ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ສີແສງແຫ່ງຍຸກ: ທ່ານສີຈິ້ນຜິງຢູ່ນະຄອນເຊ້ຍເມີນ 5
ຢູ່ເຊ້ຍເມີນມີໜອງຢຸນຕ່າງທີ່ເປັນໜອງທຳມະຊາດທີ່ຕິດກັບທະເລ, ສະນັ້ນນ້ຳທະເລຈຶ່ງສາມາດໄຫຼເຂົ້າສູ່ພາຍໃນຕົວເມືອງໄດ້. ໃນຊຸມປີ 1970, ໄດ້ສ້າງເຂື່ອນກັ້ນທະເລເພື່ອສ້າງທົ່ງນາ, ຈົນເຮັດໃຫ້ໜອງຢຸນຕ່າງກາຍເປັນທະເລສາບທີ່ຖືກປິດກັ້ນໄວ້, ເມື່ອຮອດຊຸມປີ 1980, ນະຄອນເຊ້ຍເມີນໄດ້ດຳເນີນການສ້າງເຂດພິເສດ, ນ້ຳເສດເຫຼືອຈາກອຸດສາຫະກຳ ແລະ ນ້ຳເປື້ອນຈາກຕົວເມືອງ ຖືກລະບາຍລົງສູ່ໜອງຢຸນຕ່າງ, ເຮັດໃຫ້ນ້ຳໜອງເປື້ອນເໝັນ, ຈົນເຮັດໃຫ້ປາ ກຸ້ງ ແລະ ນົກຍາງຫາຍໄປຈາກໜອງໝົດເລີຍ.
“ຍາມໃດເນາະໜອງຢຸນຕ່າງຈະບໍ່ເປື້ອນ ແລະ ບໍ່ສົ່ງກິ່ນເໝັນອີກ?” ປະຊາຊົນມີສຽງຮຽກຮ້ອງຢ່າງແຮງກ້າຕໍ່ການປັບປຸງໜອງຢຸນຕ່າງ, ທ່ານສີຈິ້ນຜິງກໍມີຄວາມຮູ້ສຶກແບບນັ້ນຄືກັນ.
ວັນທີ 30 ມີນາ ປີ 1988, ທ່ານສີຈິ້ນຜິງໄດ້ເປັນປະທານຈັດກອງປະຊຸມກ່ຽວກັບການປົວແປງໜອງຢຸນຕ່າງແບບສັງລວມ.ເຊິ່ງໄດ້ຜ່ານມະຕິກ່ຽວກັບການປົວປແປງ, ທັງໄດ້ວາງແຜນການປົວແປງຢ່າງຄົບຊຸດ. ແຕ່ກໍໄດ້ພົບກັບບັນຫາຫຍຸ້ງຍາກຂໍ້ໜຶ່ງ, ຄື, ທຸກປີຕ້ອງໃຊ້ງົບປະມານ 10 ລ້ານຢວນໃນການອະນາໄມນ້ຳໜອງ, ເຊິ່ງກວມເກືອບ 10% ຂອງງົບປະມານລາຍຈ່າຍດ້ານພື້ນຖານໂຄງລ່າງຂອງທົ່ວນະຄອນເຊ້ຍເມີນ. ແຕ່ໃນຕອນ ນັ້ນ, 10 ລ້ານຢວນແມ່ນຕົວເລກມະຫາສານ, ເງິນກ້ອນນີ້ເອົາອອກໄປນຳໃຊ້ຫຼືບໍ່ ແລະ ຄວນນຳໃຊ້ແບບໃດ? ທາງອົງການປົກຄອງນະຄອນເຊ້ຍເມີນຮູ້ສຶກລຳບາກໃນທີ່ສຸດ, ໃນເວລາປຶກສາຫາລືກໍມີຄວາມເຫັນທີ່ແຕກຕ່າງກັນຫຼາຍ. ແຕ່ທ່ານສີຈິ້ນຜິງທີ່ເປັນຮອງເຈົ້າຄອງຜູ້ປະຈຳການທີ່ຮັບຜິດຊອບດ້ານການເງິນ ໄດ້ສະໜັບສະໜູນວຽກງານນີ້ຢ່າງສະເໝີຕົ້ນສະເໝີປາຍ, ສຸດທ້າຍເຈົ້າໜ້າທີ່ການນຳຫຼາຍທ່ານໄດ້ມີຄວາມເຫັນເປັນເອກະພາບກັນ, ທ່ານສີຈິ້ນຜິງຈຶ່ງໄດ້ອະນຸມັດເບີກຈ່າຍເງິນກ້ອນນີ້.
ທ່ານຫວາງຈີ່ນສຸຍ ຫົວໜ້າຄະນະປະຈຳສະພາປະຊາຊົນນະຄອນເຊ້ຍເມີນໃນເວລານັ້ນໄດ້ຫວນຄືນວ່າ: “ໃນ 3 ປີລຽນຕິດ, ໄດ້ຂຶ້ນງົບປະມານທັງໝົດ 30 ລ້ານຢວນ, ໃນທີ່ສຸດພວກເຮົາໄດ້ປັບປຸງໜອງຢຸນຕ່າງໃຫ້ໄດ້. ເລື່ອງນີ້ແມ່ນສະຫາຍສີຈິ້ນຜິງໄດ້ປະຕິບັດຮ່ວມກັນກັບພວກເຮົາ, ພວກເຮົາໄດ້ຮັບບົດຮຽນຈາກເລື່ອງນີ້ຄື, ບໍ່ຄວນພັດທະນາການຜະລິດທີ່ແລກດ້ວຍການທຳລາຍສິ່ງແວດລ້ອມ.”
ຢູ່ທິດຕາເວັນຕົກສຽງໃຕ້ຂອງນະຄອນເຊ້ຍເມີນ, ມີເກາະດອນແຫ່ງໜຶ່ງທີ່ຢູ່ໃກ້ກັບນະຄອນເຊ້ຍເມີນໂດຍມີທະເລຂັ້ນໄວ້ ຊື່ວ່າ ເກາະກູລ້າງອີ, ມີເນື້ອທີ່ປະມານ 1,88 ກິໂລຕາແມັດ. ໃນປະຫວັດສາດສະໄໝໃໝ່ຂອງຈີນ, ເກາະດອນແຫ່ງນີ້ເຄີຍແມ່ນແດນສະຫວັນແຫ່ງໜຶ່ງທີ່ຫຼາຍຄົນມຸ່ງຫວັງຢາກໄປສຳຜັດ. ເມື່ອ 100 ກວ່າປີກ່ອນ, ຄຸນພໍ່ຈອນ ແມັກໂກວັນຂອງອັງກິດໄດ້ເດີນທາງໄປຮອດເກາະກູລ້າງອີເປັນຄັ້ງທຳອິດ, ທ່ານໄດ້ບັນທຶກໄວ້ວ່າ : “ຮ່ອມພູ ທົ່ງພຽງ, ຫາດຊາຍ ແລະໜ້າຜາສູງຊັນ, ຍັງມີແຫຼມທະເລເດ່ອອກມາ, ທິວທັດສວຍສົດງົດງາມເຮັດໃຫ້ເກາະດອນແຫ່ງນີ້ກາຍເປັນໜຶ່ງໃນເກາະດອນງາມທີ່ສຸດຢູ່ເຂດແຄມທະເລຂອງຈີນ.”
ກາງສະຕະວັດທີ 19, ຫຼັງຈາກນະຄອນເຊ້ຍເມີນກາຍເປັນດ່ານໜ້າໃນການເປີດການຄ້າຂາຍກັບຕ່າງປະເທດແລ້ວ, ປະຊາຊົນທ້ອງຖິ່ນ, ຈີນຕ່າງດ້າວທີ່ກັບຄືນປະເທດຊາດ, ແລະ ພົນລະເມືອງຕ່າງປະເທດກໍໄດ້ໄປຕັ້ງຖິ່ນຖານຢູ່ແຫ່ງນີ້, ໄດ້ສ້າງສິ່ງກໍ່ສ້າງທີ່ມີສີສັນຢ່າງຫຼາກຫຼາຍ, ສິລະປະ ວັນນະຄະດີ ແລະການສຶກສາມີຄວາມຈະເລີນຮຸ່ງເຮືອງໄດ້ໄລຍະໜຶ່ງ.
ແຕ່ວ່າ ເມື່ອຊຸມປີ 1980, ໃນເວລາທີ່ທ່ານສີຈິ້ນຜິງໄປຮອດແຫ່ງນີ້, ສະພາບການຂອງເກາະກູລ້າງອີເຮັດໃຫ້ຜູ້ພົບເຫັນແລ້ວມີຄວາມຮູ້ສຶກເປັນຫ່ວງທີ່ສຸດ. ໃນເວລານັ້ນພໍດີແມ່ນໄລຍະເບື້ອງຕົ້ນຂອງການປະຕິຮູບ ແລະ ເປີດປະຕູສູ່ພາຍນອກ, ໃນກະແສຂອງການພັດທະນາເສດຖະກິດຢ່າງຄຶກຄື້ນນັ້ນ, ຫຼາຍຄົນໄດ້ເບິ່ງຂ້າມຄວາມສຳຄັນຂອງເກາະກູລ້າງອີ, ເຮືອນວິນລາຫຼາຍຫຼັງຕົກເປັນເຮືອນເກົ່າທີ່ບໍ່ໄດ້ຮັບການປັບປຸງສ້ອມແປງ, ຊາວປະມົງບາງຄົນຍັງໄດ້ມ້າງເຮືອນວິນລາເກົ່າເພື່ອເອົາດິນຈີ່ໄປເຮັດເຕົາ, ຕັດຕົ້ນໄມ້ທີ່ມີຄ່າເອົາໄປເປັນຟືນ.
ກົງກັນຂ້າມທ່ານສີຈິ້ນຜິງໄດ້ຖືເອົາເກາະດອນນ້ອຍແຫ່ງນີ້ເປັນ “ມິ່ງຂວັນຂອງຊາດ”. ທ່ານເຄີຍກ່າວວ່າ: “ຢູ່ໃນການສ້າງສາຕົວເມືອງ ແລະ ແຫຼ່ງທ່ອງທ່ຽວຂອງປະເທດເຮົາ, ບ່ອນທີ່ສາມາດເຊື່ອມໂຍງກັບທິວທັດທຳມະຊາດ ແລະ ທິວທັດດ້ານວັດທະນະທຳໄດ້ຢ່າງກົມກຽວກັນນັ້ນມີຢູ່ບໍ່ຫຼາຍ, ມີຄວາມຈຳເປັນທີ່ສຸດທີ່ຈະຕ້ອງຖືເອົາເກາະກູລ້າງອີເປັນມິ່ງຂວັນຂອງຊາດ, ທັງຕ້ອງວາງແຜນການເສີມສ້າງ ແລະ ອະນຸລັກຢ່າງເປັນເອກະພາບກັນໃນລະດັບສູງ.”
ທ່ານຈ່າງເວີຍຊິ່ນ ຮອງຫົວໜ້າຫ້ອງການຄຸ້ມຄອງແຫຼ່ງທ່ອງທ່ຽວເກາະກູລ້າງອີກ່າວວ່າ, ປີ 1987 ທ່ານເຄີຍເຂົ້າຮ່ວມການສ້າງແຜນແມ່ບົດໃນການພັດທະນາເຂດເກາະກູລ້າງອີ - ພູວ້ານຊື. ທ່ານຫວນຄືນວ່າ: “ສະຫາຍສີຈິ້ນຜິງໄດ້ມາຊີ້ນຳວຽກງານຢູ່ເລື້ອຍໆ, ບອກພວກເຮົາວ່າ, ຕ້ອງເກັບກຳຂໍ້ມູນພື້ນຖານໃຫ້ຄົບຖ້ວນ ຮອບດ້ານ ຕິດແທດຕົວຈິງ ແລະ ລະອຽດຮອບຄອບ. ກໍຍ້ອນພາຍໃຕ້ການນຳພາຂອງສະຫາຍສີຈິ້ນຜິງ, ໜ່ວຍງານສ້າງແຜນແມ່ບົດໄດ້ໃຊ້ເວລາເກືອບໜຶ່ງປີ, ໄດ້ເກັບກຳຂໍ້ມູນຢ່າງລະອຽດກ່ຽວກັບຕົ້ນໄມ້ທີ່ມີຄ່າ ສິ່ງກໍ່ສ້າງທີ່ມີເອກະລັກຢູ່ແຫຼ່ງທ່ອງທ່ຽວຕ່າງໆຂອງນະຄອນເຊ້ຍເມີນ ເຊິ່ງລວມທັງເກາະກູລ້າງອີ.”
ຫໍປ່າກວ້າ - ຄືຕົວແທນຂອງສະຖາປັດຕະຍະກຳສະໄໝໃໝ່ຂອງນະຄອນເຊ້ຍເມີນ, ເປັນຂີດໝາຍທີ່ກຳປັ່ນເດີນທາງເຂົ້າອອກທ່າທີ່ ຕັ້ງຢູ່ເທິງເກາະກູລ້າງອີ. ທ່ານກົງເຈ ຜູ້ອຳນວຍການຫໍພິພິທະພັນເຊ້ຍເມິນທັງເປັນຜູ້ທີ່ຮັບຜິດຊອບໃນການປະຕິສັງຂອນສິ່ງກໍ່ສ້າງທີ່ມີລັກສະນະເປັນສັນຍະລັກຢູ່ເທິງເກາະກູລ້າງອີໃນເວລານັ້ນ, ທ່ານຍັງຈື່ຈຳເລື່ອງນີ້ມາໂດຍຕະຫຼອດ.
ຫໍປ່າກວ້າທີ່ສ້າງຂຶ້ນໃນປີ 1907, ມີເນື້ອທີ່ກໍ່ສ້າງທັງໝົດ 3710 ຕາແມັດ, ສູງ 25,7 ແມັດ. ປີ 1983, ຄະນະພັກ ແລະອົງການປົກຄອງນະຄອນເຊ້ຍເມີນໄດ້ຕົກລົງສ້າງຫໍພິພິທະພັນຢູ່ແຫ່ງນີ້, ແຕ່ຫໍປ່າກວ້າບໍ່ໄດ້ຮັບການປະຕິສັງຂອນມາເປັນເວລາດົນນານແລ້ວ, ທ່ານກົງເຈຈຶ່ງໝົດວິທີທາງໃນການລະດົມທຶນເພື່ອປະຕິສັງຂອນ.
ໃນມື້ໜຶ່ງຂອງປີ 1986, ຫຼັງຈາກທ່ານສີຈິ້ນຜິງໄດ້ປະກອບຄຳເຫັນໃນກອງປະຊຸມຄັ້ງໜຶ່ງທີ່ຈັດຂຶ້ນຢູ່ເກາະກູລ້າງອີແລ້ວກຳລັງຍ່າງອອກຈາກຫໍປະຊຸມ, ທ່ານກົງເຈໄດ້ດຶງທ່ານສີຈິ້ນຜິງໄວ້ ແລະເວົ້າວ່າ : “ສະຫາຍຮອງເຈົ້າຄອງ, ເຊີນທ່ານໄປທ່ຽວຊົມຫໍປ່າກວ້າ.” ທ່ານສີຈິ້ນຜິງໄດ້ຕອບທັນທີເລີຍວ່າ“ໄດ້”. ເມື່ອຍ່າງທ່ຽວເລາະເບິ່ງໄດ້ຮອບໜຶ່ງທົ່ວເດີ່ນແລ້ວ, ທ່ານກົງເຈເວົ້າຕໍ່ວ່າ “ເຊີນຂຶ້ນໄປເບິ່ງຢູ່ຊັ້ນເທິງອີກ.” ທ່ານສີຈິ້ນຜິງຕອບທັນທີວ່າ : “ຂ້າພະເຈົ້າຮູ້ຈຸດປະສົງຂອງທ່ານແລ້ວ.” ທ່ານສີຈິ້ນຜິງເຂົ້າໄປໃນຫໍປ່າກວ້າ, ແລະຍ່າງຂຶ້ນຂັັ້ນໄດ, ເມື່ອຍ່າງຂຶ້ນໄປໃນແຕ່ລະບາດກ້າວ ແປ້ນຂັ້ນໄດໄມ້ທີ່ເກົ່າແກ່ກໍມີສຽງດັງໂຄບເຄບ, ນໍ້າທີ່ຮົ່ວຈາກຫຼັງຄາມາເປັນເວລາດົນນານໄດ້ສ້າງຮອຍໂໝກສີເຫຼືອງໄວ້ຕາມສິ່ງກໍ່ສ້າງຢ່າງຫຼວງຫຼາຍ. ເມື່ອເດັກນ້ອຍແລ່ນຜ່ານ, ແປ້ນຂັ້ນໄດໄມ້ກໍສັ່ນສະເທືອນໄວ້.
ທ່ານສີຈິ້ນຜິງທັງຍ່າງທັງຖາມວ່າ: “ຍັງຂາດງົບປະມານຫຼາຍເທົ່າໃດ?”
ທ່ານກົງເຈຕອບວ່າ: “ຍັງຂາດ 3 ແສນຢວນ.”
ທ່ານສີຈິ້ນຜິງເວົ້າວ່າ: “ມື້ອື່ນມາເອົາໂລດ.”
ປະຈຸບັນເມື່ອເວົ້າເຖິງເລື່ອງນີ້, ທ່ານກົງເຈຍັງຮູ້ສຶກຕື່ນເຕັ້ນດີໃຈຢູ່ຕະຫຼອດ, ທ່ານໄດ້ຕັດສິນໃຈໃນທັນທີ, ຂ້າພະເຈົ້າຈະບໍ່ມີວັນລືມວ່າ, ໃນເວລາທີ່ພົບພໍ້ຄວາມຫຍຸ້ງຍາກລຳບາກທີ່ສຸດ, ທ່ານໄດ້ເບີກງົບປະມານ 3 ແສນຢວນນີ້, ໄດ້ຫັນປ່ຽນຊາຕາກຳຂອງສະຖາປັດຕະຍະກຳບູຮານແຫ່ງນີ້.”
ຫຼັງຈາກປະຕິສັງຂອນແລ້ວ, ຫໍປ່າກວ້າໄດ້ກາຍເປັນຫໍພິພິທະພັນໂອແກນບູຮານພຽງແຫ່ງດຽວພາຍໃນປະເທດ ແລະ ຂະໜາດໃຫຍ່ທີ່ສຸດໃນໂລກ. ຍ້ອນວ່າຍັງສາມາດໄດ້ຮັກສາສະພາບດັ້ງເດີມໃນອະດີດ, ຫໍປ່າກວ້າ ແລະ ສິ່ງກໍ່ສ້າງເກົ່າແກ່ອີກ 52 ຫຼັງ, ໄດ້ກາຍເປັນແຫຼ່ງມໍລະດົກດ້ານວັດທະນະທຳອັນສຳຄັນທີ່ສຸດຂອງເກາະກູລ້າງອີ.
ປີ 2017, ເກາະກູລ້າງອີໄດ້ຮ້ອງຂໍເຂົ້າເປັນມໍລະດົກໂລກຢ່າງສຳເລັດຜົນ, ທ່ານສີຈິ້ນຜິງທີ່ີໄດ້ເປັນຜູ້ນຳສູງສຸດຂອງພັກ ແລະ ລັດຖະບານຈີນໄດ້ໃຫ້ທິຊີ້ນຳທີ່ສຳຄັນວ່າ: “ຕ້ອງຮັກສາມໍລະດົກວັດທະນະທຳຂອງບັນພະບຸລຸດໃຫ້ດີ, ສືບທອດວັດທະນະທຳປະຫວັດສາດຕໍ່ໆໄປໃຫ້ດີກວ່າເກົ່າ.”
ຄຳເຫັນ
0