ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 26 ສິງຫານີ້, ທ່ານສີຈິ້ນຜິງ ປະທານປະເທດຈີນ ແລະ ທ່ານວະລາດີເມຍ ປູຕິນ ປະທານາທິບໍດີຣັດເຊຍຕ່າງກໍໄດ້ສົ່ງສານຊົມເຊີຍເຖິງພິທີເປີດກິດຈະກຳປີປະດິດສ້າງໃໝ່ດ້ານວິທະຍາສາດເຕັກໂນໂລຊີຈີນ-ຣັດເຊຍ.
ທ່ານສີຈິ້ນຜິງກ່າວເນັ້ນວ່າ, ຈີນ ແລະຣັດເຊຍ ໃນຖານະເປັນປະເທດໃຫຍ່ທີ່ມີຄວາມຮັບຜິດຊອບ ແລະເປັນປະເທດໃຫຍ່ດ້ານວິທະຍາສາດເຕັກໂນໂລຊີທີ່ມີບົດບາດສຳຄັນ, ຄວນເຄື່ອນໄຫວໃຫ້ສອດຄ່ອງກັບກະແສລວມຂອງຍຸກສະໄໝ ກຳແໜ້ນທ່ວງທ່າລວມຂອງການພັດທະນາ, ຊຸກຍູ້ນັກຄົ້ນຄວ້າວິທະຍາສາດ ແລະວົງການວິທະຍາສາດເຕັກໂນໂລຊີຂອງສອງປະເທດໃຫ້ດຳເນີນການແລກປ່ຽນ ແລະ ຮ່ວມມືກັນຢ່າງຮອບດ້ານໃນຫຼາຍລະດັບ ໃນຫຼາຍຂົງເຂດຢ່າງກວ້າງຂວາງ, ປະກອບສ່ວນໃໝ່ໃຫຍ່ຫຼວງກວ່າເກົ່າເຂົ້າໃນການຊຸກຍູ້ການປະຕິຮູບລະບົບການບໍລິຫານໂລກ ແລະ ສ້າງປະຊາຄົມຮ່ວມຊາຕາກຳຂອງມວນມະນຸດ.
ໃນສານຊົມເຊີຍຂອງທ່ານປູຕິນລະບຸວ່າ: ການປະດິດສ້າງໃໝ່ດ້ານວິທະຍາສາດເຕັກໂນໂລຊີແມ່ນໜຶ່ງໃນຂົງເຂດການຮ່ວມມືທີ່ມີອະນາຄົດອັນສົດໃສທີ່ສຸດລະຫວ່າງສອງປະເທດຣັດເຊຍ-ຈີນໃນປະຈຸບັນ, ທັງແມ່ນສິ່ງຕັດສິນການພັດທະນາຂອງສອງປະເທດໃນອະນາຄົດ, ທັງພົວພັນເຖິງການຍົກລະດັບຊີວິດການເປັນຢູ່ຂອງປະຊາຊົນຂອງສອງປະເທດ. ພາຍໃຕ້ຂອບ “ປີປະດິດສ້າງໃໝ່ດ້ານວິທະຍາສາດເຕັກໂນໂລຊີ” ຄັ້ງນີ້ທີ່ມີກິດຈະກຳຢ່າງຫຼວງຫຼາຍ, ລວມທັງໂຄງການຮ່ວມມືຕ່າງໆ, ເຊັ່ນ: ການຄົ້ນຄວ້າວິທະຍາສາດ ການວາງສະແດງ ການແລກປ່ຽນດ້ານວິຊາການແລະອື່ນໆ, ໂດຍສະເພາະແມ່ນລັດຖະບານສອງປະເທດ ພາກສ່ວນການແພດ ແລະ ຄົ້ນຄວ້າວິທະຍາສາດໄດ້ຮ່ວມມືກັນຢ່າງໃກ້ຊິດກ່ຽວກັບການຕ້ານກັບພະຍາດໂຄວິດ-19, ໄດ້ຮັບໝາກຜົນສຳຄັນຫຼາຍຢ່າງ, ແລະມີບົດບາດຢ່າງກວ້າງຂວາງ.
ເດືອນມິຖຸນາປີ 2019, ໃນໄລຍະທີ່ທ່ານປະທານສີຈິ້ນຜິງໄປຢ້ຽມຢາມຣັດເຊຍ, ໄດ້ຮ່ວມກັບທ່ານປະທານາທິບໍດີປູຕິນໄດ້ປະກາດວ່າປີ 2020 ແລະ ປີ 2021ຈະຈັດກິດຈະກຳ “ປີປະດິດສ້າງໃໝ່ດ້ານວິທະຍາສາດເຕັກໂນໂລຊີຈີນ-ຣັດເຊຍ”, ນີ້ແມ່ນຄັ້ງທຳອິດທີ່ຈີນ ແລະ ຣັດເຊຍໄດ້ຈັດກິດຈະກຳປີທີ່ກ່ຽວຂ້ອງພາຍໃຕ້ຫົວຂໍ້ “ປະດິດສ້າງໃໝ່ດ້ານວິທະຍາສາດເຕັກໂນໂລຊີ”.
ຄຳເຫັນ
0