ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
“ບັນດາປະເທດພົວພັນກັນຢ່າງໃກ້ຊິດ ມວນມະນຸດມີຊາຕາກຳຮ່ວມກັນ” “ ບັນດາປະເທດສາມາດມີການແຂ່ງຂັນໄດ້ ແຕ່ຕ້ອງມີລັກສະນະສ້າງສັນ ແລະດຳເນີນໄປໃນທິດທາງທີ່ດີ, ຕ້ອງຮັກສາເສັ້ນພື້ນຖານຂອງຄຸນສົມບັດ ແລະລະບຽບການສາກົນ”. ວັນທີ 22 ກັນຍານີ້, ທ່ານສີຈິ້ນຜິງ ປະທານປະເທດຈີນໄດ້ກ່າວຄຳເຫັນໃນການອະພິປາຍທົ່ວໄປໃນກອງປະຊຸມສະມັດຊາໃຫຍ່ສະຫະປະຊາຊາດຄັ້ງທີ 75, ເຊິ່ງໄດ້ຮັບສຽງຕອບຮັບທີ່ດີຈາກບຸກຄົນບັນດາປະເທດ.
ທ່ານ ສີຈິ້ນຜີງ ໄດ້ກ່າວຄວາມເຫັນສຳຄັນໃນການອະພິບາຍທົ່ວໄປ
ຂອງສະມັດຊາໃຫຍ່ອົງການ ສປຊ ຄັ້ງທີ 75 ໃນວັນທີ 22 ກັນຍານີ້
"ພວກເຮົາໄດ້ດຳລົງຊີວິດຢູ່ໃນບ້ານເມືອງຂອງໂລກທີ່ເຊື່ອມໂຍງເຊື່ອມຈອດກັນແລະຮ່ວມທຸກຮ່ວມສຸກກັນ. ບັນດາປະເທດໄດ້ພົວພັນກັນຢ່າງແໜ້ນແຟ້ນ, ມວນມະນຸດມີຊາຕາກຳຮ່ວມນຳກັນ; ຄວນມີທັດສະນະປະຊາຄົມຮ່ວມຊາຕາກຳທີ່ເຊື່ອມໂຍງເຂົ້າກັນ, ຂ້າມຜ່ານແນວຄິດກຸ່ມກ້ອນຄັບແຄບ ແລະແນວຄິດເກມຜົນລວມເປັນສູນ. "----ທ່ານສີຈິນຜິງ
ນັບແຕ່ພະຍາດໂຄວິດ-19 ແຜ່ລະບາດຢ່າງຮ້າຍແຮງໃນທົ່ວໂລກເປັນຕົ້ນມາ, ຈີນໄດ້ສົ່ງໜ່ວຍຊ່ຽວຊານແພດໝໍ 34 ໜ່ວຍໄປສູ່ 32 ປະເທດ, ໃຫ້ການຊ່ວຍເຫຼືອຕ້ານພະຍາດ 283 ຊຸດແກ່ 150 ປະເທດ ແລະ 4 ອົງການຈັດຕັ້ງສາກົນ, ສະໜອງ ແລະສົ່ງອອກວັດຖຸຕ້ານພະຍາດໃຫ້ 200 ກວ່າປະເທດ ແລະ ເຂດແຄວ້ນ. ຈີນໄດ້ຖືທ່າທີທີ່ເປີດເຜີຍ ໂປ່ງໃສ ແລະຮັບຜິດຊອບ, ເປັນເຈົ້າການແຈ້ງຂໍ້ມູນກ່ຽວກັບສະພາບພະຍາດຕໍ່ອົງການອະນາໄມໂລກ ປະເທດແລະ ເຂດແຄວ້ນທີ່ກ່ຽວຂ້ອງຢ່າງວ່ອງໄວທ່ວງທັນກັບເວລາທີ່ສຸດ, ໄດ້ເຜີຍແຜ່ຂໍ້ມູນລຳດັບແຊນເຊື້ອພະຍາດໂຄວິດ-19, ເຜີຍແຜ່ແຜນບົ່ງມະຕິປິ່ນປົວພະຍາດແລະແຜນການປ້ອງກັນ ແລະ ຄວບຄຸມພະຍາດຕັ້ງແຕ່ຫົວທີ, ແບ່ງປັນບົດຮຽນໃນການປ້ອງກັນຄວບຄຸມ ແລະປິ່ນປົວພະຍາດກັບຝ່າຍຕ່າງໆຢ່າງບໍ່ເຫັນແກ່ຕົວຢ່າງວ່ອງໄວທ່ວງທັນກັບເວລາທີ່ສຸດ. ຈີນໄດ້ຍຶດໝັ້ນທັດສະນະປະຊາຄົມຮ່ວມຊາຕາກຳຂອງມວນມະນຸດ, ເພີ່ມທະວີການປະສານງານດ້ານນະໂຍບາຍ, ເຊິ່ງໄດ້ເພີ່ມຄວາມໝັ້ນໃຈ ແລະ ແຮງຂັບເຄື່ອນໃຫ້ແກ່ການຟື້ນຟູເສດຖະກິດຂອງໂລກ.
ທ່ານ ສີຄຸນ ບຸນວິໄລ ນັກວິຊາການຜູ້ທີ່ມີຊື່ສຽງທັງເປັນນັກຄົ້ນຄວ້າກ່ຽວກັບພາກພື້ນອາຊີຕາເວັນອອກສຽງໃຕ້ຂອງລາວກ່າວວ່າ: ຜົນງານການຕ້ານພະຍາດທີ່ພົ້ນເດັ່ນຂອງຈີນເປັນແບບຢ່າງທີ່ດີ ແລະ ເປັນບົດຮຽນທີ່ດີໃຫ້ແກ່ບັນດາປະເທດໃນໂລກ. ພວກເຮົາໄດ້ເຫັນວ່າ, ໃນຂະນະທີ່ຈີນເພີ່ມທະວີການປ້ອງກັນ ແລະຄວບຄຸມພະຍາດຢູ່ພາຍໃນປະເທດຕົນ, ຈີນຍັງໄດ້ຮ່ວມກັນກັບປະຊາຄົມໂລກ, ດຳເນີນການຮ່ວມມືສາກົນເພື່ອຕ້ານພະຍາດຢ່າງຕັ້ງໜ້າ, ໃຫ້ການຊ່ວຍເຫຼືອແກ່ຫຼາຍປະເທດ, ໃຊ້ການກະທຳຕົວຈິງເພື່ອປະຕິບັດຕາມທັດສະນະປະຊາຄົມຮ່ວມຊາຕາກຳຂອງມວນມະນຸດ, ເຮັດໃຫ້ທົ່ວໂລກໄດ້ເຫັນຢ່າງຈະແຈ້ງເຖິງສະຕິຕື່ນຕົວຂອງຈີນໃນການແບບຫາບໜ້າທີ່ຮັບຜິດຊອບໃນຖານະປະເທດໃຫຍ່.
(ທ່ານ ສີຄຸນ ບຸນວິໄລ)
ຢູ່ຕໍ່ໜ້າໄພພິບັດອັນໜັກໜ່ວງ, ກຳລັງແຮງຂອງມວນມະນຸດຍັງບໍ່ທັນເຂັ້ມແຂງພຽງພໍ ຍິ່ງກວ່ານັ້ນແມ່ນຍັງອ່ອນແອຢູ່.ການເກີດມີສະພາບພະຍາດໂຄວິດ-19 ໄດ້ເຕືອນໃຫ້ພວກເຮົາຮູ້ວ່າ:ການແຜ່ລະບາດຂອງເຊື້ອພະຍາດທີ່ມີລັກສະນະທົ່ວໂລກບໍ່ມີພົມແດນນີ້,ບໍ່ມີປະເທດໃດເຊື້ອຊາດໃດສາມາດລອດພົ້ນຈາກຜົນກະທົບຂອງເຊື້ອພະຍາດໄດ້ພຽງລຳພັງ. ເມື່ອປະເຊີນກັບສະພາບການແຜ່ລະບາດຂອງພະຍາດ, ຖ້າມີແນວຄິດທີ່ເສີຍເມີຍ ແລະ ແນວຄິດປົກປ້ອງຕົນເອງທັງມີຈິດໃຈໃນລັກສະນະຢືນເບິ່ງລ້າໆເມື່ອເຫັນຄົນອື່ນປະສົບໄພກໍຈະບໍ່ມີຜົນດີຫຍັງເລີຍຕໍ່ຕົນເອງ, ຄວາມສາມັກຄີ,ການປະສານງານ ແລະ ການຮັບມືກັບພະຍາດຮ່ວມກັນໄດ້ກາຍເປັນທາງເລືອກທີ່ຈຳເປັນຂອງມວນມະນຸດ.
"ເມື່ອປະເຊີນໜ້າກັບອ່າອ່ຽງລວມຂອງເສດຖະກິດໂລກາພິວັດ, ການປະພຶດຕົນຄືກັບນົກກະຈອກເທບໝົ້ນຫົວໃສ່ຂີ້ຊາຍເພື່ອທຳທ່າວ່າບໍ່ເຫັນຫຍັງ, ຫຼືການຝືນກັບກະແສເສດຖະກິດໂລກາພິວັດຄືດັ່ງຕົວລະຄອນ ດອນກີໂຮເຕ ທີ່ຖືຫອກຍາວຕໍ່ຕ້ານຍຸກສະໄໝເຊິ່ງການກະທຳແບບນີ້ ລ້ວນແຕ່ເປັນການກະທຳທີ່ລະເມີດກົດເກນປະຫວັດສາດ. ໂລກບໍ່ສາມາດຖອຍຫຼັງຄືນສູ່ສະພາບທີ່ໂດດດ່ຽວແລະປິດປະຕູໃສ່ກັນໄດ້ອີກ, ຍິ່ງບໍ່ອາດສາມາດຖືກແບ່ງແຍກດ້ວຍນໍ້າມືຂອງຄົນໄດ້."
--ທ່ານສີຈິ້ນຜິງ
ບັນດາປະເທດຕາເວັນຕົກທີ່ມີອາເມຣິກາເປັນຕົວແທນນັ້ນເຄີຍເປັນປະເທດໄດ້ຮັບຜົນປະໂຫຍດຫຼາຍທີ່ສຸດຈາກເສດຖະກິດໂລກາພິວັດ, ແຕ່ວ່າໄປຄຽງຄູ່ກັບການຂະຫຍາຍຕົວແບບກ້າວກະໂດດຂອງປະເທດຈະເລີນໃໝ່ທີ່ທັນສະໄໝທີ່ມີຈີນເປັນຕົວແທນນັ້ນ, “ໂລກາພິວັດ”ໃນຍຸກໃໝ່ຍຸກໄດ້ຫັນຈາກຮູບການປຸ້ນສະດົມທີ່ສ້າງຄວາມບໍ່ດຸນດ່ຽງມາເປັນ “ການພັດທະນາແບບຊົມໃຊ້ຮ່ວມກັນ, ມີຄວາມຈະເລີນຮຸ່ງເຮືອງຮ່ວມກັນ”ທີ່ມີຄວາມດຸນດ່ຽງໂດຍທຽບຖານ. ລັດຖະບານອາເມຣິກາເລີ່ມມີຄວາມກັງວົນວ່າ:ໄປຄຽງຄູ່ກັບການຮ່ວມມືລະຫວ່າງເຂດແຄວ້ນຕ່າງໆໄດ້ເພີ່ມຂຶ້ນຕື່ມອີກ, ປະເທດຕົນຈະຖືກໂດດດ່ຽວ, ສະນັ້ນອາເມຣິກາຈິ່ງປ່າວປະກາດຢູ່ເລື້ອຍໆວ່າ “ອາເມຣິກາຕ້ອງມາກ່ອນ” ເພື່ອຄັດຄ້ານເສດຖະກິດໂລກາພິວັດ ແລະທຳລາຍການຮ່ວມມືສາກົນ.
ທ່ານ ຢູກິໂອະ ຮາໂຕຢາມະ ອະດີດນາຍົກລັດຖະມົນຕີຍີ່ປຸ່ນກ່າວວ່າ: ຖ້າບັນດາປະເທດລ້ວນແຕ່ປະຕິບັດຕາມຫຼັກການ “ຜົນປະໂຫຍດປະເທດຕົນຕ້ອງມາກ່ອນ”,ກໍຈະເຮັດໃຫ້ຜົນປະໂຫຍດຂອງປະເທດຕົນໄດ້ຮັບຄວາມເສຍຫາຍໃນທີ່ສຸດ, ໃນໂລກ ໂລກາພິວັດນີ້, ຖ້າຫາກດື້ດ້ານຕັດສາຍພົວພັນກັບຜູ້ອື່ນຕາມລຳພັງໃຈ, ກໍຈະສົ່ງຜົນກະທົບຕໍ່ການຟື້ນຟູເສດຖະກິດຂອງໂລກພາຍຫຼັງການແຜ່ລະບາດຂອງພະຍາດໂຄວິດ-19ສິ້ນສຸດລົງແນ່ນອນ.
(ທ່ານ ຢູກິໂອະ ຮາໂຕຢາມະ)
ນັບແຕ່ອຸດສາຫະກຳຈະເລີນຮຸ່ງເຮືອງມານີ້, ສົງຄົມມະນຸດໄດ້ພັດທະນາຢ່າງວ່ອງໄວ, ຂະນະດຽວກັນກໍໄດ້ພາໃຫ້ເກີດມີບັນຫາຕ່າງໆເປັນຕົ້ນປະຊາກອນໄດ້ເພີ່ມຂຶ້ນຢ່າງວ່ອງໄວ, ລະບົບນິເວດຖືກທຳລາຍ, ມີມົນລະພິດດ້ານສິ່ງແວດລ້ອມ, ການລະບາດຂອງພະຍາດແລະອື່ນໆ. ເລື່ອງຈິງຈຳນວນຫຼວງຫຼາຍໄດ້ພິສູດໃຫ້ເຫັນແລ້ວວ່າ: ມະນຸດໄດ້ພັດທະນາຊັບພະຍາກອນທຳມະຊາດໃນລັກສະນະປຸ້ນສະດົມພຽງເພື່ອຕອບສະໜອງກັບຄວາມຕ້ອງການດ້ານການເຕີບໂຕຂອງເສດຖະກິດໃນໄລຍະໃດໜຶ່ງເທົ່ານັ້ນ. ເມື່ອເບິ່ງຈາກໄລຍະຍາວແລ້ວ, ໃນທີ່ສຸດ ການປະພຶດທີ່ຂາດວິໄສທັດເບິ່ງກວ້າງມອງໄກລັກສະນະນີ້ຈະທຳລາຍພື້ນຖານສິ່ງແວດລ້ອມທີ່ເປັນບ່ອນເພິ່ງພາອາໄສເພື່ອການຢູ່ລອດຂອງພວກເຮົາຢ່າງສິ້ນເຊິ່ງ, ເຮັດໃຫ້ຄວາມພະຍາຍາມຂອງມະນຸດໃນການຊຸກຍູ້ການເຕີບໂຕດ້ານເສດຖະກິດແລະການພັດທະນາສັງຄົມຊ່ຳກັບວ່າສູນເສຍໄປລ້າໆ.
"ມະນຸດເຮົາບໍ່ຄວນເດີນໄປຕາມເສັ້ນທາງເກົ່າທີ່ມີແຕ່ຮຽກເອົາຫາຜົນປະໂຫຍດຢ່າງດຽວແຕ່ບໍ່ຍອມທຸ້ມເທກຳລັງຄົນແລະວັດຖຸຊັບສິນ, ພຽງເນັ້ນແຕ່ການພັດທະນາແຕ່ບໍ່ຮັກສາສິ່ງແວດລ້ອມ, ພຽງແຕ່ນຳໃຊ້ແຕ່ບໍ່ປົວແປງ." ---ທ່ານສີຈິ້ນຜິງ
ທ່ານແຊມແພດເປເຣຣາ ເລຂາສອງຂອງສະຖານທູດສີລັງກາປະຈຳຈີນຢືນຢັນວ່າ: ທ່ານສີຈິ້ນຜິງເປັນຜູ້ນຳພຽງຄົນດຽວໃນເວລາປະກອບຄຳເຫັນໄດ້ກ່າວເນັ້ນໜັກກ່ຽວກັບການອະນຸລັກສິ່ງແວດລ້ອມແລະການພັດທະນາແບບສີຂຽວ. ທົ່ວໂລກພວມຜະເຊີນກັບບັນຫາການພັດທະນາແບບຍືນຍົງ, ມີພຽງແຕ່ການປະກອບຄຳເຫັນຂອງທ່ານປະທານສີຈິ້ນຜິງເທົ່ານັ້ນທີ່ໄດ້ໃຫ້ຄຳແນະນຳທີ່ສາມາດຈັດຕັ້ງປະຕິບັດໄດ້ແລະມີລັກສະນະພຶດຕິກຳຕົວຈິງ.
(ທ່ານ ແຊມແພດເປເຣຣາ)
“ພູຂຽວນໍ້າໃສກໍແມ່ນພູເງິນພູຄຳ”. ຄວນອະນຸລັກທຳມະຊາດແລະສິ່ງແວດລ້ອມໃນຂະນະທີ່ສະແຫວງຫາການພັດທະນາເສດຖະກິດ, ເອົາໃຈໃສ່ການຟື້ນຟູສິ່ງແວດລ້ອມໃນຂະນະທີ່ພັດທະນາແລະນຳໃຊ້ຊັບພະຍາກອນທຳມະຊາດ. ພວກເຮົາຄວນຂຸດຄົ້ນຊັບພະຍາກອນທີ່ຕ້ອງການເພື່ອຄວາມຢູ່ລອດແລະການພັດທະນານຳໜ່ວຍໂລກ, ໃນຂະນະດຽວກັນກໍທຸ້ມເທກຳລັງຄົນແລະກຳລັງວັດຖຸເພື່ອບົວລະບັດຮັກສາໜ່ວຍໂລກໃຫ້ດີ. ມີພຽງແຕ່ເຮັດແນວນີ້ຈິ່ງຈະເຮັດໃຫ້ສັງຄົມມະນຸດສາມາດບັນລຸການພັດທະນາຢ່າງຖາວອນໄດ້.
"ການທີ່ມີຄວາມຂັດແຍ່ງກັນລະຫວ່າງປະເທດແມ່ນເລື່ອງປົກກະຕິ, ຄວນແກ້ໄຂຢ່າງເໝາະສົມໂດຍຜ່ານການສົນທະນາ ແລະປຶກສາຫາລືກັນ. ບັນດາປະເທດສາມາດມີການແຂ່ງຂັນໄດ້ ແຕ່ຕ້ອງມີລັກສະນະສ້າງສັນ ແລະດຳເນີນໄປໃນທິດທາງທີ່ດີ, ຕ້ອງຮັກສາເສັ້ນພື້ນຖານດ້ານຄຸນສົມບັດ ແລະລະບຽບການສາກົນ."
---ທ່ານສີຈິ້ນຜິງ
ນັບແຕ່ສົງຄາມໂລກຄັ້ງທີ 2 ສິ້ນສຸດລົງເປັນຕົ້ນມາ, ລະບົບສາກົນທີ່ຖືເອົາ ອົງການ ສປຊ ເປັນແກນກາງໄດ້ປະກອບສ່ວນອັນໃຫຍ່ຫຼວງໃຫ້ກັບໂລກໃນການພັດທະນາ,ການສ້າງສັນຕິພາບແລະການຮ່ວມມືແບບຕ່າງຝ່າຍຕ່າງມີຜົນປະໂຫຍດ. ອົງການຈັດຕັ້ງສາກົນທີ່ມີ ສປຊ ເປັນຕົວແທນໄດ້ສ້າງກົນໄກທີ່ຍຸຕິທຳແລະມີປະສິດທິຜົນໃນການແກ້ໄຂຄວາມຂັດແຍ້ງກັນລະຫວ່າງບັນດາປະເທດຢ່າງເໝາະສົມ.
ທ່ານ ກອນ ທັບພະຣັງສີ ອະດີດຮອງນາຍົກລັດຖະມົນຕີໄທກ່າວວ່າ: ເປັນເວລາດົນນານມາແລ້ວ, ເພື່ອສັນຕິພາບແລະຄວາມສະຫງົບຂອງໂລກ, ຈີນ ແລະ ບັນດາປະເທດໃນໂລກໄດ້ຮັກສາການຮ່ວມມື ແລະ ປະຕິບັດພັນທະຂອງຕົນໃນຖານະເປັນປະເທດສະມາຊິກຂອງ ສປຊ ໄດ້ເປັນຢ່າງດີ. ຈີນໄດ້ເອົາໃຈໃສ່ປະຕິບັດໂຄງການທັງໝົດທີ່ຕົນໄດ້ໃຫ້ຄຳໝັ້ນສັນຍາໄວ້, ຈີນໄດ້ໃຫ້ການຊ່ວຍເຫຼືອແກ່ປະເທດສະມາຊິກອື່ນໆທີ່ມີຄວາມຕ້ອງການໂດຍຜ່ານອົງການຈັດຕັ້ງສາກົນຕ່າງໆ ໂດຍມີການກະທຳຕົວຈິງເຊິ່ງໄດ້ສະແດງໃຫ້ທົ່ວໂລກເຫັນວ່າ: ຈີນຍິນດີຮ່ວມມືກັບບັນດາປະເທດບົນຈິດໃຈມິດຕະພາບ, ບໍ່ມີແນວຄິດຢາກສ້າງຄວາມຂັດແຍ້ງກັບປະເທດໃດໜຶ່ງ.
(ທ່ານ ກອນ ທັບພະຣັງສີ)
ທ່ານ ມົງຢົວ ອອງ ຊີນ ເລຂາທິການໃຫຍ່ຄະນະກຳມະການໂຄສະນາສູນກາງພັກສັນນິບາດເພື່ອປະຊາທິປະໄຕແຫ່ງຊາດທີ່ເປັນພັກກຳອຳນາດຂອງມຽນມາກ່າວວ່າ: ຖ້ອຍຄວາມທີ່ຜູ້ນຳອາເມຣິກາກ່າວໂຕມຕີຈີນພຽງເພື່ອຮັບໃຊ້ການເລືອກຕັ້ງທົ່ວໄປຂອງອາເມຣິກາເທົ່ານັ້ນ, ເພື່ອປົກປິດຄວາມປະລາໄຊໃນການປ້ອງກັນແລະຄວບຄຸມພະຍາດໂຄວິດ-19 ຂອງລັດຖະບານອາເມຣິກາ. ການກະທຳຂອງອາເມຣິກາທີ່ນາບຂູ່ຈະຕັດສາຍພົວພັນກັບອົງການຈັດຕັ້ງສາກົນຫຼືສັນຍາສາກົນຫຼາຍໆເທື່ອຈົນວ່າໄດ້ຖອນຕົວອອກຈາກອົງການຈັດຕັ້ງສາກົນຕ່າງໆແລະຖອນອອກຈາກສັນຍາສັນຕິພາບສາກົນຫຼາຍສະບັບຈິ່ງເປັນໄພຂົ່ມຂູ່ທີ່ໃຫຍ່ທີ່ສຸດຕໍ່ສັນຕິພາບແລະການພັດທະນາຂອງໂລກ.
(ທ່ານ ມົງຢົວ ອອງ ຊີນ)
ອາເມຣິກາອວດອ້າງຕົນເປັນປະເທດໃຫຍ່ທີ່ເຂັ້ມແຂງກໍປະຕິບັດລັດອາເມຣິກາວິເສດ,ແລະຖອນອອກຈາກອົງການຈັດຕັ້ງຫຼືສັນຍາທີ່ກ່ຽວຂ້ອງຕາມລຳພັງໃຈ, ຫວ່າງມໍ່ໆມານີ້, ກ່ຽວກັບບັນຫານິວເຄຼຍອີຣານ, ອາເມຣິກາຍັງຂົມຂູ່ ສປຊ ແລະຍິ່ງໄປກວ່ານັ້ນຍັງສວມຮອຍ ສປຊ ໂດຍໄດ້ປະກາດຂ່າວທີ່ບໍ່ຖືກຕ້ອງຕາມຄວາມເປັນຈິງ, ລະເມີດກົດລະບຽບສາກົນຢ່າງໜັກໜ່ວງໂດຍບໍ່ມີມາດຖານຄຸນສົມບັດຫຍັງເລີຍ. ປະເທດໃຫຍ່ຍິ່ງຄວນມີພາບພົດໃນຖານະເປັນປະເທດໃຫຍ່, ຄວນມີໜ້າທີ່ຮັບຜິດຊອບຂອງປະເທດໃຫຍ່ນຳອີກ.
ມິດລາຍການບັນດາທ່ານ, ມີຄວາມເຫັນແນວໃດຕໍ່ຄວາມເວົ້າເຫຼົ່ານີ້ຂອງທ່ານສີຈິ້ນຜິງ? ທ່ານສາມາດຂຽນໃສ່ບ່ອນ comment ໄດ້ເດີ!
ຄຳເຫັນ
0