ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ພິທີຍ້ອງຍໍບຸກຄົນ ແລະ ໜ່ວຍງານດີເດັ່ນທົ່ວປະເທດຈີນໃນການຕ້ານກັບພະຍາດໂຄວິດ-19 ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 8 ກັນຍານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ໃຫ້ກຽດມອບຫຼຽນໄຊແຫ່ງຊາດ ແລະ ນາມມະຍົດແຫ່ງຊາດໃຫ້ແກ່ບຸກຄົນ ແລະ ໜ່ວຍງານດີເດັ່ນ ພ້ອມທັງກ່າວຄຳປາໄສສຳຄັນ. ອີງຕາມຂໍ້ຕົກລົງຂອງກອງປະຊຸມຄັ້ງທີ 21 ຂອງຄະນະປະຈຳສະພາປະຊາຊົນແຫ່ງຊາດຈີນສະໄໝທີ 13, ໄດ້ຕົກລົງມອບຫຼຽນໄຊແຫ່ງຊາດໃຫ້ແກ່ທ່ານຈົ່ງໜານຊານ, ມອບນາມມະຍົດແຫ່ງຊາດວິລະຊົນປະຊາຊົນໃຫ້ແກ່ທ່ານຈ່າງໂປຫຼີ, ທ່ານຈ່າງຕິ້ງຢວີ ແລະ ທ່ານນາງເສິນເວີຍ.
ຕົ້ນປີນີ້, ໂດຍຜະເຊີນໜ້າກັບສະພາບການແຜ່ລະບາດຂອງພະຍາດໂຄວິດ-19 ທີ່ເກີດຂຶ້ນຢ່າງກະທັນຫັນ, ທ່ານເລຂາທິການໃຫຍ່ສີຈິ້ນຜິງໄດ້ບັນຊາດ້ວຍຕົນເອງ ແລະ ວາງແຜນການດ້ວຍຕົນເອງ, ສຸນກາງພັກກອມມູນິດຈີນໄດ້ວາງແຜນຮັບມືສະຖານະການທົ່ວທຸກດ້ານ ແລະ ໄດ້ຕັດສິນນະໂຍບາຍຢ່າງເດັດຂາດ, ທົ່ວພັກ, ທົ່ວກອງທັບ ແລະ ປະຊາຊົນບັນດາເຜົ່າໃນທົ່ວປະເທດໄດ້ຮ່ວມແຮງຮ່ວມໃຈກັນ ແລະ ສູ້ຊົນຜ່ານຜ່າ, ການຕໍ່ສູ້ຕ້ານກັບການແຜ່ລະບາດຂອງພະຍາດໂຄວິດ-19 ໃນທົ່ວປະເທດຈີນໄດ້ປະສົບຜົນສຳເລັດທາງຍຸດທະສາດທີ່ສຳຄັນ.
ໃນເວລານີ້, ພວກເຮົາຂໍສະແດງຄວາມເຄົາລົບຕໍ່ບັນດາແພດໝໍ ແລະ ພະຍາບານທີ່ມຸ່ງໜ້າໄປສູ່ເຂດທີ່ມີການແຜ່ລະບາດຂອງພະຍາດ ເຊິ່ງເຂົາເຈົ້າໄດ້ປະຕິຍານຕົນວ່າ: ຖ້າບໍ່ເອົາຊະນະການແຜ່ລະບາດຂອງພະຍາດຈະບໍ່ກັບຄືນກົມກອງ ແລະ ຖືເອົາຊຸດສີຂາວຂອງແພດໝໍເປັນຊຸດທະຫານ! ນີ້ກໍຄືວິລະຊົນຊຸດສີຂາວຂອງພວກເຮົາ: ທ່ານຈົ່ງໜານຊານ ບັນດິດຂອງສະພາບັນດິດວິທະຍາສາດສັງຄົມຈີນທີ່ມີອາຍຸ 84 ປີ, ທ່ານຈ່າງໂປຫຼີ ບັນດິດສະພາບັນດິດວິທະຍາສາດສັງຄົມຈີນທີ່ມີອາຍຸ 72 ປີ ໄດ້ຮັບການມອບໝາຍຈາກສູນກາງ, ເຖິງຈະມີອາຍຸສູງແລ້ວ, ແຕ່ພວກເພິ່ນຍັງໄປສູ້ຊົນຢູ່ນະຄອນອູຮັ້ນ, ທ່ານຈ່າງຕິ້ງຢວີ ເຖິງຈະເປັນພະຍາດ ALS, ແຕ່ບໍ່ເຄີຍທໍ້ຖອຍໃຈຈັກເທື່ອເມື່ອຜະເຊີນກັບເຊື້ອພະຍາດ; ນາງຫຼີຮຸ້ຍ ນາງພະຍາບານທີ່ອາຍຸຍັງບໍ່ຮອດ 25 ປີ ກໍໄດ້ຍຶດໝັ້ນໃນຕຳແໜ່ງງານຂອງຕົນຈົນເຖິງທີ່ສຸດ ແລະ ໄດ້ຂຽນບັນທຶກໄວ້ວ່າ: ຖ້າຂ້ອຍເສຍຊີວິດໄປແລ້ວ, ຂໍບໍລິຈາກສົບຂອງຂ້ອຍ ເພື່ອການຄົ້ນຄວ້າຕ້ານເຊື້ອພະຍາດ. ກໍຍ້ອນວ່າມີວິລະຊົນທີ່ມີເລືອດເນື້ອຕັ້ງເປັນໝື່ນເປັນແສນຄົນແບບນີ້ ທີ່ໄດ້ເຝົ້າລະວັງສຸຂະພາບທາງຮ່າງກາຍ ແລະ ຄວາມປອດໄພດ້ານຊີວິດຂອງປະຊາຊົນທົ່ວປະເທດຈີນ, ຈິ່ງສາມາດສ້າງຮົ້ວເຫຼັກກ້າດ້ານສາທາລະນະສຸກໄດ້.
ພວກເຮົາຂໍສະແດງຄວາມເຄົາລົບຕໍ່ປະຊາຊົນນະຄອນອູຮັ້ນຜູ້ອົງອາດກ້າຫານ! ແລະ ສະແດງຄວາມເຄົາລົບຕໍ່ປະຊາຊົນຈີນຜູ້ຍິ່ງໃຫຍ່! ພາຍຫຼັງທ່ານສີຈິ້ນຜິງໄດ້ອອກຄຳສັ່ງໃຫ້ຕ້ານກັບການແຜ່ລະບາດຂອງພະຍາດໂຄວິດ-19 ແລ້ວ, ທົ່ວປະເທດຈີນໄດ້ຮ່ວມກັນເປັນຈິດໜຶ່ງໃຈດຽວ, ພະນັກງານຂັ້ນຮາກຖານ 4 ລ້ານກວ່າຄົນໄດ້ສ້າງເຄືອຂ່າຍຈຳນວນ 6,5 ແສນໜ່ວຍປ້ອງກັນແລະຄວບຄຸມພະຍາດທີ່ປົກຄຸມເຂດຊຸມຊົນທົ່ວປະເທດ; ມີສະມາຊິກພັກກອມມູນິດຈີນ 79 ກວ່າລ້ານຄົນໄດ້ສະໝັກໃຈບໍລິຈາກເງິນ 8,36 ຕື້ຢວນ ເພື່ອສະໜັບສະໜູນວຽກງານຕ້ານກັບການແຜ່ລະບາດຂອງພະຍາດ, ພະນັກງານສະມາຊິກພັກ 396 ຄົນໄດ້ເສຍສະຫຼະຊີວິດໃນການຕ້ານກັບການແຜ່ລະບາດຂອງພະຍາດ; ພະນັກງານກຳມະກອນ 4 ໝື່ນກວ່າຄົນຈາກທົ່ວປະເທດຈີນໄດ້ໃຊ້ເວລາພຽງ 10 ກວ່າວັນເທົ່ານັ້ນ, ກໍໄດ້ສ້າງໂຮງໝໍໂຫເສິນຊານ ແລະ ໂຮງໝໍເຫຼີຍເສິນຊານໃຫ້ສຳເລັດ.
ນີ້ແມ່ນບັ້ນຮົບທີ່ບໍ່ເຄີຍມີມາກ່ອນຂອງປະຊາຊົນຈີນ ພາຍໃຕ້ການນຳພາຂອງພັກກອມມູນິດຈີນທີ່ຍິ່ງໃຫຍ່, ຍ່ອມຈະຖືກຈາລຶກໄວ້ໃນປຶ້ມປະຫວັດສາດຂອງຊົນຊາດຈີນໄປຕະຫຼອດກາລະນານ.
ຄຳເຫັນ
0