ການລາຍງານຂ່າວຂອງສື່ມວນຊົນຕ່າງໆໄດ້ຢັ້ງຢືນວ່າ: ວັນທີ 7 ກໍລະກົດນີ້, ລັດຖະບານອາເມຣິກາໄດ້ດຳເນີນຂັ້ນຕອນຂອງການຖອນອອກຈາກອົງການອະນາໄມໂລກຢ່າງເປັນທາງການ. ກ່ອນໜ້ານີ້ໜຶ່ງມື້, ຈີນໄດ້ປະກາດການເຂົ້າຮ່ວມເປັນປະເທດພາຄີຂອງ “ສົນທິສັນຍາວ່າດ້ວຍການຄ້າອາວຸດ” ຢ່າງເປັນທາງການ. ການຖອນອອກອົງການຈັດຕັ້ງສາກົນຂອງອາເມຣິກາແລະການເຂົ້າຮ່ວມອົງການຈັດຕັ້ງສາກົນຂອງຈີນໄດ້ສະແດງໃຫ້ເຫັນເຖິງການປະຕິເສດຄວາມຮັບຜິດຊອບຂອງອາເມຣິກາແລະການແບກຫາບຄວາມຮັບຜິດຊອບຂອງຈີນຕໍ່ສາກົນ.
ໃນຊຸມປີຜ່ານມາ, ອາເມຣິກາໄດ້ປະຕິບັດນະໂຍບາຍ “ອາເມຣິກາຕ້ອງມາກ່ອນ” ໃນຂົງເຂດຕ່າງໆ, “ການຖອນອອກຈາກສັນຍາ” ໄດ້ກາຍເປັນເລື່ອງທຳມະດາແລ້ວສຳລັບອາເມຣິກາ. ນັບແຕ່ການຖອນອອກຈາກສັນຍາຮອບດ້ານກ່ຽວກັບບັນຫານິວເຄລຍອີຣານ, ສົນທິສັນຍາວ່າດ້ວຍການທຳລາຍຂີປະນາວຸດໄລຍະໃກ້ແລະໄລຍະກາງ ແລະ ສັນຍາປາຣີກ່ຽວກັບການປ່ຽນແປງຂອງດິນຟ້າອາກາດ ຈົນຮອດການຍົກເລີກການລົງນາມເປັນພາຄີໃນ “ສົນທິສັນຍາວ່າດ້ວຍການຄ້າອາວຸດ”, ການຖອນອອກຈາກສະພາມົນຕີສິດທິມະນຸດຂອງອົງການສະຫະປະຊາຊາດ, ອົງການອະນາໄມໂລກແລະອື່ນໆ, ການກະທຳຕ່າງໆຂອງອາເມຣິກາເປັນເລື້ອງຍາກທີ່ຈະເຮັດໃຫ້ປະຊາຄົມໂລກເຫັນດີນຳ.
ໃນຂະນະດຽວກັນ, ຈີນໄດ້ຊູຄັນທຸງລັດທິຫຼາຍຝ່າຍ. ນັບແຕ່ການປົກປ້ອງລະບົບການຄ້າເສລີຢ່າງເດັດດ່ຽວ ຈົນຮອດການເຂົ້າຮ່ວມຢ່າງຕັ້ງໜ້າໃນການຮ່ວມມືກັນຕ້ານກັບການແຜ່ລະບາດຂອງພະຍາດໂຄວິດ-19 ຂອງໂລກ; ຈາກການສະໜັບສະໜູນອົງການຈັດຕັ້ງສາກົນໃນການເສີມຂະຫຍາຍບົດບາດທີ່ສຳຄັນຢ່າງແໜ້ນໜຽວ ຈົນຮອດການສຸມຄວາມພະຍາຍາມໃນການປົກປັກຮັກສາລະບົບການຄວບຄຸມກຳລັງຮົບສາກົນໃນປັດຈຸບັນ, ໂດຍປະເຊີນກັບລັດທິຝ່າຍດຽວແລະລັດທິປົກປ້ອງໃນໂລກໄດ້ເງີຍໜ້າແລະແຜ່ຂະຫຍາຍເປັນກ້າວໆ, ຈີນປົກປັກຮັກສາກົນໄກສັນຕິພາບແລະຄວາມໝັ້ນຄົງສາກົນ ໄດ້ສະແດງໃຫ້ເຫັນເຖິງອິດທິພົນແລະກຳລັງນຳພາຂອງຕົນ.
ຈີນແລະອາເມຣິກາແມ່ນປະເທດທີ່ໄດ້ຮັບຄວາມສົນໃຈຫຼາຍທີ່ສຸດໃນໂລກ, ປະຊາຄົມໂລກຄອງຄອຍຢາກເຫັນສອງຝ່າຍສາມາດຮັກສາການພົວພັນໃນລັກສະນະທີ່ມີທັງການແຂ່ງຂັນແລະການຮ່ວມມືກັນ, ຮ່ວມກັນປົກປັກຮັກສາຄວາມໝັ້ນຄົງແລະຄວາມຈະເລີນຮຸ່ງເຮືອງຂອງໂລກ. ຄັນຊັ້ນແມ່ນໃຜກັນແທ້ທີ່ແມ່ນປະເທດໃຫຍ່ທີ່ມີຄວາມຮັບຜິດຊອບ ແລະ ໄດ້ເສີມຂະຫຍາຍບົດບາດເປັນຜູ້ຮັກສາຄວາມໝັ້ນທ່ຽງທີ່ສຳຄັນທີ່ສຸດໃນຂະນະທີ່ໂລກພວມປະເຊີນກັບສິ່ງທ້າທາຍຕ່າງໆ? ແລະ ແມ່ນໃຜກັນແທ້ທີ່ເປັນຜູ້ມັກສ້າງເລື້ອງສ້າງບັນຫາ ແລະ ເປັນຜູ້ທຳລາຍລັດທິຫຼາຍຝ່າຍທີ່ແທ້ຈິງ ທັງເປັນຜູ້ສ້າງປັດໄຈທີ່ບໍ່ແນ່ນອນທີ່ສຸດຕໍ່ຄວາມເປັນລະບຽບຮຽບຮ້ອຍຂອງສາກົນ? ການຖອນອອກຈາກອົງການຈັດຕັ້ງສາກົນຂອງອາເມຣິກາແລະການເຂົ້າຮ່ວມອົງການຈັດຕັ້ງສາກົນຂອງຈີນໃນຫວ່າງມໍ່ໆມານີ້ ຈຶ່ງເປັນຄຳຕອບທີ່ຈະແຈ້ງຢູ່ແລ້ວ.
ຄຳເຫັນ
0