ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນງານຟັງຄຳໃຫ້ການກ່ຽວກັບການແຜ່ລະບາດຂອງພະຍາດໂຄວິດ-19 ທີ່ລັດຖະສະພາອາເມຣິກາຈັດຂຶ້ນໃນວັນທີ 30 ມິຖຸນາແລ້ວນີ້, ທ່ານອັນໂທນີ ຟາວຊີ ນັກວິທະຍາສາດພະຍາດຕິດແປດທີ່ມີຊື່ສຽງຂອງອາເມຣິກາກ່າວວ່າ: ຖ້າວ່າອາເມຣິກາມີຜູ້ຖືກບົ່ງມະຕິເປັນພະຍາດໂຄວິດ-19 ເພີ່ມໃໝ່ຫຼາຍກວ່າ 1 ແສນກໍລະນີຕໍ່ມື້, ຕົນເອງຈະບໍ່ຮູ້ສຶກແປກໃຈຈັກໜ້ອຍ. ທ່ານກ່າວວ່າ: “ຕົວເລກສະຖິຕິຂອງຜູ້ຖືກບົ່ງມະຕິຕິດແປດໃໝ່ຊີ້ໃຫ້ເຫັນວ່າ: ທິດທາງຂອງພວກເຮົາໃນການຮັບມືກັບການແຜ່ລະບາດຂອງພະຍາດແມ່ນຜິດພາດ. ນີ້ເປັນເລື່ອງທີ່ຈະແຈ້ງແລ້ວວ່າ: ພວກເຮົາບໍ່ສາມາດຄວບຄຸມສະພາບການຂອງການແຜ່ລະບາດໄດ້ຢ່າງຮອບດ້ານ.”
ຕົວເລກສະຖິຕິຫຼ້າສຸດທີ່ມະຫາວິທະຍາໄລຈອນ ຮັອບຄິນສ໌ເປີດເຜີຍສະແດງໃຫ້ເຫັນວ່າ: ນັບມາຮອດເວລາ 5 ໂມງຂອງວັນທີ 3 ກໍລະກົດນີ້ຕາມເວລາວຽງຈັນ, ຜູ້ຖືກບົ່ງມະຕິເປັນພະຍາດໂຄວິດ-19 ຢູ່ອາເມຣິກາມີເຖິງ 2.732.639 ກໍລະນີ, ມີຜູ້ເສຍຊີວິດແລ້ວ 128.651 ຄົນ. ໃນນັ້ນ ໃນມື້ດຽວທີ່ມີຜູ້ຖືກບົ່ງມະຕິເປັນພະຍາດໂຄວິດ-19 ເພີ່ມໃໝ່ເຖິງ 54.771 ກໍລະນີ.
ສະພາບການແຜ່ລະບາດຂອງພະຍາດໂຄວິດ-19 ຢູ່ອາເມຣິກາມີຄວາມຮ້າຍແຮງກວ່າເກົ່າ, ບັນຫາທີ່ວ່າຈະໃສ່ຜ້າປິດປາກຫຼືບໍ່ນັ້ນ ໄດ້ກາຍເປັນຈຸດພົ້ນເດັ່ນຂອງປະຊາຊົນອາເມຣິກາທີ່ນຳມາຖົກຖຽງກັນອີກຄັ້ງໜຶ່ງ. ວັນທີ 29 ມິຖຸນາແລ້ວນີ້, ໃນເວລາຕອບຄຳຖາມຂອງນັກຂ່າວກ່ຽວກັບທ່ານໂດໂນ ທຣຳຈະໃສ່ຜ້າປິດປາກໃນກອງປະຊຸມຄົບຄະນະທົ່ວປະເທດຂອງພັກຣີພັບບຣີກັນອາເມຣິກາທີ່ຈະຈັດຂຶ້ນໃນເດືອນສິງຫາໜ້ານີ້ຫຼືບໍ່, ທ່ານນາງເຄລີ ແມັກນະນີ ໂຄສົກທຳນຽບຂາວບໍ່ໄດ້ໃຫ້ຄຳຕອບຢ່າງຈະແຈ້ງ, ນາງກ່າວວ່າ: “ນີ້ແມ່ນຄວາມຕັດສິນໃຈສ່ວນຕົວຂອງປະທານາທິບໍດີເອງ, ທ່ານເຫັນວ່າ, ການທີ່ຈະໃສ່ຜ້າປິດປາກຫຼືບໍ່ນັ້ນ ຄວນໃຫ້ທຸກຄົນຕັດສິນດ້ວຍຕົນເອງ.” ໃນເມື່ອບໍ່ດົນມານີ້, ທ່ານໄມ ເພັນສ໌ ຮອງປະທານາທິບໍດີອາເມຣິກາໄດ້ກ່າວປາໄສໃນສຸເຫຼົ່າໃຫຍ່ແຫ່ງໜຶ່ງຢູ່ນະຄອນດາລັສ, ຢູ່ສຸເຫຼົ່າດັ່ງກ່າວມີຜູ້ເຂົ້າຮ່ວມປະຊຸມ 2.000 ກວ່າຄົນ ໃນນັ້ນມີຄະນະຮ້ອງເພງໃນໂບດ 100 ຄົນ, ເຂົາເຈົ້າຢືນຢູ່ໃກ້ກັນຫຼາຍ ແລະບໍ່ໄດ້ໃສ່ຜ້າປິດປາກໃນເວລາຮ້ອງເພງ. ຜົນການຄາດຄະເນຂອງຫ້ອງການປະເມີນແລະດັດຊະນີສຸຂະພາບຂອງສະຖາບັນການແພດຂອງມະຫາວິທະຍາໄລວໍຊິງຕັນກ່າວວ່າ: ຖ້າວ່າຍັງສືບຕໍ່ບໍ່ໃສ່ຜ້າປິດປາກ, ເມື່ອຮອດວັນທີ 1 ຕຸລາປີນີ້, ອາເມຣິກາອາດຈະມີປະຊາຊົນ 1.75 ແສນຄົນເສຍຊີວິດຍ້ອນເປັນພະຍາດໂຄວິດ-19.
ໃນກອງປະຊຸມຖະແຫຼງຂ່າວປະຈຳວັນທີ່ອົງການອະນາໄມໂລກຫຼື WHO ຈັດຂຶ້ນໃນວັນທີ 1 ກໍລະກົດນີ້, ຜູ້ອຳນວຍການໃຫຍ່ WHO ກ່າວວ່າ: ການແຜ່ລະບາດຂອງພະຍາດໂຄວິດ-19 ບໍ່ພຽງແຕ່ແມ່ນບັນຫາຫຍຸ້ງຍາກດ້ານວິທະຍາສາດເທົ່ານັ້ນ, ທັງເປັນການທົດສອບຕໍ່ລັກສະນະຕື່ນຕົວຂອງມະນຸດ, ສິ່ງທີ່ເຮັດໃຫ້ຄົນທັງຫຼາຍກັງວົນນັ້ນກໍຄືມີບາງປະເທດທີ່ມີຄວາມສາມາດໃນການປ້ອງກັນການແຜ່ລະບາດຂອງພະຍາດຢ່າງຮອບດ້ານ, ແຕ່ພັດບໍ່ໄດ້ນຳໃຊ້ເຄື່ອງມືທັງໝົດທີ່ເຂົາເຈົ້າມີຢູ່.
ເລີ່ມແຕ່ປີນີ້ເປັນຕົ້ນມາ, ໂດຍຜະເຊີນໜ້າກັບການແຜ່ລະບາດຂອງພະຍາດໂຄວິດ-19 ເຊິ່ງເປັນສັດຕູຮ່ວມຂອງມະນຸດ, ທ່ານໄມ ພົວແພວ ລັດຖະມົນຕີກະຊວງການຕ່າງປະເທດອາເມຣິກາບໍ່ໄດ້ເອົາໃຈໃສ່ເຖິງເລື່ອງຄວາມເປັນຈິງ ພັດມັກເວົ້າຖ້ອຍຄວາມຫຼອກລວງຢູ່ຕະຫຼອດ, ສວຍໃຊ້ການແຜ່ລະບາດຂອງພະຍາດເພື່ອໃສ່ຮ້າຍປ້າຍສີແລະທຳລາຍບົດບາດຊື່ສຽງຂອງຈີນເລື້ອຍໆ. ນັກການເມືອງອາເມຣິກາຈຳນວນໜຶ່ງຄວນຢຸດຕິການໃສ່ຮ້າຍປ້າຍສີປະເທດອື່ນໄດ້ແລ້ວ, ຄວນຖືເອົາການຕ້ານກັບການແຜ່ລະບາດຂອງພະຍາດໂຄວິດ-19 ຢູ່ພາຍໃນປະເທດອາເມຣິກາແລະ ການກອບກູ້ຊີວິດຂອງປະຊາຊົນອາເມຣິກາຢູ່ເໜືອກວ່າທຸກສິ່ງທຸກຢ່າງໂດຍໄວ ຈະດີກວ່າ.ຈົ່ງເຄົາລົບນັບຖືເລື່ອງຄວາມເປັນຈິງແລະວິທະຍາສາດ, ຢ່າເວົ້າຄຳຫຼອກລວງອີກ.
ຄຳເຫັນ
0