ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານເຈີ້ງປານສຽວໃນລາຊະວົງຊິ່ງມີບົດກະວີປະກອບພາບບົດໜຶ່ງທີ່ຍົກຍ້ອງໄມ້ໄຜ່, ມີເນື້ອໃນວ່າ “ຍຶດເກາະພູຂຽວໄວ້ບໍ່ປ່ອຍວາງ. ຝັງຮາກ ເລິກໃນຫຼືບຫີນ. ເຖິງວ່າໄດ້ປະສົບກັບສະພາບທີ່ໂຫດຮ້າຍປານໃດກໍຍັງຍືນຍົງຄົງຕົວໄດ້, ຈະບໍ່ສະທົບສະທ້ານຕໍ່ກະແສລົມຮ້ອນເຮັ່ງ ແລະ ໜາວພິລຶກ.” ເຊິ່ງບົດກະວີນີ້ໄດ້ຍ້ອງຍໍສັນລະເສີນພະລັງຊີວິດທີ່ເຂັ້ມແຂງຂອງໄມ້ໃຜ່ເພື່ອສະແດງເຖິງອຸດົມການທີ່ເດັດດ່ຽວໜຽວແໜ້ນ.
ທ່ານສີຈິ້ນຜິງມັກບົດກະວີນີ້ຫຼາຍທີ່ສຸດ, ໃນໄລຍະທີ່ທ່ານລົງພື້ນຖານເພື່ອອອກແຮງງານແລະດຳລົງຊີວິດຢູ່ບ້ານຫຼຽງເຈ່ຍເຫີ, ທ່ານປະທັບໃຈຫຼາຍຕໍ່ບົດກະວີນີ້, ທັງມີຄວາມຮູ້ສຶກຕໍ່ບົດກະວີນີ້ຢ່າງເລິກເຊິ່ງ. ຕໍ່ມາໃນບົດຄວາມໜຶ່ງ, ທ່ານສີຈິ້ນຜິງໄດ້ແປງສອງປະໂຫຍກທຳອິດຂອງບົດກະວີດັ່ງກ່າວໜ້ອຍໜຶ່ງ, ຄື : “ບໍ່ປ່ອຍປະການລົງຮາກຖານ, ຝັງຮາກສ້າງພື້ນຖານທ່າມກາງປະຊາຊົນ”, ເຊິ່ງໄດ້ສະແດງເຖິງອຸດົມການ ແລະ ຄວາມເຊື່ອໝັ້ນໃນການໃກ້ຊິດຕິດແທດກັບປະຊາຊົນ,ແລະຮັບໃຊ້ປະຊາຊົນຢ່າງສຸດອົກສຸດໃຈ.
ທ່ານສີຈິ້ນຜິງເຄີຍປະກອບຄຳເຫັນສຳຄັນກ່ຽວກັບອຸດົມການ. ໃນຄຳເຫັນເຫຼົ່ານີ້ກໍເຄີຍໃຊ້ສຳນວນອະມະຕະບູຮານຫຼາຍອັນ.
ໃນພິທີລະນຶກໄຊຊະນະຂອງການເຄື່ອນທັບທາງໄກຂອງກອງທັບແດງ ຄົບຮອບ 80 ປີ ທີ່ຈັດຂຶ້ນໃນເດືອນຕຸລາປີ 2016, ທ່ານສີຈິ້ນຜິງໄດ້ເວົ້າເຖິງເລື່ອງອະດີດເລື່ອງໜຶ່ງ
ໃນພິທີລະນຶກໄຊຊະນະຂອງການເຄື່ອນທັບທາງໄກຂອງກອງທັບແດງ ຄົບຮອບ 80 ປີ ທີ່ຈັດຂຶ້ນໃນເດືອນຕຸລາປີ 2016, ທ່ານສີຈິ້ນຜິງໄດ້ເວົ້າເຖິງເລື່ອງອະດີດເລື່ອງໜຶ່ງ. ໃນການເຄື່ອນທັບທາງໄກ, ຢູ່ບ້ານຊ່າໂຈ່ເມືອງຢູເສີງແຂວງຫູນານ, ມີທະຫານເພດຍິງ3 ຄົນຂອງກອງທັບແດງໄດ້ໄປພັກຢູ່ໃນເຮືອນຂອງແມ່ເຖົ້າຄົນໜຶ່ງ. ແມ່ເຖົ້າຜູ້ນີ້ຊື່ວ່າ ສີເຈຊິ້ວ, ໃນເວລາອຳລາ, ທະຫານເພດຍິງ 3 ຄົນນີ້ໄດ້ເຫັນວ່າແມ່ເຖົ້າຜູ້ນີ້ທຸກຍາກລຳບາກຫຼາຍ, ກໍໄດ້ຕັດຜ້າຫົ່ມເຄິ່ງໜຶ່ງຂອງຕົນໃຫ້ແມ່ເຖົ້າເພື່ອສະແດງຄວາມຂອບໃຈ. ຈາກນັ້ນແມ່ເຖົ້າຈຶ່ງຖາມວ່າ: ພັກກອມມູນິດແມ່ນຫຍັງ? ທະຫານເພດຍິງຕອບວ່າ, ຊາວພັກກອມມູນິດ ກໍແມ່ນຜູ້ທີ່ມີຜ້າຫົ່ມພຽງຜືນດຽວກໍຈະຕັດແບ່ງໃຫ້ປະຊາຊົນເຄິ່ງໜຶ່ງ.
ການຮັກສາອຸດົມການຢ່າງເດັດດ່ຽວໜຽວແໜ້ນ, ຍຶດໝັ້ນເປົ້າໝາຍທາງຈິດໃຈ, ແມ່ນພື້ນຖານທີ່ຍືນຍົງຄົງຕົວຂອງຊາວພັກກອມມູນິດຈີນ. ກໍເປັນຍ້ອນມີອຸດົມການແນວນີ້, ພັກກອມມູນິດຈີນຈຶ່ງໄດ້ບຸກໜ້າຕໍ່ສູ້,ຄົນໜຶ່ງລົ້ມລົງ,ອີກຄົນໜຶ່ງຂຶ້ນແທນດ້ວຍຄວາມອົງອາດກ້າຫານແລະບໍ່ຍອມຈຳນົນໃນສະໄໝເຮັດການປະຕິວັດ; ຈຶ່ງໄດ້ສູ້ຊົນຢ່າງທໍລະຫົດອົດທົນ ແລະເຕັມ ໄປດ້ວຍຄວາມກະຕືລືລົ້ນໃນສະໄໝ ສ້າງສາພັດທະນາປະເທດຊາດ; ຈຶ່ງກ້າເຮັດກ້າລົງມືກ່ອນໝູ່ໃນຍຸກສະໄໝຂອງການປະຕິຮູບ ແລະ ເປີດປະຕູສູ່ພາຍນອກ. ກໍເປັນຍ້ອນວ່າມີອຸດົມການແນວນີ້, ພັກກອມມູນິດຈີນຈຶ່ງສາມາດປະສົບຜົນສຳເລັດ“ຈາກໄຊຊະນະນີ້ສູ່ໄຊຊະນະໃໝ່”,ແລະໄດ້ຮັບການສະໜັບສະໜູນຈາກປະຊາຊົນອັນໄພສານ.
ເປັນຫຍັງພວກເຮົາຕ້ອງມີອຸດົມການ? ຄວາມສຳຄັນຂອງອຸດົມການສະແດງອອກຢູ່ບ່ອນໃດ?
ທ່ານສີຈິ້ນຜິງມີຄຳເຫັນທີ່ໜ້າປະທັບໃຈກ່ຽວກັບເລຶ່ອງນີ້. ທ່ານກ່າວວ່າ:
ອຸດົມການກໍແມ່ນທິດທາງຄວາມມຸ່ງຫວັງຂອງຄົນ. ຄົນບູຮານກ່າວວ່າ: ເມື່ອມີອຸດົມການ,ຈະສາມາດໄປເຖິງແດນໄກທີ່ໄຮ້ຂອບເຂດ, ສຸດຈອມພູສູງ ສຸດຂອບທະເລ ກໍບໍ່ສາມາດກັ້ນຂວາງໄດ້. ຂໍພຽງແຕ່ມີອຸດົມການທີ່ສູງສົ່ງ, ເຖິງຈະເປັນສິ່ງແຂງແກ່ນປານໃດກໍຈະສາມາດທະລຸໄດ້, ເຖິງຈະມີກອງທັບທີ່ເກັ່ງກ້າປານໃດກໍປ້ອງກັນບໍ່ໄຫວ. ເຊິ່ງມີຄວາມໝາຍວ່າ, ຜູ້ທີ່ມີອຸດົມການສູງສົ່ງ, ເຖິງຈະເປັນແດນໄກປານໃດກໍຈະສາມາດໄປເຖິງ, ບໍ່ວ່າຈະເປັນສິ່ງແຂງແກ່ນປານໃດກໍສາມາດທະລຸໄດ້. ໃນ ປະຫວັດສາດສະໄໝຕ່າງໆ ເຊັ່ນ ການປະຕິວັດ, ການສ້າງສາປະເທດຊາດ ແລະ ການປະຕິຮູບ, ມີສະມາຊິກພັກກອມມູນິດນັບບໍ່ຖ້ວນໄດ້ເສຍສະຫຼະຊີວິດຢ່າງກ້າຫານເພື່ອພາລະກິດຂອງພັກແລະປະຊາຊົນ, ເຊິ່ງສິ່ງທີ່ກະຕຸ້ນຈິດໃຈຂອງເຂົາເຈົ້າກໍແມ່ນ “ອຸດົມການປະຕິວັດຢູ່ເໜືອທຸກສິ່ງຢ່າງ”.
ສຳນວນດັ່ງກ່າວແມ່ນຄຳເຫັນຂອງທ່ານສີຈິ້ນຜິງທີ່ກ່າວໃນກອງປະຊຸມວຽກງານການຈັດຕັ້ງທົ່ວປະເທດເມື່ອວັນທີ 28 ມິຖຸນາປີ 2013. ຜູ້ເຂົ້າຮ່ວມກອງປະຊຸມຄັ້ງນີ້ລ້ວນແຕ່ແມ່ນພະນັກງານການຈັດຕັ້ງ, ແມ່ນຜູ້ສຳຄັນໃນຕຳແໜ່ງວຽກງານສະເພາະຄັດເລືອກ ແລະ ສັບຊ້ອນພະນັກງານ. ໃນການປະກອບຄຳເຫັນ, ທ່ານສີຈິ້ນຜິງໄດ້ເນັ້ນເຖິງຄວາມສຳຄັນຂອງອຸດົມການເປັນພິເສດ, ທັງໄດ້ໃຊ້ປະໂຫຍກໜຶ່ງໃນຕຳລາອະມະຕະ, ຄື: “ເມື່ອມີອຸດົມການ,ຈະສາມາດໄປເຖິງແດນໄກທີ່ໄຮ້ຂອບເຂດ, ສຸດຈອມພູສູງ ສຸດຂອບທະເລ ກໍບໍ່ສາມາດກັ້ນຂວາງໄດ້. ຂໍພຽງແຕ່ມີອຸດົມການທີ່ສູງສົ່ງ, ເຖິງຈະເປັນສິ່ງແຂງແກ່ນປານໃດກໍຈະສາມາດທະລຸໄດ້, ເຖິງຈະມີກອງທັບທີ່ເກັ່ງກ້າປານໃດກໍປ້ອງກັນບໍ່ໄຫວ.” , ເຊິ່ງເຄົ້າມາຈາກປື້ມ “ເກີຢຽນລຽນປີ້” ປື້ມລວບລວມຄະຕິເຕືອນໃຈທີ່ຮຽບຮຽງໂດຍທ່ານຈິ່ນຢິ່ງ ນັກປາດໃນລາຊະວົງຊິ່ງ. ເປັນຫຍັງທ່ານສີຈິ້ນຜິງໄດ້ນຳໃຊ້ຄະຕິເຕືອນໃຈປະໂຫຍກນີ້? ໃນຄວາມເປັນຈິງແລ້ວ, ທ່ານສີຈິ້ນຜິງຢາກບັນຍາຍເຖິງການຕັ້ງອຸດົມການທີ່ສູງສົ່ງ.
ຄົນຈີນມັກເວົ້າເລື້ອຍໆວ່າ ການຕັ້ງອຸດົມການທີ່ສູງສົ່ງກວ້າງໄກ, ອຸດົມການຈະສູງສົ່ງ ແລະ ກວ້າງໄກ ຮອດລະດັບໃດ?ອີງຕາມຄວາມເວົ້າໃນປື້ມ “ເກີຢຽນລຽນປີ້”, ແມ່ນເວົ້າວ່າ “ອູຢວນ ຟູເຈ້”, ນີ້ແມ່ນສຳນວນໜຶ່ງ,ສ່ວນຫຼາຍຈະຂຽນເປັນ “ອູຢວນຟູເຈ້” ເຄົ້າເດີມມາຈາກ ປື້ມ“ຊ້າງຊູ່”, ເຊິ່ງຕົ້ນສະບັບໃນປື້ມ “ຊ້າງຊູ່” ລະບຸໄວ້ວ່າ “ເວີຍເຕີຕົ້ງທ່ຽນ ອູຢວນຟູເຈ້.” ໝາຍຄວາມວ່າ ມີແຕ່ຄຸນສົມບັດເທົ່ານັ້ນຈຶ່ງຈະສາມາດສ້າງຄວາມປະທັບໃຈໃຫ້ຟ້າ ແລະດິນໄດ້, ບໍ່ມີບ່ອນໃດ ທີ່ຄຸນສົມບັດທີ່ສູງສົ່ງຈະບໍ່ສາມາດສ້າງຄວາມປະທັບໃຈໃຫ້ໄດ້. ແຕ່ໃນຄວາມເປັນຈິງແລ້ວ, ບໍ່ແມ່ນແຕ່ຄຸນສົມບັດສູງສົ່ງເທົ່ານັ້ນ, ອຸດົມການທີ່ສູງສົ່ງກໍມີກຳລັງແບບນີ້ເຊັ່ນກັນ. ອຸດົມການຈະສາມາດໄປຮອດບ່ອນທີ່ສູງສົ່ງກວ້າງໄກຊໍ່າໃດ? ໃນປື້ມ “ເກີຢຽນລຽນປີ້” ໄດ້ໃຊ້ຄຳປຽບທຽບວ່າ ສຸດຈອມພູສູງ ແລະ ສຸດຂອບທະເລທີ່ກວ້າງໄກ. ກໍໝາຍຄວາມວ່າ, ຄົນໆໜຶ່ງສາມາດມີອຸດົມການທີ່ສູງກວ່າພູ ແລະ ກວ້າງກວ່າທະເລ.
ສຳລັບປະໂຫຍກທີ່ວ່າ “ຂໍພຽງແຕ່ມີອຸດົມການທີ່ສູງສົ່ງ, ເຖິງຈະເປັນສິ່ງແຂງແກ່ນປານໃດກໍຈະສາມາດທະລຸໄດ້,” ນີ້ໄດ້ເວົ້າເຖິງຄວາມເຂັ້ມແຂງຂອງອຸດົມການ. ໃນພາສາຈີນເວົ້າວ່າ “ຈື້ຈື່ໂຊຊ້ຽງ ອູຈ່ຽນປູຢູ້”. ໃນນີ້, “ອູຈ່ຽນປູຢູ້” ກໍແມ່ນສຳນວນໜຶ່ງ, ແຕ່ຄົນຈີນສ່ວນຫຼາຍຈະເວົ້າເປັນຄຳວ່າ “ອູຈ່ຽນປູ້ຊຸ່ຍ”, ໝາຍຄວາມວ່າ ມີກຳລັງເຂັ້ມແຂງທີ່ສຸດ, ເຖິງຈະແມ່ນສິ່ງແຂງແກ່ນປານໃດກໍສາມາດທຳລາຍໄດ້. ໃນປື້ມ “ເກີຢຽນລຽນປີ້” ໄດ້ໃຊ້ຄຳປຽບທຽບມາພັນລະນາຄວາມເຂັ້ມແຂງຂອງອຸດົມການ ຄື ທະຫານທີ່ເກັ່ງກ້າ ແລະ ເສື້ອຫຸ້ມເກາະທີ່ແຂງແກ່ນ, ເພື່ອປຽບທຽບກອງທັບທີ່ເກັ່ງກ້າມີອາວຸດຍຸໂທປະກອນທີ່ດີ ເຊິ່ງໝາຍຄວາມວ່າ, ບໍ່ມີກຳລັງແຂງແກ່ນໃດໆ ສາມາດປ້ອງກັນກຳລັງແຮງຂອງອຸດົມການໄດ້.
ເປັນຫຍັງອຸດົມການມີກຳລັງຍິ່ງໃຫຍ່ປານນີ້? ນີ້ກໍເປັນເຫດຜົນແບບງ່າຍໆ, ເພາະວ່າເວົ້າແບບກວມລວມແລ້ວແມ່ນອຸດົມການ, ແຕ່ເວົ້າແບບເຈາະຈົງແລ້ວແມ່ນ “ເປົ້າໝາຍ”. ຄົນໆໜຶ່ງມີອຸດົມການ ແລະເປົ້າໝາຍທີ່ເດັດດ່ຽວແລ້ວ, ຈຶ່ງຈະມີຄວາມຕັດສິນໃຈ ແລະ ຄວາມກ້າຫານ, ຈຶ່ງສາມາດສຳເລັດໜ້າທີ່ທີ່ຄົນທຳມະດາຮູ້ສຶກງຶດງໍ້ອັດສະຈັນ.
ຄຳເຫັນ
0