ງານວາງສະແດງສິນຄ້າຈີນ-ອາຊຽນຄັ້ງທີ 17 ແລະ ກອງປະຊຸມສຸດຍອດການຄ້າແລະການລົງທຶນຈີນ-ອາຊຽນໄດ້ຈັດຂຶ້ນຢູ່ນະຄອນໜານໜິງເຂດປົກຄອງຕົນເອງເຜົ່າຈວ້າງກວາງຊີຈີນແຕ່ວັນທີ 27 ຫາວັນທີ 30 ພະຈິກຜ່ານມາພາຍໃຕ້ຫົວຂໍ້ “ຮ່ວມກັນສ້າງໜຶ່ງແລວໜຶ່ງເສັ້ນທາງ,ຮ່ວມກັນສ້າງເສດຖະກິດດີຈີຕອນ”. ທ່ານ ສີຈິ້ນຜິງ ປະທານປະເທດຈີນໄດ້ກ່າວຄຳປາໄສໃນພິທີໄຂງານໂດຍຊີ້ອອກວ່າ: ຈີນຖືອາຊຽນເປັນປະເທດບຸລິມະສິດສຳລັບວຽກງານການຕ່າງປະເທດກັບປະເທດອ້ອມຂ້າງແລະເປັນເຂດຈຸດສຸມໃນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຢ່າງມີຄຸນນະພາບສູງ,ຈີນຍິນດີຮ່ວມກັບອາຊຽນຊຸກຍູ້ການຮ່ວມມືໃນຂົງເຂດຕ່າງໆ, ປົກປັກຮັກສາທ່ວງທ່າ ແຫ່ງການພັດທະນາທີ່ດີເພື່ອບັນລຸເປົ້າໝາຍການສ້າງຄວາມຈະເລີນຮຸ່ງເຮືອງໃຫ້ກັບພາກພື້ນແຫ່ງນີ້,ແລະສ້າງປະຊາຄົມຮ່ວມຊາຕາກຳຈີນ-ອາຊຽນທີ່ຍິ່ງມີຄວາມແໜ້ນແຟ້ນກວ່າເກົ່າ. ພາຍໃຕ້ສະພາບການພິເສດທີ່ພະຍາດໂຄວິດ-19 ຍັງສືບຕໍ່ແຜ່ລະບາດໃນຂອບເຂດທົ່ວໂລກ, ງານວາງສະແດງສິນຄ້າຈີນ-ອາຊຽນສາມາດຈັດຂຶ້ນຕາມເວລາກຳນົດໄດ້ສະແດງໃຫ້ເຫັນເຖິງຄວາມຕັດສິນໃຈທີ່ເດັດດ່ຽວໜຽວແໜ້ນຂອງຈີນໃນການຍຶດໝັ້ນການເປີດປະຕູສູ່ພາຍນອກທີ່ມີລະດັບສູງກວ່າເກົ່າແລະຊຸກຍູ້ການຮ່ວມມືດ້ານເສດຖະກິດການຄ້າລະຫວ່າງຈີນ-ອາຊຽນຢ່າງຕໍ່ເນື່ອງ.
ສິ່ງທີ່ໜ້າສົນໃຈແມ່ນ,ເພື່ອຮັບມືກັບຜົນກະທົບຈາກການແຜ່ລະບາດຂອງພະຍາດໂຄວິດ-19ແລະຊຸກຍູ້ການຮ່ວມມືດ້ານເສດຖະກິດດີຈີຕອນລະຫວ່າງຈີນ-ອາຊຽນ, ງານວາງສະແດງຄັ້ງນີ້ໄດ້ນຳໃຊ້ຮູບແບບ “ການວາງສະແດງໂດຍກົງກັບທີ່+ງານວາງສະແດງສິນຄ້າຈີນ-ອາຊຽນທາງອອນລາຍ” ເປັນຄັ້ງທຳອິດ,ໄດ້ສຸມກຳລັງເຂົ້າໃນການສ້າງ “ງານວາງສະແດງສິນຄ້າຈີນ-ອາຊຽນທີ່ບໍ່ມີວັນປິດຕະຫຼອດໄປ”. ງານວາງສະແດງໄດ້ກຳນົດໃຫ້ມີຫໍວາງສະແດງ 3D, ການປຶກສາຫາລືທາງອອນລາຍ,ການຖ່າຍທອດສົດຂ້າມຊາດແລະອື່ນໆ.ຮູບແບບດັ່ງກ່າວໄດ້ບຸກທະລຸຂີດຈຳກັດຂອງປະເທດແລະເນື້ອທີ່ບ່ອນວາງສະແດງ,ເປັນການສ້າງຂົວຕໍ່ແຫ່ງການຮ່ວມມືທາງອອນລາຍທີ່ເໜືອການເວລາແລະເທສະ,ກໍພໍດີເປັນການສະແດງໃຫ້ເຫັນເຖິງການຮ່ວມກັນສ້າງເສດຖະກິດດີຈີຕອນ. ວັນທີ 28 ພະຈິກນີ້, ງານເຊື່ອມໂຍງເສດຖະກິດການຄ້າຈີນ-ມາເລເຊຍຄັ້ງທີ 2 ໄດ້ຈັດຂຶ້ນທາງອອນລາຍ, ໄດ້ດຳເນີນການປຶກສາຫາລືທາງອອນລາຍ 50 ກວ່າຄັ້ງໃນເວລາຫຼາຍກວ່າ 5 ຊົ່ວໂມງ, ໄດ້ບັນລຸການຮ່ວມມືເກືອບ 20 ໂຄງການ ເຊິ່ງມີມູນຄ່າປະມານ 69.620.000 ໂດລາສະຫະລັດ.
ຮູບແບບໃໝ່ດັ່ງກ່າວສະແດງໃຫ້ເຫັນວ່າງານວາງສະແດງສິນຄ້າຈີນ-ອາຊຽນພວມພັດທະນາໄປພ້ອມໆກັບກະແສແຫ່ງການພັດທະນາການພົວພັນດ້ານເສດຖະກິດການຄ້າຂອງພາກພື້ນ,ເຊິ່ງໄດ້ນຳໃຊ້ວິທະຍາສາດເຕັກນິກອັດສະລິຍະທີ່ກ້າວໜ້າທີ່ສຸດໃນສະໄໝປັດຈຸບັນ,ພະຍາຍາມຫຼຸດຜ່ອນຜົນກະທົບຈາກການແຜ່ລະລາດຂອງພະຍາດໂຄວິດ-19 ໃນລະດັບທີ່ສູງສຸດ. ໂດຍສະເພາະງານວາງສະແດງສິນຄ້າຈີນ-ອາຊຽນທີ່ໄດ້ຈັດຂຶ້ນທາງອອນລາຍໃນໝົດປີນີ້ມີຄວາມໝາຍສຳຄັນຫຼາຍ,ຈະກາຍເປັນຂົວຕໍ່ທີ່ສຳຄັນແລະເປັນພະລັງແຮງທີ່ບໍ່ມີວັນເຫືອດແຫ້ງໃນການສືບຕໍ່ຊຸກຍູ້ການພົວພັນດ້ານເສດຖະກິດການຄ້າທີ່ເຂັ້ມແຂງລະຫວ່າງຈີນ-ອາຊຽນ.
ທີ່ຈິງແລ້ວ, ໃນຊຸມປີຜ່ານມາ, ເສດຖະກິດດີຈີຕອນໄດ້ກາຍເປັນເນື້ອໃນທີ່ສຳຄັນຂອງການຮ່ວມມືດ້ານເສດຖະກິດການຄ້າລະຫວ່າງຈີນ-ອາຊຽນ,ທັງແມ່ນສິ່ງທີ່ສຳຄັນສຳລັບສອງຝ່າຍໃນການເລັ່ງການຊຸກຍູ້ການເຊື່ອມໂຍງ ເສດຖະກິດຂອງພາກພື້ນເຂົ້າກັນໃຫ້ໄວຂຶ້ນ. ເມື່ອເບິ່ງຈາກດ້ານນີ້ແລ້ວ, ປີແຫ່ງການຮ່ວມມືດ້ານເສດຖະກິດດີຈີຕອນບໍ່ແມ່ນປີເລີ່ມຕົ້ນ,ຫາກແມ່ນປີແຫ່ງການສຸມທຸກກຳລັງ,ທັງແມ່ນປີທີ່ເປັນຂີດໝາຍທີ່ສະແດງໃຫ້ເຫັນວ່າການຮ່ວມມືໃນໄລຍະຍາວລະຫວ່າງສອງຝ່າຍໄດ້ພັດທະນາມາເປັນໄລຍະໜຶ່ງແລ້ວແລະໄດ້ມີການເຊື່ອມໂຍງເຂົ້າກັນໃນລະດັບສູງສົມຄວນ.
ຜະລິດຕະພັນເສດຖະກິດດີຈີຕອນໃນງານວາງສະແດງສິນຄ້າຈີນ-ອາຊຽນຄັ້ງນີ້ອາດເວົ້າໄດ້ວ່າແມ່ນໝາກຜົນແລະຜົນສຳເລັດດ້ານການຮ່ວມມືທີ່ຈິງໃຈລະຫວ່າງສອງຝ່າຍ. ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳການຄ້າລາວກ່າວວ່າ: ພາຍໃຕ້ສະພາບການໃນປັດຈຸບັນ, ການຄົ້ນຄວ້າແລະປຶກສາຫາລືກ່ຽວກັບການລົງເລິກການຮ່ວມມືໃນດ້ານການປ້ອງກັນແລະຄວບຄຸມພະຍາດໂຄວິດ-19,ການຮ່ວມມືດ້ານເສດຖະກິດດີຈີຕອນແລະດ້ານອື່ນໆມີຄວາມສຳຄັນຫຼາຍ,ຂ້າພະເຈົ້າມີຄວາມຄອງຄອຍການຮ່ວມມືທີ່ຈະສ້າງໂອກາດໃໝ່ໃນຍຸກຄຳຍຸກຂອງເສດຖະກິດດີຈີຕອນ.
ອາດຄາດຄະເນໄດ້ວ່າ: ການຮ່ວມມືລະຫວ່າງຈີນ-ອາຊຽນໃນຂົງເຂດຕ່າງໆຈະພັດທະນາໃຫ້ກວ້າງອອກແລະກ້າວເຂົ້າສູ່ລວງເລິກໄປຄຽງຄູ່ກັບການລົງນາມແລະຈັດຕັ້ງປະຕິບັດສັນຍາ RCEP. ຫາກເບິ່ງຈາກດ້ານນີ້ແລ້ວ,ງານວາງສະແດງສິນຄ້າຈີນ-ອາຊຽນໃນອະນາຄົດບໍ່ພຽງແຕ່ຕ້ອງສອດຄ່ອງກັບຄວາມຕ້ອງການດ້ານການພັດທະນາການພົວພັນເສດຖະກິດການຄ້າລະຫວ່າງຈີນ-ອາຊຽນເທົ່ານັ້ນ,ຫາກຍັງຕ້ອງສອດຄ່ອງກັບຄວາມຕ້ອງການຂອງສັນຍາ RCEP ໃນການຊຸກຍູ້ການຄ້າເສລີຂອງພາກພື້ນທີ່ຫັນເປັນອິນເຕີເນັດ,ເພື່ອເຮັດໃຫ້ຫຼາຍປະເທດກວ່າເກົ່າໄດ້ຮັບຜົນປະໂຫຍດທີ່ແທ້ຈິງຈາກງານວາງສະແດງສິນຄ້າຈີນ-ອາຊຽນ,ທັງສືບຕໍ່ອຸທິດກຳລັງທີ່ຕັ້ງໜ້າຂອງຕົນເຂົ້າໃນການຟື້ນຟູການພັດທະນາເສດຖະກິດໂລກ.
ຄຳເຫັນ
0