ກອງ​ປະ​ຊຸມ​ສຸດຍອດ​ກຸ່ມG20ຄັ້ງ​ທີ 15 ທີ່​ເປັນ​ກອງ​ປະ​ຊຸມ​ສາ​ກົນ​ຄັ້ງສຳ​ຄັນ​ຄັ້ງ​ທີ 4 ​ທີ່​ໄດ້​ຈັດ​ຂຶ້ນ​ໃນ​ເດືອນ​ພະ​ຈິກ​ປີ​ນີ້ ໄດ້​ເລີ່ມ​ໄຂ​ຂຶ້ນ​ໃນ​ຕອນ​ຄ່ຳ​ວັນ​ທີ 21 ພາ​ຈິກ​ປີ​ນີ້. ທ່ານ​ສີ​ຈິ້ນ​ຜິງ ປະ​ທານ​ປະ​ເທດ​ຈີນ​ໄດ້​ເຂົ້າ​ຮ່ວມກອ​ງ​ປະ​ຊຸມ​ໄລ​ຍະ​ທີ 1 ດ້ວຍ​ຮູບ​ແບບ​ຜ່ານ​ວີ​ດີ​ໂອ ທັງ​ໄດ້​ກ່າວ​ຄຳ​ປາ​ໄສ​ສຳ​ຄັນ, ໂດຍ​ສະ​ເໜີ​ຈຸດ​ຢືນ​ຂອງ​ຈີນ​ຢ່າງ​ຈະ​ແຈ້ງ​ກ່ຽວ​ກັບການ​ໃຫ້ກຸ່ມG20ເສີມ​ຂະ​ຫຍາຍ​ບົດ​ບາດ​ນຳ​ໜ້າຫຼາຍກວ່າ​ເກົ່າ​ໃນ​ການ​ບໍ​ລິ​ຫານ​ໂລກ​ພາຍຫຼັງ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19.

 

ປີ 2008, ກອ​ງ​ປະ​ຊຸມ​ສຸດຍອດG20ຄັ້ງ​ທຳ​ອິດ, ​ໄດ້​ມີ​ພາ​ລະ​ກຳ​​ເພື່ອ​ກອບ​ກູ້​ເສດ​ຖະ​ກິດ​ໂລກ​ຈາກວິ​ກິດ​ການ​​ທາງ​ດ້ານການ​ເງິນ​ສາ​ກົນ​ທີ່​ຮ້າຍ​ແຮງ​ທີ່​ສຸດ​ໃນ​ຮອບ ຮ້ອຍ​ປີ​ຜ່ານ​ມາ.

 

ໃນ​ເດືອນ​ພະ​ຈິກ​ປີ​ນີ້, ກໍໄດ້​ຈັດ​ກອ​ງ​ປະ​ຊຸມ​ສຸດຍອດG20 ຄັ້ງ​ທີ 15, ​ ​ທ່າມ​ກາງກັບວິ​ກິດ​ການ​ທີ່​ຮ້າຍ​ແຮງ​ກວ່າ​ເກົ່າ. ໃນ​ການ​ກ່າວ​ຄຳ​ປາ​ໄສ​ເມື່ອ​ວັນ​ທີ 21 ພະ​ຈິກ​2020ນີ້, ທ່ານ​ສີ​ຈິ້ນ​ຜິງ​ກ່າວ​ວ່າ: “ໃນ 1 ປີ​ທີ່​ໃກ້​ຈະ​ຜ່ານພົ້ນ​ໄປ, ມວນ​ມະ​ນຸດ​ໄດ້​ປະ​ສົບ​ການ​ແຜ່​ລະ​ບາດ​ຂອງ​ພະ​ຍາດ​ຕິດ​ແປດ​ທີ່​ໜັກ​ໜ່ວງ​ທີ່​ສຸດ​ໃນ​ຮອບ​ຮ້ອ​ຍ​ປີ​ຜ່ານ​ມາ, ຫຼາຍກວ່າ 1 ລ້ານ​ຄົນ​ເສຍ​ຊີ​ວິດ, ເສດ​ຖະ​ກິດ​ໂລກ​ຊຸດ​ໂຊມ​ລົງ,ຊີ​ວິດ​ການ​ເປັນ​ຢູ່ ແລະ ສັງ​ຄົມ​ໄດ້​ຮັບ​ຜົນ​ກະ​ທົບ​ຢ່າງ​ໜັກ​ໜ່ວງ, ເຊິ່ງ​ຜົນ​ກະ​ທົບ​ຍັງ​ຮ້າຍ​ແຮງກວ່າວິ​ກິດ​ການ​ດ້ານ​ການ​ເງິນ​ສາ​ກົນ​ໃນ​ປີ 2008.”

 

ເພື່ອ​ຮັບ​ມື​ກັບ​ສິ່ງ​ທ້າ​ທາຍ​ແບບ​ບໍ່​ເຄີຍ​ມີ​ມາ​ກ່ອນ, ວັນ​ທີ 26 ມີ​ນາ​ປີ 2020, ກຸ່ມG20 ໄດ້​ຈັດ​ກອງ​ປະ​ຊຸມ​ສຸດຍອດ​ສະ​ໄໝ​ພິ​ເສດ​ຄັ້ງ​ທຳ​ອິດ​ໃນ​ປະ​ຫວັດ​ສາດ. ທ່ານ​ສີ​ຈິ້ນ​ຜິງ​ໄດ້​ກ່າວ​ຄຳ​ປາ​ໄສ​ໃນ​ຫົວ​ຂໍ້​ “ຮ່ວມ​ມືກັນ​ຕ້ານ​ກັບ​ພະ​ຍາດ ຮ່ວມ​ກັນ​ຜ່ານ​ຜ່າ​ຄວາມ​ຫຍຸ້ງ​ຍາກ”. ເຊິ່ງກອງ​ປະ​ຊຸມ​ຄັ້ງ​ນີ້​ໄດ້​ສ້າງ​ຄວາມ​ໝັ້ນ​ໃຈ​ໃຫ້​ແກ່​ໂລກ, ທັງ​ໄດ້​ຊີ້​ແຈງ​ທິດ​ທາງ​ໃຫ້​ແກ່​ການ​ຮ່ວ​ມ​ມື​ຕ້ານ​ກັບ​ພະ​ຍາດ​ຂອງ​ໂລກ.

 

ຫຼັງ​ຈາກ​ນັ້ນ​ປະ​ມານ 8 ເດືອນ, ກອ​ງ​ປະ​ຊຸມ​ສຸດຍອດG20 ຄັ້ງ​ທີ 15ກໍໄດ້​ຈັດ​ຂຶ້ນ​ຜ່ານ​ຮູ​ບ​ແບບ​ວີ​ດີ​ໂອ, ທ່ານ​ສີ​ຈິ້ນ​ຜິງ​ທີ່​ໄດ້​ເຂົ້າ​ຮ່ວມກອງ​ປະ​ຊຸມ​ສຸ​ດຍອດG20 ມາ​ເປັນ 8 ປີ​ລຽນ​ຕິດ​ໄດ້​ກ່າວ​ຄຳ​ປາ​ໄສ​ໃນ​ຫົວ​ຂໍ້ “ຮ່ວມ​ແຮງ​ຮ່ວມ​ໃຈ​ກັນ​ຕ້ານ​ກັບ​ພະ​ຍາດ ຮ່ວມ​ກັນ​ສ້າງ​ອະ​ນາ​ຄົດ” ໃນ​ກອງ​ປະ​ຊຸມ​ໄລ​ຍະ​ທີ1 ຂອງກອງ​ປະ​ຊຸມ​ດັ່ງ​ກ່າວ, ​ທ່ານ​ໄດ້​ສະ​ເໜີ​ແຜນ​ການ​ດຳ​ເນີນ​ງານ​​ເພື່ອ​ຕ້ານ​ກັບ​ພະ​ຍາດ ຮັກ​ສາ​ຄວາມ​ໝັ້ນ​ທ່ຽງ​ດ້ານ​ເສດ​ຖະ​ກິດ ແລະ ຮັກ​ສາ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ, ທັງ​ຮຽກ​ຮ້ອງ​ໃຫ້G20ຈົ່ງ​ເສີມ​ຂະ​ຫຍາຍ​ບົດ​ບາດ​ນຳ​ໜ້າຫຼາຍກວ່າ​ເກົ່າ​ໃນ​ການ​ບໍ​ລິ​ຫານ​ໂລກ.

 

ໃນ​ຂະ​ນະ​ທີ່​ປ້ອງ​ກັນ​ແລະ ຄວບ​ຄຸມ​ພະ​ຍາດ​ຢ່າງ​ເປັນ​ປົກ​ກະ​ຕິ​ນັ້ນ, ຍັງ​ຕ້ອງ​ພະ​ຍາ​ຍາມ​ຣັກ​ສາ​ຄວາມ​ໝັ້ນ​ທ່ຽງ ແລະ ການຟື້ນ​ຟູ​ເສດ​ຖະ​ກິດ, ນີ້​ແມ່ນ​ວຽກ​ງານ​ຮີບ​ດ່ວນ​ໃນ​ປະ​ຈຸ​ບັນ. ໃນ​ການ​ກ່າວ​ຄຳ​ປາ​ໄສ​ໃນຕອນ​ຄ່ຳ​ວັນ​ທີ 21 ພະ​ຈິກ ປີ2020, ທ່ານ​ສີ​ຈິ້ນ​ຜິງ​ໄດ້​ສະ​ເໜີ​ໃຫ້​ກຸ່ມG20ສຸມ​ຄວາມ​ພະ​ຍາ​ຍາມ​ຕື່ມ​ອີກ​ໃນ​ການ​ປະ​ຕິ​ບັດ​ງານ​ໃນ 4 ດ້ານ.

 

ໜຶ່ງ, ສ້າງ​ກຳ​ແພງ​ຕ້ານ​ພະ​ຍາດ​ຂອງ​​ໂລກ. ໃນ​ບັນ​ຫາ​ນີ້, ທ່ານ​ສີ​ຈິ້ນ​ຜິງ​ໄດ້​ກ່າວ​ເຖິງວັກ​ຊີນ​ເປັນ​ພິ​ເສດ. ໃນ​ເດືອນ​ພຶດ​ສະ​ພາ​ປີ 2020 ນີ້, ໃນ​ເວ​ລາ​ທີ່​ປະ​ກອບ​ຄຳ​ເຫັນ​ໃນ​ພິ​ທີ​ເປີດກອງ​ປະ​ຊຸມ​ອະ​ນາ​ໄມ​ໂລກ​ຄັ້ງ​ທີ 73 ຜ່ານ​ທາງວີ​ດີ​ໂອ, ທ່ານ​ສີ​ຈິ້ນ​ຜິງ​ໄດ້ໃຫ້​ຄຳ​ໝັ້ນ​ສັນ​ຍາ​ວ່າ: ຫຼັງ​ຈາກ​ຈີນ​ສຳ​ເລັດ​ການ​ຄົ້ນ​ຄວ້າ ແລະ ຜະ​ລິດ​ວັ​ກ ຊີນ​ຕ້ານ​ເຊື້ອ​ພະ​ຍາດ​ໂຄວິດ-19ແລ້ວ, ຈະ​ໃຫ້​ວັກ​ຊີນ​ເປັນ​ຜະ​ລິດ​ຕະ​ພັນ​ສາ​ທາ​ລະ​ນະ​ຂອງ​ໂລກ. ໃນ​ການ​ກ່າວ​ຄຳ​ປາ​ໄສ​ເມື່ອ​ວັນ​ທີ 21 ພະ​ຈິກ ປີ 2020ນີ້, ທ່ານ​ສີ​ຈິ້ນ​ຜິງ​ກ່າວ​ວ່າ, ຈີນ​ຈະ​ປະ​ຕິ​ບັດ​ຕາມ​ຄຳ​ໝັ້ນ​ສັນ​ຍາ, ໃຫ້​ການ​ຊ່ວຍ​ເຫຼືອ ແລະ ການ​ສະ​ໜັບ​ສະ​ໜູນ​ແກ່​ປະ​ເທດ​ພວມ​ພັດ​ທະ​ນາ​ອື່ນໆ, ພະ​ຍາ​ຍາມ​ເຮັດ​ໃຫ້​ວັກ​ຊີນ​ກາຍ​ເປັນ​ຜະ​ລິດ​ຕະ​ພັນ​ສາ​ທາ​ລະ​ນະ​ທີ່​ປະ​ຊາ​ຊົນ​ບັນ​ດາ​ປະ​ເທດສາ​ມາດ​ເຂົ້າ​ເຖິງ ແລະ ສາ​ມາດ​ຊື້ໄດ້.

 

ສອງ, ຮັບ​ປະ​ກັນ​ໃຫ້ເສດ​ຖະ​ກິດ​ໂລກ​ເຄື່ອນ​ໄຫວ​ໄດ້​ຢ່າງ​ໂລ່ງ​ລຽນ​ດີ. ທ່ານ​ສີ​ຈິ້ນ​ຜິງ​ກ່າວ​ເນັ້ນ​ວ່າ, ​ບົນ​ພື້ນ​ຖານ​​ການ​ປ້ອງ​ກັນ ແລະ​ຄວບ​ຄຸມ​ພະ​ຍາດ​ໃຫ້​ດີ​ນັ້ນ, ​ຕ້ອງ​ໃຫ້​ການຟື້ນ​ຟູ​ການ​ເຄື່ອນ​ໄຫວ​ຂອງ​ຕ່ອງ​ໂສ້​ອຸດ​ສາ​ຫະ​ກຳ ແລະ ຕ່ອງ​ໂສ້​ການ​ສະ​ໜອງ​ຂອງ​ໂລກ​ມີ​ຄວາມ​ສະ​ດວກ ແລະ ປອດ​ໄພ, ສ້າງ “​ຊ່ອງ​ທາງ​ດ່ວນ”, ອຳ​ນວຍ​ຄວາມ​ສະ​ດວກ​ໃຫ້​ແກ່​ການ​ໄປ​ມາ​ຫາ​ສູ່​ກັນ​ຂອງ​ບຸກ​ຄະ​ລາ​ກອນ​ຢ່າງ​ເປັນ​ລະ​ບຽບ. ໃນ​ກອງ​ປະ​ຊຸມ​ບໍ່​ເປັນ​ທາງ​ການ​ຂອງຜູ້​ນຳ​ອົງ​ການ​ເອ​ເປັກ​ຄັ້ງ​ທີ 27​ທີ່​ຈັດ​ຂຶ້ນ​ໃນ​ວັນ​ທີ 20 ພະ​ຈິກ 2020, ທ່ານ​ສີ​ຈິ້ນ​ຜິງ​ໄດ້ສະ​ເໜີ​ອອກວ່າ, ພວກ​ເຮົາ​ຄວນ​ຊຸກ​ຍູ້​ການ​ຮັບ​ຮອງ​QR CODE​ສຸ​ຂະ​ພາບ​ດ້ານ​ການ​ປ້ອງ​ກັນ​ພະ​ຍາດ​ສາ​ກົນ​ນຳ​ກັນ. ຕອນ​ຄ່ຳ​ວັນ​ທີ 21 ພະ​ຈິກ ປີ 2020, ທ່ານ​ກ່າວ​ຕື່ມວ່າ, ຈີນ​ສະ​ເໜີ​ກົນ​ໄກ​ຮັບ​ຮອງQR CODE​ສຸ​ຂະ​ພາບ​ສາ​ກົນ​ນຳ​ກັນ ໂດຍ​ອີງ​ຕາມ​ຜົນ​ກວດ​ນິວ​ຄະ​ເລ​ອິກ ແລະ ​ຜ່ານQR CODE ສາ​ກົນ​ຮ່ວມ​ກັນ,​ຫວັງ​ວ່າ​ຈະ​ມີຫຼາຍ​ປະ​ເທດກວ່າ​ເກົ່າ​ເຂົ້າ​ຮ່ວມ. ນີ້​ແມ່ນ​ວິ​ທີ​ທີ່​ດີ​ໃນ​ການ​ເຄື່ອນ​ໄຫວ​ທີ່​ສະ​ດວກ​ດ້ວຍ​ວິ​ທະ​ຍາ​ສາດ.

 

ສາມ, ເສີມ​ຂະ​ຫຍາຍ​ບົດ​ບາດຂອງ​ເສດ​ຖະ​ກິດ​ດິ​ຈີ​ຕອນ. ການ​ແຜ່​ລະ​ບາດ​ຂອງ​ພະ​ຍາດ​ແມ່ນ​ວິ​ກິດ​ການ ທັງ​ເປັນ​ກາ​ລະ​ໂອ​ກາດ, ສິ່ງ​ສຳ​ຄັນ​ຄື​ຄວນ​ປັບ​ຕົວ​ຕໍ່​ການ​ປ່ຽນ​ແປງ​ຢ່າງ​ເປັນ​ເຈົ້າ​ການ ແລະ ຫັນ​ວິ​ກິດ​ເປັນ​ໂອ​ກາດ. ທ່ານ​ສີ​ຈິ້ນ​ຜິງ​ຊີ້​ອອກວ່າ, ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ໄດ້​ກະ​ຕຸກ​ຊຸກ​ຍູ້​ການ​ພັດ​ທະ​ນາ​ເຕັກ​ນິກ​ໃໝ່ ຮູບ​ແບບ​ທຸ​ລະ​ກິດ​ໃໝ່ ແລະ ເວ​ທີ​ໃໝ່, “ເສດ​ຖະ​ກິດ​ແບບ​ບໍ່​ຕ້ອງ​ສຳ​ຜັດ” ໄດ້​ພັ​ດ​ທະ​ນາ​ໄວ​ຂຶ້ນ​ຢ່າງ​ຮອບ​ດ້ານ, ເຊິ່ງ​ເປັນ​ຊ່ອງ​ທາງ​ໃໝ່​ໃຫ້​ແກ່​ການ​ພັດ​ທະ​ນາ​​ເສດ​ຖະ​ກິດ. ທ່ານ​ຍັງ​ກ່າວ​ເນັ້ນ​ເປັນ​ພິ​ເສດ​ວ່າ, ຄວນ​ສ້າງ​ສະ​ພາບ​ແວດ​ລ້ອມ​ແຫ່ງ​ການ​ແຂ່ງ​ຂັນ​ແບບ​ຍຸດ​ຕິ​ທຳ​ໃຫ້​ແກ່​ວິ​ສາ​ຫະ​ກິດ​ວິ​ທະ​ຍາ​ສາດ​ເຕັກ​ນິກ​ຂອງ​ບັ​ນ​ດາ​ປະ​ເທດ.

 

ສີ່, ບັນ​ລຸ​ການ​ພັດ​ທະ​ນາ​ທີ່​ມີ​ລັກ​ສະ​ນະ​ກວມ​ລວມກວ່າ​ເກົ່າ. ໃນ​ກອງ​ປະ​ຊຸມ​ສຸດຍອດ​ພິ​ເສດ​ຂອງ​ກຸ່ມG20 ທີ່​ຈັດ​ຂຶ້ນ​ໃນ​ເດືອນ​ມີ​ນາ​ປີ​ນີ້ໄດ້​ສະ​ເໜີ​ອອກວ່າ, ຄວນຫຼຸດ​ຜ່ອນພາ​ລະ​ໜີ້​ສິນ​ໃຫ້​ແກ່​ປະ​ເທດ​ພວມ​ພັດ​ທະ​ນາ. ຜູ້​ຮັບ​ຜິດ​ຊອບກະ​ຊວງ​ການ​ເງິນ​ຈີນ​​ໄດ້ໃຫ້​ຮູ້​ວ່າ: ຈີນ​ແມ່ນ​ປະ​ເທດ​ທີ່​ຈັດ​ຕັ້ງ​ປະ​ຕິ​ບັດ​ນະ​ໂຍ​ບາຍ​ເລື່ອນ​ເວ​ລາ​ຊຳ​ລະ​ໜີ້​ສິນ​ເປັນ​ມູນ​ຄ່າຫຼາຍ​ທີ່​ສຸດ​ໃນ​ບັນ​ດາ​ສະ​ມາ​ຊິກ​ກຸ່ມG20. ໃນ​ການ​ກ່າວ​ຄຳ​ປາ​ໄສ​ເມື່ອ​ຕອນ​ຄ່ຳ​ວັນ​ທີ 21 ພະ​ຈິກ​ປີ 2020, ທ່ານ​ສີ​ຈິ້ນ​ຜິງ​ກ່າວ​ວ່າ, ຈີນ​ໄດ້​ສະ​ໜັບ​ສະ​ໜູນ​ຂໍ້​ຕົກ​ລົງ​ທີ່​ແກ່​ຍາວ​ເວ​ລາ​ກຳ​ນົດ​ຂອງ​ຂໍ້​ລິ​ເລີ່ມ​ເລື່ອ​ນ​ເວ​ລາ​ຊຳ​ລະ​ໜີ້, ​ແລະຈະ​ສືບ​ຕໍ່​ຮ່ວມ​ກັບ​ບັນ​ດາ​ຝ່າຍ​ຈັດ​ຕັ້ງ​ປະ​ຕິ​ບັດ​ຢ່າງ​ສຸດ​ຄວາມ​ສາ​ມາດ.

 

ນອກ​ຈາກ​ນີ້, ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ແມ່ນ​ສິ່ງ​ທ້າ​ທາຍ​ທີ່​ໜັກ​ໜ່ວງ, ທັງ​ໄດ້​ເຜີຍ​ແບ​ໃຫ້​ເຫັນ​ເຖິງ​ຈຸ​ດ​ອ່ອນ​ໃນ​ການ​ບໍ​ລິ​ຫານ​ໂລກ. ທ່ານ​ສີ​ຈິ້ນ​ຜິງ​ໄດ້​ກ່າວ​ເນັ້ນ​ວ່າ, ກຸ່ມG20 ຄວນ​ເສີມ​ຂະ​ຫຍາຍ​ບົດ​ບາດ​ນຳ​ໜ້າຫຼາຍກວ່າ​ເກົ່າ​ໃນ​ດ້ານ​ລະ​ບຽບ​ການ​ສາ​ກົນ ແລະ ບໍ​ລິ​ຫານ​ໂລກ​ໃນ​ຍຸກ ຫຼັງ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19. ວັນ​ທີ 3 ກັນ​ຍາ ປີ 2016, ໃນ​ພິ​ທີ​ເປີດກອງ​ປະ​ຊຸມ​ສຸດຍອດ​ອຸດ​ສາ​ຫະ​ກຳ​ການ​ຄ້າG20ທີ່​ຈັດ​ຂຶ້ນ​ຢູ່​ນະ​ຄອນ​ຮາງ​ໂຈ່ສ​ປ​ຈີນ, ທ່ານ​ສີ​ຈິ້ນ​ຜິງ​ກ່າວ​ວ່າ: “ພວກ​ເຮົາ​ຫວັງ​ຢາກ​ສົ່ງ​ສັນ​ຍານ​ຕໍ່​ປະ​ຊາ​ຄົມ​ໂລກ ຄື: ກຸ່ມG20ບໍ່​ພຽງ​ແຕ່​ເປັນ​ຂອງ 20​ປະ​ເທດ ສະ​ມາ​ຊິກ, ​ແຕ່ກໍ​ເປັນ​ຂອງ​ໂລກ​ເຊັ່ນ​ກັນ. ເປົ້າ​ໝາຍ​ຂອງ​ພວກ​ເຮົາ​ ຄື ເຮັດ​ໃຫ້​ການ​ເຕີບ​ໂຕ ແລະ ການ​ພັດ​ທະ​ນາ​ນຳ​ເອົາ​ຜົນ​ປະ​ໂຫຍດມາ​ໃຫ້​ແກ່​ບັນ​ດາ​ປະ​ເທດ ແລະ ປະ​ຊາ​ຊົນ​ທົ່ວ​ໂລກ, ເຮັດ​ໃຫ້​ປະ​ຊາ​ຊົນ​ບັນ​ດາ​ປະ​ເທດ ໂດຍ​ສະ​ເພາະ​ແມ່ນ​ປະ​ຊາ​ຊົນ​ຂອງ​ປະ​ເທດ​ພວມ​ພັດ​ທະ​ນາ​ມີ​ຊີ​ວິດ​ການ​ເປັນ​ຢູ່​ນັບ​ມື້​ນັບ​ດີ​ຂຶ້ນ.”

 

ພວກ​ເຮົາ​ກໍ​ເຊື່ອ​ໝັ້ນ​ວ່າ, ພາຍ​ໃຕ້​ການ​ນຳ​ໜ້າ​ຂອງ​ກຸ່ມG20, ການເດີນ​ຕາມ​ເສັ້ນ​ທາງ​ການ​ພັດ​ທະ​ນາ​ແບບ​ຍືນ​ຍົງ,ພວກ​ເຮົາ​ຈະ​ສາ​ມາດ​ຜ່ານ​ຜ່າ​ຄວາມ​ຫຍຸ້ງ​ຍາກ ແລະ ຮ່ວມ​ກັນ​ກ້າວ​ໄປ​ສູ່​ຊີ​ວິດ​ການ​ເປັນ​ຢູ່​ທີ່​ດີ​ງາມ.