ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 4 ກໍລະກົດນີ້ຕາມເວລາທ້ອງຖິ່ນເປັນວັນຊາດຂອງອາເມຣິກາເປັນເອກະລາດຄົບຮອບ 244 ປີໄດ້ໝູນວຽນມາເຖິງ. ເວົ້າສຳລັບສະຫະລັດອາເມຣິກາແລ້ວ, ວັນດັ່ງກ່າວຄວນເປັນວັນບຸນທີ່ຄຶກຄື້ນ, ແຕ່ວ່າໃນໄລຍະພິເສດນີ້, ຄວາມອ່ອນແອ ແລະ ຄວາມແຕກແຍກໃນສັງຄົມອາເມຣິກາພັດໄດ້ພົ້ນເດັ່ນຂຶ້ນ.
ວັນດັ່ງກ່າວ, ຂະບວນການຕ້ານການຈຳແນກເຊື້ອຊາດແລະຜິວພັນຂອງອາເມຣິກາໄດ້ດຸເດືອດຂຶ້ນ, ຄຳຂວັນ “ຊີວິດຂອງຄົນຜິວດຳກໍມີຄວາມສຳຄັນ” ໄດ້ດັງກ້ອງກັງວານເຖິງທຳນຽບຂາວອີກຄັ້ງໜຶ່ງ. ຕົວເລກຂໍ້ມູນທີ່ເປີດເຜີຍໃນມື້ດຽວກັນສະແດງໃຫ້ເຫັນວ່າ, ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ທີ່ເພີ່ມໃໝ່ຕະຫຼອດ 24 ຊົ່ວໂມງຜ່ານມາໄດ້ສ້າງສະຖິຕິໃໝ່, ຄືມີເຖິງ 57.497 ກໍລະນີ ເຊິ່ງໄດ້ບັງຄັບໃຫ້ອາເມຣິກາຈຳເປັນຕ້ອງຍົກເລີກກິດຈະກຳລະນຶກວັນຊາດ. ແຕ່ວ່າໃນມື້ດຽວກັນ, ທ່ານໂດໂນ ທຣຳ ປະທານາທິບໍດີອາເມຣິກາພັດກ່າວວ່າ: ເຊື້ອພະຍາດໂຄວິດ-19 ຢູ່ອາເມຣິກາ 99% ຂຶ້ນໄປແມ່ນ “ບໍ່ມີຜົນຮ້າຍຫຍັງ”, ອາເມຣິກາພວມເດີນໄປຕາມເສັ້ນທາງສູ່ໄຊນະນະ.
ໃນຂະນະດຽວກັນ, ເພື່ອໂຄສະນາຫາງສຽງ, ທ່ານໂດໂນ ທຣຳເກືອບເໝົາຊື້ເອົາຍອດການຜະລິດຢາ Remdesivir ທີ່ຖືກຖືວ່າເປັນຢາທີ່ສາມາປິ່ນປົວພະຍາດໂຄວິດ-19 ໄດ້ດີ ເຊິ່ງບໍ່ໄດ້ເອົາຫົວຊາຕໍ່ຜົນປະໂຫຍດຮ່ວມຂອງມວນມະນຸດ, ນີ້ເປັນການປະຕິບັດນະໂຍບາຍ “ອາເມຣິກາຕ້ອງມາກ່ອນ” ຢ່າງສຸດຂີດ.
ຕົວເລກຢັ່ງຄວາມຄິດເຫັນຂອງບໍລິສັດ YouGov ແລະ ຂ່າວ Yahoo ຮ່ວມກັນເຮັດຂຶ້ນສະແດງໃຫ້ເຫັນວ່າ: ຊາວອາເມຣິກາມີພຽງ 17% ເຫັນວ່າອາເມຣິກາເປັນແບບຢ່າງໃຫ້ກັບໂລກ, ມີພົນລະເມືອງອາເມຣິກາ 62% ເຫັນວ່າ ອາເມຣິກາຈະບໍ່ສົມກັບຊື່ດັ່ງກ່າວ ແລະ ມີ 40% ເຫັນວ່າ, ຈີນເຮັດໄດ້ດີກວ່າອາເມຣິກາໃນການປ້ອງກັນ ແລະ ຄວບຄຸມພະຍາດ.
ໂດຍໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ການຊຸດໂຊມລົງຂອງເສດຖະກິດ ແລະ ການຈຳແນກເຊື້ອຊາດຜິວພັນ, ອາເມຣິກາເຕັມໄປດ້ວຍຫາງສຽງກັງວົນ. “ໜັງສືພິມວໍຊິງຕັນໂພສ” ຊີ້ອອກວ່າ: ການແຜ່ລະບາດຂອງພະຍາດໂຄວິດ-19 ໄດ້ສະທ້ອນໃຫ້ເຫັນຄວາມອ່ອນແອ ແລະ ຄວາມແຕກແຍກຂອງອາເມຣິກາ.
ສິ່ງທີ່ປະຕິເສດບໍ່ໄດ້ນັ້ນກໍຄື, ໃນໄລຍະຂ້າງໜ້າທີ່ຍາວສົມຄວນ, ອາເມຣິກາຍັງຄົງແມ່ນມະຫາອຳນາດພຽງໜຶ່ງດຽວຂອງໂລກ, ແຕ່ຖ້າຫາກວ່າລັດຖະບານອາເມຣິກາຫຼອກລວງປະຊາຊົນເພື່ອໂຄສະນາຫາງສຽງ, ບໍ່ເອົາຫົວຊາຕໍ່ການຈຳແນກເຊື້ອຊາດຜິວພັນ. ໃນຂະນະດຽວກັນ, ຍັງ “ຖິ້ມໂທດ” ໃສ່ປະເທດອື່ນ ເພື່ອຫັນເຫຄວາມຂັດແຍ້ງພາຍໃນປະເທດ, ອາເມຣິກາຈະເສຍຖານະທີ່ເປັນແບບຢ່າງຂອງໂລກໃນທີ່ສຸດ.
ຄຳເຫັນ
0