ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
“ຢິວເພີງຈື້ຢວນຟ່າງໄລ, ປູອີ້ເລີ່ຫູ່” ແປວ່າ ມັນບໍ່ແມ່ນເລື່ອງປິຕິຊົມຊື່ນບໍ່ທີ່ມີໝູ່ທາງໄກມາຢາມ. ສຳນວນທີ່ມີຊື່ສຽງຂອງຂົງຈື້ນີ້ໄດ້ສະແດງໃຫ້ເຫັນເຖິງຄ່ານິຍົມດ້ານການຜູກມິດຂອງປະຊາຊາດຈີນກັບ ປະເທດເພື່ອນມິດຕ່າງໆກໍ່ຄືຊົນເຜົ່າຕ່າງໆໃນໂລກ.
ທ່ານສີຈິ້ນຜິງໄດ້ປະກອບຄຳເຫັນໂດຍໃຊ້ປະໂຫຍກນີ້ໃນກອງປະຊຸມມິດຕະພາບສາກົນຈີນ ທັງເປັນພິທີສະເຫຼີມສະຫຼອງວັນສ້າງຕັ້ງສະມາຄົມມິດຕະພາບກັບຕ່າງປະເທດຂອງປະຊາຊົນຈີນຄົບຮອບ 60 ປີເມື່ອເດືອນພຶດສະພາປີ 2014, ໃນຄວາມເປັນຈິງແລ້ວກໍແມ່ນການສະແດງໃຫ້ເຫັນເຖິງຫຼັກໝັ້ນ ແລະຄ່ານິຍົມຂອງຈີນໃນການຄົບຄ້າສະມາຄົມກັບປະຊາຊົນທົ່ວໂລກ. ປະຊາຊົນນານາຊາດເດີນທາງມາຮອດຈີນ, ແລກປ່ຽນ ແລະຮ່ວມມືກັບຈີນ, ຈີນຈະເປີດປະຕູສູ່ພາຍນອກດ້ວຍການຜູກມິດກັບປະຊາຊົນບັນດາປະເທດ. ມີແຕ່ຜ່ານຂະບວນການດັ່ງກ່າວ, ຈຶ່ງຈະເຮັດໃຫ້ປະຊາຊົນທົ່ວໂລກຮັບຮູ້ຈີນຫຼາຍຂຶ້ນ ແລະ ເຮັດໃຫ້ປະຊາຊົນຈີນຮັບຮູ້ໂລກຫຼາຍຂຶ້ນ.
ຄົນບູຮານຈີນກ່າວວ່າ: “ເວລາເດີນທາງໄປມາກໍເປັນໝູ່ກັນ, ເວລາປ້ອງກັນໂຈນກໍຊ່ວຍເຫຼືອກັນ, ໃນກໍລະນີປະສົບກັບໂລກໄພໄຂ້ເຈັບກໍຈະເບິ່ງແຍງຊ່ວຍເຫຼືອກັນ,” ເຊິ່ງໝາຍຄວາມວ່າ ຕ້ອງຜູກມິດກັບຜູ້ທີ່ສາມາດເສຍສະຫລະຊີວິດໃຫ້ໄດ້, ຜູກມິດກັບຜູ້ທີ່ມີຄວາມຈິງໃຈ ແລະ ໄວ້ໃຈໄດ້. ລະຫວ່າງຄົນກັບຄົນເປັນແນວນີ້, ລະຫວ່າງປະເທດກັບປະເທດກໍເປັນແນວນີ້ເຊັ່ນກັນ, ຄວນພົວພັນກັນຢ່າງຊື່ສັດບໍລິສຸດ, ປະເທດໃຫຍ່ ແລະ ເຂັ້ມແຂງບໍ່ຄວນຂົ່ມເຫັງປະເທດນ້ອຍຫຼືປະເທດອ່ອນແອ, ການໄປມາຫາສູ່ກັນແບບນີ້ຢູ່ເໜືອຜົນປະໂຫຍດ, ກາລະເທສະ, ມີຄຸນຄ່າທີ່ຍືນຍົງ.
ໃນຕຳລາ “ລຸນອີ” ມີປະໂຫຍກໜຶ່ງລະບຸໄວ້ວ່າ: “ເຕີປູ້ກູ່ ປີ້ຢິວລິນ”,ແປວ່າຜູ້ທີ່ມີຄຸນສົມບັດຈະບໍ່ໂດດດ່ຽວ, ຕ້ອງມີຜູ້ຮ່ວມອຸດົມການດຽວກັນເຂົ້າມາໃກ້ເປັນໝູ່. ປະເທດ ແລະບຸກຄົນກໍຄ້າຍຄືກັນ, ຂໍແຕ່ວ່າມີຄຸນສົມບັດທີ່ສູງສົ່ງ, ກໍຈະມີເພື່ອນມິດ ແລະຜູ້ຮ່ວມອຸດົມການຢ່າງແນ່ນອນ. ນັກປັດຊະຍາບູຮານຈີນກໍເຄີຍກ່າວວ່າ: “ເຕີຕ້າວໂຕ່ຈູ້, ຊື່ຕ້າວກວາຈູ້”, ໝາຍຄວາມວ່າຜູ້ທີ່ມີຄວາມເປັນທຳ ແລະຄຸນສົມບັດທີ່ສູງສົ່ງນັ້ນຈະໄດ້ຮັບການສະໜັບໜູນຢ່າງຫຼວງຫຼາຍ, ຜູ້ອະທຳ ແລະ ຂາດຄຸນສົມບັດນັ້ນຈະບໍ່ມີຜູ້ສະໜັບສະໜູນ.
ພວກເຮົາຮູ້ວ່າ, ການໄປມາຫາສູ່ກັນລະຫວ່າງປະເທດຕ້ອງສະແຫວງຫາຜົນປະໂຫຍດແນ່ນອນ. ແຕ່ຢູ່ເໜືອຜົນປະໂຫຍດນັ້ນ, ຖ້າບໍ່ມີຄວາມເປັນທຳ ແລະ ຂາດຄຸນສົມບັດ, ບໍ່ມີຫຼັກແຫ່ງຄຸນຄ່າ,ເມື່ອເປັນແນວນັ້ນ, ກໍຈະເຫຼືອພຽງແຕ່ການພົວພັນທີ່ສະແຫວງຫາຜົນປະໂຫຍດຢ່າງດຽວຢ່າງເປີດແປນ, ມັນຈະເປັນການພົວພັນແບບວຸ້ນວາຍ ແລະຍາກທີ່ຈະຮັກສາໃຫ້ໝັ້ນຄົງຖາວອນໄດ້.
ປະຈຸບັນ, ຈີນພວມຊຸກຍູ້ການສ້າງສາຍພົວພັນສາກົນແບບໃໝ່, ການພົວພັນແບບໃໝ່ນີ້ກໍແມ່ນຕ້ອງເຄົາລົບກັນ, ຍຸດຕິທຳ ເປັນທຳ, ແລະຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ, ເພື່ອໃຫ້ວົງການເພື່ອນມິດທີ່ດີຕໍ່ກັນ ແລະກ້າຕຳໜິຕິຊົມກັນຢ່າງກົງໄປກົງມານັ້ນ ນັບມື້ນັບເປີດກວ້າງອອກ.
“ຢິວເພີງຈື້ຢວນຟ່າງໄລ, ປູອີ້ເລີ່ຫູ່”, ສະແດງໃຫ້ເຫັນເຖິງຄວາມປາຖະ ໜາອັນດີງາມຂອງປະຊາຊົນຈີນທີ່ຍິນດີຜູກມິດກັບທົ່ວໂລກຢ່າງກວ້າງຂວາງ.
ວົງການເພື່ອນມິດຂອງຈີນໄດ້ເປີດກວ້າງອອກແນວໃດ? ຂໍຍົກເລື່ອງລາວຂອງລາຊະວົງຖັງ.
ໃນລາຊະວົງຖັງ, ຈີນຖືວ່າເປັນປະເທດທີ່ຮັ່ງມີ ເຂັ້ມແຂງ ແລະສິວິໄລທີ່ສຸດ. ໃນສະໄໝລາຊະວົງຖັງ, ລາຊະສຳນັກໄດ້ດຳເນີນການສອບເສັງເພື່ອຄັດເລືອກເອົາເຈົ້າໜ້າທີ່, ທັງໄດ້ອະນຸຍາດໃຫ້ຄົນຕ່າງປະເທດເຂົ້າຮ່ວມການສອບເສັງຢູ່ຈີນໄດ້, ຈຶ່ງໄດ້ດຶງດູດຄົນຕ່າງປະເທດຢ່າງຫຼວງຫຼາຍໃຫ້ມາຮໍ່າຮຽນ ແລະເສັງເປັນເຈົ້າໜ້າທີ່ຢູ່ຈີນ. ຢູ່ປະເທດຊິນລາ ເຊິ່ງເປັນປະເທດໜຶ່ງໃນປະຫວັດສາດແຫຼມເກົາຫຼີ, ມີຄົນຜູ້ໜຶ່ງຊື່ວ່າ ໂຈຈີວອນ ຫາກໍອາຍຸໄດ້ 12 ປີກໍໄປຮໍ່າຮຽນຢູ່ຈີນ, ເມື່ອສອບເສັງ, ລາວເສັງ “ຈິ້ນຊື້”ໄດ້, ຄຳວ່າ“ຈິ້ນຊື້” ໝາຍເຖິງຜູ້ທີ່ເສັງຜ່ານການສອບເສັບຂັດເລືອກເຈົ້າໜ້າທີ່ຂອງລາຊະສຳນັກສູນກາງໃນສະໄໝບູຮານຈີນ. ເມື່ອເວລາອາຍຸໄດ້ 28 ປີລາວໄດ້ກັບຄືນປະເທດ, ແລະໄດ້ຮັບໜ້າທີ່ສຳຄັນໃນການເຜີຍແຜ່ວັດທະນະທຳຂອງຈີນ, ເຊິ່ງຖືໄດ້ວ່າເປັນທູດສັນຖະວະໄມຕີລະຫວ່າງລາຊະວົງຖັງ ກັບປະເທດຊິນລາ, ອັນໄດ້ປະກອບສ່ວນອັນພົ້ນເດັ່ນເຂົ້າໃນການເສີມຂະຫຍາຍສາຍພົວພັນມິດຕະພາບລະຫວ່າງສອງປະເທດ.
ເມື່ອຫວນຄືນເຖິງປະຫວັດສາດຂອງຈີນແລ້ວຍັງເຫັນໄດ້ວ່າ: ຄົນຄືໂຈຈີວອນນີ້ຍັງມີຢູ່ຫລາຍ, ນີ້ກໍສະແດງໃຫ້ເຫັນເຖິງຄວາມເອື້ອເຟື້ອເຜື່ອແຜ່ຂອງປະຊາຊົນຈີນ, ຍິ່ງສະແດງໃຫ້ເຫັນວ່າ “ການໄປມາຫາສູ່ກັນລະຫວ່າງປະເທດ ຂຶ້ນຢູ່ກັບຄວາມສະໜິດສະໜົມກັນຂອງປະຊາຊົນ”, ການໄປມາຫາສູ່ກັນລະຫວ່າງປະຊາຊົນກໍເປັນແວ່ນແຍງໃຫ້ແກ່ການໄປມາຫາສູ່ກັນລະຫວ່າງປະເທດ.
ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18ເປັນຕົ້ນມາ, ຈີນໄດ້ຈັດການເຄື່ອນໄຫວດ້ານການຕ່າງປະເທດທີ່ສຳຄັນຫຼາຍຄັ້ງລຽນຕິດ, ຄື: ກອງປະຊຸມສຸດຍອດເອເປັກຢູ່ນະຄອນຫຼວງປັກກິ່ງ, ກອງປະຊຸມສຸດຍອດກຸ່ມ G20 ຢູ່ນະຄອນຮາງໂຈ່ວ, ກອງປະຊຸມອິນເຕີເນັດໂລກ, ກອງປະຊຸມສຸດຍອດເວທີປຶກສາຫາລື ການຮ່ວມມືສາກົນ “ໜຶ່ງແລວໜຶ່ງເສັ້ນທາງ”, ກອງປະຊຸມພົບປະຂອງຜູ້ນຳປະເທດບຣິກສຢູ່ນະຄອນເຊ້ຍເມີນ, ກອງປະຊຸມເວທີປຶກສາຫາລືອາຊີໂປອາວ ແລະກອງປະຊຸມສຸດຍອດອົງການຮ່ວມມືຊຽງໄຮ້ທີ່ຈັດຂຶ້ນຢູ່ນະຄອນຊິ່ງຕາວເມື່ອເດືອນມິຖຸນາປີ 2018, ເຊິ່ງທັງໝົດເຫຼົ່ານີ້ລ້ວນແຕ່ຢັ້ງຢືນໃຫ້ເຫັນວ່າຈີນເປີດອົກເປີດໃຈຜູກມິດກັບທົ່ວໂລກ. ທ່ານສີຈິ້ນຜິງຊີ້ອອກວ່າ, “ອະລິຍະທຳມີສີສັນຢ່າງຫຼາກຫຼາຍ, ຍ້ອນອະລິຍະທຳຂອງມະນຸດມີຄວາມຫຼາກຫຼາຍຈຶ່ງມີຄຸນຄ່າທີ່ແລກປ່ຽນ ແລະຖອດຖອນບົດຮຽນເຊິ່ງກັນແລະກັນ.”
ທ່ານສີຈິ້ນຜິງໄດ້ປະກອບຄຳເຫັນໃນເວລາປາຖະກະຖາຢູ່ສຳນັກງານໃຫຍ່ສັນນິບາດອາຣັບເມື່ອວັນທີ 21 ມັງກອນປີ 2016.
ໃນໂລກປະຈຸບັນ, ຈີນໄດ້ລິເລີ່ມ ແລະພວມຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”, ສ່ອງແສງໃຫ້ເຫັນແຜນປະຕິບັດງານທີ່ຈີນຮ່ວມມືກັບປະເທດຕ່າງໆໃນໂລກ. ຄັນຊັ້ນ ຈີນຄວນມີແນວຄວາມຄິດແນວໃດໃນການແລກປ່ຽນກັບໂລກ, ທ່ານສີຈິ້ນຜິງໃຫ້ທັດສະນະວ່າ:ເມີ້ງຈືນັກປັດຊະຍາຜູ້ຍິ່ງໃຫຍ່ໃນສະໄໝບູຮານຈີນກ່າວວ່າ: “ລີ້ທ່ຽນເຊ້ຍຈື່ ເຈີ້ງເວີ້ຍ, ຊິງທ່ຽນເຊ້ຍຈື່ຕ້າຕ້າວ” (ຄວນຢືນຢູ່ສະຖານທີ່ທີ່ຖືກຕ້ອງທີ່ສຸດໃນໂລກ, ແລະເດີນຕາມເສັ້ນທາງທີ່ກວ້າງຂວາງທີ່ສຸດໃນໂລກ). ຊຸກຍູ້ໃຫ້ຄົນທັງຫຼາຍເຂົ້າຮ່ວມວົງການເພື່ອນມິດ “ໜຶ່ງແລວໜຶ່ງເສັ້ນທາງ”; ບໍ່ແມ່ນການສະແຫວງຫາການຕາບຈູນ “ຊ່ອງຫວ່າງທາງດ້ານກຳລັງ”, ແຕ່ແມ່ນການສ້າງເຄືອຂ່າຍຄູ່ຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ສຳນວນດັ່ງກ່າວແມ່ນຄວາມເຫັນຂອງທ່ານສີຈິ້ນຜິງທີ່ທ່ານກ່າວໃນເວລາປາຖະກະຖາຢູ່ສຳນັກງານໃຫຍ່ສັນນິບາດອາຣັບເມື່ອວັນທີ 21 ມັງກອນປີ 2016. ໃນການກ່າວປາຖະກະຖາຄັ້ງນັ້ນ, ທ່ານສີຈິ້ນຜິງໄດ້ຊີ້ແຈງເຖິງຫຼັກໝັ້ນຂອງຈີນທີ່ຍິນດີຮ່ວມກັບປະເທດອາຣັບເພື່ອບຸກເບີກອະນາຄົດທີ່ດີງາມ.
ຄຳເຫັນ
0