ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນຕົ້ນປີ 2020 ທີ່ຈະຜ່ານພົ້ນໄປ, ພະຍາດໂຄວິດ-19 ໄດ້ແຜ່ລະບາດໃນຂອບເຂດທົ່ວໂລກຢ່າງກະທັນຫັນ ເຊິ່ງໄດ້ສ້າງຜົນກະທົບອັນໜັກໜ່ວງຕໍ່ການພັດທະນາເສດຖະກິດສັງຄົມຂອງປະເທດຕ່າງໆໃນໂລກ. ໂດຍຜະເຊີນໜ້າກັບສະພາບການແຜ່ລະບາດຂອງພະຍາດທີ່ໜັກໜ່ວງທີ່ສຸດທີ່ບໍ່ເຄີຍມີມາກ່ອນໃນຮອບຮ້ອຍປີໃນຂອບເຂດທົ່ວໂລກຄັ້ງນີ້, ພັກກອມມູນິດຈີນໄດ້ນຳພາປະຊາຊົນບັນດາເຜົ່າໃນທົ່ວປະເທດຈີນ, ໄດ້ດຳເນີນການຕໍ່ສູ້ຕ້ານກັບການແຜ່ລະບາດຂອງພະຍາດຢ່າງດຸເດືອດຂ້ຽວຂາດໃນໜຶ່ງປີຜ່ານມາ ແລະ ຍາດໄດ້ຜົນສຳເລັດທາງຍຸດທະສາດທີ່ສຳຄັນ. ປີ 2020 ທີ່ໃກ້ຈະຜ່ານພົ້ນໄປ, ພວກເຮົາໄດ້ຍົກເອົາຕົວເລກຂໍ້ມູນຕ່າງໆມາສະຫຼຸບເປັນຜົນງານໃນການຕ້ານກັບການແຜ່ລະບາດຂອງພະຍາດຢູ່ຈີນ.
ນັບແຕ່ເກີດມີການແຜ່ລະບາດຂອງພະຍາດເປັນຕົ້ນມາ, ນະຄອນອູຮັ້ນແຂວງຫູເປີຍຈີນໄດ້ສ້າງໂຮງໝໍຊົ່ວຂ່າວ 16 ແຫ່ງ ແລະ ປິ່ນປົວຜູ້ເປັນພະຍາດໂຄວິດ-19 ລວມທັງໝົດ 12.000 ກວ່າຄົນ. ຜູ້ກໍ່ສ້າງຈຳນວນ 13.500 ຄົນ, ເຄື່ອງຈັກອຸປະກອນປະເພດຕ່າງໆ 1.500 ກວ່າອັນ ໄດ້ເຂົ້າຮ່ວມກໍ່ສ້າງໂຮງໝໍ “ໂຮເສິນຊານ” ເຊິ່ງເປັນສະຖານທີ່ປິ່ນປົວຜູ້ເປັນພະຍາດໂຄວິດ-19 ສຳເລັດພາຍໃນເວລາ 10 ວັນ; ໃນໄລຍະດຽວກັນ, ຜູ້ກໍ່ສ້າງ 24.500 ຄົນໄດ້ສ້າງໂຮງໝໍເລີຍເສິນຊານໃຫ້ສຳເລັດພາຍໃນເວລາ 12 ວັນ, ບັນຈຸຕຽງນອນຄົນເຈັບໄດ້ 1.600 ຕຽງ ເຊິ່ງໄດ້ສ້າງສິ່ງມະຫັດສະຈັນໃນປະຫວັດການຕ້ານກັບການແຜ່ລະບາດຂອງພະຍາດຕິດແປດຢູ່ຈີນ.
ໃນໄລຍະປ້ອງກັນແລະຄວບຄຸມການແຜ່ລະບາດຂອງພະຍາດ, ມີພະນັກງານການແພດ 42.600 ກວ່າຄົນມຸ່ງໜ້າໄປສູ່ແຂວງຫູເປີຍ, ມີພະນັກງານໃນເຂດຄຸ້ມຊຸມຊົນ 4 ລ້ານກວ່າຄົນໄດ້ເຝົ້າລະວັງຢູ່ແນວໜ້າໃນການຕ້ານກັບພະຍາດ. ຍ້ອນການແຜ່ລະບາດຂອງພະຍາດ, ຫຼາຍຕົວເມືອງຂອງແຂວງຫູເປີຍໄດ້ປິດທາງເຂົ້າອອກເມືອງ ແລະ ໃນໄລຍະນີ້, ແຂວງຫູເປີຍໄດ້ຮັບເຄື່ອງບໍລິຈາກເພື່ອປ້ອງກັນພະຍາດແລະສຳລັບຊີວິດປະຈຳວັນລວມທັງໝົດ 928.800 ໂຕນ, ໄດ້ຮັບບໍລິຈາກຖ່ານຫີນຜະລິດໄຟຟ້າ, ນ້ຳມັນເຊື້ອໄຟ ແລະ ວັດຖຸອຸປະກອນການຜະລິດປະເພດອື່ນໆ 1.487.00 ກວ່າໂຕນ. ມາຮອດວັນທີ 31 ພຶດສະພາປີນີ້, ແຂວງຫູເປີຍໄດ້ຮັບເງິນບໍລິຈາກຈາກສັງຄົມ 38.93 ຕື້ຢວນ ແລະ ວັດຖຸເຄື່ອງຂອງ 990 ລ້ານກວ່າອັນ.
ໃນໄລຍະເກີດມີການແຜ່ລະບາດຂອງພະຍາດ, ຜູ້ເປັນພະຍາດທີ່ນອນປິ່ນປົວຢູ່ໂຮງໝໍໃນທົ່ວປະເທດຈີນໄດ້ຊຳລະບັນຊີ 58.000 ກວ່າເທື່ອຄົນ, ລວມຄ່າປິ່ນປົວ ທັງໝົດມີເຖິງ 1,35 ຕື້ຢວນ, ສະເລ່ຍແລ້ວ, ຄ່າປິ່ນປົວຂອງຜູ້ຖືກບົ່ງມະຕິເປັນພະຍາດໂຄວິດ-19 ມີປະມານ 23.000 ຢວນ, ລັດຖະບານຈີນໄດ້ຮັບຜິດຊອບຄ່າປິ່ນປົວທັງໝົດ ເຊິ່ງໄດ້ສ່ອງແສງໃຫ້ເຫັນເຖິງຫຼັກການທີ່ຖື “ຊີວິດຢູ່ເໜືອກວ່າທຸກສິ່ງທຸກຢ່າງ” ຢ່າງເຕັມທີ່.
ຍ້ອນໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19, ເສດຖະກິດໂລກໄດ້ຊຸດໂຊມລົງຢ່າງຮ້າຍແຮງ. ເພື່ອຮັບມືກັບການແຜ່ລະບາດຂອງພະຍາດ, ຈີນໄດ້ວາງມາດຕະການຫຼຸດສ່ວຍສາອາກອນ ແລະ ຄ່າທຳນຽມປະເພດຕ່າງໆ 28 ລາຍການ ທີ່ລວມເປັນ 7 ຊຸດ, ນັບແຕ່ເດືອນມັງກອນຫາເດືອນພະຈິກປີນີ້, ຈີນໄດ້ຫຼຸດສ່ວຍສາອາກອນ ແລະ ຄ່າທຳນຽມ 1640 ຕື້ກວ່າຢວນ ເຊິ່ງໄດ້ເສີມຂະຫຍາຍບົດບາດສຳຄັນໃນການສະໜັບສະໜູນການຟື້ນຟູການຜະລິດ ແລະ ການເຮັດວຽກພາຍໃນປະເທດຈີນ. ຈີນກໍໄດ້ກາຍເປັນກຸ່ມເສດຖະກິດຕົ້ນຕໍພຽງໜຶ່ງດຽວໃນໂລກທີ່ບັນລຸການເຕີບໂຕທາງເສດຖະກິດເປັນຕົວເລກບວກ.
ນອກນີ້, ໃນໜຶ່ງປີຜ່ານມາ, ຈີນໄດ້ໃຫ້ການຊ່ວຍເຫຼືອໃນການຕ້ານກັບການແຜ່ລະບາດຂອງພະຍາດແກ່ 150 ກວ່າປະເທດ ແລະ 9 ອົງການຈັດຕັ້ງສາກົນ, ໄດ້ສົ່ງທີມແພດ 36 ທີມໄປ 34 ປະເທດທີ່ມີຄວາມຕ້ອງການ; ໄດ້ສະໜອງຜ້າປິດປາກ 200 ຕື້ກວ່າອັນ, ຊຸດປ້ອງກັນພະຍາດ 2 ຕື້ຊຸດ ແລະ ຢາກວດຫາເຊື້ອພະຍາດ 800 ລ້ານຫຼອດ ໃຫ້ກັບບັນດາປະເທດໃນໂລກ ເຊິ່ງໄດ້ເສີມຂະຫຍາຍບົດບາດຢ່າງຕັ້ງໜ້າໃນການຮ່ວມມືກັນຕ້ານກັບການແຜ່ລະບາດຂອງພະຍາດຂອງສາກົນ ແລະ ສ່ອງແສງໃຫ້ເຫັນເຖິງນ້ຳໃຈຮັບຜິດຊອບໃນຖານະເປັນປະເທດໃຫຍ່ໃນໂລກ.
ການແຜ່ລະບາດຂອງພະຍາດໂຄວິດ-19 ຈະຕ້ອງຜ່ານພົ້ນໄປ ແລະ ອະນາຄົດດີງາມກໍຕ້ອງໝູນວຽນມາເຖິງ. ໃນປີ 2021 ທີ່ໃກ້ຈະໝູນວຽນມາເຖິງນີ້, ຈີນຈະຮັບມືກັບການແຜ່ລະບາດຂອງພະຍາດໂຄວິດ-19 ດ້ວຍການກະທຳທີ່ຕັ້ງໜ້າກວ່າເກົ່າ ແລະ ຍ່ອມຈະໄດ້ຮັບໄຊຊະນະໃນການຕໍ່ສູ້ຕ້ານກັບການແຜ່ລະບາດຂອງພະຍາດໃນທີ່ສຸດ.
ຄຳເຫັນ
0