ທ່ານ​ໂດ​ໂນ ທ​ຣຳ ປະ​ທານ​າ​ທິ​ບໍ​ດີ​ອາ​ເມ​ຣິ​ກາ​ໄດ້​ຖືກ​ວາ​ລະ​ສານ “ເດີ​ທາມ​ສ໌” ​ລົງ​ຮູບ​ສຽດ​ສີ​ໃນ​ໜ້າ​ປົກ​ເປັນ​ສີ​ດຳອີກ​ຄັ້ງ​ໜຶ່ງ​, ເຖິງວ່າ​ວາ​ລະ​ສານ​ດັ່ງ​ກ່າວ​ບໍ່​ໄດ້​ກ່າ​ວ​ເຖິງ​ຊື່​ແລະ​ນາມ​ສະ​ກຸນ​ຂອງ​ທ່ານ​ກໍ​ຕາມ. ຢູ່​ໜ້າ​ປົກ​ຂອງວາ​ລະ​ສານ​ດັ່ງ​ກ່າວ, ທຳ​ນຽບ​ຂ່າວ​ຍັງ​​ເປັນ​ແບບ​ເກົ່າ, ແຕ່​​ໃນ​ຮູບ​ໜ້າ​ປົກຢູ່​ເທິງ​ທຳ​ນຽບ​ຂາວ​ມີທໍ່​ລະ​ບາຍ​​ຄວັນ 4 ​ທໍ່​ກຳ​ລັງ​ລະ​ບາຍ​ເຊື້ອ​ພະ​ຍາດ​ຢ່າງ​ບໍ່​ຢຸດ​ຢັ້ງ. ວາ​ລະ​ສານ​ດັ່ງ​ກ່າວ​ໄດ້​ຂຽນ​ບົດ​ຄວາມ​​ລົງ​ໃນ Twitter ໂດຍ​ເນັ້ນ​ຫົວ​ຂໍ້​ວ່າ: “ຄົນ​ເຈັບ​ຄົນ​ທຳ​ອິດ” ແລະ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ຢູ່​ທຳ​ນຽບ​ຂາວ. “ຄົນ​ເຈັບ​ຄົນ​ທຳ​ອິດ” ໃຜໆ​ກໍ​ຮູ້​ແລ້ວ​ວ່າ​ແມ່ນ​ໝາຍ​ເຖິງ​ທ່ານ​ໂດ​ໂນ ທຳ ປະ​ທາ​ນາ​ທິ​ບໍ​ດີ​ອາ​ເມ​ຣິ​ກາ​ນັ້ນ​ເອງ.

ໃນ​ເດືອນ​ແລ້ວ​ນີ້, ວາ​ລະ​ສານ “ເດີ​ທາມ​ສ໌” ກໍ​ໄດ້​ພິມ​​ຮູບ​ໃນ​ໜ້າ​ປົກ​ແບບ​ສຽດ​ສີ​ງ່າຍ​ດາຍ​ທີ່​ສຸດ, ບໍ່​ມີ​ທ່ານ​ທ​ຣຳ ເຊັ່ນ​ກັນ, ແຕ່​ວ່າໜ້າ​ປົກ​ຂອງວາ​ລະ​ສານ​ເປັນ​ສີ​ດຳ! ປົກ​ກະ​ຕິ​ແລ້ວໜ້າ​ປົກ​ວາ​ລະ​ສານ “ເດີ​ທ​າມ​ສ໌” ຈະ​ເປັນ​ສີ​ແດງ, ແຕ່​ໃນ​ປະ​ຫວັດ​ສາດ​ຂອງວາ​ລະ​ສານ​ດັ່ງ​ກ່າ​ວ​ກໍ​ເຄີຍ​ເກີດ​ສະ​ພາບ​ທີ່​ໜ້າ​ປົກ​ເປັນ​ສີ​ດຳ​ສອງ​ເທື່ອ, ແຕ່​ເທື່ອ​​ຜ່ານ​ມາ​ແມ່ນ​ພາຍ​ຫຼັງ​ອາ​ເມ​ຣິ​ກາ​ເກີດ​ເຫດ​ການ “11 ກັນ​ຍາ” ເມື່ອ​ປີ 2001. ຫຼັງ​ຈາກ​ນັ້ນ 19 ປີ, ໜ້າ​ປົກ​ຂອງວາ​ລະ​ສານ “ເດີ​ທາມ​ສ໌” ​ກໍ​ໄດ້​ພິມ​ໜ້າ​ປົກ​ວາ​ລະ​ສານ​ເປັນ​ສີ​ດຳ​ອີກ​ຄັ້ງ​ໜຶ່ງ.

ເບິ່ງ​ໜ້າ​ປົກ​ສີ​ດຳ​ດັ່ງ​ກ່າວ​ຢ່າງ​ລະ​ອຽດ​​ກໍສາ​ມາດ​ເຫັນ​ໄດ້​ວ່າ: ແມ່ນ​ການ​ລວມຍອດ​ຕົວ​ເລກ​ ​ກ່ຽວ​ກັບ​ຈຳ​ນວນ​ຜູ້​ເສຍ​ຊີ​ວິດ​ຍ້ອນ​ເປັນ​ພະ​ຍາດ​ໂຄວິດ-19 ຄື: ວັນ​ທີ 29 ກຸມ​ພາ​ປີ 2020, ມີ​ຜູ້​ເສຍ​ຊີ​ວິດ​​ພຽງ​ແຕ່ 1 ຄົນຍ້ອນ​ເປັນ​ພະ​ຍາດ​ໂຄວິດ-19, ວັນ​ທີ 1 ມີ​ນາ, ​ຜູ້​ເສຍ​ຊີ​ວິດເປັນ​ສູນ; ວັນ​ທີ 2 ມີ​ນາ, ມີ 5 ຄົນ​ເສຍ​ຊີ​ວິດ​ຍ້ອນ​ເປັນ​ພະ​ຍາດ​ໂຄວິດ-19; ວັນ​ທີ 8 ກັນ​ຍາ, ມີ 445 ຄົນ​ເສຍ​ຊີ​ວິດ. ຕົວ​ເລກ​ຜູ້​ເສຍ​ຊີ​ວິດ​ຍ້ອນ​ເປັນ​ພະ​ຍາດ​ໂຄວິດ-19 ໃນ​ທຸກວັນ​ເມື່ອ​ລວມ​ເຂົ້າ​ກັນ​ແລ້ວ​ເຮັດ​ໃຫ້​ຄົນ​ຕື່ນ​ຕົກ​ໃຈ​ຄື: 200000 ຄົນ.

ພາຍ​ຫຼັງ​ມີ​ຜູ້​ເສຍ​ຊີ​ວິດ​ຍ້ອນ​ເປັນ​ພະ​ຍາດ​ໂຄວິດ-19 ​ຢູ່​ອາ​ເມ​ຣິ​ກາ​ບັນ​ລຸ​ເຖິງ 2 ແສນ​ຄົນ​ມາ​ຮອດ​ປັດ​ຈຸ​ບັນ​ໄດ້​ຜ່ານ​ມາ 1 ເດືອນ​ແລ້ວ, ຜູ້​ເສຍ​ຊີ​ວິດ​​ຢູ່​ອາ​ເມ​ຣິ​ກາ​ຫຼາຍກວ່າ 2,1 ແສນ​ຄົນ​ແລ້ວ. ອີງ​ຕາມ​ການ​ຄາດ​ຄະ​ເນ​ຂອງ​ທ່ານ Dr. ຟາວ​ຊີ​ຂອງ​ອາ​ເມ​ຣິ​ກາ, ອາ​ເມ​ຣິ​ກາ​ອາດ​ຈະ​ມີຜູ້​ເສຍ​ຊີ​ວິດ​ຍ້ອນ​ເປັນ​ພະ​ຍາດ​ດັ່ງ​ກາວ​ອີກ 2 ແສນ​ຄົນ. ນີ້​ຈະ​ເປັນ​ເລື່ອງ​ໂສກ​ນາດ​ຕະ​ກຳ​ເສົ້າ​ແບບ​ໃດ​ກັນ​ແທ້​ຂອງມວນ​ມະ​ນຸດ!

ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ແມ່ນ​ການ​ທົດ​ສອບ​ຄັ້ງ​ໃຫຍ່​ແທ້ໆ. ຖ້າ​ວ່າ​ບໍ່​ໃຫ້​ການ​​ເຄົາ​ລົບ​​ຕໍ່​ວິ​ທະ​ຍາ​ສາດ, ຈະ​ໄດ້​ຜົນ​ຕອບ​ແທ​ນ​ທີ່​ເຈັບ​ແສບ​ຢ່າງ​ແນ່ນອນ. ການ​ທີ່​ໃສ່​ຮ້າຍ​ປ້າຍ​ສີ​ແລະ​ຖິ້ມ​ໂທດ​ໃຫ້​ປະ​ເທດ​ອື່ນກໍ​ບໍ່​ມີ​ຜົນ​ປະ​ໂຫຍດ​ຫຍັງ​ເລີຍ, ຄວາມ​ເວົ້າ​ຫຼອກ​ລວງ​​ຊ້ຳ​ແລ້ວ​ຊ້ຳ​ອີກ​ຫຼາຍກວ່າພັນເທື່ອ​ຍັງ​ເປັນ​ຄວາມ​ຫຼອກ​ລວງ​ຄື​ເກົ່າ. ການ​ກະ​ທຳ​ຂອງ​ທຳ​ນຽບ​ຂາວ​ໃນ​ການ​ຮັບ​ມື​ກັບ​ການ​ແຜ່​ລະ​ບາດ​ຂອງ​ພະ​ຍາ​ດ​ໂຄວິດ-19 ເຮັດ​ໃຫ້​ວາ​ລະ​ສານ “ເດີ​ທາມ​ສ໌” ອົດ​ທົນ​ຕໍ່​ໄປ​ບໍ່​ໄດ້​​ອີກແລ້ວ, ​ສະ​ນັ້ນ​ຈຶ່ງ​ໄດ້​ພິມ​ໜ້າ​ປົກ​ດັ່ງ​ກ່າວ​ແບບ​ເຈັບ​ແສບທີ່​ສຸດ​ຄື: ທຳ​ນຽບ​ຂາວ​ກຳ​ລັງ​ມີ​ເຊື້ອ​ພະ​ຍາດ​ລະ​ບາຍ!