ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານສີຈິ້ນຜິງໄດ້ເດີນທາງໄປຢ້ຽມຢາມປະເທດຕ່າງໆໃນໂລກ ໂດຍໄດ້ຜູກມິດຢ່າງກວ້າງຂວາງພາຍໃຕ້ປັດໄຈພື້ນຖານທີ່ຍຶດໝັ້ນໃນຫຼັກການບໍ່ຮ່ວມກຸ່ມ ເຊິ່ງໄດ້ເຮັດໃຫ້ຈີນກັບໂລກເພີ່ມທະວີສາຍພົວພັນອັນໃກ້ຊິດກັນຢ່າງບໍ່ຢຸດຢັ້ງ.
ໃນພິທີເປີດກອງປະຊຸມເວທີປຶກສາຫາລືຂັ້ນສູງກ່ຽວກັບການຮ່ວມມືສາກົນ “ໜື່ງແລວໜຶ່ງເສັ້ນທາງ” ຄັ້ງທີ 2 ເມື່ອປີ 2019, ທ່ານວະລາດີເມຍປູຕິນປະທານາທິບໍດີຣັດເຊຍໄດ້ກ່າວວ່າ: “ຈີນຈະຄົບຄ້າກັບປະເທດອື່ນດ້ວຍຮູບການແນວໃດນັ້ນເປັນສິ່ງທີ່ມີຄວາມໝາຍເລິກເຊິ່ງແລະຍາວນານ.”
ຄຳເວົ້າດັ່ງກ່າວຂອງທ່ານປູຕິນແມ່ນມີຄວາມໝາຍອັນເລິກເຊິ່ງ. ປີ2014,ໃນງານກິລາໂອລິມປິກລະດູໜາວທີ່ຈັດຂຶ້ນຢູ່ເມືອງໂຊຈີປະເທດຣັດເຊຍ, ທ່ານສີຈິ້ນຜິງທີ່ໄດ້ເດີນທາງໄປເຂົ້າຮ່ວມພິທີເປີດງານດັ່ງກ່າວນັ້ນໄດ້ກ່າວວ່າ: “ປະເທດເພື່ອນບ້ານໃກ້ຄຽງໄດ້ຈັດງານສິລິມຸງຄຸນ, ຂ້າພະເຈົ້າຕ້ອງມາສະແດງຄວາມຊົມເຊີຍແນ່ນອນ” ເຊິ່ງໄດ້ສະທ້ອນໃຫ້ເຫັນມິດຕະພາບອັນປະເສີດດັ່ງກອນບູຮານຈີນທີ່ວ່າ :“ຄຳໝັ້ນສັນຍາອັນໜັກແໜ້ນຕອນແຮກສ່ຽວ, ເຖິງຈະຢູ່ໄກກັນພັນລີ້ກໍຕ້ອງເດີນທາງໄປພົບກັນຕາມນັດໝາຍ”. ສ່ວນໃນຊຸມປີມໍ່ໆມານີ້, ກິດຈະກຳການຕ່າງປະເທດລະດັບສາກົນທີ່ຈີນເປັນເຈົ້າພາບຈັດຂຶ້ນນັ້ນ, ທ່ານປະທານາທິບໍດີປູຕິນກໍໄດ້ໃຫ້ກຽດເຂົ້າຮ່ວມເກືອບທຸກເທື່ອຕາມຄຳເຊີນ.
ນອກນີ້, ຈີນຍັງມີເພື່ອນມິດທີ່ດີແລະເພື່ອນເກົ່າຜູ້ໜຶ່ງຄື: ລາວ. ຕອນທ່ານສີຈິ້ນຜິງຢ້ຽມຢາມປະເທດລາວໃນເດືອນມິຖຸນາປີ 2010 ໃນຖານະເປັນຮອງປະທານປະເທດຈີນ, ທ່ານກໍໄດ້ພົບປະ ແລະ ປຶກສາຫາລືກັບ ທ່ານ ບຸນຍັງ ວໍລະຈິດ ຮອງປະທານປະເທດແຫ່ງສປປລາວໃນເວລານັ້ນຢູ່ນະຄອນຫຼວງວຽງຈັນ. ໃນການພົບປະຄັ້ງນັ້ນ, ທ່ານສີຈິ້ນຜິງເຄີຍໄດ້ກ່າວວ່າ: “ຜູ້ນຳສອງປະເທດໄດ້ເດີນທາງໄປມາຫາສູ່ກັນເລື້ອຍໆປານຍາດຕິພີ່ນ້ອງ.” ຫຼາຍປີຜ່ານມາ, ການນຳຂັ້ນສູງຂອງຈີນ ແລະ ລາວໄດ້ຮັກສາການແລກປ່ຽນຢ້ຽມຢາມເຊິ່ງກັນແລະກັນເປັນປະຈຳປານຍາດຕິພີ່ນ້ອງຕະຫຼອດມາ.
ຍັງມີບຸກຄົນສຳຄັນທາງການເມືອງຂອງຫຼາຍປະເທດກໍໄດ້ສ້າງສະຖິຕິໃໝ່ຂອງຕົນໃນການເດີນທາງຢ້ຽມຢາມຈີນ.
ໃນປີ2019, ທ່ານນາຊາບາເຢັຟ ປະທານາທິບໍດີຄົນທຳອິດຂອງປະເທດກາຊັກສະຖານທີ່ເຄີຍພົບປະກັບທ່ານສີຈິ້ນຜິງ19ເທື່ອກ່າວວ່າ: “ທຸກເທື່ອທີ່ພົບປະກັບທ່ານ, ຂ້າພະເຈົ້າກໍຢາກສົນທະນາຢ່າງເລິກເຊິ່ງກັບທ່ານແລະເທື່ອໃດພວກເຮົາກໍໄດ້ລົມກັນຢ່າງເບີກບານມ່ວນຊື່ນທີ່ສຸດ. ພວກເຮົາເຊື່ອໝັ້ນທີ່ສຸດແລະອາໄສປະເທດເພື່ອນມິດຄືຈີນທີ່ສຸດ. ຈາກການສົນທະນາກັນຢ່າງຈິງໃຈແລະກົງໄປກົງມາຫຼາຍເທື່ອ, ທ່ານນາຊາບາເຢັຟໄດ້ຍ້ອງຍໍຊົມເຊີຍຢ່າງສູງຕໍ່ຄວາມມີສະເໜ່ຂອງການເປັນຜູ້ນຳຂອງທ່ານສີຈິ້ນຜິງ.
ທ່ານ ເຊບາສຕຽນ ເຄີສ ນາຍົກລັດຖະມົນຕີໂອຕຣີສ ກ່າວວ່າ: “ຂ້າພະເຈົ້າຂຶ້ນດຳລົງຕຳແໜ່ງນາຍົກລັດຖະມົນຕີພຽງໜຶ່ງປີກໍໄດ້ເດີນທາງຢ້ຽມຢາມປະເທດຈີນ3ເທື່ອແລ້ວ.”
ທ່ານອາເບຍ ອາເມັດ ອາລີ ນາຍົກລັດຖະມົນຕີເອທີໂອປີເວົ້າດ້ວຍຄວາມຈິງໃຈວ່າ: “ຈີນເປັນປະເທດນອກອາຟຣິກາພຽງໜຶ່ງດຽວທີ່ຂ້າພະເຈົ້າເຄີຍເດີນທາງຢ້ຽມຢາມສອງເທື່ອນັບແຕ່ຂຶ້ນດຳລົງຕຳແໜ່ງເປັນຕົ້ນມາ.”
ທ່ານມີໂລສ ຊີມານ ປະທານາທິບໍດີປະເທດເຊັກໄດ້ເຂົ້າຮ່ວມກອງປະຊຸມເວທີປຶກສາຫາລືຂັ້ນສູງກ່ຽວກັບການຮ່ວມມືສາກົນ “ໜື່ງແລວໜຶ່ງເສັ້ນທາງ” ຄັ້ງທີ 2 ໃນປີ 2019ຜ່ານມາເຊິ່ງທ່ານໄດ້ສັກໄມ້ຄ້ອນເທົ້າເພາະຍ່າງບໍ່ສະດວກ. ທ່ານສີຈິ້ນຜິງໄດ້ເວົ້າກັບທ່ານຊີມານວ່າ: “ເທື່ອນີ້ເປັນເທື່ອທີ 5 ແລ້ວທີ່ທ່ານເດີນທາງມາຢ້ຽມຢາມຈີນນັບແຕ່ທ່ານຂຶ້ນດຳລົງຕຳແໜ່ງເປັນປະທານາທິບໍດີເປັນຕົ້ນມາ.” ທ່ານຊີມານເວົ້າຕື່ມວ່າ: “ບໍ່ມີປະເທດທີສອງທີ່ຂ້າພະເຈົ້າໄດ້ໄປຢ້ຽມຢາມຫຼາຍປານນີ້”
“ປູກໝາກໄດ້ໝາກ,ປູກຖົ່ວໄດ້ຖົ່ວ”ເຊິ່ງເປັນຄຳສຸພາສິດຈີນທີ່ທ່ານສີຈິ້ນຜິງເຄີຍນຳໃຊ້ເພື່ອພັນລະນາເຖິງການພົວພັນລະຫວ່າງສາເຫດກັບໝາກຜົນໃນເວທີວຽກງານການຕ່າງປະເທດ. ຄຳສຸພາສິດນີ້ຟັງແລ້ວລຽບງ່າຍທີ່ສຸດ,ແຕ່ມີຄວາມໝາຍອັນເລິກເຊິ່ງຄື:ໃນຂະນະທີ່ເຮົາໃຫ້ການເຄົາລົບນັບຖື ແລະ ໃຫ້ກຽດຄົນອື່ນນັ້ນ,ເຮົາກໍຈະໄດ້ຮັບຄວາມເຄົາລົບນັບຖືຈາກຄົນອື່ນເຊັ່ນກັນ.
ຄຳເຫັນ
0