ວັນ​ທີ 9 ສິງ​ຫາ​ນີ້, ຈຳ​ນວນຜູ້​ຖືກ​ບົ່ງ​ມະ​ຕິ​ເປັນ​ພະ​ຍາດ​ໂຄວິດ-19 ​ຢູ່​ອາ​ເມ​ຣິ​ກາ​​ມີ​ເຖິງ 5.036.387 ຄົນ, ມີຜູ້​ເສຍ​ຊີ​ວິດ​ຍ້ອນ​​ພະ​ຍາດ​ມີເຖິງ 162.851 ຄົນ. ຈາກ​ຜູ້​ເປັນ​ພະ​ຍາດ 4 ລ້ານ​ຄົນ​ເພີ່ມ​ຂຶ້ນ​ເປັນ 5 ລ້ານ​ຄົນ,ໃຊ້​ເວ​ລາພຽງ​ແຕ່ 17 ວັນ​ເທົ່າ​ນັ້ນ. ຈຳ​ນວນ​ປະ​ຊາ​ກອນ​ຂອງ​ອາ​ເມ​ຣິ​ກາ​ກວມ​ພຽງ​ແຕ່ 4% ຂອງ​ໂລກ, ​ແຕ່ໄດ້​ກວ​ມ​ປະ​ມານ 25% ຂອງ​ຈຳ​ນວນ​ຜູ້​ເປັນ​ພະ​ຍາດ​ຂອງ​ໂລກ ແລະ 22,4% ຂອງ​ຈຳ​ນວນ​ຜູ້​ເສຍ​ຊີ​ວິດ​ຂອງ​ໂລກ.
 

ໃນ​ຈຳ​ນວ​ນ​ຜູ້​ຖືກ​ບົ່ງ​ມະ​ຕິ​ເປັນ​ພະ​ຍາດ​ໂຄວິດ-19 ທີ່​ມີ​ຫຼາຍກວ່າ 5 ລ້ານ​ຄົນ​ຢູ່​ອາ​ເມ​ຣິ​ກາ, ມີ​ຫຼາຍກວ່າ 3,38 ແສນ​ຄົນ​ເປັນ​ເດັກ​ນ້ອຍ. ສະ​ມາ​ຄົມ​​ແພດເດັກ​ນ້ອຍ​ຂອງ​ອາ​ເມ​ຣິ​ກາ​ຊີ້​ໃຫ້​ເຫັນ​ວ່າ: ໃນ​ທ້າຍ​ເຄິ່ງ​ເດືອນ​ກໍ​ລະ​ກົດ​ຜ່ານ​ມາ, ຢູ່​ອາ​ເມ​ຣິ​ກາ​ໄດ້​ມີ​ເດັກ​ນ້ອຍ​​ເກືອບ 1 ແສນ​ຄົນ​ຖືກ​ບົ່ງ​ມະ​ຕິ​ເປັນ​ພະ​ຍາດ​ໂຄວິດ-19, ໃນ​ເດືອ​ນ​ກໍ​ລະ​ກົດ​ປີ​ນີ້​ໄດ້​ມີ​ເດັກ​ນ້ອຍ​ຫຼາຍກວ່າ 25 ຄົນ​ເສຍ​ຊີ​ວິດ​ຍ້ອນ​ເປັນ​ພະ​ຍາດ​ໂຄວິດ-19. ແຕ່​ວ່າ, ເມື່ອ​ປະ​ເຊີນ​ໜ້າ​ກັບ​ສະ​ພາບ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ທີ່​ໜັກ​ໜ່ວງ​ແນວ​ນີ້, ທ່ານ ໂດ​ໂນ ທ​ຣຳ ຍັງ​ໄດ້​ອອກ​ຄຳ​ສັ່ງ​ໃຫ້​ໂຮງ​ຮຽນ​ຂອງ​ອາ​ເມ​ຣິ​ກາ​ຟື້ນ​ຟູ​ການ​ຮຽນ​ການ​ສອນ​ໂດຍ​ໄວ, ​ທ່ານເປັນ​ປະ​ທາ​ນາ​ທິ​ບໍ​ດີ​​ແຕ່​ພັດ​ບໍ່​ໃຫ້​ຄວາມ​ສຳ​ຄັນ​ຕໍ່​ຄວາມ​ປອດ​ໄພ​ດ້ານ​ຊີ​ວິດ​ຂອງ​ປະ​ຊາ​ຊົນ,ເຊື່ອ​ວ່າ​​ລັກ​ສະ​ນະ​ແບບ​ນີ້ຈະ​ບໍ່​ເຄີຍ​ມີ​ມາ​ກ່ອນໃນ​ປະ​ຫວັດ​ສາດ​ຂອງ​ອາ​ເມ​ຣິ​ກາ.
 

ຄຳ​ຂວັນ​ໃນ​ການ​ຫາ​ສຽງ​ເລືອກ​ຕັ້ງ​ຂອງ​ທ່ານ ໂດ​ໂນ ທ​ຣຳ ໃນໄລ​ຍະ​ຜ່ານ​ມາແມ່ນ​ເຮັດ​ໃຫ້​ອາ​ເມ​ຣິ​ກາ​ຍິ່ງ​ໃຫຍ່​ຄື​ເກົ່າ, ແຕ່​ທີ່​ຈິງ​ແລ້ວ, ທ່ານ ໂດ​ໂນ ທ​ຣຳ ພັດໄດ້​ກະ​ທຳ​ຕາມຄຳ​ຂວັນທີ່​ວ່າ​ເຮັດ​ໃຫ້​ເຊື້ອ​ໄວ​ຣັ​ສ​ຢູ່​ອາ​ເມ​ຣິ​ກາ​ຫຼາຍກວ່າ​ເກົ່າ!