ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານສີຈິ້ນຜິງເຄີຍກ່າວວ່າ, ທ້ອງຟ້າກວ້າງໃຫຍ່ພຽງພໍ, ໜ່ວຍໂລກໃຫຍ່ພຽງພໍ, ໂລກກໍກວ້າງພຽງພໍ, ສາມາດຮອງຮັບບັນດາປະເທດພັດທະນາ ແລະ ສ້າງຄວາມຈະເລີນຮຸ່ງເຮືອງຮ່ວມກັນ. ທ່ານສີຈິ້ນຜິງລິເລີ່ມທັດສະນະບໍລິຫານໂລກທີ່ປຶກສາຫາລືຮ່ວມກັນ ສ້າງສາຮ່ວມກັນ ແລະ ຊົມໃຊ້ຮ່ວມກັນ, ເຊິ່ງໄດ້ສອດຄ່ອງຈັງຫວະການພັດທະນາຂອງຍຸກສະໄໝ ແລະ ຄວາມຮຽກຮ້ອງຕ້ອງການຂອງຍຸກສະໄໝ, ທັງເປັນການຊີ້ແຈງທິດທາງສະຫວ່າງສະໄຫວໃຫ້ແກ່ການຮ່ວມມືແບບຕ່າງຝ່າຍຕ່າງມີຜົນປະໂຫຍດ ເພື່ອແກ້ໄຂສິ່ງທ້າທາຍໃນຍຸກໂລກາພິວັດ.
“ວ້ານອູປີ້ງອີ້ ເອີ ປູ້ຊ່ຽງໄຮ້, ຕ້າວປິ້ງຊີງ ເອີ ປູ້ຊ່ຽງເປີ້ຍ”(“ຊີວະນານາພັນໃນໂລກເຕີບໃຫຍ່ຮ່ວມກັນແຕ່ບໍ່ກະທົບກັນ, ກົດເກນຕ່າງໆຄົງຕົວຮ່ວມກັນແຕ່ບໍ່ຂັດແຍ່ງກັນ”). ພວກເຮົາຕ້ອງມີທັດສະນະໃນລະດັບສູງຕໍ່ປະຫວັດສາດໂລກ, ພິຈາລະນາທ່າອ່ຽງການພັດທະນາ ແລະ ບັນຫາທີ່ສຳຄັນຂອງໂລກປະຈຸບັນ. ຍຶດໝັ້ນເສັ້ນທາງພັດທະນາໂດຍສັນຕິ, ຍຶດໝັ້ນນະໂຍບາຍການຕ່າງປະເທດ ສັນຕິພາບ ເອກະລາດ ແລະ ເປັນເຈົ້າຕົນເອງ, ຍຶດໝັ້ນຍຸດທະສາດເປີດປະຕູສູ່ພາຍນອກທີ່ຕ່າງຝ່າຍຕ່າງມີຜົນປະໂຫຍດ, ເປີດກວ້າງການຮ່ວມມືກັບບັນດາປະເທດໃນໂລກຢ່າງບໍ່ຢຸດຢັ້ງ, ຕັ້ງໜ້າເຂົ້າຮ່ວມການບໍລິຫານໂລກ. ບັນລຸເປົ້າໝາຍການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະ ພັດທະນາຮ່ວມກັນໃນຫຼາຍຂົງເຂດກວ່າເກົ່າ ແລະລະດັບສູງກວ່າເກົ່າ. ບໍ່ຂຶ້ນກັບຜູ້ອື່ນ, ຍິ່ງບໍ່ສົມຄວນປຸ້ນສະດົມຜູ້ອື່ນ, ຮ່ວມກັບປະຊາຊົນບັນດາປະເທດພະຍາຍາມຮ່ວມກັນສ້າງປະຊາຄົມຮ່ວມຊາຕາກຳຂອງມວນມະນຸດ, ສ້າງໂລກໃຫ້ດີງາມກວ່າເກົ່າ.
ພິທີລະນຶກວັນເກີດຂອງທ່ານກາກມາກຄົບຮອບ 200 ປີໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 4 ພຶດສະພາປີ2018, ທ່ານສີຈິ້ນຜິງປະກອບຄຳເຫັນໃນພິທືດັ່ງກ່າວ.
ຄວາມເຫັນຕອນນີ້ແມ່ນຄວາມເຫັນຂອງທ່ານສີຈິ້ນຜິງທີ່ກ່າວໃນພິທີລະນຶກວັນເກີດຂອງທ່ານກາກມາກຄົບຮອບ 200 ປີເມື່ອວັນທີ 4 ພຶດສະພາປີ2018. ໃນການປະກອບຄຳເຫັນ, ທ່ານສີຈິ້ນຜິງໄດ້ກ່າວເນັ້ນອີກເທື່ອໜຶ່ງເຖິງທັດສະນະທີ່ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ. ໃນຄຳເຫັນດັ່ງກ່າວ, ທ່ານສີຈິ້ນຜິງໄດ້ໃຊ້ສອງປະໂຫຍກອະມະຕະ ຄື: “ວ້ານອູປີ້ງອີ້ ເອີ ປູ້ຊ່ຽງໄຮ້, ຕ້າວປິ້ງຊີງ ເອີ ປູ້ຊ່ຽງເປີ້ຍ”, ເຊິ່ງມາຈາກຕຳລາອະມະຕະໃນປັດຊະຍາຂົງຈື້ “ລີຈີ້ ຈົ່ງຢົ່ງ”. ມີຄວາມໝາຍວ່າ, ຊີວະນານາພັນໃນໂລກເຕີບໃຫຍ່ຮ່ວມກັນ, ແລະເຕີບໃຫຍ່ຂຶ້ນດ້ວຍຮູບແບບຂອງຕົນ, ເຖິງວ່າຢູ່ໃນສິ່ງແວດລ້ອມດຽວກັນ, ແຕ່ກໍບໍ່ໄດ້ກີດຂວາງການເຕີບໃຫຍ່ຂອງກັນແລະກັນ.
ໃນປື້ມ “ລຸນອີ” ຍັງລະບຸວ່າ “ລີຈື່ຢົ້ງ ເຫີເວີຍກຸ້ຍ”, ເຊິ່ງມີຄວາມໝາຍວ່າ, ຖ້າວ່າຄົນທັງຫຼາຍຮ່ວມກັນປະຕິບັດຕາມຫຼັກການໃດໜຶ່ງ, ແລະຮ່ວມກັນປະຕິບັດຕາມທັດສະນະໃດໜຶ່ງ, ແລະຮ່ວມກັນຮັກສາລະບຽບການໃດໜຶ່ງ, ກໍສາມາດສ້າງສະພາບການທີ່ຕ່າງຝ່າຍຕ່າງມີຜົນປະໂຫຍດ ຢູ່ຮ່ວມກັນຢ່າງປອງດອງ ແລະ ພັດທະນາຮ່ວມກັນຢ່າງກົມກຽວ. ນີ້ກໍແມ່ນຜົນສະຫຼຸບຂອງບັນພະບຸລຸດຈີນຫຼັງຈາກໄດ້ສະຫຼຸບບົດຮຽນການ ປົກຄອງແລະການບໍລິຫານປະເທດ, ກົດເກນດ້ານການພັດທະນາຂອງສັງຄົມມະນຸດ.
ທ່ານສີຈິ້ນຜິງສະເໜີວ່າ, ພວກເຮົາຄວນສ້າງປະຊາຄົມຮ່ວມຊາຕາກຳຂອງມວນມະນຸດ, ຄວນສ້າງສັງຄົມທີ່ກົມກຽວກັນ, ແລະສ້າງໂລກທີ່ກົມກຽວກັນ. ທີ່ຈິງແລ້ວໄດ້ຖືເອົາຫຼັກການ “ຄວາມກົມກຽວເປັນສິ່ງສຳຄັນ” “ຊີວະນານາພັນໃນໂລກເຕີບໃຫຍ່ຮ່ວມກັນ, ແລະເຕີບໃຫຍ່ດ້ວຍຮູບແບບຂອງຕົນ, ເຖິງວ່າຢູ່ໃນສິ່ງແວດລ້ອມດຽວກັນ, ແຕ່ກໍບໍ່ໄດ້ກີດຂວາງການເຕີບໃຫຍ່ຂອງກັນລະກັນ” ນຳໃຊ້ເຂົ້າໃນການພົວພັນສາກົນໃນຍຸກປະຈຸບັນ ແລະ ການຂະຫຍາຍການພົວພັນລະຫວ່າງປະເທດກັບປະເທດໃນຍຸກປະຈຸບັນ, ນີ້ກໍແມ່ນຜົນການຫັນປ່ຽນ ແລະ ການຂະຫຍາຍຕົວດ້ວຍການປະດິດສ້າງໃໝ່ຈາກວັດທະນະທຳມູນເຊື້ອທີ່ດີງາມຂອງປະຊາຊາດຈີນ.
ກ່ຽວກັບທັດສະນະ “ກົມກຽວ” ໃນວັດທະນະທຳຈີນ, ທ່ານອາດຈະຮູ້ວ່າ, ປີ 2008 ໃນພິທີເປີດງານກິລາໂອລິມປິກປັກກິ່ງ, ໄດ້ມີການສະແດງຕົວໜັງສືຈີນ “ເຫີ” (ແປວ່າ ກົມກຽວ)ທີ່ເປັນຮູບແບບຕ່າງໆ, ທີ່ຈິງແລ້ວກໍແມ່ນເພື່ອເຜີຍແຜ່ທັດສະນະກ່ຽວກັບວັດທະນະທຳທີ່ມີເອກະລັກຂອງຈີນຕໍ່ທົ່ວໂລກ. ພວກເຮົາເວົ້າວ່າ “ຄວາມກົມກຽວເປັນສິ່ງລໍ້າຄ່າ” “ກົມກຽວແລະ ຍອມຮັບຄວາມແຕກຕ່າງກັນ”, ແຕ່ສະພາບການໃນໂລກປະຈຸບັນພວມຜັນແປໄປຢ່າງສັບສົນໃນຮອບຮ້ອຍປີຜ່ານມາ, ສະຖານະການສາກົນມີຄວາມສັບສົນ, ສະນັ້ນຄວາມແຕກຕ່າງກັນກໍໝາຍເຖິງມີຜົນປະໂຫຍດທີ່ບໍ່ຄືກັນ, ຈຶ່ງບໍ່ສາມາດຫຼີກລ່ຽງຄວາມຂັດແຍ່ງກັນໄດ້. ສະນັ້ນຊູ່ມື້ນີ້ເມື່ອພວກເຮົາເວົ້າເຖິງ “ຄວາມກົມກຽວ” ກໍຊ່ຳກັບວ່າຕ້ອງຍອມເສຍປຽບໃນທຸກສິ່ງຢ່າງບໍ່?
ໃນສະໄໝບູຮານຂອງຈີນມີນິຍາຍເລື່ອງໜຶ່ງຊື່ວ່າ “ຮ່ອມ6ສອກ”. ໃນສະໄໝເຈົ້າຊີວິດຄ່າງຊີໃນລາຊະວົງຊິ່ງ, ຈ່າງຢີ່ງເປັນເຈົ້າໜ້າທີ່ໃນລາຊະສຳນັກ, ລະຫວ່າງເຮືອນຂອງລາວຢູ່ບ້ານເກີດ ແລະເຮືອນຂອງເພື່ອນບ້ານໃກ້ຄຽງມີຮ່ອມທາງເສັ້ນໜຶ່ງເພື່ອໃຫ້ສອງຄອບຄົວນຳໃຊ້ຮ່ວມກັນ. ຕໍ່ມາເພື່ອນບ້ານໃກ້ຄຽງປຸກເຮືອນໃໝ່ແລະຢາກຍຶດໃຊ້ຮ່ອມທາງສາຍນີ້ແຕ່ພຽງຝ່າຍດຽວ, ແຕ່ຄອບຄົວຂອງຈ່າງຢິ່ງບໍ່ເຫັນດີ. ສອງຝ່າຍຈຶ່ງຜິດຖຽງກັນຈົນບໍ່ສາມາດໂລ່ງລອຍກັນໄດ້ ເລີຍຮ້ອງຟ້ອງຕໍ່ອົງການປົກຄອງເມືອງ. ເຈົ້າເມືອງໄດ້ພິຈາລະນາວ່າ ສອງຄອບຄົວລ້ວນແຕ່ແມ່ນຕະກຸນຂຸນນາງໃຫຍ່, ຈຶ່ງບໍ່ກ້າຕັດສິນຢ່າງງ່າຍດາຍ. ໃນເວລານັ້ນ, ຄອບຄົວຂອງຈ່າງຢິ່ງຈຶ່ງໄດ້ສົ່ງຈົດໝາຍບອກຈ່າງຢິ່ງຢ່າງຮີບດ່ວນ, ໂດຍຮຽກຮ້ອງໃຫ້ລາວມາແກ້ໄຂບັນຫານີ້. ເມື່ອຈ່າງຢິ່ງອ່ານຈົດໝາຍແລ້ວຕອບຄືນວ່າ: ສົ່ງຈົດໝາຍໄກພັນລີ້ພຽງເພື່ອເລື່ອງການສ້າງກຳແພງເທົ່ານັ້ນ, ປ່ອຍຮ່ອມທາງໃຫ້ເຂົາ3ສອກຊິເປັນຫຍັງ? ກຳແພງເມືອງຈີນຍັງຄົງຕົວຢູ່ຈົນເຖິງປະຈຸບັນ, ແຕ່ບໍ່ມີຈິນຊີຮ້ອງເຕ້ໃນສະໄໝກ່ອນແລ້ວ. ເມື່ອຄອບຄົວຂອງຈ່າງຢິ່ງອ່ານແລ້ວກໍເຂົ້າໃຈເນື້ອໃນຄວາມໝາຍຂອງລາວ, ຈຶ່ງໄດ້ເປັນເຈົ້າການໃຫ້ດິນຮ່ອມທາງກວ້າງ 3 ສອກ. ເມື່ອເພື່ອນບ້ານໃກ້ຄຽງເຫັນແບບນັ້ນຈຶ່ງຮູ້ສຶກຕື້ນຕັນໃຈ ຈຶ່ງໄດ້ໃຫ້ດິນຮ່ອມທາງ 3 ສອກຢ່າງເປັນເຈົ້າການເຊັ່ນກັນ, ໃນທີ່ສຸດສອງຝ່າຍຈຶ່ງໄດ້ຈົ່ງຮ່ອມທາງກວ້າງ6 ສອກ, ຈາກນັ້ນຮ່ອມນີ້ຈຶ່ງໄດ້ຊື່ວ່າ ຮ່ອມ 6 ສອກ, ແລະໄດ້ເລົ່າຂານກັນມາວ່າເປັນເລື່ອງທີ່ດີ.
ຈາກນິຍາຍເລື່ອງນີ້ພວກເຮົາເຫັນໄດ້ວ່າ, ລະຫວ່າງຄົນກັບຄົນຕ້ອງມີຄວາມປອງດອງກົມກຽວກັນ, ລະຫວ່າງຄອບຄົວກັບຄອບຄົວກໍຄວນມີຄວາມປອງດອງກົມກຽວກັນ, ລະຫວ່າງປະເທດກັບປະເທດກໍຄວນມີຄວາມກົມກຽວກັນເຊັ່ນກັນ. ແຕ່ຄວາມປອງດອງກົມກຽວບໍ່ແມ່ນຍອມຮັບທຸກສິ່ງຢ່າງໂດຍບໍ່ມີຫຼັກການ, ຫາກແຕ່ແມ່ນການບັນລຸຄວາມເຂົ້າໃຈກັນໂດຍຜ່ານການປຶກສາຫາລືກັນບົນພື້ນຖານທີ່ຍອມຮັບຄວາມແຕກຕ່າງກັນ.
ໃນນິຍາຍເລື່ອງ “ຮ່ອມ 6 ສອກ”ດັ່ງກ່າວ, ຖ້າວ່າຝ່າຍໃດຝ່າຍໜຶ່ງຫາກຍັງຊູຊີຕ້ອງຍຶດຄອງຮ່ອມ6ສອກນີ້ທັງໝົດ, ກໍຍ່ອມຈະພາໃຫ້ເກີດຄວາມຂັດແຍ່ງກັນ. ແຕ່ສອງຝ່າຍໄດ້ແກ້ໄຂບັນຫາໂດຍຜ່ານການປຶກສາຫາລືກັນ ແລະ ສ້າງຄວາມເຂົ້າໃຈກັນ, ຜ່ອນສັ້ນຜ່ອນຍາວເພື່ອໃຫ້ມີຄວາມເຫັນໂລ່ງລອຍເປັນເອກະພາບກັນ ແລະ ມີຜົນປະໂຫຍດຮ່ວມຫຼາຍທີ່ສຸດ, ດັ່ງນັ້ນສະພາບການທີ່ “ປອງດອງກົມກຽວ”ກໍສາມາດຮັກສາໄດ້ເປັນໄລຍະຍາວນານ.
ໃນວັດທະທະນຳຂອງຈີນ, ແຕ່ໃດໆມາກໍມີແນວຄວາມຄິດທາງອຸດົມການທີ່ໃຫ້ທົ່ວໂລກປອງດອງກົມກຽວກັນ. ເພື່ອນມິດລາວທີ່ເຄີຍມາທ່ຽວນະຄອນຫຼວງປັກກິ່ງອາດຈະເຫັນວ່າ, ຢູ່ຕໍ່ໜ້າຫໍທ່ຽນອ່ານເມີນມີຄຳຂວັນຕິດຢູ່ສອງເບື້ອງມີເນື້ອໃນວ່າ: “ສປຈີນໝັ້ນຍືນ” “ຄວາມສາມັກຄີຂອງປະຊາຊົນໃນໂລກໝັ້ນຍືນ”, ເຊິ່ງຄຳຂວັນນີ້ໄດ້ຕິດໄວ້ຢູ່ສະຖານທີ່ສຳຄັນທີ່ສຸດຂອງຈີນ, ໃນຄວາມເປັນຈິງແລ້ວກໍເປັນການສືບທອດແນວຄິດທີ່ ບັນດາປະເທດໃນໂລກປອງດອງກົມກຽວກັນ, ທົ່ວໂລກເປັນຄອບຄົວດຽວກັນ, ທັງເປັນການສືບທອດແນວຄວາມຄິດທີ່ວ່າ “ຊີວະນານາພັນໃນໂລກເຕີບໃຫຍ່ຂຶ້ນຮ່ວມກັນ, ແລະເຕີບໃຫຍ່ດ້ວຍຮູບແບບຂອງຕົນ, ເຖິງວ່າຢູ່ໃນສິ່ງແວດລ້ອມດຽວກັນ, ແຕ່ກໍບໍ່ໄດ້ກີດຂວາງການເຕີບໃຫຍ່ຂອງກັນລະກັນ”ໃນວັດທະນະທຳມູນເຊື້ອຂອງຈີນ. ທ່ານສີຈິ້ນຜິງສະເໜີຂໍ້ລິເລີ່ມໃນການສ້າງປະຊາຄົມຮ່ວມຊາຕາກຳຂອງມວນມະນຸດ, ແມ່ນຂໍ້ລິເລີ່ມທີ່ມີວິໄສທັດເບິ່ງກວ້າງມອງໄກ, ທັງເປັນການພິຈາລະນາຢ່າງມີເຫດມີຜົນຕໍ່ຄວາມສາມັກຄີຂອງປະຊາຊົນທົ່ວໂລກ, ທັງແມ່ນການສະໜອງແຜນການແກ້ໄຂທີ່ເຕັມໄປດ້ວຍສະຕິປັນຍາ ແລະ ຄວາມໝັ້ນໃຈດ້ານວັດທະນະທຳຂອງຈີນເພື່ອແກ້ໄຂບັນຫາການພັດທະນາໃນອະນາຄົດຂອງມວນມະນຸດ. ຈີນກໍພວມສຸມຄວາມພະຍາຍາມຂອງຕົນ, ສະແຫວງຫາວິໄສທັດກ່ຽວກັບຄວາມສາມັກຄີຂອງປະຊາຊົນທົ່ວໂລກ, ປະກອບສ່ວນຫຼາຍກວ່າເກົ່າເຂົ້າໃນການພັດທະນາຂອງມວນມະນຸດ.
ຄຳເຫັນ
0