蒙龙

ຕາລາງລາຍການ FM93Mhz

ດາວໂຫຼດ App CRI-FM93 ລະບົບ IOS

ດາວໂຫຼດ App CRI-FM93 ລະບົບ Android

FM93

ເສດ​ຖະ​ກິ​ດ​ຈີນ​ປາ​ກົດ​ມີ​ຄວາມ​ສາ​ມາດ​ບົ່ມ​ຊ້ອນ​ໃນ​ດ້ານ​ການ​ພັດ​ທະ​ນາ​​ທ່າມ​ກາງສະ​ພາບ​​ຄວາມຫຍຸ້ງ​ຍາກ

2021-01-29 10:11:42 CRI

ໃນຫຼາຍ​ປີ​ມາ​ນີ້, ການ​ລົງ​ທຶນ​​ຂອງຕ່າງ​ປະ​ເທດ​ຢູ່​ຈີນ​ໄດ້​ເປັນ​ອັນ​ດັບ​ໜຶ່ງ​ໃນ​ກຸ່ມປະ​ເທດ​ພວມ​ພັດ​ທະ​ນາ ແລະ ເປັນ​ອັນ​ດັບ​ສອງ​ໃນ​ໂລກ​ມາ​ໂດຍ​ຕະຫຼອດ. ຈົນ​ຮອດ​ປີ​ຜ່ານ​ມາ, ສະ​ພາບ​ການ​ດັ່ງ​ກ່າວ​ເກີດ​ມີ​ການ​ປ່ຽນ​ແປງ. ບົດ​ລາຍ​ງານ​​ປະ​ຈຳ​ປີ 2020 ຂອງ​ອົງ​ການ​ການ​ຄ້າ​ແລະ​ການ​ພັດ​ທະ​ນາ​ຂອງ​ອົງ​ກາ​ນ​ສະ​ຫະ​ປະ​ຊາ​ຊາດ​​ໄດ້ສະ​ແດງ​ໃຫ້​ເຫັນ​ວ່າ: ປີ 2020, ການ​ລົງ​ທຶນ​​​ຂອງຕ່າງ​ປະ​ເທດ​ຢູ່​ຈີນ​ມີ​ເຖິງ 163 ຕື້ໂດ​ລາ​ສະ​ຫະ​ລັດ ເຊິ່ງ​ໄດ້​ລື່ນ​ກາຍອາ​ເມ​ຣິ​ກາ​ທີ່​​ມີ 134 ຕື້​ໂດ​ລາ​ສະ​ຫະ​ລັດ ແລະ ກາຍ​ເປັນ​ປະ​ເທດ​ທີ່​ມີ​ການ​ລົງ​ທຶນ​​ຂອງ​ຕ່າງ​ປະ​ເທດຫຼາຍ​ທີ່​ສຸດ​ໃນ​ໂລກ.

ປີ 2015, ການ​ລົງ​ທຶນ​​​ຂອງ​ຕ່າງ​ປະ​ເທດ​ຢູ່​ອາ​ເມ​ຣິ​ກາ​ໄດ້​ສ້າງ​ສະ​ຖິ​ຕິ​ສູງ​ສຸດ ຄື 440 ຕື້​ໂດ​ລາ​ສະ​ຫະ​ລັດ ແລ້ວ​ຄ່ອຍໆຫຼຸດ​ໜ້ອຍ​ຖອຍ​ລົງ, ນີ້​ແມ່ນ​ຍ້ອນ​ວ່າ: ທ່ານ​ໂດ​ໂນ ທ​ຣຳ ປະ​ທາ​ນາ​ທິ​ບໍ​ດີ​ອາ​ເມ​ຣິ​ກາ​ໄດ້​ປະ​ຕິ​ບັດ​ນະ​ໂຍ​ບາຍ​ການ​ຄ້າ​ແບບ​ລັດ​ທິ​ຝ່າຍ​ດຽວ​ ເຊິ່ງໄດ້​ທຳ​ລາຍ​ຜົນ​ປະ​ໂຫຍດ​​ດ້ານ​ການ​ລົງ​ທຶນ​ຂອງ​ຕ່າງ​ປະ​ເທດ ແລະ ເຮັດ​ໃຫ້​ຍອດ​ການ​ລົງ​ທຶນ​ຢູ່​ອາ​ເມ​ຣິ​ກາ​ຂອງ​ນັກ​ທຸ​ລະ​ກິດ​ຕ່າງ​ປະ​ເທດ​​ຢູ່​ອາ​ເມ​ຣິ​ກາຫຼຸດ​ລົງ​ໄວ​ກວ່າ​ເກົ່າ. ປີ 2020, ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ໄດ້​ສົ່ງ​ຜົນ​ກະ​ທົບ​ຕໍ່​ເສດ​ຖະ​ກິດ​ຂອງ​ບັນ​ດາ​ປະ​ເທດ​ໃນ​ໂລກ​ຢ່າງ​ໜັກ​ໜ່ວງ, ການ​ລົງ​ທຶນ​​ໂດຍ​ກົງ​ຂອງ​ຕ່າງ​ປະ​ເທດ​ທີ່​ມີ​ຕໍ່​ປະ​ເທດ​ຕ່າງໆ​ໃນ​ໂລກ​ໄດ້ຫຼຸດ​ລົງ 42% ແລະ ເປັນ​ລະ​ດັບ​ຕ່ຳ​ສຸດ​ນັບ​ແຕ່​ຊຸມ​ປີ 1990 ເປັນ​ຕົ້ນ​ມາ. ນອກ​​ຈາກນີ້, ​ຍ້ອນອາ​ເມ​ຣິ​ກາ​ບໍ່​ສາ​ມາດ​ຄວບ​ຄຸມ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19​ໄດ້, ​ຈິ່ງ​ເຮັດ​ໃຫ້ເສດ​ຖະ​ກິດ​ຊຸດ​ໂຊມ​ລົງ​ຢ່າງ​ໜັກ​ໜ່ວງ, ເຮັດ​ໃຫ້​ການ​ລົງ​ທຶນ​ຂອງ​ວິ​ສາ​ຫະ​ກິດ​ຕ່າງ​ປະ​ເທດຢູ່​ອາ​ເມ​ຣິ​ກາ​ຫຼຸດ​ລົງ 49%, ຈິ່ງ​​ເປັນ​ສາຍ​ເຫດເຮັດ​ໃຫ້​ການ​ລົງ​ທຶນ​​ຂອງ​ຕ່າງ​ປະ​ເທດ​ຢູ່​ຈີນລື່ນ​ກາຍ​ອາ​ເມ​ຣິ​ກາ ແລະ ​ກາຍ​ເປັນ​ອັນ​ດັບ​ໜຶ່ງ​ໃນ​ການ​ດຶງ​ດູດ​ການ​ລົງ​ທຶນ​​ຂອງ​ຕ່າງ​ປະ​ເທດ.

​ການ​ລົງ​ທຶນ​ຕ້ອງ​ສະ​ແຫວງ​ຫາ​ຜົນ​ກຳ​ໄລ, ເສດ​ຖະ​ກິດ​ບ່ອນ​ໃດ​ມີ​ຄວາມ​ຄຶກ​ຄື້ນ​ມີ​ຊີ​ວິດ​ຊີ​ວາ ແລະ ມີ​ຄວາມ​ສາ​ມາດ​ບົ່ມ​ຊ້ອນ​ດ້ານ​ການ​ພັດ​ທະ​ນາ, ​ເງິນ​ລົງ​ທຶນ​ກໍ​ຈະ​ໄຫຼ​ໄປ​ສູ່​​ບ່ອນ​ນັ້ນ.

ນັບ​ແຕ່​ເກີດ​​ມີການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ເປັນ​ຕົ້ນ​ມາ, ຈີນ​ສາ​ມາດປ້ອງ​ກັນ​ແລະ​ຄວບ​ຄຸມ​ການ​ແຜ່​ລະ​ບາດ​ຂອງ​ພະ​ຍາດ​ໄວ້​ໄດ້​ຢ່າງ​ບັງ​ເກີດ​ຜົນ ແລະ ​ສາ​ມາດຟື້ນ​ຟູ​ການ​ຜະ​ລິດ ແລະ ຊີ​ວິດ​ການ​ເປັນ​ຢູ່​​ສູ່​ສະ​ພາບ​ປົກ​ກະ​ຕິ​ໄດ້​ໄວ​ຢ່າງ​ເປັນ​ລະ​ບຽບ​ຮຽບ​ຮ້ອຍ, ນີ້​ໄດ້​ຊຸກ​ຍູ້​ໃຫ້​ເສດ​ຖະ​ກິດຟື້ນ​ຟູ​ໄດ້​ໃນ​ເວ​ລາ​ສັ້ນ. ໂດ​ຍ​ຜ່ານ​ຈາກ​ສະ​ພາບ​ການ​ພັດ​ທະ​ນາ​ທີ່​ເນັ້ນ​ໃສ່​ການ​ໝູນ​ວຽນ​ພາຍ​ໃນ​ເປັນຫຼັກ ແລະ ການ​ໝູນ​ວຽນ​ທັງພາຍ​ໃນ​ແລະ​​ສາ​ກົນ​ທີ່​ຊ່ວຍ​ຊູ​ຍູ້​ໜູນ​ກັນ, ຈີນ​ໄດ້​ບັນ​ລຸ​ການ​ພັດ​ທະ​ນາ​ເສດ​ຖະ​ກິດ​ທີ່​ມີ​ຄຸນ​ນະ​ພາບ​ສູງ. ເສດ​ຖະ​ກິດ​ຈີນ​ໄດ້​​ພິກ​ຈາກ​ສະ​ພາບຄວາມ​ກົດ​ດັນ​ຢ່າງ​ໜັກ​ໜ່ວງ​ໃນ​ໄລ​ຍະ​ຕົ້ນ​​ປີ​ກໍ​ສາ​ມາດ​ຟື້ນ​ຄືນ​​ໄດ້ໃນ​ໄຕ​ມາດ​ທີ 3 ຂອງ​ປີ​ຜ່ານ​ມາ, ແລ້ວ​ໄດ້​ບັນ​ລຸ​ການ​ບຸກ​ທະ​ລຸ​ໃໝ່ ເຊິ່ງ​ໄດ້​ສ່ອງ​ແສງ​ໃຫ້​ເຫັນ​ເຖິງ​ຄວາມ​​ທົນ​ແທນແໜ້ນ​ໜຽວ​​ທາງ​ດ້ານເສດ​ຖະ​ກິດ ແລະ ຄວາມ​ສາ​ມາດ​ບົ່ມ​ຊ້ອນ​ດ້ານ​ການ​ພັດ​ທະ​ນາ​ອັນ​ມະ​ຫາ​ສານ. ຫວ່າງ​ມໍ່ໆ​ມາ​ນີ້, ອົງ​ກາ​ນ​ສະ​ຖິ​ຕິ​ແຫ່ງ​ຊາດ​ຈີນ​​ໄດ້ເປີດ​ເຜີຍ​ວ່າ: ​ລວມຍອດ​ຜະ​ລິດ​​ຕະ​ພັນພາຍ​ໃນ​ ຫຼື GDP ຂອງ​ຈີນ​ໃນ​ປີ 2020 ໄດ້​​ບັນ​ລຸຫຼາຍກວ່າ 1 ແສນ​ຕື້ຢວນ ເຊິ່ງ​ໄດ້​ພິ​ສູດ​ໃຫ້​ເຫັນ​ຢ່າງ​ຈະ​ແຈ້ງວ່າ: ພາຍ​ໃຕ້​ສະ​ພາບ​ການ​ທີ່​ພະ​ຍາດ​ໂຄວິດ-19 ແຜ່​ລະ​ບາດ​ໃນ​ຂອບ​ເຂດ​ທົ່ວ​ໂລກ​ຢ່າງ​ໜັກ​ໜ່ວງ, ​ແຕ່ເສດ​ຖະ​ກິດ​ຈີນ​​ສາ​ມາດ​ຜ່ານ​ຜ່າ​ການ​ທົດ​ສອບ​ຈາກ​ຜົນ​ກະ​ທົບ​ໄດ້​ເປັນ​ຢ່າງ​ດີ, ຄາດ​ວ່າ: ເສ​ດ​ຖະ​ກິດ​ຈີນ​ໃນ​ປີ​ນີ້​ຈະ​ເຕີບ​ໂຕ​ຕື່ມ​ອີກ, ຈີນ​ໄດ້​ປະ​ຕິ​ບັດ​ມາດ​ຕະ​ການ​ປ້ອງ​ກັນ​ແລະ​ຄວບ​ຄຸມ​ພະ​ຍາດ​ທີ່​ເຂັ້ມ​ງວດ ເຊິ່ງຈະ​ເພີ່ມ​ຄວາມ​ໝັ້ນ​ໃຈ​​ໃຫ້ນັກ​ລົງ​ທຶນ​ຕ່າງ​ປະ​ເທດ​ທີ່​ມີ​ຕໍ່​​ປະ​ເທດຈີນ.

ປີ 2020, ເຖິງວ່າ​ໄດ້​ຮັບ​ຜົນ​ກະ​ທົບ​ຈາກ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ຢ່າງ​ຕໍ່​ເນື່ອງ​ກໍ​ຕາມ, ແຕ່​ຈີນກໍໄດ້​ສືບ​ຕໍ່​ເປີດ​ປະ​ຕູ​ສູ່​ພາຍນອກ​ຢ່າງ​ໜັກ​ແໜ້ນ, ມີ​ຈັງ​ຫວະນັບ​ມື້​ນັບ​ໄວ​ຂຶ້ນ ແລະ ມີ​ຄຸນ​ນະ​ພາບ​ນັບ​ມື້​ນັບ​ສູງ​ຂຶ້ນ. ຄຽງ​ຄູ່​ກັບ​ຈີນ​ໄດ້​ປັບ​ປຸງ​ນະ​ໂຍ​ບາຍ​ດຶງ​ດູດ​ການ​ລົງ​ທຶນ​ຈາກ​ຕ່າງ​ປະ​ເທດ ແລະ ສະ​ພາບ​ແວດ​ລ້ອມ​ການ​ລົງ​ທຶນ​​ດີ​ຂຶ້ນ​ເລື້ອຍໆ, ບວກ​ກັບ​ຈີນ​​ສາ​ມາດ​ຄວບ​ຄຸມ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ໄວ້​ໄດ້​ເປັນ​ຢ່າງ​ດີ, ນັກ​ທຸ​ລະ​ກິດ​ຕ່າງ​ປະ​ເທດ​ຍ່ອມ​ຈະ​ເພີ່ມ​ການ​ລົງ​ທຶນ​ຢູ່​ຈີນນັບ​ມື້​ນັບຫຼາຍ​ຂຶ້ນ​ຢ່າງ​ແນ່ນອນ.

ຄຳ​ເຫັນ

0