ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນວັນທີ 21 ກັນຍານີ້ຕາມເວລາທ້ອງຖິ່ນ, ຈຳນວນຜູ້ເສຍຊີວິດຍ້ອນເປັນພະຍາດໂຄວິດ-19 ຢູ່ອາເມຣິກາຄາດວ່າຈະມີເຖິງ 2 ແສນຄົນ, ນີ້ເປັນຕົວເລກທີ່ມີລັກສະນະໂສກນາດຕະກຳ. ສິ່ງທີ່ເຮັດໃຫ້ຄົນຮູ້ສຶກປະຫຼາດໃຈເປັນພິເສດກໍແມ່ນ, ຈົນມາຮອດປັດຈຸບັນ,ລັດຖະບານອາເມຣິກາກໍບໍ່ຍອມຮັບວ່າເຂົາເຈົ້າມີຄວາມຜິດພາດແລະຂໍ້ບົກຜ່ອງໃດໆໃນວຽກງານຮັບມືກັບສະພາບພະຍາດໂຄວິດ-19.
ເມື່ອເບິ່ງໂດຍລວມແລ້ວ, ຢູ່ອາເມຣິກາໄດ້ມີຄວາມຜິດພາດຫຼືບັນຫາໃຫຍ່ດັ່ງລຸ່ມນີ້,ທີ່ສົ່ງຜົນເຮັດໃຫ້ມີຜູ້ເສຍຊີວິດຈຳນວນ 2 ແສນຄົນແລະມີຄວາມບໍ່ແນ່ນອນຢ່າງໜັກໜ່ວງຈົນຮອດປັດຈຸບັນ.
ຄວາມຜິດພາດທີ່ໜັກໜ່ວງອັນທີໜຶ່ງແມ່ນ: ລັດຖະບານກໍຄືກະແສຫຼັກທາງສັງຄົມຂອງອາເມຣິກາບໍ່ມີຄວາມຮັບຮູ້ທີ່ເປັນເອກະພາບກັນກ່ຽວກັບຄວາມໜັກໜ່ວງຮ້າຍແຮງຂອງພະຍາດໂຄວິດ-19.
ຄວາມຜິດພາດທີ່ໜັກໜ່ວງທີ່ສຸດອັນທີສອງແມ່ນ: ໂດຍປະເຊີນກັບທາງເລືອກອັນຮີບດ່ວນໃນການຕ້ານກັບພະຍາດໂຄວິດ-19 ແລະຄວາມສຳຄັນໃນການຟື້ນຟູເສດຖະກິດ, ຜູ້ນຳແລະປວງຊົນຈຳນວນຫຼາຍຂອງອາເມຣິກາລ້ວນແຕ່ໄດ້ເລືອກເອົາການຟື້ນຟູເສດຖະກິດຫຼາຍກວ່າ.
ຄວາມຜິດພາດອັນໜັກໜ່ວງທີ່ສຸດອັນທີສາມແມ່ນ: ຈິດໃຈຮັບຮູ້ວິທະຍາສາດມີຂໍ້ບົກຜ່ອງທີ່ເຮັດໃຫ້ຄົນຮູ້ສຶກຕົກສະເງີ້. ການໃສ່ຜ້າປິດປາກໄດ້ຮັບການຢັ້ງຢືນໂດຍທົ່ວໄປຈາກຈີນ,ປະເທດແລະເຂດແຄ້ວນອາຊີຕາເວັນອອກອື່ນໆວ່າເປັນມາດຕະການດ້ານການປ້ອງກັນພະຍາດໂຄວິດ-19 ທີ່ມີປະສິດທິຜົນ, ແຕ່ປະທານາທິບໍດີແລະປະຊາຊົນຫຼາຍຄົນຢູ່ອາເມຣິກາລ້ວນແຕ່ໄດ້ຄັດຄ້ານການໃສ່ຜ້າປິດປາກ.
ຄວາມຜິດພາດອັນໜັກໜ່ວງທີ່ສຸດອັນທີສີ່ແມ່ນ: ການຕ້ານກັບພະຍາດໂຄວິດ-19 ຄ້າຍຄືກັນກັບສົງຄາມບັ້ນໜຶ່ງ, ແຕ່ການຕ້ານກັບພະຍາດໂຄວິດ-19 ຢູ່ອາເມຣິກາບໍ່ໄດ້ມີການບັນຊາຈາກການນຳຂັ້ນສູງທີ່ມີປະສິດທິຜົນແລະການເຄື່ອນໄຫວທີ່ເປັນເອກະພາບກັນໃນຂອບເຂດທົ່ວປະເທດ, ແຖມຍັງຖືກກໍ່ກວນຢ່າງໜັກໜ່ວງຈາກການຫາສຽງທາງການເມືອງເພື່ອການເລືອກຕັ້ງທົ່ວໄປ.
ຄວາມຜິດພາດອັນໜັກໜ່ວງທີ່ສຸດອັນທີ 5 ແມ່ນ: ກຳລັງການເມືອງຕ່າງໆຢູ່ອາເມຣິກາບໍ່ມີຄວາມສາມາດລະດົມການເປັນຈິດໜຶ່ງໃຈດຽວກັນເມື່ອປະເຊີນກັບພະຍາດໂຄວິດ-19 ທີ່ຮ້າຍແຮງ, ກ່ອນອື່ນພວກເຂົາເຈົ້າ ລ້ວນແຕ່ຄິດວ່າຈະເຮັດແນວໃດເພື່ອປັດປ່າຍໜ້າທີ່ຮັບຜິດຊອບໄດ້ດີ, ແລະຈະເຮັດແນວໃດເພື່ອເຮັດໃຫ້ຝ່າຍກົງກັນຂ້າມຕົກຢູ່ໃນສະພາບຄວາມຫຍຸ້ງຍາກແນວໃດ.
ໃນຈຳນວນ 2 ແສນຄົນທີ່ເສຍຊີວິດໄປແລ້ວນັ້ນສ່ວນຫຼາຍແມ່ນຜູ້ທຸກຍາກແລະຄົນອາເມຣິກາເຊື້ອສາຍອາຟຣິກາ. ເຖິງວ່າອາເມຣິກາເປັນປະເທດທີ່ເຂັ້ມແຂງກໍຕາມ, ແຕ່ພັດເປັນປະເທດທີ່ບໍ່ໄດ້ຮັບໃຊ້ປະຊາຊົນຢ່າງເຕັມເມັດເຕັມໜ່ວຍ, ສະນັ້ນພະຍາດໂຄວິດ-19 ຈຶ່ງໄດ້ແຜ່ລະບາດຢ່າງຮ້າຍແຮງແບບນີ້ຢູ່ປະເທດທີ່ມີຄວາມຈະເລີນທີ່ສຸດໃນໂລກ. ແນວໃດກໍຕາມ, ຈຳນວນຜູ້ເສຍຊີວິດ 2 ແສນຄົນຍ້ອນພະຍາດໂຄວິດ-19 ເປັນເລື່ອງອັບປະຍົດຂອງອາເມຣິກາໃນຖານະເປັນປະເທດມະຫາອຳນາດທີ່ມີວິທະຍາສາດການແພດກ້າວໜ້າທີ່ສຸດແລະມີກຳລັງທີ່ເຂັ້ມແຂງທີ່ສຸດ, ໂດຍສະເພາະເປັນເລື່ອງອັບປະຍົດຂອງຄະນະນຳຜູ້ກຳອຳນາດແລະບຸກຄົນດີເດັ່ນໃນວົງການຕ່າງໆທີ່ມີຄວາມສາມາດໃນການຈັດສັນຊັບພະຍາກອນທາງສັງຄົມຂອງອາເມຣິກາ, ໃນຂະນະດຽວກັນກໍເປັນການທຳລາຍຊື່ສຽງຂອງລະບອບການເມືອງອາເມຣິກາເອງ.
ຄຳເຫັນ
0