ຫວ່າງມໍ່ໆມານີ້, ວາລະສານທ້າມສ໌ລາຍສັບປະດາຂອງອາເມຣິກາໄດ້ພິມບົດຄວາມທີ່ພາດຫົວຂໍ້ວ່າ “ເປັນຫຍັງອາເມຣິກາພວມປະລາໄຊໃນການຕໍ່ສູ້ຕ້ານກັບການແຜ່ລະບາດຂອງພະຍາດໂຄວິດ-19” ໂດຍຂຽນວ່າ: ການຮັບມືກັບການແຜ່ລະບາດຂອງພະຍາດໂຄວິດ-19 ພວມປະລາໄຊຢ່າງສິ້ນເຊີງແບບນີ້, ສາເຫດຕົ້ນຕໍແມ່ນຍ້ອນຄວາມຜິດພາດຂອງລັດຖະບານ.
ບົດຄວາມຊີ້ໃຫ້ເຫັນວ່າ: ເຖິງວ່າເຈົ້າໜ້າທີ່ສາທາລະນະສຸກແລະບຸກຄົນອື່ນໆໄດ້ສຸມທຸກຄວາມພະຍາຍາມຢ່າງສຸດຂີດແລ້ວກໍຕາມ, ແຕ່ເຈົ້າໜ້າທີ່ທີ່ໄດ້ຮັບການເລືອກຕັ້ງຈາກປະຊາຊົນຫຼາຍທ່ານຂອງອາເມຣິກາບໍ່ໄດ້ເອົາໃຈໃສ່ຕໍ່ໄພຂົ່ມຂູ່ຈາກພະຍາດໂຄວິດ-19 ໃນໄລຍະເບື້ອງຕົ້ນຢ່າງຕັ້ງໜ້າ. ທຳນຽບຂາວໄດ້ສິ້ນເປືອງເວລາຫຼາຍອາທິດໂດຍເມີນເສີຍຕໍ່ຄວາມຮ້າຍແຮງຂອງເຊື້ອພະຍາດດັ່ງກ່າວ,ແລະເຊື່ອວ່າເຊື້ອພະຍາດຈະສູນຫາຍໄປເອງ; ລັດຖະບານບໍ່ໄດ້ວາງແຜນການຕິດຕາມແລະກວດຫາເຊື້ອທີ່ເໝາະສົມ; ຮ້າຍແຮງກວ່ານັ້ນອີກແມ່ນທຳນຽບຂາວໄດ້ສົ່ງເສີມໃຫ້ລັດຕ່າງໆເປີດລັດຄືນໃໝ່ໃນສະພາບການທີ່ຍັງມີການແຜ່ລະບາດຂອງພະຍາດໂຄວິດ-19 ໜັກໜ່ວງຄືເກົ່າ.
ບົດຄວາມຍັງລະບຸອີກວ່າ: ຄວາມຜິດພາດທີ່ຈະແຈ້ງຂອງລັດຖະບານອາເມຣິກາແມ່ນບໍ່ມີອຸປະກອນກວດຫາເຊື້ອຂັ້ນພື້ນຖານທີ່ພຽງພໍ ເພາະນີ້ເປັນປັດໄຈສຳຄັນໃນການຮັບມືກັບການແຜ່ລະບາດຂະໜາດໃຫຍ່. ຄົນອາເມຣິກາບາງຄົນເວົ້າວ່າ: ເຂົາເຈົ້າຕ້ອງລໍຖ້າສອງອາທິດປາຍຈຶ່ງສາມາດໄດ້ຮັບຜົນກວດ. ແຕ່ເມື່ອປະເຊີນກັບສະພາບການແບບນີ້, ທຳນຽບຂາວບໍ່ໄດ້ຮຽກຮ້ອງໃຫ້ຍົກສູງຄວາມສາມາດດ້ານການກວດຫາເຊື້ອເພີ່ມຂຶ້ນ,ແຕ່ຫາກໄດ້ສະເໜີວ່າໃຫ້ອາເມຣິກາຫຼຸດການກວດຫາເຊື້ອ.
ການແຜ່ລະບາດຂອງພະຍາດໂຄວິດ-19 ຄັ້ງນີ້ໄດ້ເຜີຍແບຂໍ້ບົກຜ່ອງພື້ນຖານທີ່ສຳຄັນຂອງອາເມຣິກາ ເຊິ່ງລວມທັງຕາໜ່າງຄວາມໝັ້ນຄົງທາງສັງຄົມທີ່ຖືກທຳລາຍຢ່າງໜັກໜ່ວງ ກໍຄືລັດທິຊາດນິຍົມທີ່ເປັນລະບົບທີ່ເປັນໄພອັນຕະລາຍຕໍ່ຊີວິດ.
ຄຳເຫັນ
0