黄理春

ຕາລາງລາຍການ FM93Mhz

ດາວໂຫຼດ App CRI-FM93 ລະບົບ IOS

ດາວໂຫຼດ App CRI-FM93 ລະບົບ Android

FM93

ແນວ​ຄິດ​ການ​ພັດ​ທະ​ນາ​ໃໝ່​ພາ​ໃຫ້​ການ​ພັດ​ທະ​ນາ​ຂອງ​ຈີນ​ມີ​ຄຸນ​ນະ​ພາບ​ສູງ​​ຂຶ້ນ​ສູ່​ລະ​ດັບ​ໃໝ່

2020-10-28 15:41:31 cri

ປະ​ເທດ​ໃດ​ໜຶ່ງ​ຄັດ​ເລືອກແນວ​ຄິດ​ການ​ພັດ​ທະ​ນາ​ແບບ​ໃດ, ກໍ​ຈະ​ມີ​ສະ​ພາບ​ການ​ພັດ​ທະ​ນາ​ແບບ​ນັ້ນ. ກ່ອນ​ໜ້າ​ນີ້ 5 ປີ, ກອງ​ປະຊຸມ​ຄົບ​ຄະນະ​ຄັ້ງ​ທີ 5 ​ຂອງ​ຄະນະ​ກຳມະການ​ສູນ​ກາງ​ພັກ​ກອມ​ມູນິດ​ຈີນ​ສະ​ໄໝທີ 18 ໄດ້​ສະ​ເໜີ​ແນວ​ຄິດ​ການພັດ​ທະ​ນາ​ຄື: ​ການ​ພັດ​ທະ​ນາ​​ດ້ວຍ​ການ​ປະ​ດິດ​ສ້າງ​ໃໝ່, ​ປະ​ສານ​ສົມ​ທົບ​ກັນ, ສີ​ຂຽວ, ເປີດ​ປະ​ຕູ​ສູ່​ພາຍນອກ​ແລະ​ແບ່ງ​ປັນ​ກັນ, ​ເຊິ່ງ​ເປັນ​ການ​ໃຫ້​ທິດ​ຊີ້​ນຳທາງ​ທິດ​ສະ​ດີ​ແລະ​ການ​ເຄື່ອນ​ໄຫ​ວ​ແກ່​ການ​ພັດ​ທະ​ນາ​ດ້ວຍ​ຄຸນ​ນະ​ພາບ​ສູງ.

ໃນ​ໄລ​ຍະ 5 ປີ​ຜ່ານ​ມາ, ​ການ​ລົງ​ທຶນ​ດ້ານ​ການ​ຄົ້ນ​ຄວ້າ​ເພື່ອ​ການ​ພັດ​ທະ​ນາ​ຂອງ​ຈີນ​ໄດ້​ເພີ່ມ​ຂຶ້ນ​ຈາກ 2,06% ຂອງ GDP ຂອງ​ຈີນ​​ເປັນ 2,23%, ທຶນ​ຄົ້ນ​ຄວ້າ​ພື້ນ​ຖານ​ເພີ່ມ​ຂຶ້ນ​ເກືອບ​ໜຶ່ງ​ເທົ່າ, ດັດ​ຊະ​ນີ​ປະ​ດິດ​ສ້າງ​ໃໝ່​ລະ​ດັບ​ໂລກ​ໄດ້​ຫຍັບ​ຂຶ້ນ​ຈາກ​ອັນ​ດັບທີ 29 ​ເປັນ​ອັນ​ດັບ​ທີ 14.

ໃນ​ໄລ​ຍະ 5 ປີ​ຜ່ານ​ມາ, ຊາວ​ກະ​ສິ​ກອນ​ຫຼາຍກວ່າ 100 ລ້ານ​ຄົນ​ໄດ້​ກາຍ​ເປັນ​ຊາວ​ເມືອງ​ໃໝ່; ຮອດ​ທ້າຍ​ປີ 2019, ​ລະ​ດັບ​ການ​ຫັນ​ເປັນ​ຕົວ​ເມືອງ​ຂອງ​ປະ​ຊາກ​ອນ​ຈີນ​ໄດ້​ຖືກ​ຍົກ​ສູງ​ຂຶ້ນ​ເປັນ 60,6%, ​ເມື່ອທຽບ​ໃສ່​ໄລ​ຍະ​ດຽວ​ກັນ​ຂອງ​ປີ 2015 ເພີ່ມ​ຂຶ້ນ 4,5%; ເງື່ອນ​ໄຂ​ການ​ຜະ​ລິດ​ແລະ​ຊີ​ວິດ​ການ​ເປັນ​ຢູ່​ຂອງ​ຊາວກ​ະ​ສິ​ກອນ​ໄດ້​ຮັບ​ການ​ປັບ​ປຸງ​ໃຫ້​ດີ​ຂຶ້ນ​ຢ່າງ​ຈະ​ແຈ້ງ, ການ​ພັດ​ທະ​ນາ​ແບບ​ປະ​ສານ​ສົມ​ທົບ​ລະ​ຫວ່າງ​ຕົວ​ເມືອງ​ແລະ​ຊົນ​ນະ​ບົດ​ກັນ​ໄດ້​ເກີດ​​ມີ​ສະ​ພາບ​ການ​ໃໝ່.

ໃນ​ໄລ​ຍະ 5 ປີ​ຜ່ານ​ມາ, ການ​ພັດ​ທະ​ນາ​ແບບ​ສີ​ຂຽວ​ຂອງ​ຈີນ​ໄດ້​​ຈັດ​ຕັ້ງປະ​ຕິ​ບັດ​ໃຫ້​ເປັນ​ຮູບ​ປະ​ທຳ. ປີ 2019, ການ​ສິ້ນ​ເປືອງໃຊ້ພະລັງງານຕໍ່ຫົວໜ່ວຍ GDP ທຽບ​ໃສ່​ປີ 2015 ໄດ້​ຫຼຸດ​ລົງ 13,2%, ຕົວ​ເມືອງ​ລະ​ດັບນະ​ຄອນ​ແລະ​ລະ​ດັບ​ແຂວງ 337 ແຫ່ງ​ໃນ​ທົ່ວ​ປະ​ເທດ​ຈີນ​, ວັນ​ເວ​ລາ​ທີ່​ອາ​ກາດ​ເປັນ​ຄຸ​ນະ​ພາບ​ດີ​ມີ​ເຖິງ 82%, ສະ​ພາບ​ແວດ​ລ້ອມ​ຂອງ​ຈີນ​ໄດ້​ຮັບ​ການ​ປັບ​ປຸງ​​ໃຫ້ດີ​ຂຶ້ນ​ໂດຍ​ລວມ.

ໃນ​ໄລ​ຍະ 5 ປີ​ຜ່ານ​ມາ, ຍອດ​ມູນ​ຄ່າ​ຂາ​ເຂົ້າ​ຂາ​ອອກ​ຂອງ​ຈີນ​ໄດ້​ເປັນ​ອັນ​ດັບ​​ໜຶ່ງ​​ຂອງ​ໂລກ, ​ການ​ດຶງ​ດູດ​ການ​ລົງ​ທຶນ​ຂອງ​ຕ່າງ​ປະ​ເທດ​ໃນ​ປີ 2019 ໄດ້​ສ້າງ​ສະ​ຖິ​ຕິ​ໃໝ່​​ເປັນ​ປະ​ຫວັດ​ສາດ, ການ​ເປີດ​ປະ​ຕູ​ສູ່​ພາຍນອກ​ຂອງ​ຈີນ​ພວມ​ກ້າວ​ຂຶ້ນ​ສູ່​ລະ​ດັບ​ໃໝ່.

ໃນ​ໄລ​ຍະ 5 ປີ​ຜ່ານ​ມາ, ຈີນ​ໄດ້​ຊ່ວຍ​ເຫຼືອ​​ປະ​ຊາ​ກອນຜູ້​ທຸກ​ຍາກ​​ຢູ່​ຊົນ​ນະ​ບົດ​ຫຼາຍກວ່າ 50 ລ້ານ​ຄົນ​​ໃຫ້​ສາ​ມາດ​ຫຼຸດ​ພົ້ນ​ອອກ​ຈາກ​ສະ​ພາບ​ຄວາມ​ທຸກ​ຍາກ, ຄວາມ​ທຸກ​ຍາກ​ທົ່ວ​ໄປ​ໃນ​ເຂດ​ແຄວ້ນ​ໄດ້​ຮັບ​ການ​ແກ້​ໄຂ​ໃນ​ຂັ້ນ​ພື້ນ​ຖານ, ບັ້ນ​ລຶບ​ລ້າງ​ຄວາມ​ທຸກ​ຍາກ​ໃນ​ຂັ້ນ​ສຸດ​ທ້າຍ​ໄດ້​ປະ​ສົບ​ຜົນ​ສຳ​ເລັດ​ທີ່​ມີ​ລັກ​ສະ​ນະ​ຕັດ​ສິນ.

ເມື່ອ​ທົບ​ທວນ​ຄືນ “ແຜນ​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ 5 ປີ ຄັ້ງ​ທີ 13”, ພາຍ​ໃຕ້​ການ​ສູ້​ຊົນ​ຮ່ວມ​ກັນ​ຂອງ​ປະ​ຊາ​ຊົນ​ຈີນ 1.4 ຕື້​ຄົນ, ການ​ພັດ​ທະ​ນາ​ຂອງ​ຈີນ​ໄດ້​ກ້າວ​ຂຶ້ນ​ສູ່​ລະ​ດັບ​ໃໝ່. ເພື່ອ​ປະ​ຕິ​ບັດ “ແຜນ​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ 5 ປີ​ຄັ້ງ​ທີ 14,” ລັດ​ຖະ​ບານ​ຈີນ​ຈະ​ຍຶດ​ໝັ້ນ​ການ​ພັດ​ທະ​ນາ​ທີ່​ຖື​ປະ​ຊາ​ຊົນ​ເປັນ​ໃຈ​ກາງ, ຈັດ​ຕັ້ງ​ປະ​ຕິ​ບັດ​ແຜນ​ການ​ຕາມ​ແນວ​ຄິດ​ການ​ພັດ​ທະ​ນາ​ໃໝ່, ແລະ​ຈະ​ຂຽນໜ້າ​ໃໝ່​ຂອງ​ການ​ພັດ​ທະ​ນາ​ທີ່​ມີ​ຄຸນ​ນະ​ພາບ​ສູງ.

ຄຳ​ເຫັນ

0