ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນຖານະເປັນໂຄງການສັນຍະລັກແຫ່ງມິດຕະພາບແລະການຮ່ວມມືລະຫວ່າງສອງປະເທດລາວ-ຈີນ, ທາງລົດໄຟຄວາມໄວສູງລາວ-ຈີນໄດ້ຮັບການມອບໝາຍຈາກການນຳສອງປະເທດ, ທັງແມ່ນຄວາມຄອງຄອຍຂອງປະຊາຊົນ. ເຖິງວ່າໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ໃນປີນີ້, ເຮັດໃຫ້ການກໍ່ສ້າງທາງລົດໄຟໄດ້ຊ້າລົງໃນໄລຍະໜຶ່ງກໍຕາມ, ແຕ່ຄຽງຄູ່ກັບການຮ່ວມມືຕ້ານກັບການແຜ່ລະບາດຂອງພະຍາດໂຄວິດ-19 ຂອງສອງປະເທດໄດ້ຮັບຄວາມຄືບໜ້າ, ການກໍ່ສ້າງທາງລົດໄຟຄວາມໄວສູງລາວ-ຈີນໄດ້ມີການບຸກທະລຸເລື້ອຍໆ.
ວັນທີ 13 ມີນາປີ 2020, ອຸມົງທີ່ຍາວ 1 ໝື່ນແມັດຂຶ້ນໄປ ເຊິ່ງເປັນອຸມົງເສັ້ນທຳອິດຢູ່ຕາມທາງລົດໄຟລາວ-ຈີນໄດ້ຖືກເຈາະຊອດ. ວັນທີ 27 ມີນາ, ລາງລົດໄຟເສັ້ນທຳອິດທີ່ຍາວ 500 ແມັດຢູ່ຕາມທາງລົດໄຟລາວ-ຈີນກໍໄດ້ສຳເລັດຜົນຢູ່ນະຄອນຫຼວງວຽງຈັນ, ຕອນເຊົ້າວັນທີ 31 ມີນາ, ສະຖານີສົ່ງສັນຍານຢູ່ນະຄອນຫຼວງວຽງຈັນທີ່ສູງ 40 ແມັດໄດ້ເລີ່ມກໍ່ສ້າງ ເຊິ່ງສະແດງໃຫ້ເຫັນວ່າ: ໂຄງການກໍ່ສ້າງເສົາສົ່ງສັນຍານໂທລະຄົມຢູ່ຕາມທາງລົດໄຟໄດ້ເລີ່ມຂຶ້ນຢ່າງເປັນທາງການແລ້ວ. ວັນທີ 3 ກໍລະກົດ, ພິທີລົງມືກໍ່ສ້າງສະຖານີລົດໄຟນະຄອນຫຼວງວຽງຈັນໄດ້ຈັດຂຶ້ນຢູ່ເມືອງໄຊທານີນະຄອນຫຼວງວຽງຈັນ, ການກໍ່ສ້າງສະຖານີລົດໄຟຕາມທາງລົດໄຟລາວ-ຈີນໄດ້ລິເລີ່ມຂຶ້ນຢ່າງຮອບດ້ານ. ວັນທີ 19 ພະຈິກ, ໂດຍຜ່ານການກໍ່ສ້າງເປັນເວລາ 4 ເດືອນ, ອາຄານສະຖານີລົດໄຟນະຄອນຫຼວງວຽງຈັນກໍໄດ້ສ້າງສຳເລັດ. ວັນທີ 29 ພະຈິກ, ການວາງລາງລົດໄຟຕາມທາງລົດໄຟຕອນນະຄອນຫຼວງວຽງຈັນຫານະຄອນຫຼວງພະບາງໄດ້ສຳເລັດຢ່າງຈົບງາມ ເຊິ່ງເປັນຂີດໝາຍສະແດງໃຫ້ເຫັນວ່າ: ການກໍ່ສ້າງທາງລົດໄຟລາວ-ຈີນໄດ້ມີຄວາມຄືບໜ້າສຳຄັນອີກຕື່ມ.
ເຖິງວ່າການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ການກໍ່ສ້າງທາງລົດໄຟລາວ-ຈີນຊ້າລົງກໍຕາມ, ແຕ່ພາຍໃຕ້ການຮ່ວມມືທີ່ດີລະຫວ່າງລັດຖະບານ ແລະ ພະນັກງານກໍ່ສ້າງຂອງສອງປະເທດລາວ-ຈີນ, ການກໍ່ສ້າງທາງລົດໄຟລາວ-ຈີນກໍໄດ້ສຳເລັດການກໍ່ສ້າງໄປແລ້ວ 88%, ບໍ່ພຽງແຕ່ໄດ້ຈັດຕັ້ງປະຕິບັດໃຫ້ໄດ້ຕາມຄາດໝາຍການກໍ່ສ້າງເທົ່ານັ້ນ, ຫາກຍັງສາມາດບຸກທະລຸໃໝ່ຢູ່ເລື້ອຍໆ ເຊັ່ນ: ການເຈາະອຸມົງຊອດ, ການກ່າຍທ່ອນຂົວ, ການກໍ່ສ້າງສະຖານີ ແລະ ການວາງລາງລົດໄຟເປັນຕົ້ນ ເຊິ່ງໄດ້ສ້າງພື້ນຖານອັນໝັ້ນແກ່ນໃຫ້ແກ່ການເປີດນຳໃຊ້ທາງລົດໄຟລາວ-ຈີນໃນເດືອນທັນວາປີ 2021.
ປີໃໝ່ກຳລັງຈະໝູນວຽນມາເຖິງ, ການກໍ່ສ້າງທາງລົດໄຟລາວ-ຈີນກໍຈະມີຈຸດພົ້ນເດັ່ນໃໝ່, ທາງລົດໄຟລາວ-ຈີນກໍຈະສ້າງສຳເລັດ ແລະ ເປີດນຳໃຊ້ຕາມເວລາກຳນົດຢ່າງແນ່ນອນ ເຊິ່ງຈະເປັນການຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ແລະ ຊ່ວຍໃຫ້ປະເທດລາວບັນລຸເປົ້າໝາຍຍຸດທະສາດການພັດທະນາທີ່ “ຫັນປະເທດຈາກປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດກັບພາກພື້ນ”. ທາງລົດໄຟສາຍນີ້ຍ່ອມຈະຮັດແໜ້ນມິດຕະພາບລະຫວ່າງປະຊາຊົນສອງຊາດລາວ-ຈີນໃຫ້ແໜ້ນແຟ້ນຍິ່ງໆຂຶ້ນຢ່າງແນ່ນອນ.
ຄຳເຫັນ
0