ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນ 4 ປີຜ່ານມາ, ອາເມຣິການອກຈາກໄດ້ປ່ຽນແປງນະໂຍບາຍການຄ້າຂອງຕົນທີ່ປະຕິບັດມາເປັນເວລາ 70 ປີ, ປ່າວປະກາດວ່າ “ອາເມຣິກາຕ້ອງມາກ່ອນ, ຝືນກະແສໂລກາພິວັດ”ແລະດຳເນີນການຂວ້ຳບາດດ້ານພາສີອາກອນຕໍ່ປະເທດອື່ນໆໃນໂລກແລ້ວ, ເລື່ອງທີ່ລັດຖະບານໂດໂນ ທຣຳ ກໍ່ຂຶ້ນຫຼາຍທີ່ສຸດກໍ່ແມ່ນ “ຖອນຕົວອອກຈາກສັນຍາແລະອົງການຈັດຕັ້ງສາກົນຕ່າງໆ.”
ຫຼັງຈາກອາເມຣິກາໄດ້ຖອນຕົວອອກຈາກສັນຍາກ່ຽວກັບການພົວພັນຄູ່ຮ່ວມຂ້າມປາຊີຟິິກ(TPP)ໃນເດືອນມັງກອນປີ 2017ແລ້ວ, ກໍ່ນັບມື້ນັບມັກຖອນຕົວອອກຈາກສັນຍາຕ່າງໆຫຼາຍຂຶ້ນ. ໃນເວລາ 4 ປີຜ່ານມາ, ອາເມຣິກາໄດ້ຖອນຕົວອອກຈາກສັນຍາປາຣີ, ອົງການການສຶກສາ,ວິທະຍາສາດແລະວັດທະນະທຳຂອງສະຫະປະຊາຊາດ(ອຸຍແນສໂກ), ສັນຍາວ່າດ້ວຍການອົບພະຍົບສາກົນ, ສັນຍາຮອບດ້ານກ່ຽວກັບອາວຸດນິວເຄລຍອີຣານ, ສະພາມົນຕີສິດທິມະນຸດຂອງອົງການສະຫະປະຊາຊາດ, ສົນທິສັນຍາວ່າດ້ວຍຂີປະນາວຸດໄລຍະກາງ, ສົນທິສັນຍາກ່ຽວກັບການເປີດນ່ານຟ້າກໍຄືອົງການອະນາໄມໂລກ. ອາເມຣິກາໄດ້ມີການກະທຳຕາມລຳພັງໃຈ,ບໍ່ເອົາຫົວຊານຳໜ້າທີ່ຄວາມຮັບຜິດຊອບທີ່ມີຕໍ່ສາກົນ,ປະຕິບັດຕາມລັດທິຝ່າຍດຽວໝົດທຸກເລື່ອງ.
ແມ່ນແທ້,ການຖອນອອກຈາກສັນຍາສາກົນຕ່າງໆມີຜົນດີຕໍ່ຜົນປະໂຫຍດລັດທິຝ່າຍດຽວແລະລັດທິມະຫາອຳນາດຂອງອາເມຣິກາ, ແຕ່ການກະທຳແບບນີ້ໄດ້ທຳລາຍອົງການຈັດຕັ້ງສາກົນແລະລະບຽບການສາກົນຕ່າງໆທີ່ອາເມຣິກາເປັນຜູ້ນຳພາສ້າງຕັ້ງຂຶ້ນເອງ,ໄດ້ທຳລາຍຄວາມເປັນລະບຽບຮຽບຮ້ອຍຂອງສາກົນ. ຫຼັງຈາກຖອນອອກຈາກສັນຍາສາກົນຕ່າງໆແລ້ວ ອາເມຣິກາກໍເລີຍໄດ້ເສຍສິດສະແດງຄວາມຄິດເຫັນທີ່ເຄີຍມີໃນສາກົນ, ຈົນເຖິງຂັ້ນໄດ້ທຳລາຍຄວາມໄວ້ເນື້ອເຊື່ອໃຈຈາກປະເທດພັນທະມິດຈຳນວນໜຶ່ງຂອງອາເມຣິກາເອງ,ເຮັດໃຫ້ອິດທິພົນໃນສາກົນຂອງອາເມຣິກາຖືກທຳລາຍ. ຈົນອະດີດລັດຖະມົນຕີກະຊວງການຕ່າງປະເທດອາເມຣິກາກໍເຄີຍໄດ້ກ່າວເປັນຫ່ວງວ່າ: “ພາບພົດທີ່ມີຕໍ່ສາກົນຂອງອາເມຣິການັບມື້ນັບຊຸດໂຊມລົງເຖິງລະດັບຕ່ຳສຸດ,ທົ່ວໂລກລ້ວນແຕ່ເຫັນເລື່ອງນີ້ເປັນເລື່ອງທີ່ເປັນຕາຫົວຂວັນ”.
ພາຍໃຕ້ຜົນກະທົບຈາກການແຜ່ລະບາດຂອງພະຍາດໂຄວິດ-19, ເສດຖະກິດອາເມຣິກາໄດ້ຮັບຜົນກະທົບຢ່າງຮຸນແຮງ, ຂະແໜງການທ່ອງທ່ຽວກໍ່ໄດ້ເກີດມີຜົນເສຍຫາຍຢ່າງໜັກໜ່ວງ. ເພື່ອກະຕຸ້ນເສດຖະກິດ, ອາເມຣິກາໄດ້ສະເໜີວ່າຢາກເຂົ້າຮ່ວມອົງການທ່ອງທ່ຽວໂລກຄືນໃໝ່, ແຕ່ໄດ້ຖືກປະຕິເສດຈາກອົງການສະຫະປະຊາຊາດ, ສະນັ້ນຈຶ່ງເຫັນໄດ້ວ່າ:ອາເມຣິກາມີແຕ່ໄດ້ຮັບຜົນກຳທີ່ຕົນໄດ້ກະທຳໄວ້ຢ້ອນຫຼັງ.
ເພື່ອສ້າງພາບພົດທີ່ດີຕໍ່ສາກົນຄືນໃໝ່, ທ່ານ ໂຈ ໄບເດັນ ປະທານາທິບໍດີອາເມຣິກາຄົນໃໝ່ໄດ້ປະກາດໃນມື້ທຳອິດທີ່ທ່ານຂຶ້ນຮັບຕຳແໜ່ງວ່າ: ຈະຟື້ນຟູການພົວພັນລະຫວ່າງອາເມຣິກາກັບອົງການອະນາໄມໂລກໃນທັນທີ, ພ້ອມທັງຍອມຮັບວ່າອົງການອະນາໄມໂລກມີຄວາມສຳຄັນທີ່ສຸດໃນການປະສານງານແລະຮັບມືກັບວິກິດການຂອງໂລກ. ເຖິງວ່າທ່ານ ໂຈ ໄບເດັນໄດ້ປ່ຽນຄຳຂວັນຈາກອາເມຣິກາຕ້ອງມາກ່ອນເປັນອາເມຣິກາຈະກັບມາ,ປະຖິ້ມເສັ້ນທາງລັດທິຝ່າຍດຽວແລະເຂົ້າຮ່ວມສັນຍາຄືນໃໝ່ກໍຕາມ, ແຕ່ກໍບໍ່ສາມາດຟື້ນຟູພາບພົດທີ່ມີຕໍ່ສາກົນຂອງອາເມຣິກາທີ່ທ່ານ ໂດໂນ ທຣຳ ໄດ້ເປັນຜູ້ທຳລາຍໄປແລ້ວນັ້ນໃນໄລຍະທ່ານຄອງອຳນາດ.
ອາເມຣິກາເລືອກເຂົ້າຮ່ວມສັນຍາແລະອົງການຈັດຕັ້ງສາກົນຄືນໃໝ່ແມ່ນມີຈຸດປະສົງເພື່ອສ້າງພາບພົດຂອງການເປັນຜູ້ນຳຂອງອາເມຣິກາຄືນໃໝ່, ແຕ່ວ່າ, ຖ້າຢາກຟື້ນຟູອິດທິພົນຂອງອາເມຣິກາຄືນໃໝ່ກໍບໍ່ແມ່ນເລື່ອງງ່າຍດາຍ, ຖານະຜູ້ນຳຂອງອາເມຣິກາກໍ່ບໍ່ສາມາດຟື້ນຟູຄືນໃໝ່ໄດ້ຢ່າງງ່າຍດາຍ. ທົ່ວໂລກພວມເລັ່ງລັດການປ່ຽນແປງໃໝ່,ການພົວພັນໃນສາກົນກໍຈະເກີດມີການປ່ຽນແປງທີ່ສອດຄ່ອງກັບສະພາບການ. ທີ່ຈິງແລ້ວ, ໃນຫຼາຍປີຜ່ານມາ, ການພົວພັນໃນສາກົນໄດ້ພັດທະນາເປັນແບບຫຼາຍຂົ້ວຢ່າງຕໍ່ເນື່ອງ. ເມື່ອຜ່ານການທົດສອບຈາກການແຜ່ລະບາດຂອງພະຍາດໂຄວິດ-19 ໃນ 1 ປີຜ່ານມາ, ທົ່ວໂລກຍິ່ງຕ້ອງສ້າງການພົວພັນຄູ່ຮ່ວມມືແບບໃໝ່ຊະນິດໜຶ່ງ, ການພົວພັນສາກົນຕ້ອງການການເຂົ້າຮ່ວມຂອງອາເມຣິກາ, ແຕ່ກໍ່ຈະບໍ່ຖືຜົນປະໂຫຍດຂອງອາເມຣິກາຢູ່ເໜືອໝູ່. ກ່ຽວກັບການທີ່ອາເມຣິກາຢາກກັບຄືນສູ່ອົງການຈັດຕັ້ງສາກົນບາງແຫ່ງໃນຕໍ່ໜ້ານີ້, ພວກເຮົາຄອງຄອຍການກະທຳທີ່ແທ້ຈິງຂອງອາເມຣິກາຫຼາຍກວ່າ.
ຄຳເຫັນ
0