ວັນທີ 27 ກັນຍານີ້ຕາມເວລາທ້ອງຖິ່ນ, ສານຂອງເຂດພິເສດໂກລົມເບຍຂອງອາເມຣິກາໄດ້ຕັດສິນໃຫ້ຢຸດຕິການປະຕິບັດຄຳສັ່ງຂອງລັດຖະບານອາເມຣິກາກ່ຽວກັບການໃຫ້ຢຸດຕິການດາວໂລດAPP Tik Tokຢູ່ເພລສະຕໍຂອງອາເມຣິກາ. ໃນງານຟັງຄຳໃຫ້ການທີ່ຈັດຂຶ້ນໃນວັນທີ 27 ກັນຍານີ້, ທ່ານ ຈອນຮອນ ທະນາຍຄວາມຂອງ Tik Tok ກ່າວວ່າ: Tik Tok ມີຜູ້ຊົມຊາວເນັດປະມານ 100 ລ້ານຄົນຢູ່ອາເມຣິກາ, ການຢຸດຕິການໃຊ້ Tik Tok ກໍເທົ່າກັບວ່າໄດ້ລ່ວງລະເມີດສິດເສລີພາບໃນການປາກເວົ້າຂອງປະຊາຊົນ.
ກ່ຽວກັບຂໍ້ອ້າງທີ່ວ່າຫ້າມດາວໂລດAPP Tik Tok ເພື່ອຄວາມໝັ້ນຄົງແຫ່ງຊາດຂອງກະຊວງຍຸດຕິທຳອາເມຣິກາ, ທ່ານ ຈອນຮອນ ຕອບໂຕ້ວ່າ: ຄຳສັ່ງເກືອດຫ້າມດັ່ງກ່າວເປັນການຕິດຕາມຄວບຄຸມທີ່ບໍ່ຖືກຕ້ອງຕໍ່ການເຄື່ອນໄຫວຂອງສ່ວນບຸກຄົນທາງດ້ານໂທລະຄົມ, ຫາກບໍ່ແມ່ນໄດ້ພິຈາລະນາເຖິງຄວາມໝັ້ນຄົງແຫ່ງຊາດຢ່າງແທ້ຈິງແຕ່ຢ່າງໃດ,ກົງກັນຂ້າມພັດໄດ້ພິຈາລະນາເຖິງຜົນປະໂຫຍດທາງການເມືອງກ່ຽວກັບການເລືອກຕັ້ງທົ່ວໄປທີ່ຈະຈັດຂຶ້ນໃນໄວໆນີ້. ກ່ອນໜ້ານີ້, ໜັງສືພິມນິວຢອກທາມສ໌ຂອງອາເມຣິກາກໍໄດ້ລາຍງານວ່າ: ອົງການຂ່າວລັບສູນກາງອາເມຣິກາຫຼື CIA ໄດ້ປະເມີນຜົນໂດຍເຫັນວ່າ: ບໍ່ໄດ້ມີຫຼັກຖານອ້າງອີງທີ່ສະແດງໃຫ້ເຫັນວ່າ:ລັດຖະບານຈີນໄດ້ເກັບກຳຂໍ້ມູນຂອງຊາວເນັດຜູ້ເຂົ້າຊົມ Tik Tok.
ໃນໄລຍະມໍ່ໆມານີ້, ອາເມຣິກາໄດ້ສ້າງຄວາມກົດດັນຢ່າງຮ້າຍແຮງໃຫ້ກັບ Tik Tok ໂດຍມີຈຸດປະສົງເພື່ອທຳລາຍຄວາມໝັ້ນໃຈຂອງ Tik Tok ເປັນກ້າວໆ,ເພື່ອໃຫ້ Tik Tok ລົດລາວາສອກ. ຂະນະດຽວກັນ,ຄຽງຄູ່ກັບການເປີດເຜີຍຂໍ້ມູນຂອງບັນດາຝ່າຍ, ອາເມຣິກາກໍໄດ້ເຜີຍແບຈຸດປະສົງທີ່ແທ້ຈິງຂອງຕົນເພື່ອເຂົ້າຍຶດຄອງ Tik Tok ຢ່າງຮອບດ້ານເຊິ່ງລວມທັງເຕັກນິກທີ່ກ່ຽວຂ້ອງຂອງ Tik Tok. ໂຄສົກກະຊວງການຄ້າຈີນເຄີຍໄດ້ກ່າວວ່າ: ອາເມຣິກາມີຄຳສັ່ງເກືອດຫ້າມທາງການຄ້າທີ່ກ່ຽວຂ້ອງກັບແອັບ WeChat ແລະ Tik Tok ໃນຂໍ້ຫາຄວາມໝັ້ນຄົງແຫ່ງຊາດ ເປັນການທຳລາຍສິດແລະຜົນປະໂຫຍດທີ່ເປັນທຳແລະຖືກຕ້ອງຕາມກົດໝາຍຂອງວິສາຫະກິດທີ່ກ່ຽວຂ້ອງຢ່າງໜັກໜ່ວງ. ຖ້າອາເມຣິກາປະຕິບັດຕາມໃຈຄືແບບນີ້, ຈີນຈະໃຊ້ມາດຕະການທີ່ຈຳເປັນເພື່ອປົກປັກຮັກສາສິດແລະຜົນປະໂຫຍດທີ່ຖືກຕ້ອງຕາມກົດໝາຍຂອງວິສາຫະກິດຈີນຢ່າງເດັດດ່ຽວໜຽວແໜ້ນ.
ຄຳເຫັນ
0