ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ສິງຫານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນໄດ້ເປັນປະທານຈັດກອງປະຊຸມສຳມະນາກ່ຽວກັບການ ຊຸກຍູ້ເຂດສາມຫຼ່ຽມປາກແມ່ນ້ຳຢາງເຊໃຫ້ພັດທະນາແບບເຊື່ອມໂຍງເຂົ້າເປັນອັນໜຶ່ງອັນດຽວກັນຢູ່ນະຄອນເຫີເຟີຍ ທັງປະກອບຄຳເຫັນທີ່ສຳຄັນ. ທ່ານກ່າວເນັ້ນວ່າ, ຕ້ອງຮັບຮູ້ເຖິງຖານະບົດບາດທີ່ສຳຄັນຂອງເຂດສາມຫຼ່ຽມປາກແມ່ນ້ຳຢາງເຊໃນການພັດທະນາເສດຖະກິດສັງຄົມຂອງຈີນ, ຕ້ອງປະສົມປະສານກັບຄວາມຮຽກຮ້ອງຂອງສະພາບການໃໝ່, ກຳແໜ້ນວຽກງານສຳຄັນໂດຍປິ່ນອ້ອມ “ການເຊື່ອມໂຍງເຂົ້າເປັນອັນໜຶ່ງອັນດຽວກັນ” ແລະ “ຄຸນນະພາບສູງ”, ຊຸກຍູ້ການພັດທະນາແບບເຊື່ອມໂຍງເຂົ້າເປັນອັນໜຶ່ງອັນດຽວກັນຂອງເຂດນີ້ໃຫ້ໄດ້ຮັບປະສິດທິຜົນຢ່າງບໍ່ຢຸດຢັ້ງ.
ທ່ານສີຈິ້ນຜິງກ່າວເນັ້ນວ່າ, ເຂດສາມຫຼ່ຽມປາກແມ່ນ້ຳຢາງເຊຕ້ອງເສີມຂະຫຍາຍທ່າແຮງຕ່າງໆ ເຊັ່ນ: ເຕົ້າໂຮມຜູ້ມີຄວາມຮູ້ຄວາມສາມາດຢ່າງຫຼວງຫຼາຍ, ມີ ວິທະຍາສາດເຕັກໂນໂລຊີໃນລະດັບສູງ, ອຸດສາຫະກຳການຜະລິດມີການພັດທະນາຫຼາຍ ແລະອື່ນໆ, ຕັ້ງໜ້າຄົ້ນຄວ້າເສັ້ນທາງທີ່ກຳເນີດສະພາບການພັດທະນາອັນໃໝ່. ນະຄອນຊຽງໄຮ ແລະ ເຂດສາມຫຼ່ຽມປາກແມ່ນ້ຳຢາງເຊບໍ່ພຽງແຕ່ຕ້ອງສະໜອງຜະລິດຕະພັນທີ່ມີຄຸນນະພາບດີເທົ່ານັ້ນ, ຍັງຕ້ອງສະໜອງສິນຄ້າທີ່ມີສ່ວນວິທະຍາສາດເຕັກໂນໂລຊີທີ່ມີລະດັບສູງ, ເພື່ອຄ້ຳຊູການພັດທະນາດ້ວຍຄຸນນະພາບສູງໃນທົ່ວປະເທດ. ເຂດນີ້ຕ້ອງປັບປຸງສະພາບແວດລ້ອມການດຳເນີນທຸລະກິດຕາມມາດຕະຖານສຸດຍອດຂອງສາກົນ, ໃຊ້ສະພາບແວດລ້ອມທີ່ເປີດກວ້າງ ມີການບໍລິການທີ່ດີ ປະດິດສ້າງໃໝ່ ແລະ ມີປະສິດທິພາບສູງເພື່ອດຶງດູດຜູ້ມີຄວາມຮູ້ຄວາມສາມາດ ກໍຄື ວິສາຫະກິດ ທັງພາຍໃນ ແລະ ຕ່າງປະເທດໄປສ້າງທຸລະກິດຢູ່ແຫ່ງນີ້, ຊຸກຍູ້ໃຫ້ການຄ້າແລະ ການລົງທຶນມີຄວາມສະດວກກວ່າເກົ່າ, ພະຍາຍາມກາຍເປັນຂົວຕໍ່ອັນສຳຄັນໃນການເຊື່ອມຈອດຕະຫຼາດສາກົນກັບຕະຫຼາດພາຍໃນປະເທດ.
ທ່ານສີຈິ້ນຜິງຍັງຊີ້ອອກວ່າ, ການປະຕິບັດຍຸດທະສາດພັດທະນາ ເຂດສາມຫຼ່ຽມປາກແມ່ນ້ຳຢາງເຊໃຫ້ເຊື່ອມໂຍງເຂົ້າເປັນອັນໜຶ່ງອັນດຽວກັນຕ້ອງທຳລາຍອຸປະສັກດ້ານການບໍລິຫານ, ປັບປຸງນະໂຍບາຍຂອງແຫ່ງຕ່າງໆໃຫ້ປະສານສົມທົບກັນ, ຊຸກຍູ້ການພັດທະນາທີ່ມີຄຸນນະພາບສູງ. 3 ແຂວງ ແລະ 1 ກຳແພງນະຄອນຢູ່ເຂດນີ້ຕ້ອງຈັດຕັ້ງປະຕິບັດນະໂຍບາຍຕ່າງໆຂອງສູນກາງພັກກອມມູນິດຈີນບົນພື້ນຖານທີ່ກຳແໜ້ນການປ້ອງກັນ ແລະ ຄວບຄຸມພະຍາດຢ່າງເປັນປົກກະຕິ, ຮັບປະກັນມາດຕະການແກ້ໄຂຄວາມຫຍຸ້ງຍາກຕ່າງໆສາມາດເຂົ້າເຖິງຮາກຖານ, ເກີດຜົນປະໂຫຍດຕໍ່ອົງກອນເສດຖະກິດໃນຕະຫຼາດໂດຍກົງ, ນຳພາທຶນຮອນສະໜັບສະໜູນອຸດສາຫະກຳການຜະລິດ ແລະ ວິສາຫະກິດຂະໜາດກາງ ແລະ ນ້ອຍ. ຕ້ອງເລັ່ງລັດການຫັນເປັນແບບດີຈີຕອນ ແລະ ແບບອັດສະລິຍະຂອງອຸດສາຫະກຳ, ເລັ່ງລັດຊຸກຍູ້ການສ້າງສາໂຄງການໃຫຍ່ທີ່ສຳຄັນ.
ຄຳເຫັນ
0