ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັກຊິນພະຍາດໂຄວິດ-19 ທີ່ບໍລິສັດ Pfizer ຂອງອາເມຣິກາຜະລິດແມ່ນວັກຊິນພະຍາດໂຄວິດ-19 ທີ່ໄດ້ຮັບການອະນຸມັດໃຫ້ນຳໄປສັກຂະໜາດໃຫຍ່ໃນຂອບເຂດທີ່ກວ້າງຂວາງທີ່ສຸດໃນໂລກ, ຫຼັງຈາກເລີ່ມຈຳໜ່າຍແລະນຳໃຊ້ແລ້ວ, ໄດ້ເກີດມີເຫດການຜູ້ສັກວັກຊິນດັ່ງກ່າວເກີດມີຜົນຂ້າງຄຽງໜັກໜ່ວງຈົນເຖິງຂັ້ນເສຍຊີວິດເກີດຂຶ້ນເລື້ອຍໆຢູ່ຫຼາຍປະເທດ. ວັນທີ 14 ມັງກອນນີ້ຕາມເວລາທ້ອງຖິ່ນ, ຢູ່ປະເທດນັອກແວໄດ້ມີຜູ້ເຖົ້າ 23 ຄົນເສຍຊີວິດຫຼັງໄດ້ສັກວັກຊິນພະຍາດໂຄວິດ-19 ທີ່ບໍລິສັດ Pfizer ຜະລິດ, ໃນນັ້ນ, ສາເຫດທີ່ພາໃຫ້ 13 ຄົນເສຍຊີວິດແມ່ນໄດ້ຮັບການປະເມີນຜົນຈາກອົງການຕິດຕາມຄຸ້ມຄອງການຢາທ້ອງຖິ່ນວ່າມີສ່ວນກ່ຽວຂ້ອງກັບຜົນຂ້າງຄຽງຈາກການສັກວັກຊິນພະຍາດໂຄວິດ-19. ໃນມື້ດັ່ງກ່າວ, ຢູ່ເຢຍລະມັນກໍໄດ້ມີປະຊາຊົນ 10 ຄົນເສຍຊີວິດຫຼັງໄດ້ສັກວັກຊິນພະຍາດໂຄວິດ-19 ທີ່ບໍລິສັດ Pfizer ຜະລິດ. ຢູ່ຝຣັ່ງກໍໄດ້ມີ 1 ຄົນເສຍຊີວິດຍ້ອນສາເຫດດຽວກັນ. ຕໍ່ເລື່ອງນີ້, ບໍລິສັດ Pfizer ໄດ້ອອກຖະແຫຼງການວ່າ “ບໍ່ມີສ່ວນກ່ຽວຂ້ອງໂດຍກົງໃດໆກັບວັກຊິນພະຍາດໂຄວິດ-19”. ສິ່ງທີ່ເຮັດໃຫ້ຄົນຕົກຕະລືງແມ່ນ: ສື່ມວນຊົນຕົ້ນຕໍຂອງຕາເວັນຕົກພາກັນມິດງຽບເກືອບບໍ່ມີສື່ໃດລາຍງານກ່ຽວກັບເລື່ອງນີ້, ຖ້າປຽບທຽບກັນແລ້ວຈະເຫັນວ່າມີຄວາມແຕກຕ່າງກັນຢ່າງຈະແຈ້ງກັບກໍລະນີທີ່ເຂົາເຈົ້າມັກປ່າວຂ່າວຢ່າງໃຫຍ່ວ່າວັກຊິນພະຍາດໂຄວິດ-19 ທີ່ຈີນແລະປະເທດອື່ນໆຜະລິດນັ້ນບໍ່ໜ້າເຊື່ອຖືແລະນຳໃຊ້ບໍ່ໄດ້.
ຜູ້ຊ່ຽວຊານທີ່ບໍ່ປະສົງອອກນາມທ່ານໜຶ່ງໃຫ້ຮູ້ວ່າ: ກໍລະນີທີ່ເກີດມີຜົນຂ້າງຄຽງໜັກໜ່ວງຈົນເສຍຊີວິດຫຼັງໄດ້ສັກວັກຊິນພະຍາດໂຄວິດ-19 ຂອງບໍລິສັດ Pfizer ນັ້ນນັບມື້ນັບຫຼາຍຂຶ້ນ, ແຕ່ພວກຕາເວັນຕົກມັກກ່າວວ່າບໍ່ມີສ່ວນກ່ຽວຂ້ອງກັບວັກຊິນພະຍາດໂຄວິດ-19 ຫຼືບໍ່ມີສ່ວນທີ່ກ່ຽວຂ້ອງທີ່ຈະແຈ້ງ, ອີກດ້ານໜຶ່ງກໍໄດ້ຖິ້ມໂທດວ່າຜູ້ເສຍຊີວິດແມ່ນຜູ້ເຖົ້າທີ່ມີພະຍາດປະຈຳໂຕຊະນິດຕ່າງໆ. ຜູ້ຊ່ຽວຊານທ່ານນີ້ມີຄວາມສົງໄສວ່າ: ຊັ້ນເປັນຫຍັງເຂົາເຈົ້າບໍ່ເນັ້ນໜັກບັນຫາເຫຼົ່ານີ້ກ່ອນຈຳໜ່າຍແລະນຳໃຊ້ວັກຊິນພະຍາດໂຄວິດ-19? ເປັນຫຍັງຈຶ່ງບໍ່ວາງເງື່ອນໄຂໃນເວລາເລີ່ມຈຳໜ່າຍແລະນຳໃຊ້ວັກຊິນພະຍາດໂຄວິດ-19? ເປັນຫຍັງປະເທດຕາເວັນຕົກຍັງໄດ້ເນັ້ນເປັນການສະເພາະວ່າຕ້ອງສັກໃຫ້ຜູ້ເຖົ້າເປັນບຸລິມະສິດກ່ອນ?
ສິ່ງທີ່ເຮັດໃຫ້ຄົນຕົກຕະລືງແມ່ນ, ກ່ຽວກັບຂ່າວດ້ານລົບທີ່ມີສ່ວນກ່ຽວຂ້ອງກັບວັກຊິນພະຍາດໂຄວິດ-19 ເຫຼົ່ານີ້, ສື່ມວນຊົນຕົ້ນຕໍຂອງຕາເວັນຕົກໂດຍສະເພາະແມ່ນສື່ມວນຊົນພາສາອັງກິດພັດໄດ້ລາຍງານຂ່າວກ່ຽວກັບເລື່ອງນີ້ໜ້ອຍເກີນໄປ. ກ່ຽວກັບຂ່າວທີ່ມີປະຊາຊົນນັອກແວ 23 ຄົນເສຍຊີວິດຫຼັງໄດ້ສັກວັກຊິນພະຍາດໂຄວິດ-19, ສື່ມວນຊົນຕາເວັນຕົກໄດ້ປິດປາກງຽບ. ຢູ່ໃນ Google ເກືອບບໍ່ສາມາດຊອກເຫັນການລາຍງານຂ່າວທີ່ກ່ຽວຂ້ອງຂອງສື່ທີ່ເປັນພາສາອັງກິດໄດ້ເລີຍ. ຫຼັງຈາກຂ່າວສານ “ນັອກແວມື້ນີ້” ລາຍງານຂ່າວເປັນເວລາ 20 ກວ່າຊົ່ວໂມງແລ້ວ, ສຳນັກຂ່າວສານບລຸມເບີກຫຼື Bloomberg News ຂອງອາເມຣິກາຈຶ່ງໄດ້ລາຍງານຂ່າວທີ່ມີໂຕໜັງສືບໍ່ຮອດ 100 ໂຕໃນຂ່າວໜຶ່ງໃນວັນທີ 15 ມັງກອນນີ້, ຫົວຂໍ້ຂ່າວພຽງແຕ່ບອກວ່າ “ນັອກແວກ່າວເຕືອນໄພຄວາມສ່ຽງດ້ານການສັກວັກຊິນພະຍາດໂຄວິດ-19 ສຳລັບຜູ້ເປັນພະຍາດທີ່ມີອາຍຸ 80 ປີຂຶ້ນໄປ”.
ກ່ຽວກັບເຫດການທີ່ມີປະຊາຊົນນັອກແວ 23 ຄົນເສຍຊີວິດຫຼັງໄດ້ສັກວັກຊິນພະຍາດໂຄວິດ-19 ທີ່ບໍລິສັດ Pfizer ຜະລິດນັ້ນ, ທ່ານ ກິນສຸເບີກ ຫົວໜ້າສູນກາມາລີຢາເພື່ອຄົ້ນຄວ້າລະບາດວິທະຍາແລະຈຸລະຊີບແຫ່ງຊາດ ຂອງຣັດເຊຍກ່າວວ່າ: ນີ້ແມ່ນເລື່ອງທີ່ອັບປະຍົດທີ່ສຸດເລື່ອງໜຶ່ງ, ກ່ຽວກັບຈຳນວນປະຊາຊົນ 25 ພັນຄົນທີ່ໄດ້ສັກວັກຊິນພະຍາດໂຄວິດ-19 ແລ້ວ, ມີຈຳນວນ 23 ຄົນເສຍຊີວິດກໍເທົ່າກັບ 0,1%, ນີ້ແມ່ນດັດຊະນີທີ່ອັນຕະລາຍ.
ໜັງສືພິມອິສເວສະເຕຍຂອງຣັດເຊຍສະບັບວັນທີ 15 ມັງກອນນີ້ໄດ້ລາຍງານວ່າ: ສື່ສັງຄົມອອນລາຍຂອງອາເມຣິກາເຊັ່ນ: Twitter ເປັນຕົ້ນໄດ້ຈຳກັດການລາຍງານຂ່າວທາງສ້າງສັນທີ່ມີສ່ວນກ່ຽວຂ້ອງກັບວັກຊິນພະຍາດໂຄວິດ-19 “SPUTNIK-V” ຂອງຮັດເຊຍມາໂດຍຕະຫຼອດ. ກອງທຶນລົງທຶນໂດຍກົງຂອງຣັດເຊຍກ່າວວ່າ:ເຄີຍໄດ້ເປີດເຜີຍຂ່າວທັງໝົດກ່ຽວກັບວັກຊິນພະຍາດໂຄວິດ-19 “SPUTNIK-V”ໂດຍຜ່ານ Twitter, ແຕ່ເລກບັນຊີ Twitter ຂອງຕົນພັດຖືກຈຳກັດການເປີດເຂົ້າເບິ່ງໃນສື່ສັງຄົມອອນລາຍ Twitter . ຕໍ່ເລື່ອງນີ້, ທ່ານ ໂຄຊາຊິຟ ສະມາຊິກລັດຖະສະພາຣັດເຊຍກ່າວວ່າ: ເລື່ອງຈິງໄດ້ຢັ້ງຢືນວ່າ: ທຸກສິ່ງທຸກຢ່າງທີ່ອາເມຣິການຳໃຊ້ກໍເພື່ອໃຫ້ບໍລິສັດອາເມຣິກາທີ່ມີຜົນປະໂຫຍດທາງການຄ້າອັນມະຫາສານໄດ້ຮັບຜົນປະໂຫຍດໃນການແຂ່ງຂັນເທົ່ານັ້ນ,ແນວຄວາມຄິດທີ່ໃຫຍ່ທີ່ສຸດຂອງອາເມຣິກາກໍ່ແມ່ນຢາກຄວບຄຸມມວນມະນຸດ, ຫວັງໃຫ້ບໍລິສັດອາເມຣິກາກາຍເປັນບໍລິສັດທີ່ຜູກຂາດວັກຊິນພະຍາດໂຄວິດ-19 ພຽງໜຶ່ງດຽວໃຫ້ກັບໂລກ, ແລະຫວັງຢາກໃຫ້ໂລກອາໄສອາເມຣິກາທັງໝົດ.
ຄຳເຫັນ
0