ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນວັນທີ 21 ມັງກອນ ປີ 2016, ໃນການກ່າວປາຖະກະຖາຢູ່ສຳນັກງານໃຫຍ່ສັນນິບາດອາຣັບ, ທ່ານສີຈິ້ນຜິງໄດ້ນຳໃຊ້ປະໂຫຍກໜຶ່ງຂອງເມີ້ງຈື ຄື:“ລີ້ທ່ຽນເຊ້ຍຈື່ເຈີ້ງເວີ້ຍ, ຊິງທ່ຽນເຊ້ຍຈື່ຕ້າຕ້າວ”,ແປວ່າ “ຢືນຢູ່ສະຖານທີ່ທີ່ຖືກຕ້ອງທີ່ສຸດໃນໂລກ, ເດີນຕາມເສັ້ນທາງກວ້າງຂວາງທີ່ສຸດໃນໂລກ”, ເຊິ່ງປະໂຫຍກນີ້ມາຈາກບົດ “ເມີ້ງຈື ເທີງເວີນກົ່ງ ເຊ້ຍ”.
ໃນສະໄໝຂອງເມີ້ງຈື (ປີ372ກ່ອນຄສ -ປີ289ກ່ອນຄສ), ມີຊາຍຜູ້ໜຶ່ງຊື່ ຈິງຊຸ່ນ, ເປັນຜູ້ໄດ້ເຊື່ອຖືໃນສຳນັກວິຊາການ “ການເມືອງການຕ່າງປະເທດ”, ລາວໄດ້ປຶກສາກັບເມີ້ງຈືກ່ຽວກັບບັນຫາ “ວິລະບຸລຸດຜູ້ຍິ່ງໃຫຍ່”. ຈິງຊຸ່ນເຫັນວ່າ, ໃນຕອນນັ້ນ ກົ່ງຊຸ່ນຢຽນ ແລະ ຈ່າງອີ ທີ່ເປັນນັກການເມືອງການຕ່າງປະເທດທີ່ມີຊື່ສຽງນັ້ນ ເປັນ ວິລະບຸລຸດຜູ້ຍິ່ງໃຫຍ່. ຖ້າເຂົາເຈົ້າໃຈຮ້າຍໂມໂຫຂຶ້ນ, ໂລກກໍຈະເກີດມີຄວາມວຸ້ນວາຍ, ຖ້າເຂົາເຈົ້າມີຈິດໃຈສະຫງົບ, ໂລກກໍຈະມີຄວາມສະຫງົບ. ແຕ່ເມີ້ງຈືເຫັນວ່າ: ຄົນເຫຼົ່ານີ້ບໍ່ສົມເປັນວິລະບຸລຸດຜູ້ຍິ່ງໃຫຍ່, ວິລະບຸລຸດຜູ້ຍິ່ງໃຫຍ່ຄວນ “ອາໄສຢູ່ໃນເຮືອນທີ່ກວ້າງທີ່ສຸດໃນໂລກ, ຢືນຢູ່ບ່ອນທີ່ຖືກຕ້ອງທີ່ສຸດໃນໂລກ, ເດີນຕາມເສັ້ນທາງທີ່ກວ້າງຂວາງທີ່ສຸດໃນໂລກ, ຖ້າສາມາດບັນລຸອຸດົມການໄດ້ກໍຈະຮ່ວມກັນກັບປະຊາຊົນເດີນທາງເສັ້ນທາງທີ່ຖືກຕ້ອງແບບນີ້, ຖ້າບໍ່ສາມາດບັນລຸອຸດົມການໄດ້ກໍຈະຍຶດໝັ້ນຕາມຫຼັກການຕົນເອງແຕ່ພຽງຜູ້ດຽວ; “ຄວາມຮັ່ງມີ ແລະ ຕຳແໜ່ງສູງກໍບໍ່ສາມາດເຮັດໃຫ້ເສຍທາດຂາດຄຸນໄດ້, ໃນຍາມທຸກຍາກກໍຍັງໜັກແໜ້ນບໍ່ ຫວັ່ນໄຫວຄອນແຄນ, ອິດທິພົນ ແລະອຳນາດໃດໆກໍບໍ່ສາມາດບັງຄັບໃຫ້ຈຳນົນໄດ້”, ຄົນລັກສະນະແບບນີ້ຈຶ່ງແມ່ນວິລະບຸລຸດຜູ້ຍິ່ງໃຫຍ່.” ຄຳບັນຍາຍຕອນນີ້ຂອງເມີ້ງຈືກ່ຽວກັບວິລະບຸລຸດຜູ້ຍິ່ງໃຫຍ່, ຖືວ່າໜ້າປະທັບໃຈທີ່ສຸດ, ເຊິ່ງເປັນການຍ້ອງຍໍສໍລະເສີນຕໍ່ວິລະບຸລຸດຜູ້ຍິ່ງໃຫຍ່ທີ່ເດີນຕາມເສັ້ນທາງແຫ່ງຄວາມເປັນທຳຢ່າງສະຫງ່າຜ່າເຜີຍໃນປະຫວັດສາດຂອງປະຊາຊາດຈີນ.
ທິດສະດີກ່ຽວກັບຄຸນສົມບັດຂອງວິລະບຸລຸດຜູ້ຍິ່ງໃຫຍ່ທີ່ສະເໜີໂດຍເມີ້ງຈື, ກໍໄດ້ກາຍເປັນຫຼັກການສຳຄັນໃນການສ້າງພາບພົດໃຫ້ຈີນໃນຖານະເປັນປະເທດໃຫຍ່ໃນໂລກໃນປະຈຸບັນ. ກໍຄືດັ່ງທີ່ທ່ານສີຈິ້ນຜິງກ່າວໄວ້ວ່າ: ພວກເຮົາຈະບໍ່ສະແຫວງຫາລັກສະນະຄວາມເປັນຕົວແທນ, ກໍບໍ່ສະແຫວງຫາການສວຍໂອກາດ “ສວມຮອຍ”; ພວກເຮົາຍິນດີຮ່ວມກັບປະຊາຊົນບັນດາປະເທດໃນໂລກເພື່ອຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ; ພວກເຮົາຍິນດີສ້າງປະຊາຄົມຮ່ວມຊາຕາກຳຂອງມວນມະນຸດ, ເຮັດໃຫ້ຄົນທັງຫຼາຍຮ່ວມກັນສ້າງໂລກທີ່ສວຍງາມບົນພື້ນຖານທີ່ຕ່າງຝ່າຍຕ່າງມີຜົນປະໂຫຍດ ແລະ ໄວ້ເນື້ອເຊື່ອໃຈກັນ. ນີ້ກໍຄືຄວາມໝັ້ນໃຈໃນວັດທະນະທຳ ລະບອບ ທິດສະດີ ແລະ ເສັ້ນທາງທີ່ກຳເນີດມາຈາກມູນເຊື້ອວັດທະນະທຳທີ່ດີງາມຂອງປະຊາຊາດຈີນ.
ທ່ານສີຈິ້ນຜິງປະກອບຄຳເຫັນໃນກອງປະຊຸມວຽກງານການຕ່າງປະເທດຂອງສູນກາງພັກກອມມູນິດຈີນທີ່ຈັດຂຶ້ນໃນເດືອນມິຖຸນາປີ 2018 ຢູ່ນະຄອນຫຼວງປັກກິ່ງ.
ປະຈຸບັນ, ສະຖານະການສາກົນພວມມີການຜັນແປຢ່າງໃຫຍ່ຫຼວງໃນຮອບຮ້ອຍປີຜ່ານມາ, ພາຍໃຕ້ສະພາບການແນວນີ້, ພວກເຮົາຢາກສ້າງການພົວພັນສາກົນແບບໃໝ່, ກໍຕ້ອງຮັບຮູ້ທ່າອ່ຽງຂະຫຍາຍຕົວຂອງສະພາບການສາກົນໃນປະຈຸບັນຢ່າງຖືກຕ້ອງ. ໃນກອງປະຊຸມວຽກງານການຕ່າງປະເທດຂອງສູນກາງພັກກອມມູນິດຈີນທີ່ຈັດຂຶ້ນໃນເດືອນມິຖຸນາປີ 2018 ຢູ່ນະຄອນຫຼວງປັກກິ່ງ, ທ່ານສີຈິ້ນຜິງຊີ້ອອກວ່າ, ໃນການຮັບຮູ້ສະຖານະການສາກົນຕ້ອງບຳລຸງສ້າງທັດສະນະທີ່ມີຕໍ່ປະຫວັດສາດ ທັດສະນະທີ່ມີຕໍ່ສະພາບການລວມ ແລະ ທັດສະນະກ່ຽວກັບຖານະບົດບາດຂອງຕົນຢ່າງຖືກຕ້ອງ. ຫຼືເວົ້າອີກຢ່າງໜຶ່ງແມ່ນ:ໃນສະຖານະການສາກົນປະຈຸບັນ, ພວກເຮົາຍິ່ງຕ້ອງຢືນຢູ່ບ່ອນທີ່ຖືກຕ້ອງທີ່ສຸດໃນໂລກ, ແລະເດີນຕາມເສັ້ນທາງທີ່ກວ້າງຂວາງທີ່ສຸດໃນໂລກ.
ຕັ້ງແຕ່ໃດໆມາ, ວັດທະນະທຳຂອງຈີນແມ່ນສະແຫວງຫາເປົ້າໝາຍກ່ຽວກັບວຽກງານການຕ່າງປະເທດທີ່ເຊື່ອມໂຍງຈຸດດີເດັ່ນດ້ານວັດທະນະທຳຂອງປະເທດຕ່າງໆ, ສະແຫວງຫາຜົນປະໂຫຍດລວມຂອງໂລກ, ແລະການຮ່ວມມືແບບຕ່າງຝ່າຍຕ່າງມີຜົນປະໂຫຍດ. ແຕ່ລະປະເທດຕ່າງກໍມີຈຸດດີເດັ່ນດ້ານວັດທະນະທຳຂອງໃຜລາວ, ຄວນເຄົາລົບແລະຍອມຮັບຈຸດດີເດັ່ນດ້ານວັດທະນະທຳຂອງກັນແລະກັນ, ເຊື່ອມໂຍງຈຸດດີເດັ່ນດ້ານວັດທະນະທຳຂອງປະເທດຕ່າງໆເຂົ້າກັນ, ທົ່ວໂລກຈຶ່ງຈະມີຄວາມປອງດອງກົມກຽວກັນ. ມີແຕ່ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ, ຈຶ່ງຈະໄດ້ຮັບປະສິດທິຜົນທີ່ດີ ແບບ 1 ບວກ1 ໃຫຍ່ກວ່າ 2.
ໃນປະຫວັດສາດຂອງຈີນກໍມີຕົວຢ່າງໜຶ່ງທີ່ພົ້ນເດັ່ນ, ຄືທ່ານເຈີ້ງເຫີ ນັກເດີນທະເລຜູ້ຍິ່ງໃຫຍ່ທີ່ສຸດໃນປະຫວັດສາດຂອງຈີນ. ທ່ານເຈີ້ງເຫີ ເດີນທະເລທາງໄກ ໄດ້ສະແດງໃຫ້ເຫັນເຖິງຈິດໃຈວັດທະນະທຳທີ່ມີໄມຕີຈິດມິດຕະພາບ ສັນຕິພາບແລະ ຢູ່ຮ່ວມກັນຢ່າງກົມກຽວ. ປະຈຸບັນຢູ່ປະເທດໄທຍັງມີຮູບປັ້ນເຈີ້ງເຫີເຄືອບຄໍາອົງໜຶ່ງ; ຢູ່ຫໍພິພິດທະພັນກິດຈະການທາງທະເລຂອງສິງກະໂປ, ມີກຳປັ່ນ “ເຈີ້ງເຫີ” ທີ່ເປັນກຳປັ່ນຈຳລອງຂະໜາດເທົ່າກັບຂອງຈິງລຳໜຶ່ງ. ທັງໝົດເຫຼົ່ານີ້ລ້ວນແຕ່ແມ່ນສັກຂີພິຍານຕົວຈິງທີ່ສະແດງໃຫ້ເຫັນເຖິງການໄປມາຫາສູ່ກັນດ້ວຍໄມຕີຈິດມິດຕະພາບລະຫວ່າງຈີນກັບປະເທດຕ່າງໆໃນໂລກ.
ທ່ານສີຈິ້ນຜິງຊີ້ອອກວ່າ, ທ້ອງຟ້າກວ້າງໃຫຍ່ພຽງພໍ, ໜ່ວຍໂລກກໍກວ້າງຂວາງພຽງພໍ,ໂລກນີ້ກໍໃຫຍ່ພຽງພໍ, ເຊິ່ງສາມາດຮອງຮັບບັນດາປະເທດໃຫ້ພັດທະນາ ແລະ ສ້າງຄວາມຈະເລີນຮຸ່ງເຮືອງຮ່ວມກັນ. ໃນໂລກປະຈຸບັນບໍ່ມີປະເທດໃດສາມາດຢູ່ໂດດດ່ຽວໄດ້, ບໍ່ມີປະເທດໃດສາມາດພັດທະນາດ້ວຍຕົນເອງໂດຍປາສະຈາກການໄປມາຫາສູ່ກັນກັບປະເທດອື່ນ.
ປະຈຸບັນຈີນພວມປະຕິບັດຕາມທັດສະນະທີ່ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ ແລະ ຢູ່ຮ່ວມກັນຢ່າງກົມກຽວ, ພະຍາຍາມຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ໃນນັ້ນຕົວຢ່າງທີ່ດີທີ່ສຸດກໍແມ່ນ ການຮ່ວມມືສາກົນ “ໜຶ່ງແລວໜຶ່ງເສັ້ນທາງ”. ປະຈຸບັນ ຈີນໄດ້ກາຍເປັນປະເທດເສດຖະກິດໃຫຍ່ອັນດັບ2ຂອງໂລກ, ເປັນຜູ້ແບກຫາບຄວາມຮັບຜິດຊອບສາກົນນັບມື້ນັບຫຼາຍຂຶ້ນ. ທ່ານສີຈິ້ນຜິງກໍເຄີຍກ່າວວ່າ, ການພັດທະນາຂອງຈີນໄດ້ຮັບຜົນປະໂຫຍດຈາກປະຊາຄົມໂລກ, ຈີນກໍຍິນດີສະໜອງຜະລິດຕະພັນສາທາລະນະໃຫ້ແກ່ປະຊາຄົມໂລກຫຼາຍກວ່າເກົ່າ.
ທ່ານອາດຈະຮູ້ເຫດຜົນແບບງ່າຍໆຢ່າງໜຶ່ງ ຄື: ຖ້າຢາກຮັ່ງມີຂຶ້ນ ກໍຄວນສ້າງເສັ້ນທາງໄປກ່ອນ. ຫຼາຍປະເທດລຽບຕາມ “ໜຶ່ງແລວໜຶ່ງເສັ້ນທາງ” ຍັງທຸກຍາກຫຼ້າຫຼັງຢູ່, ອັນເກີດມາຈາກຫຼາຍສາເຫດ, ໃນນັ້ນສາເຫດສຳຄັນອັນໜຶ່ງກໍຄື ສິ່ງກໍ່ສ້າງພື້ນຖານໂຄງລ່າງຍັງຫຼ້າຫຼັງຫຼາຍ, ເຊິ່ງກະທົບເຖິງການພັດທະນາຂອງປະເທດລຽບຕາມ “ໜຶ່ງແລວໜຶ່ງເສັ້ນທາງ”.
ກໍຍ້ອນໄດ້ພິຈາລະນາເຖິງບັນຫານີ້, ປີ 2013, ເປັນເວລາດຽວກັນທີ່ໄດ້ສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ຕໍ່ປະຊາຄົມໂລກຢ່າງເປັນທາງການ, ທ່ານສີຈິ້ນຜິງຍັງໄດ້ສະເໜີໃຫ້ສ້າງທະນາຄານລົງທຶນພື້ນຖານໂຄງລ່າງອາຊີ ຫຼື AIIB, ເພື່ອລະດົມທຶນເຂົ້າໃນການກໍ່ສ້າງພື້ນຖານໂຄງລ່າງໃຫ້ແກ່ປະເທດລຽບຕາມ “ໜຶ່ງແລວໜຶ່ງເສັ້ນທາງ”.
ເລີ່ມແຕ່ເດືອນມັງກອນ ປີ 2016, ເມື່ອທະນາຄານ AIIB ໄດ້ເລີ່ມໃຫ້ບໍລິການຢ່າງເປັນທາງການແລ້ວກໍໄດ້ເລືອກເຟັ້ນໂຄງການລົງທຶນທີ່ສຳຄັນຈຳນວນໜຶ່ງຢ່າງຈິງຈັງ, ແລະໄດ້ລົງທຶນຢ່າງຫຼວງຫຼາຍ. ການກໍ່ສ້າງພື້ນຖານໂຄງລ່າງລຽບຕາມ “ໜຶ່ງແລວໜຶ່ງເສັ້ນທາງ”ໄດ້ພັດທະນາກ້າວໄປໜ້າຢ່າງເປັນລະບົບ ແລະ ເປັນເຄືອຂ່າຍ, ເຊິ່ງລວມທັງທາງດ່ວນ ທາງລົດໄຟຄວາມໄວສູງ, ກໍລວມທັງສະໜາມບິນ ທ່າກຳປັ່ນ, ລວມທັງໂທລະຄົມມະນາຄົມ, ເຊິ່ງໄດ້ເສີມຂະຫຍາຍບົດບາດທີ່ສຳຄັນທີ່ສຸດໃຫ້ແກ່ການພັດທະນາ ແລະ ການສ້າງຄວາມຮັ່ງມີຮ່ວມກັນຂອງປະເທດລຽບຕາມ “ໜຶ່ງແລວໜຶ່ງເສັ້ນທາງ”.
ປະເທດລາວກໍຢູ່ລຽບຕາມ “ໜຶ່ງແລວໜຶ່ງເສັ້ນທາງ”. ວັນທີ 10 ເມສາ ປີ 2010, ຜູ້ຕາງໜ້າ 18 ປະເທດອາຊີໄດ້ລົງນາມໃນ “ສັນຍາລະຫວ່າງລັດຖະບານວ່າດ້ວຍຕາໜ່າງທາງລົດໄຟອາຊີ”ຢ່າງເປັນທາງການ. ໃນນັ້ນ, ເສັ້ນທາງລົດໄຟຈີນ-ລາວກໍນອນຢູ່ໃນຕອນໜຶ່ງທີ່ສຳຄັນໃນເສັ້ນທາງລົດໄຟສາຍກາງຂອງພາກພື້ນອາຊີ. ອີງຕາມແຜນການ, ເສັ້ນທາງລົດໄຟລາວ-ຈີນຈະຜ່ານປະເທດລາວ, ໂດຍເຊື່ອມຕໍ່ຊາຍແດນຈີນກັບປະເທດລາວໃນຕອນເໜືອ ນະຄອນຫຼວງວຽງຈັນກັບປະເທດໄທ, ໃນອະນາຄົດຍັງຈະເຊື່ອມຕໍ່ກັບເຄືອຂ່າຍທາງລົດໄຟຂອງປະເທດອື່ນໃນແຫຼມອິນດູຈີນ. ສະນັ້ນ, ການສ້າງເສັ້ນທາງລົດໄຟລາວ-ຈີນ ບໍ່ພຽງແຕ່ຈະເຮັດໃຫ້ປະເທດລາວທີ່ຢູ່ໃຈກາງແຫຼມອິນດູຈີນເສີມຂະຫຍາຍທ່າແຮງດ້ານພູມສາດຢ່າງແທ້ຈິງ ເພື່ອຫັນປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດກັບພາກພື້ນ, ພ້ອມທັງຈະເຊື່ອມຕໍ່ປະເທດລາວກັບປະເທດຈີນ ແລະ ປະເທດອາຊຽນອື່ນໆຢ່າງແໜ້ນແຟ້ນກວ່າເກົ່າ, ເປັນການປັບປຸງເຄືອຂ່າຍທາງລົດໄຟອາຊີໃຫ້ສົມບູນຂຶ້ນ, ສ້າງໂອກາດພັດທະນາທີ່ດີກວ່າເກົ່າໃຫ້ແກ່ປະເທດພວມພັດທະນາເຊິ່ງລວມທັງປະເທດລາວ, ອັນຈະນຳເອົາຜົນປະໂຫຍດຕົວຈິງມາສູ່ປະຊາຊົນບັນດາປະເທດ.
ຄຳເຫັນ
0