ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານສີຈິ້ນຜິງໄດ້ໃຫ້ຄວາມສຳຄັນຢ່າງສູງຕໍ່ວຽກງານຕ້ານຢາເສບຕິດ. ພາຍໃຕ້ການຊີ້ນຳນຳພາຂອງທ່ານມາເປັນເວລາຫຼາຍປີ, ຕຳຫຼວດປາບປາມຢາເສບຕິດ,ອາສາສະໝັກບຳບັດຜູ້ຕິດຢາເສບຕິດແລະຜູ້ອື່ນໆໄດ້ເຂົ້າຮ່ວມບັ້ນຮົບທົ່ວປວງຊົນຕ້ານຢາເສບຕິດນັບມື້ນັບຫຼາຍຂຶ້ນ.
ສ່ຽງຊີວິດດ້ວຍຄວາມໄວ
ທ່ານສີຈິ້ນຜິງກ່າວວ່າ:"ຫາກບໍ່ສາມາດປາບປາມຢາເສບຕິດໄດ້ ກໍຈະບໍ່ລົດລະການຕໍ່ສູ້ຕ້ານກັບຢາເສບຕິດແມ່ນແຕ່ມື້ດຽວ."
ທ່ານຫວາງຢວີກ່າວວ່າ:"ຂ້າພະເຈົ້າມີຄວາມໃຝ່ຝັນອັນໜຶ່ງຄືຫວັງໃຫ້ໂລກນີ້ປອດຢາເສບຕິດ." ເພື່ອໃຫ້ຄວາມໃຝ່ຝັນນີ້ປາກົດຜົນເປັນຈິງ, ຫົວໜ້າໜ່ວຍປາບປາມຢາເສບຕິດຂອງພະແນກປ້ອງກັນຄວາມສະຫງົບນະຄອນສາງຈື້ແຂວງຊ່ານຊີ່ທ່ານນີ້ໄດ້ລອດຕາຍຈາກການປະຕິບັດໜ້າທີ່ປາບປາມຢາເສບຕິດມາຫຼາຍເທື່ອແລ້ວ.
ໃນການເຄື່ອນໄຫວໄລ່ຈັບຄົນຮ້າຍເທື່ອໜຶ່ງ, ຜູ້ຕ້ອງຫາໄດ້ຂັບລົດຫຼົບໜີໄປຕາມທາງດ່ວນຢ່າງບໍ່ມີທິດທາງ, ທ່ານຫວາງຢວີແລະຕຳຫຼວດທ່ານອື່ນໆໄດ້ຂັບລົດດ້ວຍຄວາມໄວສູງເພື່ອໄລ່ຈັບຜູ້ຕ້ອງຫາ ຈົນເຮັດໃຫ້ລົດເກືອບເສຍຫລັກແລະ ເກືອບປີ້ນຂວ້ຳຢູ່ທາງໂຄ້ງຫຼາຍເທື່ອ. ໃນທີ່ສຸດທ່ານຫວາງຢວີກໍສາມາດລັດສະກັດຜູ້ຕ້ອງຫາຢູ່ປ້ອມເກັບຄ່າທາງດ່ວນແລະສາມາດຄົ້ນພົບຢາໄອສ 50 ກິໂລ ກຣາມທີ່ຊຸກເຊື່ອງໄວ້ໃນປະຕູລົດຂອງຜູ້ຕ້ອງຫາ.
ບໍ່ໃຫ້ປ່ອຍປະຜູ້ຕິດຢາເສບຕິດຈັກຄົນ
ທ່ານສີຈິ້ນຜິງກ່າວວ່າ: "ຢາກເຮັດວຽກງານຕ້ານຢາເສບຕິດໄດ້ດີຕ້ອງມີຈິດໃຈເຂັ້ມແຂງແລະເດັດດ່ຽວໜຽວແໜ້ນ, ຕັ້ງໃຈເຮັດວຽກແລະຕິດແທດຕົວຈິງ. ຕ້ອງປະຕິບັດງານໂດຍເລີ່ມຈາກຊາວໜຸ່ມ,ເລີ່ມຈາກການສຶກສາອົບຮົມແລະ ປ້ອງກັນປະຊາຊົນອັນໄພສານບໍ່ໃຫ້ໄປຂ້ອງກ່ຽວກັບຢາເສບຕິດ, ໃຫ້ປະຊາຊົນທັງຫຼາຍຕັ້ງໜ້າສະແຫວງຫາວິທີການດຳລົງຊີວິດທີ່ສົດຊື່ນແລະສີວິໄລ."
ທ່ານຕ້ວນຮວາເຊີ້ງເຊື່ອວ່າ: ເວົ້າໃນດ້ານທາດແທ້ຂອງເຂົາເຈົ້າແລ້ວ,ຜູ້ຕິດຢາເສບຕິດບໍ່ແມ່ນຄົນຮ້າຍທີ່ແທ້ຈິງ, ຕ້ອງມີມື້ໃດມື້ໜຶ່ງທີ່ເຂົາເຈົ້າຈະສາມາດສຳນຶກຕໍ່ຄວາມຜິດຂອງຕົນ.
ທ່ານຕ້ວນຮວາເຊີ້ງ ອາຍຸ 79 ປີ ແມ່ນຜູ້ປະຕິບັດວຽກງານອາສາສະໝັກກ່ອນໝູ່ຢູ່ນະຄອນຜິງຊ່ຽງແຂວງຈ່ຽງຊີ່. ທ່ານມີທ່າທີສະເໝີຕົ້ນສະເໝີປາຍວ່າ:ຈະບໍ່“ປ່ອຍປະ” ຜູ້ຕິດຢາເສບຕິດຈັກຄົນ. ນັບແຕ່ປີ 2014 ເປັນຕົ້ນມາ, ທ່ານຕ້ວນຮວາເຊີ້ງໄດ້ສ້າງຕັ້ງຫ້ອງການບຳບັດ ແລະຕ້ານຢາເສບຕິດ ແລະ ສະມາຄົມອາສາສະໝັກຕ້ານຢາເສບຕິດ. ນັບມາຮອດປະຈຸບັນ, ໄດ້ດຳເນີນກິດຈະກຳໂຄສະນາຕ້ານຢາເສບຕິດ 1.160 ກວ່າເທື່ອ ໂດຍມີຜູ້ເຂົ້າຮ່ວມຮັບຟັງ 9 ແສນ 8 ໝື່ນກວ່າເທື່ອຄົນ. ເວລາການໃຫ້ບໍລິການທີ່ເປັນອາສາສະໝັກຂອງທ່ານຕ້ວນຮວາເຊີ້ງມີເຖິງ 5 ໝື່ນກວ່າຊົ່ວໂມງ.
ການຕ້ານຢາເສບຕິດໃນສາກົນ ເພື່ອສ້າງຜົນປະໂຫຍດໃຫ້ແກ່ປະຊາຊົນບັນດາປະເທດ
ທ່ານສີຈິ້ນຜິງໄດ້ວາງແຜນຄືດັ່ງນີ້: “ຢາເສບຕິດແມ່ນໄພອັນຕະລາຍຮ່ວມຂອງສັງຄົມມະນຸດ” “ຈີນມີຈຸດຢືນໃຫ້ເສີມສ້າງອົງການຕ້ານລັດທິກໍ່ການຮ້າຍໃນພາກພື້ນ, ປາບປາມການຜະລິດ ແລະການຄ້າຂາຍຢາເສບຕິດຢ່າງເຂັ້ມງວດ.”
ໜ່ວຍປາບປາມຢາເສບຕິດຂອງພະແນກປ້ອງກັນຄວາມສະຫງົບນະຄອນລິນຊ່າງແຂວງຢຸນນານໄດ້ຈັດຕັ້ງປະຕິບັດຄືແນວນີ້: ເດືອນພຶດສະພາປີ 2018, ເຂົາເຈົ້າໄດ້ຮ່ວມມືກັບຕຳຫຼວດມຽນມາມ້າງທຳລາຍໂຮງງານຜະລິດຢາເສບຕິດແຫ່ງໜຶ່ງຢູ່ຕ່າງປະເທດ, ຍຶດໄດ້ວັດຖຸດິບທີ່ໃຊ້ໃນການຜະລິດຢາເສບຕິດປະເພດຕ່າງໆ 43,6 ໂຕນ, ອຸປະກອນຈຳນວນໜຶ່ງ, ຈັບຜູ້ຕ້ອງຫາໄດ້ 30 ຄົນ, ໂຮງງານດັ່ງກ່າວເປັນໂຮງງານປຸງແຕ່ງວັດຖຸດິບເພື່ອຜະລິດຢາເສບຕິດແຫ່ງທຳອິດທີ່ຈີນໄດ້ເຂົ້າຮ່ວມມ້າງທຳລາຍຢູ່ຕ່າງປະເທດນັບແຕ່ສປຈີນສະຖາປະນາຂຶ້ນເປັນຕົ້ນມາ.
ເນື່ອງໃນໂອກາດ “ວັນຕ້ານຢາເສບຕິດສາກົນ” ໄດ້ໝູນວຽນມາເຖິງ, ຈີນໄດ້ຈັດພິທີຍ້ອງຍໍລວມໝູ່ ແລະ ບຸກຄົນກ້າວໜ້າໃນວຽກງານຕ້ານຢາເສບຕິດທົ່ວປະເທດຈີນ.ໂດຍມີທ່ານຫວາງຢວີ ຫົວໜ້າໜ່ວຍປາບປາມຢາເສບຕິດຂັ້ນຮາກຖານ ຜູ້ມີຄວາມໃຝ່ຝັນຢາກໃຫ້ທົ່ວໂລກປອດຢາເສບຕິດ, ທ່ານຕ້ວນຮວາເຊີ້ງເປັນອາສາສະໝັກຕ້ານຢາເສບຕິດຢູ່ທ້ອງຖິ່ນເຊິ່ງເປັນຜູ້ບຳບັດຜູ້ຕິດຢາເສບຕິດເພື່ອໃຫ້ເຂົາເຈົ້າມີຊີວິດໃໝ່, ໜ່ວຍປາບປາມຢາເສບຕິດເມືອງລິນຊ່າງແຂວງຢຸນນານທີ່ ສູ້ຊົນພະຍາຍາມສະກັດກັ້ນບໍ່ໃຫ້ຢາເສບຕິດກໍຄືຜູ້ຄ້າຂາຍຢາເສບຕິດເລັດລອດເຂົ້າສູ່ປະເທດຈີນແລະຜູ້ອື່ນໆ ລ້ວນແຕ່ໄດ້ຮັບການຍ້ອງຍໍໃນພິທີດັ່ງກ່າວ.
ໃນຂະນະທີ່ກ່າວສະແດງຄວາມຊົມເຊີຍຢ່າງສຸດໃຈຕໍ່ລວມໝູ່ ແລະບຸກຄົນກ້າວໜ້າທີ່ໄດ້ຮັບການຍ້ອງຍໍ, ທັງສະແດງຄວາມຢື້ຢາມຖາມຂ່າວຢ່າງຈິງໃຈເຖິງບັນດາສະຫາຍທີ່ສູ້ຊົນຢູ່ແນວຮົບຕ້ານຢາເສບຕິດຂອງທົ່ວປະເທດ, ທ່ານສີຈິ້ນຜິງຍັງໃຫ້ທິດຊີ້ນຳວ່າ: ປະຈຸບັນ, ບັນຫາຢາເສບຕິດຢູ່ທັງພາຍໃນ ແລະຕ່າງປະເທດ, ໄພອັນຕະລາຍຈາກຢາເສບຕິດແບບເກົ່າ ແລະ ແບບໃໝ່, ການກະທຳຜິດກ່ຽວກັບຢາເສບຕິດທາງອອນລາຍ ແລະອອຟລາຍປົນເປກັນ, ໄດ້ເປັນໄພອັນຕະລາຍຢ່າງໜັກໜ່ວງຕໍ່ຄວາມປອດໄພດ້ານຊີວິດ ແລະ ສຸຂະພາບຮ່າງກາຍຂອງປະຊາຊົນ, ກໍຄືຄວາມສະຫງົບຂອງສັງຄົມ, ສະນັ້ນ,ຕ້ອງລົງເລິກປະຕິບັດວຽກງານຕ້ານຢາເສບຕິດຄືທີ່ໄດ້ເຮັດຜ່ານມາຢ່າງເດັດດ່ຽວ ແລະເຖິງກົກເຖິງຮາກ.
ຄຳເຫັນ
0