ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 22 ຕຸລານີ້, ຄະນະປະຈຳກົມການເມືອງສູນກາງພັກກອມມູນິດຈີນໄດ້ຈັດກອງປະຊຸມ ເພື່ອຮັບຟັງການລາຍງານຜົນສະຫຼຸບ ແລະປະເມີນການຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 13. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນກ່າວວ່າ, ໂດຍຜ່ານການພັດທະນາຕາມ “ແຜນການ 5 ປີຄັ້ງທີ 13”, ກຳລັງເສດຖະກິດ ກຳລັງວິທະຍາສາດເຕັກນິກ ແລະ ກຳລັງສັງລວມແຫ່ງຊາດຈີນໄດ້ເພີ່ມຂຶ້ນສູ່ລະດັບສູງກວ່າເກົ່າ.
ໃນກອງປະຊຸມດັ່ງກ່າວ, ທ່ານສີຈິ້ນຜິງກ່າວເນັ້ນວ່າ, ແຜນການ 5 ປີຄັ້ງທີ 13 ຂອງຈີນໄດ້ດຳເນີນໄປຢ່າງສະດວກ, ເສດຖະກິດຈີນໄດ້ເຄື່ອນໄຫວຢ່າງໝັ້ນທ່ຽງໂດຍລວມ, ໂຄງປະກອບເສດຖະກິດໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ, ການຫັນເປັນທັນສະໄໝດ້ານກະສິກຳໄດ້ຮັບຄວາມຄືບໜ້າຢ່າງໜັກແໜ້ນ, ໝາກຜົນການລຶບລ້າງຄວາມທຸກຍາກໄດ້ປະຈັກຕາຕໍ່ຊາວໂລກ, ສິ່ງແວດລ້ອມນິເວດໄດ້ຮັບການປັບປຸງໃຫ້ດີຂຶ້ນຢ່າງພົ້ນເດັ່ນ, ການລົງເລິກການປະຕິຮູບຢ່າງຮອບດ້ານໄດ້ຮັບຄວາມຄືບໜ້າທີ່ສຳຄັນ, ການເປີດປະຕູສູ່ພາຍນອກໄດ້ເປີດກວ້າງອອກຢ່າງຕໍ່ເນື່ອງ, ການສ້າງສາ “ໜຶ່ງແລວໜຶ່ງເສັ້ນທາງ” ຮ່ວມກັນໄດ້ຮັບໝາກຜົນຢ່າງຈົບງາມ, ຊີວິດການເປັນຢູ່ຂອງປະຊາຊົນມີລະດັບສູງຂຶ້ນຢ່າງພົ້ນເດັ່ນ, ການຫັນເປັນທັນສະໄໝຂອງລະບົບ ແລະ ຄວາມສາມາດການບໍລິຫານລັດໄດ້ເລັ່ງລັດກ້າວໄປໜ້າຢ່າງວ່ອງໄວ. ສິ່ງສຳຄັນຍິ່ງກວ່ານັ້ນ ຄື, ໃນພຶດຕິກຳຂອງການປະຕິບັດແຜນການ 5 ປີຄັ້ງທີ 13, ຄວາມດີເລີດດ້ານການນຳພາຂອງພັກກອມມູນິດຈີນ ແລະ ລະບອບສັງຄົມນິຍົມທີ່ມີສີສັນພິເສດຂອງຈີນໄດ້ຍົກສູງໃຫ້ພົ້ນເດັ່ນຂຶ້ນຕື່ມອີກ.
ໃນກອງປະຊຸມຍັງກ່າວເນັ້ນວ່າ, ໃນໄລຍະປະຕິບັດແຜນການ 5 ປີຄັ້ງທີ 14, ຈີນຈະເຂົ້າສູ່ໄລຍະພັດທະນາຄັ້ງໃໝ່, ຕ້ອງສຸມໃສ່ການຊຸກຍູ້ການພັດທະນາດ້ວຍຄຸນນະພາບສູງ, ພະຍາຍາມສ້າງສະພາບການພັດທະນາອັນໃໝ່ທີ່ຖືເອົາການເຄື່ອນໄຫວພາຍໃນປະເທດເປັນຫຼັກ, ເຮັດໃຫ້ການເຄື່ອນໄຫວທັງພາຍໃນແລະ ສາກົນຊ່ວຍຊູຍູ້ໜູນກັນ. ຕ້ອງພັດທະນາຕາມກະແສຍຸກສະໄໝ, ສ້າງສະພາບການໃໝ່ທີ່ເອື້ອອຳນວຍໃຫ້ແກ່ພາລະກິດສ້າງສາປະເທດສັງຄົມນິຍົມແບບທັນສະໄໝຢ່າງຮອບດ້ານ.
ຄຳເຫັນ
0