ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນຫຼາຍມື້ມໍ່ໆມານີ້, ຜູ້ຖືກບົ່ງມະຕິເປັນພະຍາດໂຄວິດ-19 ຢູ່ນະຄອນຫຼວງປັກກິ່ງໄດ້ເພີ່ມຂຶ້ນຢ່າງວ່ອງໄວ. ນັບແຕ່ເກີດມີການແຜ່ລະບາດຂອງພະຍາດຢູ່ຕະຫຼາດຂາຍຍົກຊິນຟາຕີ້ໃນວັນທີ 11 ມິຖຸນານີ້ເປັນຕົ້ນມາ, ນັບລວມແລ້ວ, ມີຜູ້ຖືກບົ່ງມະຕິເປັນພະຍາດດັ່ງກ່າວຢູ່ນະຄອນຫຼວງປັກກິ່ງໄດ້ເພີ່ມຂຶ້ນ 106 ກໍລະນີ. ເປັນຫຍັງນະຄອນຫຼວງປັກກິ່ງຈຶ່ງເກີດມີການແຜ່ລະບາດຂອງພະຍາດຢ່າງຂ້ຽວຂາດແບບນີ້? ປາໄຊມອນຍັງກິນໄດ້ຢູ່ບໍ່? ປັກກິ່ງໄດ້ຮັບມືກັບການແຜ່ລະບາດຂອງພະຍາດຄັ້ງນີ້ແນວໃດ? ສະພາບການແຜ່ລະບາດຂອງພະຍາດໃນອະນາຄົດຈະເປັນແນວໃດ? ທ່ານອູຈຸ່ນໂຢ ຫົວໜ້າຜູ້ຊ່ຽວຊານດ້ານລະບາດວິທະຍາຂອງສູນປ້ອງກັນແລະຄວບຄຸມພະຍາດແຫ່ງລັດຈີນຈະໃຫ້ຄຳຕອບແກ່ທ່ານດັ່ງຕໍ່ໄປນີ້.
1) ເຊື້ອພະຍາດທີ່ກໍ່ໃຫ້ເກີດມີການແຜ່ລະບາດຢູ່ປັກກິ່ງໃນຄັ້ງນີ້ມາຈາກໃສ?
ທ່ານອູຈຸ່ນໂຢ: ອາດຈະແມ່ນເຊື້ອພະຍາດມາຈາກເຂດອື່ນ ຫຼື ອາດຈະແມ່ນເຊື້ອພະຍາດປົນມາກັບວັດຖຸເຄື່ອງຂອງໃດໜຶ່ງ. ປັດຈຸບັນ, ພວກເຮົາເຫັນໄດ້ວ່າ, ສະພາບແວດລ້ອມທີ່ຊຸ່ມເຢັນຈະເໝາະກັບການຄົງຕົວຢູ່ຂອງເຊື້ອພະຍາດໂຄວິດ-19. ອີກຢ່າງໜຶ່ງອາດຈະແມ່ນຜູ້ເປັນພະຍາດໂຄວິດ-19 ເດີນທາງເຂົ້າສູ່ນະຄອນຫຼວງປັກກິ່ງຈາກຕ່າງຖິ່ນ. ຜູ້ປ່ວຍເຫຼົ່ານີ້ອາດຈະແມ່ນຜູ້ຕິດເຊື້ອພະຍາດທີ່ບໍ່ສະແດງອາການ ຫຼື ມີອາການເບົາ, ແຕ່ວ່າຕົນເອງພັດບໍ່ຮູ້ວ່າຕົນເອງໄດ້ຕິດເຊື້ອພະຍາດແລ້ວ.
ນັກຄົ້ນຄວ້າຈີນໄດ້ເອົາເຊື້ອພະຍາດໂຄວິດ-19 ທີ່ພົບເຫັນຢູ່ຈີນໄປປຽບທຽບກັບເຊື້ອພະຍາດທີ່ພົບເຫັນຢູ່ແຫ່ງຕ່າງໆໃນທົ່ວໂລກແລ້ວເຫັນວ່າ: ເຊື້ອພະຍາດທີ່ແຜ່ລະບາດຢູ່ນະຄອນຫຼວງປັກກິ່ງໃນຄັ້ງນີ້ ອາດຈະແມ່ນມາຈາກເອີຣົບ. ແຕ່ເຊື້ອພະຍາດຕົ້ນຕໍທີ່ແຜ່ລະບາດຢູ່ເອີຣົບຫາກບໍ່ໝາຍຄວາມວ່າ ມັນຈະມາຈາກປະເທດໃດໜຶ່ງໃນທະວີບເອີຣົບ, ກໍຄືກັນກັບເຊື້ອພະຍາດທີ່ແຜ່ລະບາດຢູ່ອາເມຣິກາກ່ອນໜ້ານີ້ກໍແມ່ນມາຈາກເອີຣົບ, ແຕ່ພັດບໍ່ຮູ້ວ່າມັນມາຈາກປະເທດໃດກັນແທ້ໃນເອີຣົບ.
2) ປາໄຊມອນຍັງກິນໄດ້ຢູ່ບໍ່?
ທ່ານອູຈຸ່ນໂຢ: ບໍ່ໄດ້ຢືນຢັນວ່າເຄື່ອງທະເລ, ຜະລິດຕະພັນຊີ້ນ ເປັນແຫຼ່ງກຳເນີດຂອງການແຜ່ລະບາດຂອງພະຍາດຢູ່ນະຄອນຫຼວງປັກກິ່ງໃນຄັ້ງນີ້. ຖ້າແຫຼ່ງຜະລິດຜະລິດຕະພັນເຫຼົ່ານີ້ບໍ່ໄດ້ເກີດມີການແຜ່ລະບາດຂອງພະຍາດ, ຜະລິດຕະພັນເຫຼົ່ານີ້ລ້ວນແຕ່ເປັນຜະລິດຕະພັນທີ່ປອດໄພ. ແຕ່ກໍຢາກເຕືອນໃຫ້ຄົນທັງຫຼາຍຮູ້ນັ້ນກໍຄື: ຖ້າຜະລິດຕະພັນເຫຼົ່ານີ້ມາຈາກປະເທດ ຫຼື ເຂດແຄວ້ນທີ່ເກີດມີການແຜ່ລະບາດຂອງພະຍາດທີ່ໜັກໜ່ວງ, ຜະລິດຕະພັນເຫຼົ່ານີ້ຖືກປົນເປື້ອນເຊື້ອພະຍາດໃນຂອດການຜະລິດ, ນອກນີ້, ເຄື່ອງທະເລແຊ່ເຢັນ ຫຼື ແຊ່ແຂງແລ້ວຈິ່ງຖືກຂົນສົ່ງ, ດັ່ງນັ້ນ, ການປົນເປື້ອນເຊື້ອພະຍາດແບບນີ້ແມ່ນເປັນໄປໄດ້ຢູ່. ສະນັ້ນ, ຕ້ອງເພີ່ມທະວີການກັກກັນພະຍາດລະບາດ. ນອກນີ້, ໃນເວລາປຸງແຕ່ງອາຫານເຫຼົ່ານີ້ຕ້ອງເອົາໃຈໃສ່ບັນຫາດ້ານຄວາມສະອາດ ໂດຍສະເພາະແມ່ນຖ້ວຍ, ຈານ ທີ່ໃສ່ອາຫານດິບແລ້ວ ບໍ່ຄວນນຳມາໃສ່ອາຫານສຸກອີກ, ຖ້າເປັນໄປໄດ້, ຢ່າກິນອາຫານດິບ.
3) ສະພາບການແຜ່ລະບາດຂອງພະຍາດຢູ່ນະຄອນຫຼວງປັກກິ່ງໃນຄັ້ງນີ້ຂ້ຽວຂາດບໍ່? ຈະປ້ອງກັນແລະຄວບຄຸມໃຫ້ບັງເກີດຜົນໄດ້ແນວໃດ?
ທ່ານອູຈຸ່ນໂຢ: ພາຍໃຕ້ສະພາບການທີ່ຈີນໄດ້ຕັດຊ່ອງທາງການແຜ່ລະບາດຂອງພະຍາດໂດຍພື້ນຖານແລ້ວ, ນະຄອນຫຼວງປັກກິ່ງໄດ້ພົບເຫັນຜູ້ຖືກບົ່ງມະຕິເປັນພະຍາດຫຼາຍປານນີ້ຢ່າງກະທັນຫັນ, ຈາກນີ້ຈຶ່ງເຫັນໄດ້ວ່າ: ສະພາບການແຜ່ລະບາດຂອງພະຍາດຂ້ຽວຂາດຫຼາຍ. ອີກດ້ານໜຶ່ງ, ຄວນເຫັນໄດ້ວ່າ, ຜູ້ຖືກບົ່ງມະຕິເປັນພະຍາດເຫຼົ່ານີ້ມີ 60% ແມ່ນຜູ້ທີ່ຜ່ານການກວດຫາເຊື້ອພະຍາດດ້ວຍຄວາມຕື່ນຕົວແລ້ວພົບເຫັນ, ຜູ້ເປັນພະຍາດເຫຼົ່ານີ້ຍັງຢູ່ໃນໄລຍະຫາກໍ່ເປັນພະຍາດ. ນອກນີ້, ນະຄອນຫຼວງປັກກິ່ງໄດ້ກວດນິວຄະເລອິກຫາເຊື້ອໃຫ້ກັບ 7 ໝື່ນກວ່າຄົນແລ້ວ, ມີແຕ່ 50 ກວ່າຄົນເປັນຜົນບວກ. ຈາກນີ້ຈຶ່ງເຫັນໄດ້ວ່າ: ການພົບເຫັນ ແລະ ວິທີການຮັບມືກັບການແຜ່ລະບາດຂອງພະຍາດແມ່ນທັນສະພາບການທີ່ສຸດ. ປັດຈຸບັນ, ນະຄອນຫຼວງປັກກິ່ງໄດ້ຍົກລະດັບການປ້ອງກັນແລະຄວບຄຸມຄວາມສ່ຽງຕໍ່ບາງເຂດທີ່ມີຄວາມສ່ຽງສູງ, ປິດຕະຫຼາດທີ່ເກີດການແຜ່ລະບາດຂອງພະຍາດ, ປິດເຂດຊຸມຊົນບາງແຫ່ງທີ່ມີຜູ້ຖືກບົ່ງມະຕິເປັນພະຍາດ, ດຳເນີນການກວດນິວຄະເລອິກຂະໜາດໃຫຍ່, ພະຍາຍາມຊອກໃຫ້ເຫັນຜູ້ມີເຊື້ອພະຍາດໂດຍໄວ, ກັກບໍລິເວນໂດຍໄວ ແລະ ປິ່ນປົວໂດຍໄວ.
4) ຈະວິນິດໄສການແຜ່ລະບາດຂອງພະຍາດໃນໄລຍະຕໍ່ໄປຄືແນວໃດ? ເວລາໃດຈິ່ງແມ່ນເວລາສຳຄັນທີ່ສຸດໃນການແຜ່ລະບາດຂອງພະຍາດໃນຄັ້ງນີ້?
ທ່ານອູຈຸ່ນໂຢ: ກໍລະນີເປັນພະຍາດທີ່ນະຄອນຫຼວງປັກກິ່ງຕາມການລາຍງານໃນ 3 ມື້ຂ້າງໜ້າຈະເປັນໄລຍະທີ່ສຳຄັນທີ່ສຸດ. ເນື່ອງຈາກວ່າພາຍຫຼັງເກີດການແຜ່ລະບາດຂອງພະຍາດໃນວັນທີ 11 ມິຖຸນານີ້ແລ້ວ, ນະຄອນຫຼວງປັກກິ່ງໄດ້ໃຊ້ມາດຕະການໃນທັນທີ. ຖ້າໃຜຜູ້ໃດຕິດເຊື້ອພະຍາດແລ້ວ, ຈະມີອາການສະແດງອອກມາໃນມື້ອື່ນ ແລະ ມື້ຮື; ຖ້າຈຳນວນຜູ້ຖືກບົ່ງມະຕິເປັນພະຍາດໃນມື້ອື່ນ ແລະ ມື້ຮືບໍ່ໄດ້ເພີ່ມຂຶ້ນຢ່າງຫຼວງຫຼາຍ, ອາດເວົ້າໄດ້ວ່າ, ການແຜ່ລະບາດຂອງພະຍາດໃນຄັ້ງນີ້ກໍຈະຖືກຄວບຄຸມໄວ້ໄດ້ເທົ່າກັບຂະໜາດໃນປັດຈຸບັນນີ້ແລ້ວ.
ຄຳເຫັນ
0