ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
“ພູຂຽວນໍ້າໃສ ກໍແມ່ນພູເງິນພູຄຳ”, ປະຈຸບັນ ແນວຄວາມຄິດທີ່ມີຄວາມໝາຍເລິກເຊິ່ງປະໂຫຍກນີ້ ໄດ້ກາຍເປັນຄວາມເວົ້າອະມະຕະທີ່ປະຊາຊົນຈີນຮັບຮູ້ຢ່າງກວ້າງຂວາງ, ທັງໄດ້ເຊື່ອມສານເຂົ້າສູ່ຊີວິດປະຈຳວັນຂອງປະຊາຊົນຈີນ.
ເດືອນກັນຍາປີ 2016, ທ່ານສີຈິ້ນຜິງໄດ້ກ່າວຄຳປາໄສໃນກອງປະຊຸມສຸດຍອດດ້ານອຸດສາຫະກຳການຄ້າG20
ກ່ຽວກັບບັນຫາວ່າຄວນເຮັດແນວໃດຈຶ່ງຈະສາມາດນຳໃຊ້ “ພູຂຽວນໍ້າໃສ”ເພື່ອຊຸກຍູ້ການພັດທະນາເສດຖະກິດ, ແລະ ສ້າງ “ພູເງິນພູຄຳ”ນັ້ນ, ທ່ານສີຈິນຜິງເຄີຍໃຫ້ທິດຊີ້ນຳມາຫຼາຍເທື່ອແລ້ວວ່າ: “ການອະນຸລັກສິ່ງແວດລ້ອມໃຫ້ດີຂຶ້ນກໍແມ່ນຮັກສາກຳລັງການຜະລິດ, ການປັບປຸງສິ່ງແວດລ້ອມກໍແມ່ນການພັດທະນາກຳລັງການຜະລິດ”. ເດືອນກັນຍາປີ 2016, ໃນເວລາເຂົ້າຮ່ວມກອງປະຊຸມສຸດຍອດດ້ານອຸດສາຫະກຳການຄ້າG20, ທ່ານສີຈິ້ນຜິງໄດ້ກ່າວວ່າ: “ຢູ່ໃນຈຸດເລີ່ມຕົ້ນໃໝ່, ພວກເຮົາຈະຊຸກຍູ້ການພັດທະນາແບບສີຂຽວຢ່າງເດັດດ່ຽວໜຽວແໜ້ນ, ສະແຫວງຫາການພັດທະນາທີ່ມີປະສິດທິຜົນ ແລະມີຄຸນນະພາບສູງກວ່າເກົ່າ.”
ເມື່ອລະບົບນິເວດດີຂຶ້ນກໍຈະມີຄວາມສິວິໄລເພີ່ມຂຶ້ນ, ເມື່ອລະບົບນິເວດຊຸດໂຊມກໍຈະເຮັດໃຫ້ຄວາມສິວິໄລຊຸດໂຊມລົງ. ການອະນຸລັກສິ່ງແວດລ້ອມແມ່ນພາລະກິດໃນການສ້າງຜົນງານໃນປະຈຸບັນ ແລະ ມີຜົນປະໂຫຍດໃຫ້ກັບຫຼາຍເຊັ່ນຄົນ.
ບໍ່ວ່າໃນສະໄໝບູຮານຫຼືສະໄໝປະຈຸບັນ, ຢູ່ຈີນ ຫຼືວ່າຢູ່ຕ່າງປະເທດກໍຕາມ, ກໍລະນີທີ່ກ່າວມານີ້ມີຢູ່ຢ່າງຫຼວງຫຼາຍ. ທ່ານອັງແກນໄດ້ຂຽນໄວ້ໃນປື້ມ “ທຳມະຊາດສັດຈະວິພາກ” ວ່າ: “ພົນລະເມືອງຢູ່ເມໂຊປູຕາເມຍ, ເກຼັກ, ອາຊີນ້ອຍ ແລະ ແຫ່ງອື່ນໆ, ໄດ້ທຳລາຍປ່າໄມ້ເພື່ອບຸກເບີກດິນປູກຝັງ, ແຕ່ເຂົາເຈົ້າບໍ່ນຶກບໍ່ຝັນວ່າ, ສະຖານທີ່ເຫຼົ່ານີ້ໃນປະຈຸບັນໄດ້ກາຍເປັນດິນແດນທີ່ບໍ່ມີພືດຫຍັງເກີດຂຶ້ນເລີຍ. ພວກເຮົາບໍ່ຄວນຫຼົງເມົາມົວຫຼາຍເກີນໄປຕໍ່ໄຊຊະນະຂອງມະນຸດເໜືອທຳມະຊາດ. ສຳລັບໄຊຊະນະທຸກເທື່ອໃນລັກສະນະແບບນີ້, ທຳມະຊາດລ້ວນແຕ່ຈະແກ້ແຄ້ນ ມະນຸດພວກເຮົາ. ”
ເຊັ່ນດຽວກັນ, ອະລິຍະທຳຈີນກໍໄດ້ສະສົມສະຕິປັນຍາທີ່ເຄົາລົບທຳມະຊາດນິເວດ. ຕົວຢ່າງວ່າ, ຈີນມີແນວຄິດປັດຊະຍາທີ່ວ່າ “ທຳມະຊາດ ແລະ ມະນຸດເຊື່ອມໂຍງເປັນອັນໜຶ່ງອັນດຽວກັນ” “ກົດແຫ່ງການເຄື່ອນໄຫວຂອງທຸກສິ່ງຢ່າງໃນໂລກເປັນໄປຕາມກົດເກນທຳມະຊາດ” , ມີກະວີອະມະຕະທີ່ວ່າ “ຂໍວອນທ່ານຢ່າຕີນົກໂຕແມ່, ເພາະນົກນ້ອຍຍັງຖ້າແມ່ບິນກັບຄືນຮັງ”, ທັງໝົດເຫຼົ່ານີ້ໄດ້ແຝງຊ້ອນທັດສະນະກ່ຽວກັບທຳມະຊາດທີ່ລຽບງ່າຍ ແລະ ສະຫຼາດ, ຈົນມາຮອດຍຸກປະຈຸບັນຍັງເປັນການເຕືອນສະຕິ ແລະ ເປັນແຮງບັນດານໃຈໃຫ້ແກ່ພວກເຮົາຢູ່.
ທ່ານສີຈິ້ນຜິງເປັນຜູ້ທີ່ສົນໃຈປັດຊະຍາ ແລະ ວັນນະຄະດີທ່ານຈຶ່ງຊ່າງຖອດເອົາບົດຮຽນແລະ ສະຕິປັນຍາຈາກປະຫວັດສາດ, ນັບແຕ່ກອງປະຊຸມໃຫຍ່ຂອງພັກກອມມູນິດຈີນສະໄໝທີ 18 ເປັນຕົ້ນມາ, ໃນການປະກອບຄຳເຫັນຫຼາຍເທື່ອ, ທ່ານສີຈິ້ນຜິງໄດ້ກ່າວວ່າ: ການພັດທະນາແບບສີຂຽວ ກາກບອນຕ່ຳ ແບບໝູນວຽນ, ເປັນທາງເລືອກທີ່ຕ້ອງເປັນໄປຂອງຈີນໃນການຫັນປ່ຽນຮູບແບບການພັດທະນາ, ທັງເປັນທາງເລືອກຢ່າງເປັນເຈົ້າຕົນເອງ.
ວັນທີ 8 ມີນາປີ 2006, ໃນການກ່າວປາຖະກະຖາເທື່ອໜຶ່ງຢູ່ມະຫາວິທະຍາໄລປະຊາຊົນຈີນ, ທ່ານສີຈິ້ນຜິງໄດ້ອະທິບາຍການພົວພັນລະຫວ່າງ “ພູຂຽວນ້ຳໃສ” ແລະ “ພູເງິນພູຄຳ” ດ້ວຍຄວາມເວົ້າທີ່ລຽບງ່າຍ ທັງໄດ້ລົງເລິກການວິເຄາະແນວຄວາມຄິດດັ່ງກ່າວ. ທ່ານກ່າວວ່າ: “ໃນພຶດຕິກຳຕົວຈິງ, ຄວາມຮັບຮູ້ຕໍ່ການພົວພັນລະຫວ່າງ ພູຂຽວນ້ຳໃສ ແລະ ພູເງິນພູຄຳ ໄດ້ຜ່ານ 3 ໄລຍະ, ຄື: ໄລຍະທີ 1 ແມ່ນເອົາພູຂຽວນ້ຳໃສແລກປ່ຽນພູເງິນພູຄຳ, ບໍ່ໄດ້ພິຈາລະນາ ຫຼື ພິຈາລະນາໜ້ອຍກ່ຽວກັບຄວາມສາມາດຮອງຮັບຂອງສິ່ງແວດລ້ອມ, ມີແຕ່ຂຸດຄົ້ນຊັບພະຍາກອນຢ່າງດຽວເທົ່ານັ້ນ. ໃນໄລຍະທີ 2 ກໍຄື ທັງຢາກໄດ້ພູເງິນພູຄຳ ແຕ່ກໍຕ້ອງຮັກສາພູຂຽວນ້ຳໃສເຊັ່ນກັນ, ໃນເວລານີ້, ຄວາມຂັດແຍ່ງລະຫວ່າງການພັດທະນາເສດຖະກິດ ກັບການຂາດເຂີນຊັບພະຍາກອນ ແລະ ການຊຸດໂຊມຂອງສິ່ງແວດລ້ອມກໍໄດ້ພົ້ນເດັ່ນຂຶ້ນ, ມະນຸດຮັບຮູ້ວ່າ ສິ່ງແວດລ້ອມແມ່ນພື້ນຖານສຳລັບການດຳລົງຄົງຕົວ ແລະ ການພັດທະນາຂອງຄົນເຮົາ, ຕ້ອງຮັກສາພູຂຽວໄວ້ ຈຶ່ງມີຟືນດັງໄຟຢ່າງຍືນຍົງ. ຮອດໄລຍະທີ 3 ໄດ້ຮັບຮູ້ວ່າ ພູຂຽວນ້ຳໃສກໍສາມາດນຳມາເຊິ່ງພູເງິນພູຄຳຢ່າງບໍ່ເຫືອດແຫ້ງ, ພູຂຽວນ້ຳໃສກໍແມ່ນພູເງິນພູຄຳນັ້ນເອງ, ຕົ້ນໄມ້ສີຂຽວທີ່ພວກເຮົາປູກໄວ້ກໍແມ່ນຕົ້ນເງິນຕົ້ນຄຳ, ທ່າແຮງດ້ານນິເວດກາຍເປັນທ່າແຮງດ້ານເສດຖະກິດ, ເຊິ່ງກາຍເປັນການພົວພັນທີ່ສາມາດເຊື່ອມໂຍງເປັນອັນໜຶ່ງອັນດຽວກັນໄດ້ມີຄວາມກົມກຽວ ແລະ ເປັນເອກະພາບກັນ, ໄລຍະນີ້ແມ່ນໄລຂະທີ່ກ້າວເຂົ້າສູ່ລະດັບທີ່ສູງກວ່າເກົ່າ.”
ແນວຄວາມຄິດນີ້ຂອງທ່ານສີຈິ້ນຜິງສະແດງໃຫ້ເຫັນວ່າ, ມະນຸດມີແຕ່ຢູ່ຮ່ວມກັບສິ່ງແວດລ້ອມຢ່າງກົມກຽວກັນເທົ່ານັ້ນ, ຈຶ່ງຈະສາມາດດຳລົງຄົງຕົວ ແລະ ພັດທະນາໄດ້ຢ່າງຍືນຍົງ. ກໍຄືດັ່ງທີ່ຄົນບູຮານຈີນເຄີຍກ່າວໄວ້ວ່າ: “ທຳມະຊາດຢູ່ຮ່ວມກັບມະນຸດເຮົາ, ຊີວະນານາພັນ ແລະ ມະນຸດເຮົາເຊື່ອມໂຍງເປັນອັນໜຶ່ງອັນດຽວກັນ.”
ເດືອນພະຈິກປີ 2013, ໃນກອງປະຊຸມຄົບຄະນະຄັ້ງທີ 3ຂອງຄະນະກຳມະການສູນກາງພັກກອມມູນິດຈີນສະໄໝທີ 18, ທ່ານສີຈິ້ນຜິງໄດ້ບັນລະຍາຍ “ມະຕິຕົກລົງຂອງສູນກາງພັກກອມມູນິດຈີນກ່ຽວກັບຫຼາຍບັນຫາສຳຄັນໃນການລົງເລິກການປະຕິຮູບຢ່າງຮອບດ້ານ”
ເດືອນພະຈິກປີ 2013, ໃນກອງປະຊຸມຄົບຄະນະຄັ້ງທີ 3ຂອງຄະນະກຳມະການສູນກາງພັກກອມມູນິດຈີນສະໄໝທີ 18, ທ່ານສີຈິ້ນຜິງໄດ້ບັນລະຍາຍ “ມະຕິຕົກລົງຂອງສູນກາງພັກກອມມູນິດຈີນກ່ຽວກັບຫຼາຍບັນຫາສຳຄັນໃນການລົງເລິກການປະຕິຮູບຢ່າງຮອບດ້ານ”, ໂດຍໄດ້ຊີ້ແຈງການພົວພັນນິເວດທີ່ “ທຳມະຊາດ ແລະ ມະນຸດເຊື່ອມໂຍງເປັນອັນໜຶ່ງອັນດຽວກັນ” ຢ່າງເລິກເຊິ່ງ. ທ່ານກ່າວວ່າ: “ພູຜາປ່າໄມ້ແມ່ນ້ຳ ທົ່ງນາ ໜອງບຶງແມ່ນປະຊາຄົມຮ່ວມຊີວິດ, ເສັ້ນຊີວິດຂອງຄົນຂຶ້ນຢູ່ກັບນາ, ເສັ້ນຊີວິດຂອງນາຂຶ້ນຢູ່ກັບນ້ຳ, ເສັ້ນຊີວິດຂອງນ້ຳຂຶ້ນຢູ່ກັບພູ, ເສັ້ນຊີວິດຂອງພູຂຶ້ນຢູ່ກັບດິນ, ເສັ້ນຊີວິດຂອງດິນຂຶ້ນກັບຕົ້ນໄມ້.” ຈາກນັ້ນພວກເຮົາຈຶ່ງເຫັນໄດ້ວ່າ, ພູຜາປ່າໄມ້ ແມ່ນ້ຳ ທົ່ງນາ ແລະ ໜອງບຶງທີ່ເປັນປັດໄຈພື້ນຖານຂອງລະບົບນິເວດ, ມີສາຍພົວພັນຢ່າງໃກ້ຊິດທີ່ສຸດກັບມະນຸດ, ເຊິ່ງໄດ້ ປະກອບເປັນ “ປະຊາຄົມຮ່ວມຊີວິດແບບກາຍອິນຊີ ແລະ ມີຄວາມເປັນລະບຽບຮຽບຮ້ອຍ”, ໃນນັ້ນບໍ່ວ່າປັດໄຈໃດໜຶ່ງຖືກທຳລາຍ, ມະນຸດກໍຍາກຈະສາມາດດຳລົງຄົງຕົວ ແລະ ພັດທະນາຕໍ່ໄປໄດ້.
ການພັດທະນາແມ່ນຫຼັກການຂັ້ນເດັດຂາດ, ແມ່ນຫົວຂໍ້ອະມະຕະຂອງມະນຸດ. ແຕ່ໃນໄລຍະທີ່ແຕກຕ່າງກັນຂອງການພັດທະນາຈະຜະເຊີນກັບບັນຫາທີ່ແຕກຕ່າງກັນ, ນີ້ກໍຕ້ອງຮັບຮູ້ ແລະ ແກ້ໄຂບັນຫາໃນໄລຍະການພັດທະນາທີ່ແຕກຕ່າງກັນຕາມຫຼັກວິທະຍາສາດ. ປະຈຸບັນ, ຢູ່ຈີນເມື່ອເວົ້າເຖິງ “ຄວາມສິວິໄລດ້ານນິເວດ” ໃນຄວາມເປັນຈິງແລ້ວກໍແມ່ນການສະແຫວງຫາເສັ້ນທາງການພັດທະນາອັນໃໝ່ຢູ່ຈີນ, ເພື່ອແກ້ໄຂບັນຫາທີ່ວ່າ “ຈີນຄວນພັດທະນາໄປໃນທາງທິດໃດ”. ທ່ານສີຈິ້ນໄດ້ຜິງສະເໜີແນວຄວາມຄິດ “ພູຂຽວນ້ຳໃສກໍແມ່ນພູເງິນພູຄຳ” ເຊິ່ງໄດ້ສ່ອງແສງໃຫ້ເຫັນທັດສະນະກ່ຽວກັບໄລຍະການພັດທະນາ. ຢາກໄດ້ທັງພູເງິນພູຄຳ, ທັງພູຂຽວນ້ຳໃສ, ພູຂຽວນ້ຳໃສກໍແມ່ນພູເງິນພູຄຳ, ນີ້ແມ່ນການຫັນປ່ຽນອັນເລິກເຊິ່ງທາງດ້ານແນວຄິດ ແລະ ຮູບແບບການພັດທະນາ, ເປັນການປະຕິຮູບແນວຄິດການພັດທະນາແບບເກົ່າ ຄ່ານິຍົມແບບເກົ່າ ແລະ ທັດສະນະແບບເກົ່າທີ່ມີຕໍ່ຊັບສົມບັດ, ທັງເປັນການປະຕິຮູບຢ່າງເລິກເຊິ່ງກ່ຽວກັບແນວຄິດ ແລະ ຮູບການປົກຄອງບໍລິຫານການປົກຄອງປະເທດ, ນີ້ຍ່ອມຈະນຳພາການພັດທະນາຂອງຈີນກ້າວໄປສູ່ລະດັບສູງກວ່າເກົ່າ, ທັງຈະເປັນການປະກອບສ່ວນຫຼາຍກວ່າເກົ່າເຂົ້າໃນການພັດທະນາແບບຍືນຍົງຂອງໂລກ.
ຄຳເຫັນ
0