ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 22 ທັນວານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດສປຈີນໄດ້ສົນທະນາກັບທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດສປປລາວຜ່ານທາງໂທລະສັບ.
ທ່ານສີຈິ້ນຜິງກ່າວວ່າ, ພາຍໃຕ້ການນຳພາທີ່ເຂັ້ມແຂງຂອງສູນກາງພັກປະຊາຊົນປະຕິວັດລາວ ແລະ ສະຫາຍເລຂາທິການໃຫຍ່ບຸນຍັງ ວໍລະຈິດ, ປະເທດລາວໄດ້ມີຄວາມໝັ້ນຄົງທາງດ້ານການເມືອງ ແລະ ສັງຄົມ, ເສດຖະກິດໄດ້ພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນຢ່າງພົ້ນເດັ່ນ. ໃນຊຸມປີມໍ່ໆມານີ້, ຂ້າພະເຈົ້າ ແລະ ສະຫາຍເລຂາທິການໃຫຍ່ບຸນຍັງ ວໍລະຈິດໄດ້ຕັ້ງໜ້າຊຸກຍູ້ການສ້າງຄູ່ຮ່ວມຊາຕາກຳຈີນ-ລາວ, ໄດ້ເປີດຍຸກໃໝ່ແຫ່ງການພົວພັນຈີນ-ລາວ. ພວກເຮົາໃຫ້ຄວາມສຳຄັນຢ່າງສູງຕໍ່ວຽກງານລຶບລ້າງຄວາມທຸກຍາກ, ເຮັດໃຫ້ການຮ່ວມມືດ້ານການລຶບລ້າງຄວາມທຸກຍາກກາຍເປັນຈຸດພົ້ນເດັ່ນອັນໜຶ່ງໃນການພົວພັນຈີນ-ລາວ. ສອງຝ່າຍໄດ້ຮ່ວມມືກັນຕ້ານກັບພະຍາດໂຄວິດ-19 ແລະ ຕ້ານກັບໄພນ້ຳຖ້ວມ, ຮ່ວມກັນຄັດຄ້ານການຫັນເອົາການແຜ່ລະບາດຂອງພະຍາດເປັນບັນຫາການເມືອງ ແລະ ໃສ່ຮ້າຍປ້າຍສີປະເທດອື່ນດ້ວຍຂໍ້ອ້າງຂອງການແຜ່ລະບາດຂອງພະຍາດ, ເຊິ່ງໄດ້ສ່ອງແສງໃຫ້ເຫັນເຖິງຈິດໃຈຄູ່ຮ່ວມຊາຕາກຳທີ່ຮ່ວມທຸກຮ່ວມສຸກ ແລະ ຊ່ວຍເຫຼືອເຊິ່ງກັນແລະກັນ.
ທ່ານສີຈິ້ນຜິງກ່າວວ່າ: ສອງຝ່າຍຄວນລົງເລິກການແລກປ່ຽນດ້ານຍຸດທະສາດ, ສະໜັບສະໜູນເຊິ່ງກັນແລະກັນໃນບັນຫາທີ່ພົວພັນເຖິງຜົນປະໂຫຍດແກນກາງຂອງກັນ ແລະກັນ. ສອງຝ່າຍຄວນຮັກສາການໄປມາຫາສູ່ກັນລະຫວ່າງການນຳຂັ້ນສູງຢ່າງແໜ້ນແຟ້ນ, ລົງເລິກການແລກປ່ຽນທິດສະດີ ແລະ ບົດຮຽນດ້ານການຄຸ້ມຄອງພັກ ແລະ ບໍລິຫານປະເທດ, ສ້າງສະພາບການໄປມາຫາສູ່ກັນລະຫວ່າງສອງພັກຢ່າງຮອບດ້ານ ຂົງເຂດກວ້າງຂວາງ ແລະ ໃນຫຼາຍລະດັບໃຫ້ຄົບຖ້ວນສົມບູນຂຶ້ນເລື້ອຍໆ. ສອງຝ່າຍຄວນລົງເລິກການເຊື່ອມຈອດກັນໃນດ້ານຍຸດທະສາດການພັດທະນາ, ໂດຍຖືເອົາການທີ່ປະເທດຈີນເລັ່ງລັດສ້າງສະພາບການພັດທະນາໃໝ່ ແລະ ການເຊັນ “ສັນຍາຄູ່ຮ່ວມມືເສດຖະກິດຮອບດ້ານໃນພາກພື້ນ”ຢ່າງເປັນທາງການ ເປັນກາລະໂອກາດ, ຊຸກຍູ້ການສ້າງແລວເສດຖະກິດຈີນ-ລາວ ແລະ ທາງລົດໄຟຈີນ-ລາວຢ່າງໜັກແໜ້ນ, ເປີດກວ້າງການຮ່ວມມືໃນຂົງເຂດວັດທະນະທຳການສຶກສາ, ວຽກງານຊາວໜຸ່ມ, ການທ່ອງທ່ຽວ ແລະອື່ນໆ, ທັງເພີ່ມທະວີການປະສານສົມທົບໃນວຽກງານສາກົນ ແລະ ພາກພື້ນ, ຊຸກຍູ້ການສ້າງຄູ່ຮ່ວມຊາຕາກຳຈີນ-ລາວໃຫ້ກ້າວເຂົ້າສູ່ລວງເລິກຢ່າງໜັກແໜ້ນ, ເພື່ອສ້າງຜົນປະໂຫຍດໃຫ້ແກ່ປະຊາຊົນສອງຊາດຫຼາຍກວ່າເກົ່າ. ຂໍອວຍພອນໃຫ້ກອງປະຊຸມໃຫຍ່ຂອງພັກປະຊາຊົນປະຕິວັດລາວຄັ້ງທີ 11 ຈັດຂຶ້ນດ້ວຍຜົນສຳເລັດອັນຈົບງາມໃນປີໜ້າ.
ທ່ານບຸນຍັງ ວໍລະຈິດກ່າວວ່າ, ປະຈຸບັນການເມືອງ ເສດຖະກິດ ແລະ ການຮ່ວມມືກັບຕ່າງປະເທດຂອງລາວໄດ້ຮັກສາທ່ວງທ່າຂະຫຍາຍຕົວທີ່ດີ, ພັກ ແລະ ລັດຖະບານລາວພວມສຸມທຸກຄວາມພະຍາຍາມເພື່ອກະກຽມຈັດກອງປະຊຸມໃຫຍ່ຂອງພັກປະຊາຊົນປະຕິວັດລາວຄັ້ງທີ 11 ແລະ ກອງປະຊຸມສະພາແຫ່ງຊາດຄັ້ງທີ 9 ທີ່ຈະຈັດຂຶ້ນໃນຕົ້ນປີໜ້າ. ຝ່າຍລາວຂໍສະແດງຄວາມຂອບໃຈນຳພັກ ລັດຖະບານ ແລະ ປະຊາຊົນຈີມທີ່ໄດ້ໃຫ້ການສະໜັບສະໜູນ ແລະ ການອູ້ມຊູຊ່ວຍເຫຼືອອັນລ້ຳຄ່າໃນໄລຍະທີ່ລາວເກີດມີສະພາບການແຜ່ລະບາດຂອງພະຍາດໂຄວິດ-19, ຂໍສະແດງຄວາມຊົມເຊີຍຢ່າງສຸດໃຈຕໍ່ຝ່າຍຈີນທີ່ໄດ້ຮັບໄຊຊະນະຄັ້ງສຳຄັນໃນບັ້ນຕ້ານກັບພະຍາດ, ບັ້ນລຶບລ້າງຄວາມທຸກຍາກ ແລະວຽກງານອື່ນໆພາຍໃຕ້ການນຳພາຂອງສູນກາງພັກກອມມູນິດຈີນທີ່ມີສະຫາຍສີຈິ້ນຜິງເປັນແກນນຳ, ຝ່າຍລາວໄດ້ຕິດຕາມຢ່າງໃກ້ຊິດກ່ຽວກັບແຜນການພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 14 ແລະຂໍ້ສະເໜີກ່ຽວກັບເປົ້າໝາຍວິໄສທັດໄລຍະຍາວຮອດປີ 2035ທີ່ໄດ້ຮັບຮອງໃນກອງປະຊຸມຄົບຄະນະຄັ້ງທີ 5 ຂອງຄະນະກຳມະການສູນກາງພັກກອມມູນິດຈີນສະໄໝທີ 19, ຂ້າພະເຈົ້າເຊື່ອໝັ້ນວ່າຈີນຈະສາມາດສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານ, ເປີດຂະບວນການໃໝ່ຂອງການສ້າງປະເທດສັງຄົມນິຍົມທີ່ທັນສະໄໝຢ່າງຮອບດ້ານ. ປີໜ້າແມ່ນປີທີ່ລາວ-ຈີນໄດ້ສ້າງຕັ້ງສາຍພົວພັນທາງການທູດຄົບຮອບ 60 ປີ, ລາວຍິນດີຮ່ວມກັນກັບຈີນສືບຕໍ່ຈັດຕັ້ງປະຕິບັດ ແຜນແມ່ບົດກ່ຽວກັບການສ້າງຄູ່ຮ່ວມຊາຕາກຳຈີນ-ລາວ ທີ່ຜູ້ນຳສູງສຸດຂອງສອງພັກໄດ້ເຊັນກັນ, ເພີ່ມທະວີການແລກປ່ຽນບົດຮຽນໃນການຄຸ້ມຄອງພັກ ການປົກຄອງປະເທດ ແລະການບໍລິຫານລັດ, ຮັກສາການໄປມາຫາສູ່ກັນໃນທຸກລະດັບ, ເລັ່ງລັດຊຸກຍູ້ການຮ່ວມມືຕົວຈິງໃນຂົງເຂດຕ່າງໆພາຍໃຕ້ຂອບ “ໜຶ່ງແລວໜຶ່ງເສັ້ນທາງ”, ຮ່ວມກັນປົກປັກຮັກສາສັນຕິພາບ ແລະ ການພັດທະນາຂອງສາກົນ ແລະ ພາກພື້ນ, ຊຸກຍູ້ການພົວພັນລາວ-ຈີນໃຫ້ໄດ້ຮັບການພັດທະນາຫຼາຍກວ່າເກົ່າ.
ຄຳເຫັນ
0