ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານຫຼີຊິ້ວຈີ້ ຮອງເລຂາຄະນະພັກນະຄອນເຊ້ຍເມີນໃນເວລານັ້ນ
ແຕ່ເດືອນມິຖຸນາປີ 1985ຫາເດືອນມິຖຸນາປີ 1988, ທ່ານສີຈິ້ນຜິງໄດ້ໄປຮັບໜ້າທີ່ຕຳແໜ່ງເປັນຄະນະປະຈຳພັກ, ຮອງເຈົ້າຄອງນະຄອນ, ຮອງເຈົ້າຄອງນະຄອນຜູ້ປະຈຳການຂອງນະຄອນເຊ້ຍເມີນແຂວງຟູຈ້ຽນຕາມລຳດັບ ຈົນກາຍເປັນຜູ້ນຳພາແລະຜູ້ບຸກເບີກທີ່ສຳຄັນ ໃນໄລຍະເບື້ອງຕົ້ນຂອງການສ້າງຕັ້ງເຂດເສດຖະກິດພິເສດເຊ້ຍເມີນ. ທ່ານໄດ້ນຳພາໃນການກຳນົດຍຸດທະສາດການພັດທະນາເສດຖະກິດສັງຄົມຂອງເຊ້ຍເມີນ ໂດຍໄດ້ຄົ້ນຄວ້າແລະຊຸກຍູ້ການປະຕິບັດມາດຕະການຕ່າງໆໃນການປະຕິຮູບຢ່າງມີການປະດິດສ້າງ, ຕັ້ງໜ້າຄົ້ນຄວ້າເສັ້ນທາງເປີດປະຕູສູ່ພາຍນອກເພື່ອຊຸກຍູ້ການປະຕິຮູບແລະການເພັດທະນາ, ອອກແຮງຊຸກຍູ້ວຽກງານອະນຸລັກສິ່ງແວດລ້ອມນິເວດ, ເອົາໃຈໃສ່ອະນຸລັກແລະສືບທອດວັດທະນະທຳໃນປະຫວັດສາດ, ສຸມກຳລັງເຂົ້າໃນການແກ້ໄຂບັນຫາທີ່ປະຊາຊົນສົນໃຈທີ່ສຸດ. ໃນໄລຍະເວລາ 3 ປີ ທີ່ປະຕິບັດໜ້າທີ່ຕຳແໜ່ງຢູ່ເຊ້ຍເມີນ, ທ່ານສີຈິ້ນຜິງໄດ້ເຮັດວຽກເພື່ອປະຊາຊົນຢ່າງດຽວເທົ່ານັ້ນ, ເຂັ້ມງວດໃນດ້ານລະບຽບວິໄນຕໍ່ຕົນເອງ, ປະຕິບັດໜ້າທີ່ວຽກງານແລະສຳຫຼວດຄົ້ນຄວ້າຢ່າງດຸໝັ່ນຂະຫຍັນພຽນ, ກ້າຮັບຜິດຊອບ,ກ້າປະດິດສ້າງໃໝ່, ເຊິ່ງໄດ້ສ່ອງແສງໃຫ້ເຫັນເຖິງຄວາມສາມາດໃນການຮັບຮູ້ຢ່າງຖືກຕ້ອງຕໍ່ສະພາບການລວມແລະມີວິໄສທັດທີ່ເບິ່ງກວ້າງມອງໄກ. ທ່ານເຄີຍກ່າວດ້ວຍຄວາມປະທັບໃຈຢ່າງເລິກເຊິ່ງວ່າ: “ເຊ້ຍເມີນເປັນບ່ອນທີ່ສ້າງປະສົບການຊີວິດຫຼາຍຢ່າງແລະເປັບບ່ອນທີ່ຝຶກຝົນຫຼໍ່ຫຼອມໃຫ້ກັບຂ້າພະເຈົ້າ.”
ກາງເດືອນມິຖຸນາປີ 1985, ທ່ານສີຈິ້ນຜິງໄດ້ຖືກຍົກຍ້າຍໜ້າທີ່ຕຳແໜ່ງຈາກເມືອງເຈີ້ງຕິ້ງແຂວງເຫີເປີຍໃຫ້ໄປຮັບໜ້າທີ່ໃໝ່ຢູ່ນະຄອນເຊ້ຍເມີນແຂວງຟູຈ້ຽນ ເຊິ່ງເປັນເມືອງເຂດພິເສດທີ່ຕັ້ງຢູ່ແຄມຝັ່ງທະເລທາງພາກຕາເວັນອອກສຽງໃຕ້ຂອງຈີນ. ໃນມື້ນັ້ນພໍດີແມ່ນວັນເກີດຄົບຮອບ 32 ປີຂອງທ່ານ. ຕອນໄປຮັບໜ້າທີ່ຕຳແໜ່ງຢູ່ເຊ້ຍເມີນ, ທ່ານບໍ່ໄດ້ຖືສຳພາລະໄປຫຼາຍມີພຽງໜ້ອຍດຽວ, ສ່ວນການເດີນທາງໄປເຊ້ຍເມີນ, ທ່ານກໍອາໄສຮ່ວມເດີນທາງໄປນຳລົດຄົນອື່ນ. ທ່ານຫຼີຊິ້ວຈີ້ ຮອງເລຂາຄະນະພັກນະຄອນເຊ້ຍເມີນໃນເວລານັ້ນໄດ້ຫວນຄືນເຖິງສະພາບທີ່ຕົນໄດ້ໄປຮັບທ່ານສີຈິ້ນຜິງວ່າ: ທ່ານສີຈິ້ນຜິງໄດ້ສ້າງຄວາມປະທັບໃຈໃຫ້ຕົນໃນເວລາພົບກັນຄັ້ງທຳອິດຄື: ທ່ານນຸ່ງຖືແບບລຽບງ່າຍ,ໜ້າຕາຊົດຊື່ນແຈ່ມໃສແບບໜຸ່ມແໜ້ນແລະມີລັກສະນະທ່າທີອ່ອນນ້ອມຖ່ອມຕົວ.
ພາຍຫຼັງຮັບທ່ານສີຈິ້ນຜິງແລ້ວ, ທ່ານຫຼີຊິ້ວຈີ້ໄດ້ພາທ່ານເຂົ້າໄປພັກຢູ່ໃນເຮືອນທີ່ໄດ້ຈັດສັນໃຫ້ລ່ວງໜ້າ. ຢູ່ໃນຫ້ອງ, ພາຍຫຼັງໄດ້ຟັງທ່ານຫຼີຊິ້ວຈີ້ ແນະນຳສະພາບກ່ຽວກັບເຊ້ຍເມີນສູ່ຟັງແລ້ວແລ້ວ, ທ່ານສີຈິ້ນຜິງເວົ້າດ້ວຍຄວາມດີໃຈທີ່ສຸດວ່າ: “ມື້ນີ້ເວົ້າສຳລັບຂ້າພະເຈົ້າແລ້ວມີຄວາມໝາຍສອງຢ່າງ,ໜຶ່ງແມ່ນຂ້າພະເຈົ້າມາເຂົ້າຮ່ວມການສ້າງສາພັດທະນາເຂດພິເສດເຊ້ຍເມີນ, ສອງແມ່ນວັນເກີດຂອງຂ້າພະເຈົ້າ. ” ປົກກະຕິແລ້ວ, ການສະຫຼອງວັນເກີດຄວນມີເຂົ້າໜົມເຄັກ, ແຕ່ວ່າຕາມປະເພນີຂອງເຊ້ຍເມີນຕ້ອງກິນໝີ່ອາຍຸຍືນແລະໄຂ່ໄກ່. ແຕ່ວ່າໃນເວລານັ້ນເງື່ອນໄຂມີຈຳກັດ, ບໍ່ມີເຂົ້າໜົມເຄັກ. ໃນຄາບເຂົ້າມື້ນັ້ນຂອງທ່ານສີຈິ້ນຜິງມີອາຫານພື້ນເມືອງທີ່ມີເອກະລັກພິເສດຂອງເຊ້ຍເມີນເຊັ່ນ: ຈືນຫອຍນາງລົມ, ຂົ້ວໝີ່, ວຸ້ນໜອນທະເລແລະອື່ນໆ. ຈືນຫອຍນາງລົມຍັງໃສ່ໄຂ່ໄກ່, ແລະເອົາຂົ້ວໝີ່ຕາງໝີ່ອາຍຸຍືນ ເຊິ່ງກໍຖືວ່າໄດ້ສະຫຼອງວັນເກີດໃຫ້ກັບທ່ານສີຈິ້ນຜິງຕາມປະເພນີຂອງເຊ້ຍເມີນແລ້ວ.
ວັນທີ 5 ກັນຍາ ປີ 2010, ທ່ານສີຈິ້ນຜິງ ທີ່ເປັນຮອງປະທານປະເທດໃນເວລານັ້ນໄດ້ໄປກວດກາແລະຊີ້ນຳວຽກງານຢູ່ນະຄອນເຊ້ຍເມີນ, ທ່ານໄດ້ຈັບມືກັບທ່ານຫຼີຊິ້ວຈີ້ທັງຍັງໄດ້ກ່າວເຖິງ ອາຫານ 3 ເຍື່ອງໃນຄາບເຂົ້າທຳອິດຕອນທີ່ເພິ່ນຫາກໍ່ໄປຮັບໜ້າທີ່ຕຳແໜ່ງຢູ່ເຊ້ຍເມີນ.
ເດືອນຕຸລາປີ 1980, ລັດຖະບານຈີນໄດ້ອະນຸມັດໃຫ້ສ້າງຕັ້ງເຂດເສດຖະກິດພິເສດເຊ້ຍເມີນ ທີ່ກວມເນື້ອທີ່ພຽງ 2,5 ກີໂລຕາແມັດເທົ່ານັ້ນ. ປີ 1985, ລັດຖະບານຈີນໄດ້ອະນຸມັດໃຫ້ຂະຫຍາຍເຂດເສດຖະກິດພິເສດເຊ້ຍເມີນໃຫ້ກວ້າງອອກໂດຍກວມເຖິງທົ່ວເກາະເຊ້ຍເມີນ ເຊິ່ງມີເນື້ອທີ່ 131 ກິໂລຕາແມັດ. ໃນເວລານັ້ນ, ເຊ້ຍເມີນເປັນຕົວເມືອງຂະໜາດນ້ອຍ,ເປັນເມືອງເກົ່າ, ພື້ນຖານເສດຖະກິດອ່ອນແອ, ຍອດມູນຄ່າການຜະລິດອຸດສາຫະກຳທົ່ວນະຄອນເຊ້ຍເມີນໃນເວລານັ້ນຍັງບໍ່ເທົ່າກັບຍອດມູນຄ່າການຜະລິດຂອງບໍລິສັດແຫ່ງໜຶ່ງຂອງຕົວເມືອງໃນຂະໜາດດຽວກັນແຫ່ງອື່ນໆພາຍໃນຈີນ. ປະຊາຊົນເຊ້ຍເມີນມັກເວົ້າກັນວ່າ:ເຊ້ຍເມີນຄື: “ເສັ້ນທາງບໍ່ຮາບພຽງ, ໄຟຟ້າບໍ່ຮຸ່ງ,ໂທລະສັບບໍ່ມີສັນຍານ,ນ້ຳປະປາຂາດເປັນປະຈຳ.”ແລະຍັງມີຄົນພັນລະນາສະພາບການຂອງເຊ້ຍເມີນວ່າ: “ເຊ້ຍເມີນກໍປຽບເໝືອນນາງສາວງາມແຕ່ນຸ່ງເຄື່ອງເກົ່າຂາດ.”
ກໍແມ່ນໃນເວລານັ້ນຫຼະ, ທ່ານສີຈິ້ນຜິງໄດ້ໄປຮັບໜ້າທີ່ຕຳແໜ່ງຢູ່ເຊ້ຍເມີນ. ປີ 2006, ເນື່ອງໃນໂອກາດສະເຫຼີມສະຫຼອງວັນສ້າງຕັ້ງເຂດເສດຖະກິດພິເສດເຊ້ຍເມີນຄົບຮອບ 25 ປີ, ທ່ານສີຈິ້ນຜິງໄດ້ໃຫ້ສຳພາດຕໍ່ນັກຂ່າວວ່າ: ຕອນເພິ່ນຫາກໍ່ໄປຮັບໜ້າທີ່ຕຳແໜ່ງໃໝ່ໆຢູ່ເຊ້ຍເມີນ, ສະພາບຕົວຈິງຂອງເຊ້ຍເມີນແມ່ນຫ່າງໄກຈາກການຄາດຄິດລ່ວງໜ້າ. ເພາະວ່າກ່ອນໜ້ານັ້ນ, ທ່ານບໍ່ເຄີຍໄປແຂວງຟູຈ້ຽນຈັກເທື່ອ, ເວົ້າລວມແລ້ວຮູ້ສຶກວ່າ ເຊ້ຍເມີນບໍ່ໄດ້ມີການເປີດປະຕູສູ່ພາຍນອກແລະມີຄວາມກ້າວໜ້າຄືດັ່ງທີ່ໄດ້ຈິນຕະນາການໄວ້ ໂດຍສະເພາະແມ່ນເບິ່ງໃນດ້ານພື້ນຖານໂຄງລ່າງແລະສະພາບໂສມໜ້າຂອງຕົວເມືອງແລ້ວ, ເຊ້ຍເມີນໃນເວລານັ້ນແມ່ນອ່າວຫຼ້າຫຼັງແທ້ໆ.
ຄວາມຫຼ້າຫຼັງແບບນີ້ມັນບໍ່ພຽງແຕ່ແມ່ນຄວາມຫຼ້າຫຼັງທາງດ້ານເງື່ອນໄຂວັດຖຸເທົ່ານັ້ນ, ເມື່ອທຽບໃສ່ເຂດພິເສດແຫ່ງອື່ນໆແລ້ວ, ການສ້າງຕັ້ງເຂດເສດຖະກິດພິເສດເຊ້ຍເມີນແມ່ນຕ້ອງທຸ້ມເທຄວາມພະຍາຍາມຫຼາຍກວ່າແຫ່ງອື່ນໆ, ນັ້ນກໍຄືການປ່ຽນແປງໃໝ່ດ້ານແນວຄິດ.
ທ່ານຈູ່ລີ້ສຸຍ ຮອງຫົວໜ້າຄະນະກຳມະການປະຕິຮູບໂຄງປະກອບນະຄອນເຊ້ຍເມີນໃນເວລານັ້ນໄດ້ຫວນຄືນເຖິງອະດີດວ່າ:ພາຍຫຼັງທ່ານສີຈິ້ນຜິງໄປຮອດເຊ້ຍເມີນແລ້ວກໍໄດ້ຮັບຜິດຊອບວຽກງານການປະຕິຮູບໂຄງປະກອບ ໂດຍໄດ້ຊີ້ນຳນຳພາໂດຍກົງໃນການຊຸກຍູ້ການຄົ້ນຄວ້າການປະຕິຮູບທີ່ເປັນບັນຫາຫຍຸ້ງຍາກຕ່າງໆ. ເຊິ່ງໃນນັ້ນ ມາດຕະການໜຶ່ງທີ່ມີຄຳປຽບທຽບຄື: “ປ່ອຍນ້ຳລ້ຽງປາ” ອັນໄດ້ກະຕຸ້ນການພັດທະນາຂອງທ່າກຳປັ່ນເຊ້ຍເມີນ ທັງໄດ້ກະຕຸກຊຸກຍູ້ລັດວິສາຫະກິດທີ່ຕົກຢູ່ໃນສະພາບຫຍຸ້ງຍາກຈຳນວນຫຼາຍແຫ່ງນັ້ນໃຫ້ພັດທະນາຢ່າງມີຊີວິດຊີວາ.
ພາຍຫຼັງໄປຮັບໜ້າທີ່ຕຳແໜ່ງຢູ່ເຊ້ຍເມີນບໍ່ດົນ, ຮູບຮ່າງສູງໃຫຍ່ຂອງທ່ານສີຈິ້ນຜິງກໍໄດ້ປາກົດໃຫ້ເຫັນເລື້ອຍໆຢູ່ທ່າກຳປັ່ນຕຸ່ງຕູ້. ທ່ານຍ່າງໄປເຖິງຈຸດເຄນຍົກຕູ້ບັນຈຸສິນຄ້າ ສອງເຄື່ອງ ແລ້ວຖາມພະນັກງານວ່າ: ເຄນສອງເຄື່ອງນີ້ສາມາດຍົກນ້ຳໜັກສິນຄ້າໄດ້ຫຼາຍປານໃດ. ເຄນສອງເຄື່ອງນີ້ເປັນເຄນທີ່ມີຢູ່ທ່າກຳປັ່ນເຊ້ຍເມີນພຽງ 2 ເຄື່ອງເທົ່ານັ້ນ. ເຄື່ອງໜຶ່ງສາມາດຍົກຕູ້ບັນຈຸສິນຄ້າມາດຕະຖານໄດ້ພຽງ 35.000 ຕູ້ຕໍ່ປີເທົ່ານັ້ນ. ສ່ວນເຄນປະເພດດຽວກັນຢູ່ຮົງກົງແມ່ນສາມາດຍົກຕູ້ບັນຈຸສິນຄ້າໄດ້ເຖິງ 120.000 ຕູ້ຕໍ່ປີ. ຜ່ານຈາກການສຳຫຼວດຄົ້ນຄວ້າຢູ່ພື້ນທີ່ຕົວຈິງມາຫຼາຍເທື່ອແລະໄດ້ຮັບຟັງຄວາມຄິດເຫັນຂອງພະນັກງານວິສາຫະກິດທີ່ກ່ຽວຂ້ອງຢ່າງລະອຽດແລ້ວ, ທ່ານສີຈິ້ນຜິງໄດ້ຮັບຮູ້ສະພາບການຢ່າງຈະແຈ້ງຄື ຄວາມສາມາດການຂົນສົ່ງບໍ່ພຽງພໍ, ພື້ນຖານໂຄງລ່າງບໍ່ສົມບູນ, ຂອດແລະຂັ້ນຕອນປະຕິບັດງານບໍ່ສອດຄ່ອງກັບສະພາບຕົວຈິງ. ສ່ວນລັດກໍບໍ່ມີງົບປະມານພຽງພໍໃຫ້ກັບວິສາຫະກິດເພື່ອປັບປຸງພື້ນຖານໂຄງລ່າງໃຫ້ສົມບູນຂຶ້ນ. ການທີ່ໄດ້ຮັບຜົນກຳໄລໜ້ອຍຫຼືຂາດທຶນໜ້ອຍ, ເຊິ່ງບໍ່ພຽງແຕ່ເປັນສະພາບຫຍຸ້ງຍາກຂອງພະແນກກິດຈະການທ່າກຳປັ່ນເຊ້ຍເມີນເທົ່ານັ້ນຍັງເປັນບັນຫາຫຍຸ້ງຍາກຂອງລັດວິສາຫະກິດສ່ວນຫຼາຍຂອງເຊ້ຍເມີນໃນເວລານັ້ນອີກດ້ວຍ. ພະນັກງານອາວຸໂສຂອງພະແນກກິດຈະການທ່າກຳປັ່ນເຊ້ຍເມີນໄດ້ເລົ່າກ່ຽວກັບສະພາບການປະຊຸມເທື່ອໜຶ່ງໃນເວລານັ້ນໃຫ້ຟັງວ່າ: “ທ່ານສີຈິ້ນຜິງໄດ້ເວົ້າກັບພວກເຮົາວ່າ, ລັດຈະບໍ່ໃຫ້ພວກເຈົ້າມອບກຳໄລໃຫ້ລັດ, ຜົນກຳໄລທີ່ພວກເຈົ້າສ້າງຂຶ້ນນັ້ນ, ຈະບໍ່ຕ້ອງມອບໃຫ້ກັບລັດແມ່ນແຕ່ອັດດຽວ, ຜົນກຳໄລຈະຈົ່ງໄວ້ໃຫ້ພວກເຈົ້າ, ແຕ່ວ່າມີເງື່ອນໄຂຄື: ພວກເຈົ້າຕ້ອງຮັບປະກັນວ່າ ເມື່ອຫາຜົນກຳໄລໄດ້ແລ້ວຕ້ອງນຳໃຊ້ເຂົ້າໃນການປັບປຸງພື້ນຖານໂຄງລ່າງໃຫ້ສົມບູນຂຶ້ນສາກ່ອນ.”
ຫຼັງຈາກນັ້ນ, ເຊ້ຍເມີນໄດ້ນຳໜ້າໃນການວາງມາດຕະການເກັບສ່ວຍສາອາກອນແລະຜົນກຳໄລແບບແຍກສ່ວນກ່ອນໝູ່ໃນທົ່ວປະເທດຈີນ, ລັດວິສາຫະກິດອຸດສາຫະກຳທີ່ຕ້ອງມອບອາກອນເຂົ້າຄັງເງິນຂອງລັດຈຳນວນ 66 ແຫ່ງໃນທົ່ວນະຄອນເຊ້ຍເມີນໄດ້ປະຕິບັດມາດຕະການແຍກສ່ວຍສາອາກອນແລະຜົນກຳໄລ, ໃຊ້ຜົນກຳໄລທີ່ເຫຼືອຈາກການເສຍອາກອນແລ້ວນັ້ນເພື່ອໃຊ້ຄືນເງິນກູ້, ສຳລັບວິສາຫະກິດທີ່ແຕກຕ່າງກັນຈະປະຕິບັດອັດຕາສ່ວນເສຍອາກອນທີ່ແຕກຕ່າງກັນ. ຈຸດປະສົງຕົ້ນຕໍກໍເພື່ອເຮັດໃຫ້ວິສາຫະກິດມອບອາກອນໃຫ້ລັດແລ້ວ, ຍັງຈະສາມາດມີກຳໄລໄວ້ໃຫ້ວິສາຫະກິດເພື່ອພັດທະນາການຜະລິດໃຫ້ຫຼາຍເທົ່າທີ່ຈະຫຼາຍໄດ້. ສະເພາະແຕ່ປີທຳອິດທີ່ດຳເນີນການປະຕິຮູບດັ່ງກ່າວ, ພະແນກກິດຈະການທ່າກຳປັ່ນເຊ້ຍເມີນກໍໄດ້ສ້າງຜົນກຳໄລໄດ້ 20 ລ້ານກວ່າຢວນ, ຈາກນັ້ນບໍ່ເທົ່າໃດປີກໍສາມາດສ້າງຜົນກຳໄລໄດ້ເຖິງ 700 ລ້ານກວ່າຢວນ.
“ເຮັດການປະຕິຮູບ, ເມື່ອເຮັດກ່ອນໝູ່ຈະຕ້ອງມີຄວາມສ່ຽງກ່ອນໝູ່, ແຕ່ວ່າ ລັດຕ້ອງສົ່ງຄົນໄປທາບທາມກ່ອນ, ເມື່ອເຮັດໄດ້ດີແລ້ວ ຈະເປັນບົດຮຽນທີ່ດີໃຫ້ກັບລັດໃນການສືບຕໍ່ປະຕິຮູບໃນຕໍ່ໜ້າ ເຊິ່ງນີ້ໄດ້ເສີມຂະຫຍາຍບົດບາດນຳໜ້າໃນຂອດສຳຄັນເພື່ອສືບຕໍ່ຊຸກຍູ້ວຽກງານດ້ານອື່ນໆໃຫ້ສາມາດດຳເນີນໄປດ້ວຍດີ.” ທ່ານຜູ້ຟັງ, ນີ້ຄືຄຳເຫັນຂອງທ່ານສີຈິ້ນຜິງທີ່ທ່ານປະກອບໃນກອງປະຊຸມຄະນະປະຈຳຄະນະພັກນະຄອນເຊ້ຍເມີນຄັ້ງໜຶ່ງ. ຈາກເມືອງເຈີ້ງຕິ້ງຮອດນະຄອນເຊ້ຍເມີນ, ທ່ານສີຈິ້ນຜິງໄດ້ເລີ່ມດຳເນີນການຄົ້ນຄວ້າແລະທົດລອງຢູ່ແນວໜ້າແຫ່ງການປະຕິຮູບແລະເປີດປະຕູສູ່ພາຍນອກ, ອັນໄດ້ສ້າງພື້ນຖານໃຫ້ແກ່ການພັດທະນາຢ່າງວ່ອງໄວຢູ່ເຂດເສດຖະກິດພິເສດເຊ້ຍເມີນ.
ຄຳເຫັນ
0