ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 11 ມັງກອນປີ 2021ນີ້, ພິທີເປີດຊຸດສຳມະນາສຳລັບພະນັກງານການນຳຕົ້ນຕໍຂັ້ນແຂວງແລະກະຊວງເພື່ອເຊື່ອມຊຶມແລະຜັນຂະຫຍາຍເນື້ອໃນຈິດໃຈຂອງກອງປະຊຸມຄົບຄະນະຄັ້ງທີ 5 ຂອງຄະນະກຳມະການສູນກາງພັກກອມມູນິດຈີນສະໄໝທີ 19 ໄດ້ໄຂຂຶ້ນຢູ່ໂຮງຮຽນທິດສະດີສູນກາງພັກ(ສະຖາບັນການປົກຄອງແຫ່ງຊາດ). ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ກ່າວຄຳປາໄສສຳຄັນໃນພິທີດັ່ງກ່າວໂດຍໄດ້ອະທິບາຍຕື່ມອີກກ່ຽວກັບເນື້ອໃຈຈິດໃຈແກນກາງທີ່ສຳຄັນຂອງກອງປະຊຸມຄົບຄະນະຄັ້ງທີ 5 ຂອງຄະນະກຳມະການສູນກາງພັກກອມມູນິດຈີນສະໄໝທີ 19 ຄື: ໄລຍະການພັດທະນາໃໝ່, ທັດສະນະການພັດທະນາໃໝ່ແລະສະພາບການພັດທະນາໃໝ່. ທ່ານສີຈິ້ນຜິງໄດ້ຊີ້ໃຫ້ເຫັນວ່າ:
ໄລຍະການພັດທະນາໃໝ່ຄື: ພັກເຮົາໄດ້ນຳພາປະຊາຊົນເຂົ້າສູ່ໄລຍະໃໝ່ທີ່ກ້າວກະໂດດເປັນຄັ້ງປະຫວັດສາດຈາກການລຸກຢືນຂຶ້ນ, ຮັ່ງມີຂຶ້ນຈົນຮອດເຂັ້ມແຂງຂຶ້ນ. ນີ້ຄືໄລຍະໜຶ່ງໃນໄລຍະເບື້ອງຕົ້ນຂອງສັງຄົມນິຍົມ, ຂະນະດຽວກັນກໍເປັນໄລຍະໜຶ່ງທີ່ຢືນຢູ່ຈຸດເລີ່ມຕົ້ນໃໝ່ພາຍຫຼັງທີ່ໄດ້ຜ່ານການສະສົມກຳລັງມາເປັນເວລາຫຼາຍສິບປີ. ໃນນີ້, ຄຳວ່າ “ເຂັ້ມແຂງ”ເປັນຄຳສັບສຳຄັນແລະຈຸດພິເສດສຳຄັນຂອງໄລຍະໃໝ່.
ທັດສະນະການພັດທະນາໃໝ່ຄື: ສະແຫວງຫາຄວາມຜາສຸກເພື່ອປະຊາຊົນ, ສະແຫວງຫາການຟື້ນຟູຄວາມຈະເລີນຮຸ່ງເຮືອງຄືນໃໝ່ໃຫ້ກັບຊົນຊາດ, ນີ້ເປັນຈຸດເລີ່ມຕົ້ນທັງເປັນຈຸດປະສົງເປົ້າໝາຍຂອງພັກເຮົາໃນການນຳພາສ້າງປະເທດໃຫ້ຫັນເປັນທັນສະໄໝ ທັງເປັນຮາກເຫງົ້າແລະຈິດວິນຍານ ຂອງທັດສະນະການພັດທະນາໃໝ່. ການບັນລຸເປົ້າໝາຍຮັ່ງມີຮ່ວມກັນບໍ່ພຽງແຕ່ເປັນບັນຫາເສດຖະກິດເທົ່ານັ້ນ, ຍັງເປັນບັນຫາການເມືອງອັນສຳຄັນທີ່ພົວພັນເຖິງພື້ນຖານການກຳອຳນາດຂອງພັກ. ຄືດັ່ງຄຳບູຮານຈີນທີ່ກ່າວໄວ້ວ່າ: “ວິທີທີ່ດີໃນການບໍລິຫານປະເທດ, ກໍຕ້ອງເຮັດໃຫ້ປະຊາຊົນຮັ່ງມີສາກ່ອນ.”
ສະພາບການພັດທະນາໃໝ່ຄື: ສ້າງສະພາບການພັດທະນາໃໝ່ທີ່ຖືຮອບໝູນວຽນເສດຖະກິດພາຍໃນເປັນຕົ້ນຕໍ ແລະໃຫ້ຮອບໝູນວຽນເສດຖະກິດທັງພາຍໃນແລະສາກົນຊ່ວຍຊູຍູ້ໜູນກັນ. ນີ້ແມ່ນທາງເລືອກຍຸດທະສາດຂອງຈີນ. ຂໍກຸນແຈໃນການສ້າງສະພາບການພັດທະນາໃໝ່ແມ່ນຂຶ້ນຢູ່ກັບຮອບໝູນວຽນເສດຖະກິດທີ່ເຄື່ອນໄຫວຢ່າງໂລ່ງລຽນດີ. ມີພຽງແຕ່ອີງໃສ່ສະພາບຕົວຈິງຂອງຕົນ, ເຮັດໃຫ້ຮອບໝູນວຽນເສດຖະກິດພາຍໃນສາມາດເຄື່ອນໄຫວໄດ້ຢ່າງໂລ່ງລຽນດີເທົ່ານັ້ນ ຈິ່ງຈະສາມາດຍືນຍົງຄົງຕົວແລະພັດທະນາຕໍ່ໄປໄດ້ຢ່າງມີຊີວິດຊີວາສະເໝີຕົ້ນສະເໝີປາຍບໍ່ວ່າສະຖານະການສາກົນຈະຜັນແປໄປແນວໃດກໍຕາມ.
ຄຳເຫັນ
0