ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 23 ກໍລະກົດປີ 2020, ກຸ່ມບໍລິສັດຜະລິດລົດເລກ1ຂອງຈີນຈຳກັດເຊິ່ງຄົນຈີນມັກເອີ້ນຫຍໍ້ວ່າ ບໍລິສັດ“ຢີ່ຊີ້” ນັ້ນໄດ້ຖືກຂະໜານນາມວ່າເປັນ “ລູກກົກປະເທດຈີນໃໝ່”ຂອງຂະແໜງການລົດ, ໄດ້ຕ້ອນຮັບການມາຢ້ຽມຢາມຂອງທ່ານສີຈິ້ນຜິງປະທານປະເທດຈີນທີ່ມີອາຍຸດຽວກັນກັບບໍລິສັດ.
ໃນໄລຍະດຳເນີນການສຳຫຼວດກວດກາວຽກງານຢູ່ແຂວງຈີລິນ, ທ່ານສີຈິ້ນຜິງໄດ້ເດີນທາງໄປສະຖາບັນຄົ້ນຄວ້າພັດທະນາຂອງກຸ່ມບໍລິສັດຢີ່ຊີ້ເພື່ອດຳເນີນການສຳຫຼວດຄົ້ນຄວ້າເປັນການສະເພາະ ທັງໄດ້ໃຫ້ທິດຊີ້ນຳສຳຄັນກ່ຽວກັບເສັ້ນທາງການປະຕິຮູບແລະການພັດທະນາລັດວິສາຫະກິດຈີນ.
ປະຫວັດຂອງບໍລິສັດຢີ່ຊີ້.
ທີ່ຕັ້ງ: ນະຄອນສາງຊຸ່ນ ເທດສະບານແຂວງຈີລິນ ທາງພາກຕາເວັນອອກສຽງເໜືອຂອງຈີນ
ເວລາ: ຫຼັງສປຈີນສະຖາປະນາຂຶ້ນເປັນປີທີ4 ຄືວັນທີ 15 ກໍລະກົດ ປີ 1953, ໄດ້ຈັດພິທີວາງສີລາລືກສ້າງບໍລິສັດຢີ່ຊີ້.
ຜົນງານ: ປີ1956, ໄດ້ຜະລິດລົດຄັນທຳອິດຂອງປະເທດຈີນໃໝ່, ທ່ານເໝົາເຈີຕຸ່ງຜູ້ນຳພາສ້າງຕັ້ງປະເທດຈີນໃໝ່ໄດ້ຕັ້ງຊື່ຍີ່ຫໍ້ວ່າ “ເຈຟ້າງ” (ແປວ່າປົດປ່ອຍ) ແລະ ໄດ້ຂຽນຊື່ຍີ່ຫໍ້ໃສ່ຫົວລົດດ້ວຍຕົນເອງ, ເຊິ່ງເປັນເຫດການທີ່ສະແດງໃຫ້ເຫັນວ່າ: ໄດ້ສິ້ນສຸດປະຫວັດສາດທີ່ຈີນບໍ່ສາມາດຜະລິດລົດໄດ້. ປີ1958，ລົດເກງຍີ່ຫໍ້ “ຫົງສີ” (ທຸງແດງ) ຄັນທຳອິດແລະລົດເກງຊັ້ນສູງຍີ່ຫໍ້ “ຕຸ່ງເຟີ່ງ”(ລົມບົວລະພາ)ຄັນທຳອິດຂອງປະເທດຈີນໃໝ່ກໍໄດ້ກຳເນີດເກີດຂຶ້ນຢູ່ບໍລິສັດຢີ່ຊີ້ຕາມລຳດັບເຊິ່ງໄດ້ເປັນການເປີດສັງກາດໃໝ່ໃຫ້ກັບອຸດສາຫະກຳລົດເກງຈີນ.
ລະດັບຊື່ສຽງຂອງຍີ່ຫໍ້: ຜ່ານຈາກການພັດທະນາມາເປັນເວລາ 60 ກວ່າປີ, ບໍລິສັດຢີ່ຊີ້ໄດ້ສ້າງຖານການຜະລິດໃຫຍ່ 5 ແຫ່ງຢູ່ທົ່ວປະເທດຈີນຄື:ເຂດຕາເວັນອອກສຽງເໜືອ, ເຂດເໜືອ, ເຂດຕາເວັນອອກ, ເຂດໃຕ້ ແລະ ເຂດຕາເວັນຕົກສຽງໃຕ້ຂອງຈີນ, ຍັງໄດ້ຜະລິດລົດຫຼາຍປະເພດເຊັ່ນ:ລົດບັນທຸກຂະໜາດກາງ, ລົດບັນທຸກໜັກ, ລົດບັນທຸກເບົາ, ລົດຂະໜາດນ້ອຍ, ລົດໂດຍສານ, ລົດເກງເປັນຕົ້ນ, ນັບລວມແລ້ວໄດ້ຈຳໜ່າຍລົດຫຼາຍກວ່າ 45,48 ລ້ານຄັນ ເຊິ່ງມີປະລິມານການຈຳໜ່າຍຢູ່ໃນແຖວໜ້າຂອງຂະແໜງລົດຂອງຈີນ. ນອກນີ້, ບໍລິສັດຢີ່ຊີ້ຍັງໄດ້ສ້າງຖານຜະລິດລົດ16 ແຫ່ງຢູ່ 14 ປະເທດເຊັ່ນ:ອາຟຣິກາໃຕ້,ປາກີສະຖານ,ແມັກຊິກ,ຣັດເຊຍເປັນຕົ້ນເຊິ່ງກິດຈະການໄດ້ປົກຄຸມ 78 ປະເທດ.
ອະດີດແລະປັດຈຸບັນຂອງບໍລິສັດຢີ່ຊີ້
ອະດີດ: ເດືອນກໍລະກົດປີ 1953, ພີທີວາງສີລາລືກສ້າງບໍລິສັດຢີ່ຊີ້
ສະຖານທີ່ແຫ່ງນີ້ເຄີຍເປັນບ່ອນຮົກເຮື້ອ ທີ່ເຕັມແຕ່ກະຕ່າຍປ່າແລະໝາຈອກ. ແຕ່ກີ້ ເຄີຍເກີດມີເຫດການທີ່ກຳມະກອນສູ້ກັບໝາໄນຢ່າງກ້າຫານຢູ່ໂຮງງານທີ່ຫາກໍ່ສ້າງສຳເລັດຢູ່ແຫ່ງນີ້. ຕາມການເລົ່າຂານກັນວ່າ: ທິມງານຊາວໜຸ່ມເຄີຍຂ້າໜູ 39ໂຕໃນເວລາເຮັດອະນາໄມຢູ່ໃນສາງທີ່ມີເນື້ອທີ່ບໍ່ເຖິງ 40 ຕາແມັດ.
ປັດຈຸບັນ:ບໍລິສັດຢີ່ຊີ້ໄດ້ສ້າງໂຮງປະກອບລົດແບບອັດຕະໂນມັດຢ່າງມີປະສິດທິພາບສູງ
ອະດີດ: ວັນທີ 13 ກໍລະກົດປີ 1956, ລົດບັນທຸກຍີ່ຫໍ້“ເຈຟ້າງ” ຄັນທຳອິດທີ່ທ່ານ ເໝົາເຈີຕຸ່ງອະດີດປະທານປະເທດຈີນເປັນຜູ້ຕັ້ງຊື່ໃຫ້ແລະຂຽນຊື່ໃສ່ຫົວລົດດ້ວຍຕົນເອງນັ້ນໄດ້ຜະລິດຢ່າງສຳເລັດຜົນ.ເມື່ອຮອດປີ1986 ໄດ້ຢຸດເຊົາການຜະລິດລົດຍີ່ຫໍ້ “ເຈຟ້າງ” ລຸ້ນເກົ່າ, ແຕ່ກໍສາມາດຜະລິດລົດໄດ້ທັງໝົດຫຼາຍກວ່າ 1,28ລ້ານຄັນເຊິ່ງ ກວມ 50% ຂອງຍອດປະລິມານການຜະລິດລົດໃນທົ່ວປະເທດຈີນໃນຕອນນັ້ນ.
ປັດຈຸບັນ: ວັນທີ 18ເມສາປີ 2018, ລົດລຸ້ນໃໝ່ຂອງຍີ່ຫໍ້“ເຈຟ້າງ”ໄດ້ຜະລິດສຳເລັດແລ້ວ. ຢູ່ບົນເສັ້ນທາງເລັ່ງລັດການພັດທະນາເຕັກນິກລົດອັດສະລິຍະແລະເລັ່ງລັດສ້າງລະບົບການຈຳໜ່າຍສິນຄ້າແບບອັດສະລິຍະ, ບໍລິສັດຢີ່ຊີ້ໄດ້ກ້າວໄປສູ່ແຖວໜ້າຂອງຂະແໜງການອີກຄັ້ງໜຶ່ງ.
ອະດີດ: ວັນທີ 1ສິງຫາປີ 1958, ລົດຍີ່ຫໍ້“ຫົງສີ”(ທຸງແດງ)ຄັນທຳອິດໄດ້ຖືກຜະລິດຂື້ນຢ່າງສຳເລັດຜົນ. ປີ 1959, ໃນພິທີສວນສະໜາມເພື່ອສະເຫຼີມສະຫຼອງວັນສະຖາປະນາປະເທດຈີນໃໝ່ຄົບຮອບ 10 ປີ, ລົດ“ຫົງສີ”ເປັນລົດສວນສະໜາມເປັນຄັ້ງທຳອິດ. ຈົນມາຮອດປີ 2019, ລົດ“ຫົງສີ”ເຄີຍເປັນລົດສວນສະໜາມທັງໝົດ 6 ຄັ້ງໃນພິທີສວນສະໜາມຂະໜາດໃຫຍ່ຂອງປະເທດຈີນໃໝ່.
ປັດຈຸບັນ: ວັນທີ 10 ກໍລະກົດປີ 2020, ລົດ“ຫົງສີ”ລຸ້ນH5ທີ່ມີຮູບຊົງທີ່ທັນສະໄໝແລະສວຍງາມກວ່າເກົ່າໄດ້ວາງສະແດງຢູ່ງານວາງສະແດງລົດສາກົນ(ສາງຊຸ່ນ)ຈີນຄັ້ງທີ17.
ລົດ“ຫົງສີ”E-HS9ທີ່ວາງສະແດງຢູ່ສະຖາບັນຄົ້ນຄວ້າພັດທະນາຂອງກຸ່ມບໍລິສັດຢີ່ຊີ້
ລົດsportທີ່ຂັບເຄື່ອນດ້ວຍເຊື້ອໄຟປະສົມລະຫວ່າງໄຟຟ້າແລະນຳ້ມັນເຊື້ອໄຟແບບສາກໄຟຂອງບໍລິສັດຢີ່ຊີ້
ຖານການຜະລິດລົດບັນທຸກຂອງກຸ່ມບໍລິສັດຢີ່ຊີ້ທີ່ຕັ້ງຢູ່ອາຟຼິກາໃຕ້
ໝາກຜົນດ້ານວິທະຍາສາດເຕັກໂນໂລຊີໄດ້ຫັນເປັນກຳລັງການຜະລິດຕົວຈິງ, ບໍ່ສາມາດປາສະຈາກການອອກແຮງງານແລະສະຕິປັນຍາຂອງກຳມະກອນໄດ້. ໃນຂະບວນການສ້າງສາປະເທດທີ່ເຂັ້ມແຂງດ້ານອຸດສາຫະກຳການຜະລິດ, ຕ້ອງການ “ກຳມະກອນຫຼຽນຄໍາ”ທີ່ມີອຸດົມການ ມີສະຕິປັນຍາ ແລະ ມີສີມືຊຳນານ.
ຢູ່ຫ້ອງທົດລອງຂອງສະຖາບັນຄົ້ນຄວ້າພັດທະນາຂອງກຸ່ມບໍລິສັດລົດເລກ 1ຈີນຈຳກັດຫຼື ບໍລິສັດຢີ່ຊີ້, ທ່ານສີຈິ້ນຜິງໄດ້ຮູ້ວ່າມີບາງຄົນແມ່ນນັກສຶກສາທີ່ຮຽນຈົບໃໝ່ໃນປີນີ້, ທ່ານສີຈິ້ນຜິງໄດ້ສະແດງຄວາມເອົາໃຈໃສ່ ແລະ ຖາມວ່າເຂົາເຈົ້າຮຽນຈົບຈາກໂຮງຮຽນໃດ? ມີລາຍຮັບຫຼາຍປານໃດ? ມາເຮັດວຽກຢູ່ນີ້ພໍໃຈບໍ່? ຜູ້ຮັບຜິດຊອບບໍລິສັດແນະນຳວ່າ, ປີນີ້ກຸ່ມບໍລິສັດຢີ່ຊີ້ໄດ້ຮັບສະໝັກນັກສຶກສາທີ່ຮຽນຈົບໃໝ່ 1115 ຄົນ. ທ່ານສີຈິ້ນຜິງກ່າວວ່າ: “ນັກສຶກສາປະກອບອາຊີບ, ປີນີ້ໄດ້ຜະເຊີນກັບຄວາມຫຍຸ້ງຍາກຈຳນວນໜຶ່ງ,ເນື່ອງຈາກຜົນກະທົບຈາກການແຜ່ລະບາດຂອງພະຍາດໂຄວິດ-19. ແຕ່ພັກ ແລະ ລັດຖະບານໄດ້ສຸມທຸກຄວາມພະຍາຍາມ ຖືເປັນສິ່ງສຳຄັນໃນວຽກງານເສດຖະກິດປີນີ້, ພະຍາຍາມເຮັດໃຫ້ນັກສຶກສາຂອງພວກເຮົາສາມາດຊອກໄດ້ວຽກເຮັດງານທຳ. ນັກສຶກສາກໍຕ້ອງຕັ້ງທັດສະນະປະກອບອາຊີບຢ່າງຖືກຕ້ອງ, ຊອກໄດ້ຖານະທີ່ຕັ້ງຂອງຕົນ,ປ້ອນຕົວເຂົ້າສູ່ວຽກງານຕົວຈິງ, ບັນລຸອຸດົມການທາງຊີວິດຂອງຕົນ.”
ຈາກ “ໝີ່ຊີ” ກາຍເປັນ “ກຳມະກອນຫຼຽນຄຳ”
ທ່ານຊີຊົ່ງອີ, ກຳມະກອນສ້ອມແປງໃນເມື່ອກ່ອນ, “ກຳມະກອນຫຼຽນຄຳ”ຂອງກຸ່ມບໍລິສັດລົດເລກ 1ຈີນຈຳກັດຫຼື ບໍລິສັດຢີ່ຊີ້ ໃນປະຈຸບັນ.
ປີ 1994, ທ່ານຊີຊົ່ງອີທີ່ມີອາຍຸ 20 ປີໄດ້ເຂົ້າເຮັດວຽກເປັນກຳມະກອນສ້ອມແປງໃນໂຮງງານຂອງບໍລິສັດຢີ່ຊີ້. ໃນເວລານັ້ນເມື່ອເຄື່ອງຈັກເກີດມີບັນຫາໃນລະບົບການຜະລິດແລ້ວ ກໍຕ້ອງໃຊ້ເຄື່ອງອື່ນໄປປ່ຽນແທນ, ຈາກນັ້ນຈຶ່ງສົ່ງໄປສ້ອມແປງ, ແລ້ວເກັບໄວ້ເປັນເຄື່ອງຈັກສຳຮອງ. ສຳລັບເຄື່ອງຈັກເຫຼົ່ານີ້ລ້ວນແຕ່ເກັບມ້ຽນໄວ້ຢູ່ຫ້ອງສ້ອມແປງ. ທ່ານຊີຊົ່ງອີຫຍຸ້ງກັບການເຮັດວຽກຢູ່ຫ້ອງສ້ອມແປງຈົນບໍ່ມີເວລາໄປໃສ, ຕັ່ງຍາວໃນໂຮງງານຈຶ່ງໄດ້ກາຍເປັນຕຽງນອນຂອງລາວ. ເພື່ອປະຢັດເວລາ, ທ່ານຊີຊົ່ງອີຍັງໄດ້ເຮັດອາຫານແບບງ່າຍໆວ່ອງໄວ, ຄື:ໃຊ້ກ່ອງເຂົ້າອາລຸຍມິນຽມມາຕົ້ມໝີ, ປົນກັບແຈ່ວໄຂ່ທີ່ແມ່ແຕ່ງໃຫ້, ກໍຖືວ່າເປັນຄາບເຂົ້າແບບງ່າຍໆ. ເມື່ອກິນແບບງ່າຍໆແນວນີ້ມາຫຼາຍເທື່ອແລ້ວ, ໝູ່ຮ່ວມງານກໍມັກເວົ້າຢອກລາວໂດຍເອີ້ນຊື່ຫຼິ້ນວ່າ “ໝີ່ຊີ”.
ທ່ານຊີຊົ່ງອີທີ່ຖືໂຮງງານເປັນຊີວິດຈິດໃຈ, ໄດ້ຊຸກຍູ້ໃຫ້“ສິນຄ້າທີ່ຜະລິດໂດຍຈີນ” ກ້າວໄປສູ່ “ສິນຄ້າທີ່ປະດິດສ້າງໃໝ່ໂດຍຈີນ”, ແມ່ນຍ້ອນຄວາມຜິດພາດເທື່ອໜຶ່ງໃນການເຮັດວຽກ. ມີເທື່ອໜຶ່ງເພິ່ນລືມຈອດເຫຼັກຢູ່ 4 ຈຸດຈຶ່ງຖືກຕັດເງິນ 200 ຢວນ, ໃນເວລານັ້ນ ທ່ານຊີຊົ່ງອີມີຄ່າແຮງງານປະມານ 50 ກວ່າຢວນຕໍ່ມື້, ຄວາມຜິດພາດເທື່ອນັ້ນໄດ້ເຮັດໃຫ້ທ່ານເສຍຄ່າແຮງງານຫຼາຍມື້. ທ່ານໄດ້ລົງມືຈາກຄວາມຜິດພາດທີ່ລືມຈອດເຫຼັກ, ຄົ້ນຄວ້າວິທີໃໝ່ ແລະ ປັບປຸງ, ຈຶ່ງໄດ້ປະດິດສ້າງເຄື່ອງເອເລັກໂຕຣນິກຕິດຕາມການຈອດເຫຼັກ, ທັງໄດ້ໃຊ້ຮູບການທີ່ປະສົມປະສານເຕັກນິກເອເລັກໂຕຼນິກມີໂຄຼ, ເຕັກນິກເກັບກຳຂໍ້ມູນບ່ອນຈອດເຫຼັກ ແລະ ເຕັກນິກຄອມພິວເຕີ ໂດຍໄດ້ແກ້ໄຂບັນຫາຫຍຸ້ງຍາກລະດັບໂລກໃນການຕິດຕາມຄວບຄຸມ ແລະວັດແທກຄຸນນະພາບໃນການຈອດໂຄງລົດຂອງລົດເກງ ເຊິ່ງເປັນບັນຫາທີ່ຄົງຄ້າງໃນທົ່ວຂະແໜງການຜະລິດລົດ, ແລະໄດ້ຊ່ວຍຊຸກຍູ້ການຫັນເປັນແບບດີຈີຕອນຂອງບໍລິສັດຢີ່ຊີ້.
ໝາກຜົນດ້ານວິທະຍາສາດເຕັກໂນໂລຊີໄດ້ຫັນເປັນກຳລັງການຜະລິດຕົວຈິງ, ບໍ່ສາມາດປາສະຈາກການອອກແຮງງານຂອງກຳມະກອນໄດ້. ໃນຂະບວນການສ້າງສາປະເທດທີ່ເຂັ້ມແຂງດ້ານອຸດສາຫະກຳການຜະລິດ, ຈີນໄດ້ບຳລຸງສ້າງ ແລະປາກົດມີ ກຳມະກອນທີ່ມີສີມືດີຄືທ່ານຊີຊົ່ງອີ ຜູ້ທີ່ຕອບແທນ ບຸນຄຸນຂອງປະເທດຊາດດ້ວຍສີມືຂອງຕົນນັບມື້ນັບຫຼາຍຂຶ້ນ.
ຄຳເຫັນ
0