ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ1ກໍລະກົດປີ2020ນີ້ ແມ່ນວັນສ້າງຕັ້ງພັກກອມມູນິດຈີນຄົບຮອບ99ປີ. ໃນໄລຍະເບື້ອງຕົ້ນທີ່ຫາກໍ່ສ້າງຕັ້ງພັກຂຶ້ນມາໃໝ່ມີສະມາຊິກພຽງ50ກວ່າຄົນ, ຈົນຮອດທຸກມື້ນີ້ທີ່ໄດ້ກາຍເປັນພັກການເມືອງໃຫຍ່ທີ່ສຸດໃນໂລກ. ເຮັດແນວໃດພັກກອມມູນິດຈີນຈິ່ງສາມາດລຸກຂຶ້ນຈາກຄວາມຫຍຸ້ງຍາກລຳບາກໃນແຕ່ລະຄັ້ງເພື່ອສືບຕໍ່ບຸກບືນກ້າວເດີນໄປໜ້າ. ເມື່ອເວລາຜ່ານໄປເກືອບຮ້ອຍປີ, ພັກກອມມູນິດຈີນຍັງສາມາດຍືນຍົງຄົງຕົວແລະຮັກສາຄວາມມີຊີວິດຊີວາໄດ້ແມ່ນຍ້ອນຫຍັງ? ມາຟັງທ່ານສີຈິ້ນຜິງຜູ້ນຳພັກກອມມູນິດຈີນເລົ່າກ່ຽວກັບອຸດົມການແຕ່ຫົວທີແລະພາລະກຳ,ຈິດໃຈແລະຄວາມຮັບຜິດຊອບຂອງຊາວພັກກອມມູນິດຈີນ.
ການອອກເດີນທາງຄັ້ງພິເສດຫຼັງກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19
ວັນທີ31ຕຸລາປີ2017, ທ່ານສີຈິ້ນຜິງໄດ້ນຳພາຄະນະປະຈຳກົມການເມືອງສູນກາງພັກກອມມູນິດຈີນເດີນທາງໄປຮອດນະຄອນຊຽງໄຮແລະທົບທວນຄືນຄຳປະຕິຍານຕົນເຂົ້າເປັນສະມາຊິກພັກກອມມູນິດຈີນ
“ນີ້ແມ່ນສະຖານທີ່ເລີ່ມຕົ້ນຄວາມໃຝ່ຝັນຂອງພັກເຮົາ. ພັກເຮົາກຳເນີດຈາກທີ່ນີ້, ແລະອອກເດີນທາງຈາກທີ່ນີ້ກ້າວໄປສູ່ການເປັນພັກກຳອຳນາດຂອງປະເທດຊາດ. ສະນັ້ນ ສະຖານທີ່ແຫ່ງນີ້ຈຶ່ງເປັນຮາກເຫງົ້າຂອງພັກເຮົາ.”
ວັນທີ31ຕຸລາປີ2017, ທ່ານສີຈິ້ນຜິງໄດ້ນຳພາຄະນະປະຈຳກົມການເມືອງສູນກາງພັກກອມມູນິດຈີນເດີນທາງໄປຮອດນະຄອນຊຽງໄຮແລະນະຄອນເຈ່ຍຊີ່ງແຂວງເຈີ້ຈ່ຽງ, ເພື່ອຢ້ຽມຊົມສະຖານທີ່ຈັດກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 1ແລະເຮືອແດງເຈ່ຍຊີ່ງ, ນີ້ເປັນການທົບທວນຄືນປະຫວັດສາດການສ້າງຕັ້ງພັກກອມມູນິດຈີນແລະຄຳປະຕິຍານຕົນເຂົ້າເປັນສະມາຊິກພັກກອມມູນິດຈີນ, ເປັນການຢືນຢັນເຖິງອຸດົມຄະຕິທາງການເມືອງອັນເດັດດ່ຽວຂອງຄະນະນຳສູນກາງພັກກອມມູນິດຈີນຊຸດ ໃໝ່.
ວັນທີ31ຕຸລາປີ2017, ທ່ານສີຈິ້ນຜິງຢ້ຽມຊົມຫໍລະນຶກສະຖານທີ່ຈັດກອງປະຊຸມໃຫຍ່ພັກກອມມູນິດຈີນຄັ້ງທີ1
ຄະນະປະຈຳກົມການເມືອງສູນກາງພັກເດີນທາງອອກຈາກນະຄອນຫຼວງປັກກິ່ງນຳກັນໃນຄັ້ງນີ້ເປັນສິ່ງທີ່ພົບເຫັນໜ້ອຍເຊິ່ງຫ່າງຈາກວັນປິດກອງປະຊຸມຜູ້ແທນທົ່ວປະເທດຂອງພັກກອມມູນິດຈີນຄັ້ງທີ19 ພຽງ1ອາທິດ. ກອງປະຊຸມດັ່ງກ່າວໄດ້ວາງແຜນພັດທະນາອະນາຄົດຂອງຈີນຄື: ສ້າງປະເທດສັງຄົມນິຍົມທີ່ທັນສະໄໝເຂັ້ມແຂງແລະບັນລຸເປົ້າໝາຍແຫ່ງການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງປະຊາຊາດຈີນຄືນໃໝ່, “ການເປີດຍຸກໃໝ່ຂອງຈີນ” ໄດ້ເປັນທີ່ປະຈັກຕາຕໍ່ຊາວໂລກ.
ກອງປະຊຸມໃຫຍ່ຂອງພັກກອມມູນິດຈີນຄັ້ງທີ19
ການຍຶດໝັ້ນແລະຮັກສາຄວາມໃຝ່ຝັນ, ບໍ່ວ່າຈະໄປໄກປານໃດກໍຈະບໍ່ຫລົງລືມອຸດົມການແຕ່ຫົວທີ. ຢູ່ນະຄອນຊຽງໄຮແລະນະຄອນເຈ່ຍຊີ່ງ, ທ່ານສີຈິ້ນຜິງໄດ້ເວົ້າເຖິງ“ອຸດົມການແຕ່ຫົວທີ” ຫຼາຍເທື່ອ, ຄືດັ່ງທີ່ທ່ານໄດ້ກ່າວເນັ້ນໃນບົດລາຍງານຂອງກອງປະຊຸມໃຫຍ່ຂອງພັກກອມມູນິດຈີນຄັ້ງທີ19 ວ່າ:“ບໍ່ລືມອຸດົມການແຕ່ຫົວທີ, ຈຶ່ງຈະໄດ້ຮັບຜົນສຳເລັດໃນທີ່ສຸດ.” ອຸດົມການແຕ່ຫົວທີ ແລະພາລະກຳຂອງຊາວພັກກອມມູນິດຈີນ, ກໍແມ່ນການສະແຫວງຫາຄວາມສຸກໃຫ້ແກ່ປະຊາຊົນຈີນ, ສະແຫວງຫາການຟື້ນຟູຄວາມຈະເລີນຮຸ່ງເຮືອງໃຫ້ແກ່ປະຊາຊາດຈີນ. ເຊິ່ງແມ່ນແຮງຂັບເຄື່ອນພື້ນຖານທີ່ກະຕຸກຊຸກຍູ້ໃຫ້ຊາວພັກກອມມູນິດຈີນບຸກບືນກ້າວໄປໜ້າຢ່າງບໍ່ຢຸດຢັ້ງ.
ທ່ານສີຈິ້ນຜິງຢ້ຽມຢາມປະຊາຊົນຜູ້ທຸກຍາກ
ນະໂຍບາຍຂອງສູນກາງພັກຈະດີຫຼືບໍ່ ຕ້ອງເບິ່ງວ່າພີ່ນ້ອງປະຊາຊົນຍິ້ມຫຼືໄຫ້.
“ນະໂຍບາຍຂອງສູນກາງພັກຈະດີຫຼືບໍ່ ຕ້ອງເບິ່ງວ່າພີ່ນ້ອງປະຊາຊົນຈະຍິ້ມຫຼືໄຫ້”. ປີ 2015, ທ່ານສີຈິ້ນຜິງໄດ້ໃຫ້ທັດສະນະດັ່ງກ່າວໃນເວລາໄປສຳຫຼວດກວດກາວຽກງານການລຶບລ້າງຄວາມທຸກຍາກຢູ່ບ້ານຮວ່າມ້າວແຂວງກຸ້ຍໂຈ່ວ.
ນັບແຕ່ກອງປະຊຸມໃຫຍ່ ຂອງພັກກອມມູນິດຈີນຄັ້ງທີ 18ເປັນຕົ້ນມາ, ທ່ານສີຈິ້ນຜິງໄດ້ສຳຫຼວດກວດກາວຽກງານຢູ່ຮາກຖານໃນທົ່ວປະເທດ. ທ່ານໄດ້ເດີນທາງໄປເຖິງເຂດທຸກຍາກພິເສດທຸກບ່ອນ, ຈັດກອງປະຊຸມສຳມະນາກ່ຽວກັບການລຶບລ້າງຄວາມທຸກຍາກ 6 ປີລຽນຕິດ, ແລະໄດ້ກ່າວເນັ້ນໜັກເຖິງການລຶບລ້າງຄວາມທຸກຍາກໃນຄຳອວຍພອນປີໃໝ່ 6 ປີລຽນຕິດ, ໄດ້ປຶກສາຫາລືຮ່ວມກັນກັບສະມາຊິກສອງສະພາກ່ຽວກັບການລຶບລ້າງຄວາມທຸກຍາກໃນກອງປະຊຸມສອງສະພາທົ່ວປະເທດຈີນ 8 ປີລຽນຕິດ, ແລະໄດ້ສະເໜີແຜນຍຸດທະສາດສຳຄັນຕ່າງໆ, ເຊັ່ນ: “ຊ່ວຍເຫຼືອຜູ້ທຸກຍາກໃຫ້ຖືກຕ້ອງກັບເປົ້າໝາຍທີ່ແນ່ນອນ”, “ລຶບລ້າງຄວາມທຸກຍາກໃຫ້ຖືກຕ້ອງກັບເປົ້າໝາຍທີ່ແນ່ນອນ”, “2 ບໍ່ກັງວົນ 3 ຮັບປະກັນ” ແລະອື່ນໆ.
ເມື່ອຮອດປີ 2020, ປະຊາກອນຜູ້ທຸກຍາກໃນຊົນນະບົດຕາມມາດຖານປະຈຸບັນຈະຕ້ອງຫຼຸດພົ້ນອອກຈາກຄວາມທຸກຍາກທັງໝົດ. ນີ້ແມ່ນຄຳໝັ້ນສັນຍາທີ່ເຄັ່ງຂຶມຂອງພັກກອມມູນິດຈີນທີ່ໃຫ້ໄວ້ກັບປະຊາຊົນທົ່ວປະເທດ. ເຖິງວ່າໄດ້ປະສົບກັບຜົນກະທົບຈາກການແຜ່ລະບາດຂອງພະຍາດໂຄວິດ-19ຢ່າງໜັກໜ່ວງທີ່ມີຕໍ່ເສດຖະກິດ ກໍຕາມ, ແຕ່ທ່ານສີຈິ້ນຜິງໄດ້ກ່າວເນັ້ນມາໂດຍຕະຫຼອດວ່າ: ເປົ້າໝາຍນີ້ “ຕ້ອງບັນລຸຜົນເປັນຈິງຕາມເວລາກຳນົດ, ຈະບໍ່ມີການຖອຍຫຼັງແລະບໍ່ມີການໂຍະຍານແຕ່ຢ່າງໃດເລີຍ.”“ຄົນລຸ້ນພວກເຮົານີ້ກໍມີຄວາມປາຖະໜາທີ່ຢາກຊ່ວຍເຫຼືອປະຊາຊົນໂດຍສະເພາະແມ່ນຊ່ວຍຊາວກະສິກອນຂອງພວກເຮົາໃຫ້ມີການພັດທະນາ. ຢູ່ບົນເສັ້ນທາງສ້າງສັງຄົມນິຍົມຈະບໍ່ປະຖີ້ມຜູ້ໃດຜູ້ໜຶ່ງໄວ້ຢູ່ເບື້ອງຫຼັງ, ຕ້ອງສ້າງຄວາມຮັ່ງມີຮ່ວມກັນ.”
ສື່ມວນຊົນເຄີຍພັນລະນາວ່າ: ປະຊາຊົນຜູ້ທຸກຍາກນັບເປັນຮ້ອຍລ້ານຄົນ, ບໍ່ວ່າຢູ່ເທິງພູໜ່ວຍໃດຫຼືຮ່ອມພູແຫ່ງໃດໃນດິນແດນຈີນ 9,6 ລ້ານກິໂລຕາແມັດ, ພະນັກງານຜູ້ເຮັດວຽກເພື່ອລຶບລ້າງຄວາມທຸກຍາກຂອງພັກກອມມູນິດຈີນກໍຈະຂຶ້ນພູລົງຫ້ວຍເພື່ອໄປຊ່ວຍໃຫ້ໄດ້, ຊ່ວຍລົງທະບຽນ, ຊ່ວຍເຫຼືອເພື່ອໃຫ້ຫຼຸດພົ້ນອອກຈາກຄວາມທຸກຍາກ. ການລຶບລ້າງຄວາມທຸກຍາກທີ່ດຳເນີນໄປດ້ວຍການເຕົ້າໂຮມກຳລັງແຮງທົ່ວປະເທດກໍແມ່ນເພື່ອຮັບປະກັນໃຫ້ທຸກຄົນສາມາດຊົມໃຊ້ສິດໃນການພັດທະນາ.
ປີ2020, ບັ້ນຮົບຕ້ານກັບພະຍາດໂຄວິດ-19ຂອງຈີນໄດ້ກາຍເປັນເລື່ອງລາວທີ່ອົບອຸ່ນແລະມີຊີວິດຊີວາທີ່ໄດ້ສ່ອງແສງໃຫ້ເຫັນເຖິງແນວຄິດ “ປະຊາຊົນຢູ່ເໜືອກວ່າທຸກສິ່ງຢ່າງ”. ເມື່ອຜະເຊີນໜ້າກັບການແຜ່ລະບາດຂອງພະຍາດໂຄວິດ-19,ພັກກອມມູນິດຈີນໄດ້ກຳນົດຢ່າງຈະແຈ້ງມາຕັ້ງແຕ່ຫົວທີວ່າ: ຖືເອົາຄວາມປອດໄພດ້ານຊີວິດແລະສຸຂະພາບຮ່າງກາຍຂອງປະຊາຊົນສຳຄັນກວ່າໝູ່. ທ່ານສີຈິ້ນຜິງກ່າວວ່າ:“ປະຊາຊົນຢູ່ເໜືອກວ່າທຸກສິ່ງຢ່າງ, ຊີວິດຢູ່ເໜືອກວ່າທຸກສິ່ງຢ່າງ, ເພື່ອປົກປ້ອງຄວາມປອດໄພດ້ານຊີວິດແລະສຸຂະພາບຮ່າງກາຍຂອງປະຊາຊົນແມ່ນສາມາດເສຍຄ່າຕອບແທນໄດ້ທຸກຢ່າງ.”
ຈີນໄດ້ຈັດສັນກຳລັງແພດໝໍທີ່ດີເດັ່ນທີ່ສຸດແລະ ອຸປະກອນການແພດທີ່ກ້າວໜ້າທັນສະໄໝທີ່ສຸດ ທັງເຕົ້າໂຮມກຳລັງແຮງສັງລວມທົ່ວປະເທດເພື່ອປົກປ້ອງສິດໃນການມີຊີວິດຂອງປະຊາຊົນປະເທດຕົນ, ເພື່ອເອົາຊະນະບັ້ນຮົບປ້ອງກັນ,ຄວບຄຸມແລະສະກັດກັ້ນພະຍາດຄັ້ງນີ້. ມີບົດວິເຄາະຊີ້ໃຫ້ເຫັນວ່າ: ເບິ່ງຈາກແງ່ມູມດ້ານສິດໃນການມີຊີວິດແລະສິດໃນການພັດທະນາແລ້ວສາມາດເຂົ້າໃຈໄດ້ວ່າ: ແນວຄິດການກຳອຳນາດແລະສະຕິປັນຍາດ້ານການບໍລິຫານປະເທດຂອງພັກກອມມູນິດຈີນແມ່ນມີຄຸນປະໂຫຍກຕໍ່ທົ່ວໂລກ.
ຍ້ອນຫຍັງພັກກອມມູນິດຈີນຈິ່ງສາມາດປ້ອງກັນສຸຂະພາບຂອງປະຊາຊົນແລະນຳພາປະຊາຊົນຫຼຸດພົ້ນອອກຈາກຄວາມທຸກຍາກໄດ້ໂດຍບໍ່ເສຍດາຍຄ່າຕອບແທນໃດໆ ?ຄືດັ່ງທີ່ທ່ານສີຈິ້ນຜິງໄດ້ກ່າວວ່າ: “ພັກເຮົາບໍ່ມີຜົນປະໂຫຍດພິເສດຂອງຕົນ, ເວລາໃດພັກກໍໄດ້ຖືເອົາຜົນປະໂຫຍດຂອງປະຊາຊົນສຳຄັນກວ່າໝູ່.” ທ່ານກ່າວວ່າ:
“ພື້ນຖານຂອງພັກກອມມູນິດຈີນຢູ່ນຳປະຊາຊົນ, ສາຍເລືອດແມ່ນຢູ່ນຳປະຊາຊົນ. ຕ້ອງຍຶດໝັ້ນໃນແນວຄິດການພັດທະນາທີ່ຖືປະຊາຊົນເປັນໃຈກາງ, ບໍ່ວ່າຈະຜະເຊີນກັບສິ່ງທ້າທາຍແລະແຮງກົດດັນຫຼາຍສ່ຳໃດ,ບໍ່ວ່າຈະຕ້ອງເສຍສະຫຼະແລະເສຍຄ່າຕອບແທນຫຼາຍເທົ່າໃດ, ກໍຕ້ອງຍຶດໝັ້ນແນວຄິດດັ່ງກ່າວຢ່າງໝັ້ນ ໜຽວບໍ່ປ່ຽນແປງແລະບໍ່ຫວັ່ນໄຫວຄອນແຄນຢ່າງສະເໝີຕົ້ນສະເໝີປາຍ.”
ທ່ານສີຈິ້ນຜິງຢ້ຽມຢາມປະຊາຊົນຜູ້ທຸກຍາກ
ຍື່ນຄຳຕອບຂອງບົດສອບເສັງທີ່ດີງາມກວ່າເກົ່າໃຫ້ແກ່ປະຫວັດສາດແລະປະຊາຊົນ
ການຄຸ້ມຄອງລັດຕ້ອງຄຸ້ມຄອງພັກສາກ່ອນ, ການຄຸ້ມຄອງພັກຕ້ອງຄຸ້ມຄອງຢ່າງເຂັ້ມງວດ. ນັບຕັ້ງແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານສີຈິ້ນຜິງໄດ້ສ້າງພາບປະທັບໃຈອັນເລິກເຊິ່ງໃຫ້ແກ່ພາຍນອກໃນການຄຸ້ມຄອງພັກຢ່າງເຂັ້ມງວດຮອບດ້ານ ໂດຍມີຄວາມເດັດຂາດໃນການຕັດສິນໃຈແລະ ມີຄວາມໝັ້ນໃຈໃນການຕ້ານການສໍ້ລາດບັງຫຼວງຢ່າງເຂັ້ມແຂງ. ໃນຊຸມປີຜ່ານມາ, ລະດັບຕຳແໜ່ງແລະຈຳນວນຂອງພະນັກງານການນຳທີ່ຖືກລົງໂທດ ກໍຄືຄວາມຖີ່ໃນການລົງໂທດພະນັກງານການນຳຜູ້ສໍ້ລາດບັງຫຼວງນັ້ນແມ່ນສູງກວ່າທຸກປີຜ່ານມາ. ໃນຂະນະດຽວກັນ, ການສ້າງລະບຽບການຕ່າງໆກໍໄດ້ດຳເນີນໄປຢ່າງຕໍ່ເນື່ອງ, ຕົວຢ່າງເຊັ່ນ:ການປະຕິບັດ “ກົດເຫຼັກ 8 ຂໍ້” ຂະບວນການ“ຕ້ານແບບແຜນຫຍໍ້ທໍ້ 4 ຢ່າງ” ການກວດກາວິໄນຂອງຂັ້ນສູນກາງແບບສັນຈອນທີ່ໄດ້ຫັນເປັນລະບຽບການນັ້ນໄດ້ກາຍເປັນການເຄື່ອນໄຫວປົກກະຕິ. ທ່ານສີຈິ້ນຜິງໄດ້ກ່າວເຕືອນໃຫ້ພະນັກງານ-ສະມາຊິກພັກທຸກຖ້ວນໜ້າວ່າ: “ເງິນຫຼວງເປັນຂອງລັດ, ຫ້າມບໍ່ໃຫ້ໃຊ້ຈ່າຍຟຸມເຟືອຍແມ່ນແຕ່ອັດດຽວ, ສິດອຳນາດສ່ວນລວມເປັນຂອງປະຊາຊົນ, ຫ້າມບໍ່ໃຫ້ສວຍໃຊ້ເພື່ອສະແຫວງຫາຜົນປະໂຫຍດສ່ວນຕົວແມ່ນແຕ່ໜ້ອຍດຽວ.”ທ່ານກ່າວວ່າ:
“ປະຊາຊົນຄຽດຊັງປະກົດການສໍ້ລາດບັງຫຼວງທີ່ສຸດ, ປະກົດການສໍ້ລາດບັງຫຼວງເປັນສິ່ງທ້າທາຍໃຫຍ່ທີ່ສຸດທີ່ພັກເຮົາກຳລັງຜະເຊີນຢູ່. ມີພຽງແຕ່ຍຶດໝັ້ນໃນການຕ້ານການສໍ້ລາດບັງຫຼວງຢ່າງຕໍ່ເນື່ອງແລະເດັດຂາດ, ລົງເລິກປາບປາມໃຫ້ເຖິງຖອງ, ຮັບປະກັນໃຫ້ພະນັກງານການນຳມີຄວາມບໍລິສຸດຍຸຕິທຳ, ລັດມີຄວາມປອດໃສຂາວສະອາດແລະການເມືອງມີຄວາມໂປ່ງໃສ, ຈິ່ງຈະສາມາດພົ້ນອອກຈາກວັດທະຈັກປະຫວັດສາດ, ຮັບປະກັນໃຫ້ພັກແລະປະເທດຊາດມີຄວາມໝັ້ນຄົງຖາວອນ.”
ທ່ານສີຈິ້ນຜິງຢ້ຽມຢາມປະຊາຊົນຜູ້ທຸກຍາກ
ການເຕີບໃຫຍ່ຂອງພັກການເມືອງກັບການຟື້ນຟູຄວາມຈະເລີນຮຸ່ງເຮືອງຂອງປະເທດຊາດມີສາຍພົວພັນກັນຢ່າງໃກ້ຊິດ. ຈາກຄວາມໜຸ່ມນ້ອຍທີ່ຍັງບໍ່ທັນເຂັ້ມແຂງໃນໄລຍະຫາກໍ່ສ້າງຕັ້ງຂຶ້ນໃນເບື້ອງຕົ້ນຈົນຮອດມີຄວາມເຂັ້ມແຂງຄືໃນທຸກມື້ນີ້, ໃນຖານະເປັນພັກກຳອຳນາດຂອງປະເທດໃຫຍ່ທີ່ມີປະຊາກອນ1,4ຕື້ຄົນ, ພັກກອມມູນິດຈີນໄດ້ເຕີບໃຫຍ່ແລະຟື້ນຄືນຊີບອີກໃໝ່ໃນການທົດສອບອີກແລ້ວອີກຕື່ມ.
ມຸ້ງໜ້າສູ່ອະນາຄົດ, ທ່ານສີຈິ້ນຜິງກ່າວເນັ້ນວ່າ: ສະມາຊິກພັກກອມມູນິດຈີນທຸກຖ້ວນໜ້າກໍຕ້ອງພະຍາຍາມຍື່ນຄຳຕອບຂອງບົດສອບເສັງອັນໃໝ່ແລະດີງາມກວ່າເກົ່າ ໃຫ້ແກ່ປະຫວັດສາດແລະປະຊາຊົນ.”
ທ່ານກ່າວວ່າ: “ຕອນເຊົ້າວັນທີ23 ມີນາປີ 1949, ເມື່ອສູນກາງພັກໄດ້ເດີນທາງອອກຈາກເຂດຊີ່ປາຍພົ່ວໄປປັກກິ່ງ, ທ່ານໝາວເຈີຕຸ່ງໄດ້ກ່າວວ່າ: “ມື້ນີ້ແມ່ນມື້ທີ່ພັກເຮົາເດີນທາງໄປສອບເສັງຢູ່ປັກກິ່ງ”. ພັກເຮົາສາມັກຄີແລະນຳພາປະຊາຊົນເຮັດວຽກງານທຸກປະການໃນທຸກມື້ນີ້ ກໍແມ່ນເພື່ອສືບຕໍ່ການສອບເສັງຄັ້ງນັ້ນ. ບັນດາສະຫາຍໃນທົ່ວພັກເດັດຂາດຢ່າຫລົງລືມອຸດົມການແຕ່ຫົວທີ, ຕ້ອງສືບຕໍ່ກ້າວເດີນໄປໜ້າ, ຮັກສາແບບແຜນທີ່ຖ່ອມຕົວ, ສຸຂຸມຮອບຄອບ, ບໍ່ອວດອົ່ງທະນົງຕົວ, ບໍ່ຟ້າວຟັ່ງຮ້ອນຮົນຕະຫຼອດໄປແລະຮັກສາແບບແຜນທີ່ບຸກບືນສູ້ຊົນດ້ວຍຄວາມທໍລະຫົດອົດທົນຕະຫຼອດໄປ, ກ້າດຳເນີນການປະຕິຮູບ, ກ້າປະດິດສ້າງໃໝ່, ບໍ່ຕາຍຕົວແລະບໍ່ຢຸດຈຶ້ງຢູ່ບ່ອນເກົ່າຕະຫຼອດໄປເພື່ອສືບຕໍ່ຜ່ານຜ່າບັ້ນທົດສອບໃນການສອບເສັງຄັ້ງປະຫວັດສາດໃນຄັ້ງນັ້ນ, ພະຍາຍາມຍື່ນຄຳຕອບຂອງບົດສອບເສັງອັນໃໝ່ແລະດີງາມກວ່າເກົ່າໃຫ້ແກ່ປະຫວັດສາດແລະປະຊາຊົນ.”
ຄຳເຫັນ
0