ປີ 2020 ແມ່ນປີໜຶ່ງທີ່ບໍ່ທຳມະດາທີ່ສຸດເວົ້າສຳລັບຊາວໂລກແລ້ວ, ຍາກທີ່ຈະລືມໄດ້. ຫຼາຍໆເຫດການທີ່ສຳຄັນຂອງວຽກງານການບິນອາວະກາດຂອງຈີນໃນປີນີ້ກໍຈະຖືກບັນທຶກໄວ້ໃນປະຫວັດສາດຢ່າງແນ່ນອນ, ພ້ອມທັງຈະຖືກບັນທຶກໄວ້ໃນຄວາມຊົງຈຳຂອງປະຊາຊົນຈີນຢ່າງເລິກເຊິ່ງ: ກ່ອນໜ້ານີ້ບໍ່ດົນ, ຍານສຳຫຼວດດວງຈັນ “ສາງເອີ 5” ໄດ້ນຳເອົາຕົວຢ່າງກ້ອນຫີນແລະດິນຈາກດວງຈັນງວດທຳອິດກັບຄືນສູ່ໂລກຢ່າງປອດໄພຫຼັງຈາກ 44 ປີທີ່ເຄີຍມີມະນຸດນຳເອົາຕົວຢ່າງແບບນີ້ກັບຄືນສູ່ໂລກ,ເຊິ່ງເປັນການເພີ່ມເນື້ອໃນໃໝ່ໃຫ້ແກ່ການຄົ້ນຄວ້າສຳຫຼວດປະຫວັດຄວາມເປັນມາຂອງດວງຈັນ; ໃນຂະນະດຽວກັນນີ້, ຍານສຳຫຼວດດາວອັງຄານ “ທ່ຽນເວີ້ນ 1” ລຳທຳອິດຂອງຈີນໄດ້ເດີນທາງອອກຈາກໜ່ວຍໂລກເປັນໄລຍະທາງຫຼາຍກວ່າ 100 ລ້ານກິໂລແມັດແລ້ວນັ້ນເພື່ອບິນໄປສູ່ຈຸດໝາຍປາຍທາງແລະບັນລຸຄວາມຝັນຂອງມະນຸດທີ່ຈະສຳຫຼວດຄົ້ນຄວ້າອະວະກາດ; ການໃຫ້ບໍລິການໂລກທີ່ກ່ຽວຂ້ອງຂອງລະບົບນຳທາງດ້ວຍດາວທຽມເປີຍໂຕວເລກ 3 ຂອງຈີນໄດ້ຈັດຂຶ້ນຢ່າງເປັນທາງການໃນທ້າຍເດືອນກໍລະກົດປີນີ້ເຊິ່ງໄດ້ໃຫ້ບໍລິການແກ່ 120 ປະເທດຂອງໂລກ, ໄດ້ກ້າວເຂົ້າສູ່ຍຸກໃໝ່ທີ່ໃຫ້ບໍລິການແກ່ໂລກດ້ວຍຄຸນນະພາບສູງແລະໄດ້ສ້າງຄວາມຜາສຸກໃຫ້ແກ່ມວນມະນຸດ. ໃນໄລຍະ 1 ປີ, ຈີນໄດ້ປະຕິບັດໜ້າທີ່ການບິນອາວະກາດເກືອບ 40 ຄັ້ງ, ໄດ້ມີຜົນງານທີ່ປະຈັກຕາຕໍ່ຊາວໂລກຫຼາຍຄັ້ງ, ເພື່ອບັນລຸຄວາມຝັນທີ່ “ມະນຸດຈະກ້າວສູ່ຫ້ອງອະວະກາດແຫ່ງດວງດາວທີ່ກວ້າງໄກກວ່າເກົ່າ” ເປັນແຕ່ລະບາດກ້າວ,ກໍເປັນການປະຕິບັດຕາມຄຳໝັ້ນສັນຍາທີ່ເດັດດ່ຽວໜຽວແໜ້ນຂອງຕົນໃນການຮ່ວມມືແລະນຳໃຊ້ອະວະກາດໃນທາງສັນຕິ.
ໃນຫ້ອງອະວະກາດແຫ່ງດວງດາວ, ໜ່ວຍໂລກກໍແມ່ນເຮືອນ້ອຍລຳໜຶ່ງ, ມະນຸດກໍແມ່ນຜູ້ໂດຍສານຢູ່ເທິງເຮືອ. ເມື່ອປະເຊີນໜ້າກັບດວງດາວທີ່ບໍ່ຮູ້ສະພາບຂອງມັນແມ່ນແຕ່ໜ້ອຍແລະຫ່າງໄກຈາກໜ່ວຍໂລກຫຼາຍ, ມວນມະນຸດມີແຕ່ຊົມໃຊ້ຄວາມຮູ້ແລະຊັບພະຍາກອນຮ່ວມກັນຢ່າງເຕັມສ່ວນ,ຈຶ່ງຈະສາມາດບັນລຸເປົ້າໝາຍທີ່ຈະຄົ້ນຄວ້າເພື່ອສະແຫວງຫາຄວາມລຶກລັບຂອງນອກໂລກໄດ້.ເຊື່ອວ່າໃນອະນາຄົດທີ່ບໍ່ດົນໃນຕໍ່ໜ້ານີ້, ຈະເຫັນມະນຸດ ສາມາດຮ່ວມມືແບບສາກົນໃນດ້ານວຽກງານຄົ້ນຄວ້າເພື່ອສະແຫວງຫາອະວະກາດຫຼາຍກວ່າເກົ່າ,ຮັບຮູ້ແລະຊົມໃຊ້ຄວາມຮູ້ໃໝ່ຈາກຕ່າງດ້າວ,ຮ່ວມກັນຊຸກຍູ້ເຕັກນິກແລະກຳລັງການຜະລິດທີ່ກ້າວໜ້າໃຫ້ກ້າວໄປໜ້າ,ສ່ວນຜູ້ທີ່ໄດ້ຮັບຜົນປະໂຫຍດໃນທີ່ສຸດຈະແມ່ນມວນມະນຸດທັງໝົດ.
ຄຳເຫັນ
0