ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
“ວັນບຸນ”
ໃນງານລາຕີສິລະປະສະຫຼອງບຸນກຸດຈີນ2021ຂອງວິທະຍຸໂທລະພາບສູນກາງຈີນຫຼື CMG ໄດ້ສະແດງລາຍການຟ້ອນລຳທຳເພງທີ່ມີຊື່ວ່າ “ວັນບຸນ” ເຊິ່ງປະກອບດ້ວຍການສະແດງການຟ້ອນລຳທຳເພງອາຟຣິກາ, ການຟ້ອນໄມ້ຄ້ອນ ຂອງເອຢິບບູຮານກັບການຟ້ອນແບບຕາເວັນອອກຫຼືເອີ້ນວ່າການຟ້ອນໜ້າທ້ອງ,ການຟ້ອນຄັສຕາເນັດຂອງແອັສປາຍກັບການຟ້ອນຈັງຫວະຕັງໂກຂອງອາກຊັງຕິນ, ການຟ້ອນຊົນເຜົ່າຣັດເຊຍ ແລະການຟ້ອນແພແດງຈີນ, ຖືວ່າໄດ້ສະແດງໃຫ້ເຫັນສີສັນພິເສດທີ່ສວຍງາມຂອງແຕ່ລະປະເທດ ທັງສ່ອງແສງໃຫ້ເຫັນເຖິງຄວາມສວຍງາມທີ່ປະສົມປະສານກັນໄດ້ຢ່າງກົມກຽວ.
ຈີນມີຄຳບູຮານວ່າ: “ແຕ່ລະຊາດຕ່າງກໍຮັກສາເອກະລັກວັດທະນະທຳຂອງຕົນ, ການເຄົາລົບ ແລະ ຍອມຮັບວັດທະນະທຳຂອງຊາດອື່ນ, ວັດທະນະທຳທີ່ດີງາມຂອງແຕ່ລະຊາດກໍສາມາດປະສົມປະສານເຂົ້າກັນໄດ້, ທົ່ວໂລກມີຄວາມຈະເລີນຮຸ່ງເຮືອງສວຍງາມຮ່ວມກັນ.” ຄຳນີ້ໝາຍເຖິງວ່າ: ວັດທະນະທຳຂອງແຕ່ລະຊົນຊາດຕ່າງກໍມີເອກະລັກພິເສດທີ່ໂດດເດັ່ນຂອງຊາດຕົນເຊິ່ງໄດ້ເຮັດໃຫ້ວັດທະນະທຳໂລກມີຄວາມອຸດົມສົມບູນ ເພື່ອຮ່ວມກັນຊຸກຍູ້ການພັດທະນາແລະສ້າງຄວາມຈະເລີນຮຸ່ງເຮືອງດ້ານອະລິຍະທຳຂອງມວນມະນຸດ. ມີພຽງແຕ່ຮັກສາຄວາມຫຼາກຫຼາຍດ້ານອະລິຍະທຳຂອງໂລກເທົ່ານັ້ນ, ໂລກນີ້ຈິ່ງຈະມີຄວາມອຸດົມສົມບູນທີ່ຫຼາກຫຼາຍສີສັນກວ່າເກົ່າ ແລະ ເຕັມໄປດ້ວຍຄວາມມີຊີວິດຊີວາ.
ຈີນໄດ້ນຳໃຊ້ແນວຄວາມຄິດທີ່ວ່າ “ເຄົາລົບແລະຍອມຮັບວັດທະນະທຳ ຂອງຊາດອື່ນ, ວັດທະນະທຳທີ່ດີງາມຂອງແຕ່ລະຊາດສາມາດປະສົມປະສານເຂົ້າກັນໄດ້” ເພື່ອແກ້ໄຂການພົວພັນລະຫວ່າງອະລິຍະທຳທີ່ຕ່າງກັນ. ທ່ານສີຈິ້ນຜິງປະທານປະເທດຈີນເຄີຍໄດ້ກ່າວວ່າ: ແຕ່ລະອະລິຍະທຳລ້ວນແຕ່ເປັນສິ່ງຍອດຍິ່ງແຫ່ງຄວາມສວຍງາມ, ຕ່າງກໍໄດ້ສ່ອງແສງໃຫ້ເຫັນເຖິງຄວາມງາມຄວາມປານີດທີ່ປະດິດສ້າງຂຶ້ນມາ. ສິ່ງທີ່ດີງາມທຸກຢ່າງລ້ວນແຕ່ມີເອກະລັກທີ່ຄ້າຍຄືກັນ. ຄວາມມຸ້ງຫວັງຂອງຄົນເຮົາທີ່ມີຕໍ່ສິ່ງທີ່ດີງາມ, ບໍ່ວ່າກຳລັງໃດໆກໍບໍ່ສາມາດກີດຂວາງໄດ້! ອະລິຍະທຳຕ່າງໆແຕ່ໃດໆມາບໍ່ໄດ້ມີການປະທະກັນ, ສະນັ້ນ ຄວນມີແຕ່ສາຍຕາທີ່ຊື່ນຊົມຕໍ່ຄວາມສວຍງາມຂອງອະລິຍະທຳເທົ່ານັ້ນ. ພວກເຮົາຈຶ່ງຈະເຮັດໃຫ້ອະລິຍະທຳຂອງປະເທດຕົນເຕັມໄປດ້ວຍຄວາມມີຊີວິດຊີວາທັງຄວນສ້າງເງື່ອນໄຂໃຫ້ແກ່ການພັດທະນາອະລິຍະທຳຂອງປະເທດອື່ນ ເພື່ອເຮັດໃຫ້ “ດອກໄມ້ນາໆຊະນິດໃນສວນອະລິຍະທຳຂອງໂລກ”ເບັ່ງບານຢ່າງສວຍງາມນຳກັນ.
ຄຳເຫັນ
0