ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ງານວາງສະແດງສິນຄ້ານຳເຂົ້າສາກົນຈີນຄັ້ງທີ 3 ໄດ້ຈັດຂຶ້ນຢູ່ສູນວາງສະແດງແຫ່ງຊາດຊຽງໄຮແຕ່ວັນທີ 4 ຫາວັນທີ 10 ພະຈິກນີ້. ມີວິສາຫະກິດ 3000 ກວ່າແຫ່ງທີ່ມາຈາກ 130 ກວ່າປະເທດແລະເຂດແຄວ້ນໄດ້ເຂົ້າຮ່ວມງານວາງສະແດງ, ໃນນັ້ນລວມທັງມີວິສາຫະກິດ 240 ແຫ່ງທີ່ນອນຢູ່ໃນຈຳນວນ 500 ວິສາຫະກິດຊັ້ນນຳຂອງໂລກ. ປັດຈຸບັນງານວາງສະແດງສິນຄ້ານຳເຂົ້າສາກົນຈີນທີ່ໄດ້ຈັດຂຶ້ນເປັນຄັ້ງທີ 3 ແລະໄດ້ກາຍເປັນເວທີດີທີ່ສຸດທີ່ບໍລິສັດຂ້າມຊາດທີ່ມີຊື່ສຽງໃນໂລກໄດ້ນຳສະເໜີຜະລິດຕະພັນຂອງຕົນ. ເປັນຫຍັງວິສາຫະກິດຕ່າງປະເທດແລະວິສາຫະກິດທຶນຕ່າງປະເທດຈຶ່ງເອົາໃຈໃສ່ງານວາງສະແດງສິນຄ້ານຳເຂົ້າສາກົນຈີນຄັ້ງນີ້ຫຼາຍປານນີ້? ມີສາເຫດຕົ້ນຕໍ 3 ຢ່າງຄື:
ໜຶ່ງ, ຕະຫຼາດຈີນແມ່ນຕະຫຼາດໃຫຍ່ແລະແມ່ນຕະຫຼາດທີ່ມີກຳລັງບົ່ມຊ້ອນຢ່າງມະຫາສານ, ແລະມີອະນາຄົດທີ່ດີງາມ. ໃນຖານະເປັນກຸ່ມເສດຖະກິດໃຫຍ່ອັນດັບທີ 2 ຂອງໂລກແລະເປັນປະເທດທີ່ມີລະດັບການບໍລິໂພກຫຼາຍສຸດໃນໂລກ, ຕະຫຼາດໃຫຍ່ທີ່ມີປະຊາກອນ 1,4 ຕື້ຄົນຂອງປະເທດຈີນຈຶ່ງໄດ້ຮັບຄວາມສົນໃຈໃນລະດັບສູງຈາກວິສາຫະກິດຕ່າງໆໃນໂລກ.
ສອງ, ຈີນໄດ້ປະຕິບັດມາດຕະການຢ່າງຈິງຈັງເພື່ອຊຸກຍູ້ຍຸດທະສາດການເປີດປະຕູສູ່ພາຍນອກ. ໃນ “ແຜນພັດທະນາເສດຖະກິດສັງຄົມແຫ່ງຊາດໄລຍະ 5 ປີຄັ້ງທີ 14”, ລັດຖະບານຈີນໄດ້ສະເໜີວ່າ: ຄວນ “ຍຶດໝັ້ນການດຳເນີນງານໃນການເປີດປະຕູສູ່ພາຍນອກທີ່ມີຂອບເຂດກວ້າງຂວາງກວ່າເກົ່າ, ມີຂົງເຂດຫຼາຍກວ່າເກົ່າແລະມີລະດັບເລິກເຊິ່ງກວ່າເກົ່າ, ເພື່ອສ້າງລະບົບເສດຖະກິດໃໝ່ທີ່ມີລະດັບເປີດປະຕູສູ່ພາຍນອກສູງກວ່າເກົ່າ, ແລະຍົກສູງລະດັບເປີດປະຕູສູ່ພາຍນອກຢ່າງຮອບດ້ານ.”
ສາມ, ການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ແລະການພັດທະນາເສດຖະກິດຂອງຈີນໄດ້ຮັບໝາກຜົນທີ່ພົ້ນເດັ່ນ. ປັດຈຸບັນພະຍາດໂຄວິດ-19 ພວມແຜ່ລະບາດໃນທົ່ວໂລກ, ປະເທດຈີນແມ່ນປະເທດທຳອິດທີ່ສາມາດຄວບຄຸມການແຜ່ລະບາດຂອງພະຍາດໂຄວິດ-19ໄດ້ແລະສາມາດຟື້ນຟູການຜະລິດແລະຊີວິດການເປັນຢູ່ຂອງປະຊາຊົນໃຫ້ຄືນສູ່ສະພາບປົກກະຕິ. ພາຍໃຕ້ສະພາບການທີ່ເສດຖະກິດໂລກຊຸດໂຊມລົງແລະຂາດພະລັງແຮງໃນການຟື້ນຟູຄືນໃໝ່, ປະເທດຈີນທີ່ເປີດປະຕູສູ່ພາຍນອກ, ກວມລວມ, ມີຄວາມປອດໄພແລະມີສະຖຽນລະພາບຈຶ່ງແມ່ນສະຖານທີ່ດີທີ່ສຸດສຳລັບທຶນຕ່າງປະເທດ.
ການທີ່ຈັດງານວາງສະແດງສິນຄ້ານຳເຂົ້າສາກົນຈີນຄັ້ງນີ້ຢ່າງສຳເລັດຜົນໄດ້ສະແດງໃຫ້ເຫັນວ່າ: ການພັດທະນາຂອງໂລກບໍ່ສາມາດຕັດແຍກອອກຈາກປະເທດຈີນໄດ້. ປັດຈຸບັນ, ຈີນໄດ້ກາຍເປັນເສົາຄ້ຳສຳຄັນໃນການຊຸກຍູ້ໃຫ້ເສດຖະກິດໂລກໃຫ້ເຕີບໂຕ. ສ່ວນວິສາຫະກິດຕ່າງປະເທດກໍໃຫ້ຄວາມສຳຄັນຢ່າງສູງຕໍ່ງານສະແດງສິນຄ້ານຳເຂົ້າສາກົນຈີນ, ເຊິ່ງສະແດງໃຫ້ເຫັນວ່າງານວາງສະແດງດັ່ງກ່າວໄດ້ກາຍເປັນເວທີສຳຄັນທີ່ຊຸກຍູ້ການແລກປ່ຽນແລະຮ່ວມມືດ້ານເສດຖະກິດການຄ້າສາກົນ, ແລະໄດ້ກາຍເປັນຂົວຕໍ່ທີ່ສຳຄັນໃນການພົວພັນກັນລະຫວ່າງຈີນກັບໂລກ.
ຄຳເຫັນ
0