ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ແຕ່ວັນທີ 12 ຫາວັນທີ 14 ຕຸລາປີ 2020, ກອງປະຊຸມສຸດຍອດການສ້າງປະເທດຈີນດິຈີຕອນຄັ້ງທີ 3ໄດ້ຈັດຂຶ້ນຢູ່ນະຄອນຟູໂຈ່ວແຂວງຟູຈ້ຽນ.
ແຕ່ວັນທີ 12 ຫາວັນທີ 14 ຕຸລາປີ 2020, ກອງປະຊຸມສຸດຍອດການສ້າງປະເທດຈີນດິຈີຕອນຄັ້ງທີ 3ໄດ້ຈັດຂຶ້ນຢູ່ນະຄອນຟູໂຈ່ວແຂວງຟູຈ້ຽນ. ປີ 2000, ໃນໄລຍະທີ່ດຳລົງຕຳແໜ່ງຢູ່ແຂວງຟູຈ້ຽນ, ທ່ານສີຈິ້ນຜິງໄດ້ວາງຍຸດທະສາດສ້າງ “ຟູຈ້ຽນ ດິຈີຕອນ”. ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານສີຈິ້ນຜິງໄດ້ໃຫ້ຄວາມສຳຄັນຢ່າງສູງຕໍ່ການພັດທະນາເຕັກໂນໂລຊີຂໍ້ມູນຂ່າວສານ, ເພີ່ມທະວີການອອກແບບໃນລະດັບສູງສຸດ ແລະ ວາງແຜນໂດຍລວມ, ເຊິ່ງໄດ້ວາງທິດທາງການພັດທະນາກ່ຽວກັບການສ້າງ “ປະເທດຈີນດິຈີຕອນ”.
ງານວາງສະແດງຜົນສຳເລັດຂອງການສ້າງປະເທດຈີນດິຈີຕອນຄັ້ງທີ 3
ປີ 2000, ທ່ານວາງຊິ່ນມິນ ຮອງອະທິການບໍດີມະຫາວິທະຍາໄລຟູໂຈ່ວທີ່ຫາກໍກັບມາຈາກຕ່າງປະເທດບໍ່ດົນໄດ້ເຜີຍແຜ່ຈົດໝາຍທີ່ມີຂໍ້ສະເໜີສະບັບໜຶ່ງກ່ຽວກັບການສ້າງຟູຈ້ຽນດິຈີຕອນ, ຈົດໝາຍສະບັບນີ້ໄດ້ຮັບຄວາມສົນໃຈຈາກທ່ານສີຈິ້ນຜິງທີ່ເປັນເຈົ້າແຂວງແຂວງຟູຈ້ຽນໃນເວລານັ້ນ.
ໃນຕອນນັ້ນ, ຄອມພິວເຕີ ແລະ ອິນເຕີເນັດຍັງບໍ່ທັນນຳໃຊ້ຢ່າງທົ່ວເຖິງ, “ໂລກແຫ່ງດິຈີຕອນ” “ສັງຄົມດິຈີຕອນ”ຍັງເປັນເລື່ອງໄກໂຕ, ແຕ່ທ່ານສີຈິ້ນຜິງກຳໄດ້ທ່າອ່ຽງ ແລະ ມີຄວາມສະດຸ້ງໄວຕໍ່ການພັດທະນາເຕັກໂນໂລຊີຂໍ້ມູນຂ່າວສານ. ທ່ານໄດ້ໃຫ້ທິດຊີ້ນຳວ່າ: ການສ້າງ “ຟູຈ້ຽນດິຈີຕອນ” ມີຄວາມໝາຍສຳຄັນຢ່າງຍິ່ງ; ການຈັດຕັ້ງປະຕິບັດຍຸດທະສາດທີ່ສ້າງແຂວງໃຫ້ຈະເລີນດ້ວຍວິທະຍາສາດແລະການສຶກສາ, ຕ້ອງຍາດເອົາຈຸດຍຸດທະສາດດ້ານວິທະຍາສາດເຕັກນິກ; ສ້າງ “ຟູຈ້ຽນດິຈີຕອນ”, ກໍແມ່ນຈຸດຍຸດທະສາດດ້ານວິທະຍາສາດເຕັກນິກແຫ່ງໜຶ່ງທີ່ສຳຄັນທີ່ສຸດໃນໂລກປະຈຸບັນ.
ຫຼັງຈາກການໃຫ້ທິດຊີ້ນຳດັ່ງກ່າວໄດ້ເຄິ່ງເດືອນ, “ຟູຈ້ຽນດິຈີຕອນ”ໄດ້ຖືກກຳນົດໃຫ້ເປັນຂໍ້ສະເໜີຂອງຄະນະພັກແຂວງຟູຈ້ຽນໃນແຜນການພັດທະນາເສດຖະກິດສັງຄົມ “5 ປີຄັ້ງທີ 10”. ນີ້ກໍແມ່ນການເປີດເຜີຍວິໄສລັດ “ຟູຈ້ຽນດິຈີຕອນ”ເປັນຄັ້ງທຳອິດ. ຫຼັງຈາກນັ້ນ 2 ເດືອນ, ທ່ານສີຈິ້ນຜິງໄດ້ເປັນປະທານຈັດກອງປະຊຸມຫົວຂໍ້ສະເພາະສຳລັບອົງການປົກຄອງແຂວງ, ຕົກລົງໃຫ້ສ້າງຕັ້ງໜ່ວຍງານນຳພາການສ້າງ “ຟູຈ້ຽນດິຈີຕອນ”, ໂດຍແມ່ນທ່ານສີຈິ້ນຜິງເປັນຫົວໜ້າໜ່ວຍງານ.
ປີ 2002, ຢູ່ເຂດຊຸມຊົນແຫ່ງໜຶ່ງຂອງແຂວງຟູຈ້ຽນໄດ້ສ້າງຫ້ອງສະໝຸດເອເລັກໂຕຼນິກເຂດຊຸມຊົນແຫ່ງທຳອິດໃນແຂວງຕົນ, ທັງໄດ້ປະກອບຄອມພິວເຕີ 10 ໜ່ວຍງວດທຳອິດ. ທ່ານສີຈິ້ນຜິງໄດ້ເອົາໃຈໃສ່ຢ່າງສູງວ່າ ອິນເຕີເນັດໃຊ້ການໄດ້ບໍ່ ປະຊາຊົນຈະໄດ້ຂໍ້ມູນຂ່າວສານຫຍັງຈາກອິນເຕີເນັດ. ທ່ານໄດ້ຕັ້ງໃຈສັງເກດເບິ່ງຜູ້ເຖົ້າຜູ້ໜຶ່ງໃຊ້ອິນເຕີເນັດແນວໃດ,ທັງຖາມວ່າ “ອິນເຕີເນັດໄວບໍ່”.
ພ້ອມດຽວກັນນີ້, ລະບົບຈ່າຍຄ່ານ້ຳຄ່າໄຟຜ່ານທາງອິນເຕີເນັດກໍໄດ້ທົດລອງຕິດຕັ້ງນຳໃຊ້ຢູ່ແຂວງຟູຈ້ຽນ. ທ່ານສີຈິ້ນຜິງໄດ້ຊອກຮູ້ຢ່າງລະອຽດກ່ຽວກັບການຈົດເລກໝໍ້ນັບໄຟຜ່ານທາງອິນເຕີເນັດ, ແລະຖາມວ່າ “ຕົວເລກຖືກຕ້ອງຫຼືບໍ່”. ໃນໄລຍະນັ້ນ, ອິນເຕີເນັດມີສາຍທີ່ເຊື່ອມຕໍ່ເຂົ້າເຮືອນມີແຕ່ 2 Mເທົ່ານັ້ນ, ພະນັກງານຕອບວ່າ, ຍັງຕ້ອງປະສົມປະສານກັບການຈົດຕົວເລກດ້ວຍຄົນ. ທ່ານສີຈິ້ນຜິງໄດ້ຮຽກຮ້ອງໃຫ້ເຂົາເຈົ້າຕ້ອງເຮັດແທ້ທຳຈິງ, ໃຫ້ການບໍລິການເຕັກໂນໂລຊີຂໍ້ມູນຂ່າວສານຢ່າງຈິງຈັງແກ່ປະຊາຊົນ.
ປີ 2015, ທ່ານສີຈິ້ນຜິງໄດ້ປະກອບຄຳເຫັນໃນພິທີເປີດກອງປະຊຸມອິນເຕີເນັດໂລກຄັ້ງທີ 2
ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ສູນກາງພັກທີ່ມີທ່ານສີຈິ້ນຜິງເປັນແກນກາງໄດ້ມຸ່ງໝັ້ນສູ່ອະນາຄົດ ແລະ ໄປຕາມທ່າອ່ຽງລວມໄດ້, ວາງແຜນຍຸດທະສາດໃນການສ້າງປະເທດຈີນດິຈີຕອນ. ປີ 2015, ທ່ານສີຈິ້ນຜິງໄດ້ກ່າວເນັ້ນໃນພິທີເປີດກອງປະຊຸມອິນເຕີເນັດໂລກຄັ້ງທີ 2ວ່າ: “ຈີນພວມປະຕິບັດແຜນການດຳເນີນງານ ອິນເຕີເນັດ +, ຊຸກຍູ້ການສ້າງ ປະເທດຈີນດິຈີຕອນ.” ປີ 2017 ການສ້າງປະເທດຈີນດີຈີຕອນ ໄດ້ຖືກກຳນົດເຂົ້າໃນບົດລາຍງານການເມືອງຂອງກອງປະຊຸມໃຫຍ່ຂອງພັກກອມມູນິດຈີນຄັ້ງທີ 19.
“ຂໍ້ມູນໃຫຍ່ຈະເສີມຂະຫຍາຍບົດບາດອັນໃຫຍ່ຫຼວງໃນການຮັບປະກັນ ແລະ ປັບປຸງຊີວິດການເປັນຢູ່ຂອງປະຊາຊົນ.” ໃນການຮ່ຳຮຽນລວມໝູ່ຄັ້ງທີ 2 ຂອງກົມການເມືອງສູນກາງພັກກອມມູນິດຈີນກ່ຽວກັບການຈັດຕັ້ງປະຕິບັດຍຸດທະສາດຂໍ້ມູນໃຫຍ່ແຫ່ງຊາດ, ທ່ານສີຈິ້ນຜິງຊີ້ອອກວ່າ: “ຕ້ອງຍຶດໝັ້ນແນວຄິດພັດທະນາທີ່ຖືປະຊາຊົນເປັນໃຈກາງ, ຊຸກຍູ້ ອິນເຕີເນັດ+ການສຶກສາ, ອິນເຕີເນັດ+ການປິ່ນປົວ, ອິນເຕີເນັດ+ວັດທະນະທຳ ແລະອື່ນໆ, ເຮັດໃຫ້ປະຊາຊົນບໍ່ຈຳເປັນຕ້ອງເດີນທາງໄປເຮັດທຸລະທຸກຢ່າງ, ແລະນຳໃຊ້ເຕັກໂນໂລຊີຂໍ້ມູນຂ່າວສານໃຫ້ຫຼາຍຂຶ້ນ, ເຮັດໃຫ້ການບໍລິການສາທາລະນະມີຄວາມສະໝ່ຳສະເໝີ ທົ່ວເຖິງ ແລະ ສະດວກຫຼາຍກວ່າເກົ່າ.”
ປະຈຸບັນ ເຕັກໂນໂລຊີຂໍ້ມູນໃຫຍ່ໄດ້ນຳໃຊ້ທົ່ວໄປໃນຊີວິດການເປັນຢູ່ຂອງປະຊາຊົນຈີນ, ເຊັ່ນ: ຢູ່ຮ້ານຄ້າ ພຽງແຕ່ສະແກນໃບໜ້າກໍຈະສາມາດຈ່າຍເງິນໄດ້ແລ້ວ; ຢູ່ໃນເຮືອນ ພຽງແຕ່ໃຊ້ໂທລະສັບມືຖື ແລະ ຄອມພິວເຕີ ໜ່ວຍດຽວກໍສາມາດເຮັດວຽກໄດ້ແລ້ວ; ເມື່ອໄປວຽກນອກ, ກໍສາມາດສົ່ງຂໍ້ມູນໄດ້ກັບທີ່ໂດຍບໍ່ຕ້ອງເດີນທາງໄປເຮັດທຸລະເອງທຸກຢ່າງ, ເຊິ່ງໄດ້ປະຢັດເວລາຢ່າງຫຼວງຫຼາຍ. ຄຽງຄູ່ກັບການນຳໃຊ້ຮູບແບບໃໝ່ ແລະ ເຕັກນິກໃໝ່ຕ່າງໆ, ເຊັ່ນ: ໂຮງໝໍທາງອິນເຕີເນັດ, ການປິ່ນປົວຈາກທາງໄກ, ການບົ່ງມະຕິດ້ວຍເຕັກໂນໂລຊີAI ແລະອື່ນໆ, ຄວາມແຕກໂຕນກັນດ້ານການປິ່ນປົວ ແລະ ການສຶກສາຍ້ອນຄວາມແຕກໂຕນດ້ານການພັດທະນາລະຫວ່າງທ້ອງຖິ່ນຕ່າງໆ, ກໍນັບມື້ນັບຫຼຸດໜ້ອຍລົງ.
ເດືອນສິງຫາປີ2020, ອີຊີວາງມູ ຊາວນະຄອນລາຊາເຂດຕິເບດໄດ້ເປັນພະຍາດອັກເສບມ້າມສຸກເສີນ ຈົນເຮັດໃຫ້ອະໄວຍະວະຫຼາຍບ່ອນຊຸດໂຊມລົງ, ເກືອບເສຍຊີວິດ. ແຕ່ໂຊກດີເມື່ອມີລະບົບ “5G+ການປິ່ນປົວແບບອັດສະລິຍະ”, ແພດໝໍຂອງໂຮງໝໍປະຊາຊົນນະຄອນລາຊາອາໄສລະບົບປິ່ນປົວທາງໄກ, ພາຍໃຕ້ການຊີ້ນຳທາງອອນລາຍຂອງຊ່ຽວຊານໂຮງໝໍມິດຕະພາບປັກກິ່ງ, ຈຶ່ງສາມາດດຳເນີນການຜ່າຕັດໃຫ້ອີຊີວາງມູໄດ້ຢ່າງສຳເລັດຜົນ.
ທ່ານອີປີຢານແຮນ ຫົວໜ້າພະແນກລະບົບລະລາຍໂຮງໝໍປະຊາຊົນນະຄອນລາຊາເວົ້າວ່າ, ໂດຍອາໄສລະບົບປິ່ນປົວທາງໄກ, ເຂົາເຈົ້າສາມາດໄດ້ຮັບການຊ່ວຍເຫຼືອຈາກໝໍຜູ້ຊ່ຽວຊານອາວຸໂສໃນຂົງເຂດທີ່ກ່ຽວຂ້ອງພາຍໃນປະເທດ, ດຳເນີນການບົ່ງມະຕິ ແລະ ປິ່ນປົວຄົນເຈັບຜູ້ມີອາການທີ່ປິ່ນປົວຍາກນັ້ນໄດ້ຢ່າງສະດວກ, ຄົນເຈັບບໍ່ຕ້ອງອອກໄປນອກເຂດຕິເບດກໍສາມາດຊົມໃຊ້ການບໍລິການປິ່ນປົວທີ່ມີຄຸນນະພາບສູງ.
“ນຳໃຊ້ເຕັກໂນໂລຊີຂໍ້ມູນໃຫຍ່ເພື່ອຊຸກຍູ້ການຮັບປະກັນ ແລະ ປັບປຸງຊີວິດການເປັນຢູ່ຂອງປະຊາຊົນ”. ໃນການວາງແຜນຍຸດທະສາດຂອງທ່ານສີຈິ້ນຜິງ, ປະຊາຊົນພະເອກຢູ່ສະເໝີ. ການເຮັດໃຫ້ປະຊາຊົນໄດ້ສຳຜັດກັບຄວາມສະດວກຈາກການນຳໃຊ້ເຕັກໂນໂລຊີຂໍ້ມູນຂ່າວສານຢ່າງທົ່ວເຖິງ, ປະສົມປະສານການພັດທະນາເຕັກໂນໂລຊີຂໍ້ມູນຂ່າວສານ ກັບ ການຍົກລະດັບການບໍລິການສາທາລະນະ, ແມ່ນເປົ້າໝາຍສະເໝີຕົ້ນສະເໝີປາຍຂອງທ່ານສີຈິ້ນຜິງກ່ຽວກັບຍຸດທະສາດສ້າງ “ປະເທດຈີນດິຈີຕອນ”.
ປີ 2020, ການແຜ່ລະບາດຂອງພະຍາດໂຄວິດ-19 ໄດ້ເກີດຂຶ້ນຢ່າງກະທັນຫັນ. ໃນເວລາໄປສຳຫຼວດຄົ້ນຄວ້າວຽກງານປ້ອງກັນ ແລະ ຄວບຄຸມພະຍາດໂຄວິດ-19 ຢູ່ນະຄອນຫຼວງປັກກິ່ງ, ທ່ານສີຈິ້ນຜິງກ່າວວ່າ: “ຕ້ອງນຳໃຊ້ເຄື່ອງມືດ້ານຂໍ້ມູນໃຫຍ່ ແລະ ອື່ນໆ, ເພີ່ມທະວີການສືບຫາແຫຼ່ງກຳເນີດ ແລະ ຕິດຕາມສະພາບການແຜ່ລະບາດຂອງພະຍາດ.” ພາຍໃຕ້ທິດຊີ້ນຳດັ່ງກ່າວ, ຈີນໄດ້ນຳໃຊ້ຂໍ້ມູນໃຫຍ່, ປັນຍາປະດິດ, 5G ແລະເຕັກນິກອື່ນໆ, ເພື່ອຕິດຕາມສະພາບການຂອງຄົນເຈັບ ແລະ ຜູ້ເຄີຍຢູ່ໃກ້ຊິດກັບຄົນເຈັບ, ຈັດສັນຊັບພະຍາກອນການແພດຢ່າງເໝາະສົມ, ສ້າງຕັ້ງພະແນກໄຂ້ເຂດນອກ, ດຳເນີນການບົ່ງມະຕິ ແລະ ການປິ່ນປົວທາງອອນລາຍ, ໃຊ້ “QR CODE ສຸຂະພາບ” ແລະວິທີອື່ນໆທີ່ມີປະສິດທິຜົນ, ບໍ່ພຽງແຕ່ໄດ້ຊຸກຍູ້ການປ້ອງກັນ ແລະຄວບຄຸມພະຍາດຢູ່ຈີນໃຫ້ໄດ້ຮັບຄວາມຄືບໜ້າຢ່າງຕັ້ງໜ້າເທົ່ານັ້ນ, ຍັງຈະຊຸກຍູ້ໃຫ້ໂລກເອົາຊະນະພະຍາດໄດ້ຢ່າງສຳເລັດຜົນ, ແລະສ້າງປະຊາຄົມສາທາລະນະສຸກຂອງມວນມະນຸດ.
ຄຳເຫັນ
0