ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 27 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ກ່າວຄຳ ປາໄສໃນພິທີເປີດງານວາງສະແດງສິນຄ້າຈີນ-ອາຊຽນ ແລະກອງປະຊຸມ ສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 17. ນອກຈາກນີ້, ທ່ານທອງລຸນ ສີສຸລິດ ນາຍົກລັດຖະມົນຕີລາວ, ທ່ານຮຸນແຊນ ນາຍົກລັດຖະມົນຕີກຳປູເຈຍ, ທ່ານໂຈໂຄ ວິໂດໂດ ປະທານາທິ ບໍດີອິນໂດເນເຊຍ, ທ່ານອູວິນມິນ ປະທານາທິບໍດີມຽນມາ, ທ່ານ ດູເຕີເຕ ປະທານາທິບໍດີຟິລິບປິນ ແລະຜູ້ນຳຂອງປະເທດອາຊຽນທ່ານອື່ນໆໄດ້ກ່າວຄຳປາໄສຜ່ານທາງວິດີໂອ.
ງານວາງສະແດງສິນຄ້າຄັ້ງນີ້ໄດ້ຈັດຂຶ້ນໃນຮູບແບບທັງອ໋ອນລາຍ ແລະ ອັອຟລາຍ. ໃນນັ້ນ, ຕາມແຜນການ,ເນື້ອທີ່ການວາງສະແດງກັບທີ່ຫຼືອັອຟລາຍມີ 104.000 ຕາແມັດ, ມີຫ້ອງວາງສະແດງ 5400 ຫ້ອງ ແລະມີວິສາຫະກິດທີ່ເຂົ້າຮ່ວມງານຜ່ານທາງອ໋ອນລາຍຫຼາຍກວ່າ 1500 ແຫ່ງ.
ປະເທດລາວເປັນປະເທດກິຕິມະສັກໃນງານວາງສະແດງປີນີ້
ປີມານີ້, ສົມເປັນ “ທົດສະວັດຄຳ” ສຳລັບການພົວພັນດ້ານເສດຖະກິດການຄ້າຂອງສອງຝ່າຍ. ໃນ 3 ໄຕມາດຂອງປີນີ້, ມູນຄ່າການຄ້າລະຫວ່າງຈີນກັບອາຊຽນບັນລຸເຖິງ 481,8 ຕື້ໂດລາສະຫະລັດ, ເພີ່ມຂຶ້ນຫຼາຍກວ່າໄລຍະດຽວກັນຂອງປີກາຍ 5% ເຊິ່ງເຮັດໃຫ້ອາຊຽນກາຍເປັນຄູ່ການຄ້າໃຫຍ່ທີ່ສຸດຂອງຈີນເປັນຄັ້ງທຳອິດ.
ໃນເວລາກ່າວຄຳປາໄສໃນພິທີເປີດງານວາງສະແດງສິນຄ້າຈີນ-ອາຊຽນຄັ້ງນີ້, ທ່ານສີຈິ້ນຜິງກ່າວວ່າ, ໃນ 7 ປີຜ່ານມາ, ການພົວພັນຈີນ-ອາຊຽນໄດ້ກາຍເປັນແບບຢ່າງທີ່ປະສົບຜົນສຳເລັດຫຼາຍກວ່າໝູ່ແລະມີຊີວິດຊີວາຫຼາຍກວ່າໝູ່ໃນການຮ່ວມມື ຂອງພາກພື້ນອາຊີປາຊີຟິກ ແລະກາຍເປັນແບບຢ່າງທີ່ມີຊີວີດຊີວາໃນການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ. ທ່ານກ່າວວ່າ: ຈີນຍິນດີຮ່ວມກັບອາຊຽນ, ສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ.
ປີນີ້, ເມື່ອຜະເຊີນໜ້າກັບການແຜ່ລະບາດຂອງພະຍາດໂຄວິດ-19ທີ່ເກີດຂຶ້ນຢ່າງກະທັນຫັນ, ຈີນ ແລະ ອາຊຽນໄດ້ຊ່ວຍເຫຼືອເຊິ່ງກັນແລະກັນ, ຮ່ວມກັນຜ່ານຜ່າຄວາມຫຍຸ້ງຍາກ, ເຊິ່ງເປັນຕົວຢ່າງທີ່ມີຊີວິດຊີວາໃນການສ້າງປະຊາຄົມຮ່ວມຊາຕາກຳຈີນ-ອາຊຽນ.
ຫົວຂໍ້ຫຼັກຂອງງານວາງສະແດງສິນຄ້າຈີນ-ອາຊຽນຄັ້ງນີ້ແມ່ນ “ຮ່ວມກັນສ້າງ ໜຶ່ງແລວໜຶ່ງເສັ້ນທາງ, ຮ່ວມກັນພັດທະນາເສດຖະກິດດິຈີຕອນ”. ໃນການກ່າວຄຳປາໄສເມື່ອວັນທີ 27 ພະຈິກປີ 2020ນີ້, ທ່ານສີຈິ້ນຜິງໄດ້ສະເໜີຂໍ້ລິເລີ່ມ 4 ຂໍ້, ໃນນັ້ນ ມີເນື້ອໃນວ່າ: ເພີ່ມຄວາມໄວ້ເນື້ອເຊື່ອໃຈກັນດ້ານຍຸດທະສາດ,ລົງເລິກການເຊື່ອມໂຍງແຜນແມ່ບົດການພັດທະນາ; ຍົກລະດັບການປະດິດສ້າງໃໝ່ດ້ານວິທະຍາສາດເຕັກນິກ, ລົງເລິກການຮ່ວມມືເສດຖະກິດດິຈີຕອນ.
ປີນີ້ແມ່ນປີຮ່ວມມືເສດຖະກິດດິຈີຕອນຈີນ-ອາຊຽນ. ໃນການກ່າວຄຳປາໄສເມື່ອວັນທີ 27 ພະຈິກປີ 2020ນີ້, ທ່ານສີຈິ້ນຜິງກ່າວວ່າ: ຈີນຍິນດີຮ່ວມມືກັບບັນດາປະເທດອາຊຽນ, ກຳແໜ້ນໂອກາດຂອງການປະຕິວັດວິທະຍາສາດເຕັກນິກ ແລະ ການປ່ຽນຮູບແບບອຸດສາຫະກຳຮອບໃໝ່, ຊຸກຍູ້ການເຊື່ອມໂຍງເຊື່ອມຈອດກັນດ້ານດິຈີຕອນ, ສ້າງ “ເສັ້ນທາງສາຍໄໝດິຈີຕອນ”
ກ່ຽວກັບການທີ່ຈະເຮັດແນວໃດເພື່ອສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ ແລະສ້າງ “ທົດສະວັດຄຳ”ໃນຄັ້ງຕໍ່ໄປ? ທ່ານສີຈິ້ນຜິງຍັງມີຂໍ້ສະເໜີລິເລີ່ມໃຫ້ຍົກລະດັບການຮ່ວມມືດ້ານເສດຖະກິດການຄ້າ, ເລັ່ງລັດການຟື້ນຟູເສດຖະກິດພາກພື້ນຢ່າງຮອບດ້ານ, ຍົກລະດັບການຮ່ວມມືຕ້ານກັບພະຍາດ, ເສີມສ້າງຄວາມສາມາດດ້ານສາທາລະນະສຸກ.
ໃນເວລາກ່າວຄຳປາໄສ, ທ່ານສີຈິ້ນຜິງຍັງກ່າວຕື່ມວ່າ: ຈີນຍິນດີເພີ່ມທະວີການປະສານງານກັບບັນດາປະເທດອາຊຽນ, ໂດຍຖືເອົາເຂດການຄ້າເສລີຈີນ-ອາຊຽນສ້າງຕັ້ງຂຶ້ນຄົບຮອບ10ປີເປັນໂອກາດທີ່ດີເພື່ອຈັດຕັ້ງປະຕິບັດສັນຍາການຄ້າເສລີຈີນ-ອາຊຽນໃຫ້ມີປະສິດທິຜົນ. ຈີນສະແດງຄວາມຊົມເຊີຍຕໍ່ຜົນສຳເລັດໃນການເຊັນສັນຍາກ່ຽວກັບການພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນຫຼືRCEP ແລະຫວັງວ່າສັນຍານີ້ຈະເກີດມີຜົນສັກສິດໂດຍໄວ.
ທ່ານສີຈິ້ນຜິງຢືນຢັນວ່າ ຈີນຈະເປີດກວ້າງການເປີດປະຕູສູ່ພາຍນອກຢ່າງເດັດດ່ຽວໜຽວແໜ້ນ, ເພີ່ມທະວີການຊຸກຍູ້ໃຫ້ເສດຖະກິດພາຍໃນແລະເສດຖະກິດສາກົນຊ່ວຍຊູຍູ້ໜູນກັນ, ເພື່ອເຮັດໃຫ້ການຟື້ນຟູເສດຖະກິດຂອງປະເທດຕົນຊຸກຍູ້ໃຫ້ເສດຖະກິດໂລກຟື້ນຄືນໃໝ່ຮ່ວມກັນ. ຈາກນີ້ ຈະເຮັດໃຫ້ບັນດາປະເທດໃນໂລກເຊິ່ງລວມທັງປະເທດອາຊຽນລ້ວນແຕ່ຈະໄດ້ຮັບຜົນປະໂຫຍດ. ເມື່ອມຸ້ງໜ້າສູ່ອະນາຄົດ, ຊ່ອງທາງການຮ່ວມມືລະຫວ່າງຈີນ-ອາຊຽນຈະກວ້າງຂວາງກວ່າເກົ່າ.
ຄຳເຫັນ
0