ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຜ່ານການສູ້ຊົນຢ່າງຕໍ່ເນື່ອງມາເປັນເວລາ 8 ປີ, ຈີນໄດ້ເຮັດສຳເລັດໜ້າທີ່ເປົ້າໝາຍໃນການແກ້ໄຂຂໍ້ຫຍຸ້ງຍາກເພື່ອລຶບລ້າງຄວາມທຸກຍາກໃນ ສະໄໝໃໝ່ຕາມເວລາກຳນົດ, ຈຳນວນປະຊາກອນຜູ້ທຸກຍາກຢູ່ໃນຊົນນະບົດ ໄດ້ຫຼຸດພົ້ນອອກຈາກຄວາມທຸກຍາກທັງໝົດຕາມມາດຖານໃນປັດຈຸບັນ, ເມືອງທຸກຍາກໄດ້ຫຼຸດພົ້ນອອກຈາກຄວາມທຸກຍາກທັງໝົດ, ໄດ້ລຶບລ້າງຄວາມທຸກຍາກເດັດຖານແລະຄວາມທຸກຍາກທົ່ວໄປໃນເຂດແຄວ້ນ, ປະຊາກອນທີ່ທຸກຍາກເກືອບ 100 ລ້ານຄົນໄດ້ຫຼຸດພົ້ນອອກຈາກຄວາມທຸກຍາກທັງໝົດ, ຈີນໄດ້ຮັບໄຊຊະນະທີ່ສຳຄັນແລະຍິ່ງໃຫຍ່ທີ່ເຮັດໃຫ້ທົ່ວໂລກຕ້ອງຫັນກັບມາເບິ່ງຈີນດ້ວຍສາຍຕາແບບໃໝ່. ເວົ້າສຳລັບປະເທດໃຫຍ່ທີ່ມີປະຊາກອນຈຳນວນ 1400 ລ້ານຄົນແລ້ວ, ບັນຫາຄວາມທຸກຍາກເດັດຖານທີ່ເປັນບັນຫາໃຫຍ່ໃນ 1 ພັນປີທີ່ຜ່ານມາໄດ້ສິ້ນສຸດລົງທີ່ມີລັກສະນະປະຫວັດສາດ, ນີ້ແມ່ນຜົນສຳເລັດທີ່ບໍ່ເຄີຍມີມາກ່ອນໃນປະຫວັດສາດ,ທັງແມ່ນສິ່ງອັດສະຈັນໃນປະຫວັດສາດການຫຼຸດຜ່ອນຄວາມທຸກຍາກຂອງມວນມະນຸດ!
ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານເລຂາທິການໃຫຍ່ ສີຈິ້ນຜິງ ໄດ້ຢືນຢູ່ຈຸດແຫ່ງຍຸດທະສາດການສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານແລະບັນລຸຄວາມໃຝ່ຝັນຂອງຈີນໃນການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງຊົນຊາດຈີນ, ໂດຍຖືເອົາການລຶບລ້າງຄວາມທຸກຍາກເປັນຈຸດພົ້ນເດັ່ນໃນການປົກຄອງປະເທດແລະການຄຸ້ມຄອງລັດ, ໄດ້ສະເໜີທັດສະນະໃໝ່ແລະແນວຄິດໃໝ່ຕ່າງໆ, ໄດ້ວາງນະໂຍບາຍແລະວາງແຜນການໃໝ່ຕ່າງໆ, ຊຸກຍູ້ວຽກງານການຫຼຸດຜ່ອນຄວາມທຸກຍາກຂອງຈີນໃຫ້ປະສົບຜົນສຳເລັດອັນໃຫຍ່ຫຼວງ,ເປັນການປະກອບສ່ວນທີ່ສຳຄັນແລະໃຫຍ່ຫຼວງແກ່ຂະບວນການຫຼຸດຜ່ອນຄວາມທຸກຍາກຂອງໂລກ.
ຄວາມອັດສະຈັນໃນດ້ານການຫຼຸດຜ່ອນຄວາມທຸກຍາກຂອງຈີນໄດ້ຮັບຄວາມສົນໃຈຢ່າງກວ້າງຂວາງຈາກທົ່ວໂລກ. ນັກສັງເກດການລະດັບສາກົນຕ່າງໆລ້ວນແຕ່ໄດ້ຖອດ “ລະຫັດການຫຼຸດພົ້ນອອກຈາກຄວາມທຸກຍາກ” ຂອງຈີນ. ຄວາມເວົ້າຂອງທ່ານເລຂາທິການໃຫຍ່ສີຈິ້ນຜິງຕອນໜຶ່ງໄດ້ໃຫ້ຄຳຕອບຄື: “ພວກເຮົາໄດ້ຮັບຜົນສຳເລັດທີ່ບໍ່ເຄີຍມີມາກ່ອນໃນບັ້ນລຶບລ້າງຄວາມທຸກຍາກຂັ້ນສຸດທ້າຍ ເຊິ່ງໄດ້ສະແດງໃຫ້ເຫັນເຖິງຄວາມດີເລີດດ້ານການເມືອງຂອງລະບອບສັງຄົມນິຍົມຂອງຈີນທີ່ນຳພາໂດຍພັກກອມມູນິດຈີນ.”
ຄວາມດີເລີດດ້ານການເມືອງມາຈາກການນຳພາໂດຍລວມສູນເປັນເອກະພາບຂອງພັກກອມມູນິດຈີນ. ຢູ່ໃນໂລກນີ້ບໍ່ເຄີຍມີພັກກຳອຳນາດໃດຄືກັບພັກກອມມູນິດຈີນທີ່ຖືເອົາວຽກງານການແກ້ໄຂຂໍ້ຫຍຸ້ງຍາກສຸດທ້າຍເພື່ອລຶບລ້າງຄວາມທຸກຍາກເປັນເປົ້າໝາຍບຸລິມະສິດໃນການວາງນະໂຍບາຍ, ພ້ອມທັງໄດ້ເຕົ້າໂຮມກຳລັງທົ່ວພັກແລະທົ່ວປະເທດແລະສູ້ຊົນຢ່າງບໍ່ລົດລະເພື່ອບັນລຸເປົ້າໝາຍດັ່ງກ່າວ, ໃນການສູ້ຊົນຢ່າງຕໍ່ເນື່ອງ, ກໍໄດ້ສ້າງຜົນງານທີ່ມີລັກສະນະປະຫວັດສາດບັ້ນລຶບລ້າງຄວາມທຸກຍາກຂັ້ນສຸດທ້າຍ. ຄວາມດີເລີດດ້ານການເມືອງແມ່ນມາຈາກຄວາມດີເລີດດ້ານລະບອບສັງຄົມນິຍົມທີ່ມີສີສັນພິເສດຂອງຈີນທີ່ສາມາດເຕົ້າໂຮມກຳລັງເຮັດວຽກໃຫຍ່. ອົງການຈັດຕັ້ງທາງສັງຄົມລ້ວນແຕ່ໄດ້ຕັ້ງໜ້າເຂົ້າຮ່ວມການເຄື່ອນໄຫວຕ່າງໆໃນບັ້ນລຶບລ້າງຄວາມທຸກຍາກຂັ້ນສຸດທ້າຍ, ປຸກລະດົມໃຫ້ປະຊາຊົນທັງປວງເຂົ້າຮ່ວມຢ່າງແທ້ຈິງ, ສາມັກຄີເປັນຈິດໜຶ່ງໃຈດຽວກັນເພື່ອລຶບລ້າງຄວາມທຸກຍາກໃນຂັ້ນສຸດທ້າຍ. ຄວາມດີເລີດດ້ານການເມືອງມາຈາກລະບົບລະບຽບໃນການແກ້ໄຂຂໍ້ຫຍຸ້ງຍາກສຸດທ້າຍເພື່ອລຶບລ້າງຄວາມທຸກຍາກທີ່ມີສີສັນພິເສດຂອງຈີນ. ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 18 ເປັນຕົ້ນມາ, ສະພາບການດ້ານການລຶບລ້າງຄວາມທຸກຍາກທີ່ມີລັດຖະບານ, ຕະຫຼາດແລະສັງຄົມເຂົ້າຮ່ວມດ້ວຍການປະສານງານກັນໄດ້ປະກົດຕົວຂຶ້ນເປັນກ້າວໆ. ນັບແຕ່ປີ 2020 ເປັນຕົ້ນມາ, ເຖິງວ່າໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ກໍຕາມ, ຈີນກໍສາມາດຜ່ານຜ່າສິ່ງທ້າທາຍແລະຄວາມສ່ຽງຊະນິດຕ່າງໆໄດ້, ແລະສາມາດເຮັດສຳເລັດໜ້າທີ່ເປົ້າໝາຍໃນດ້ານການລຶບລ້າງຄວາມທຸກຍາກໃນຍຸກໃໝ່ຕາມເວລາກຳນົດ, ເປັນການຢັ້ງຢືນຢ່າງເຕັມສ່ວນເຖິງບົດບາດທີ່ສຳຄັນຂອງຄວາມດີເລີດດ້ານການເມືອງ.
ການລຶບລ້າງຄວາມທຸກຍາກແມ່ນຄວາມປາຖະໜາທີ່ມວນມະນຸດສະແຫວງຫາມາໂດຍຕະຫຼອດ, ແມ່ນສິດພື້ນຖານຂອງປະຊາຊົນບັນດາປະເທດໃນການສະແຫວງຫາຊີວິດການເປັນຢູ່ທີ່ມີຄວາມສຸກ. ນັບແຕ່ສົງຄາມໂລກຄັ້ງທີ 2 ສິ້ນສຸດລົງມານີ້, ບັນຫາການລຶບລ້າງຄວາມທຸກຍາກແມ່ນໜ້າທີ່ທີ່ສຳຄັນທີ່ປະເທດພວມພັດທະນາທັງຫຼາຍປະເຊີນຢູ່.
ເປັນເວລາດົນນານມາແລ້ວ,ຈີນໄດ້ໃຫ້ການຊ່ວຍເຫຼືອລ້າແລະເງິນກູ້ພິເສດຢ່າງຫຼວງຫຼາຍໃຫ້ແກ່ປະເທດພວມພັດທະນາທັງຫຼາຍ, ໄດ້ໃຫ້ການສະໜັບສະໜູນແລະຊ່ວຍເຫຼືອດ້ານເຕັກໂນໂລຊີ,ນັກວິຊາການແລະສະຕິປັນຍາຢ່າງຫຼວງຫຼາຍ, ໄດ້ເຮັດເລັດໂຄງການພັດທະນາເສດຖະກິດສັງຄົມແລະການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນຈຳນວນຫຼວງຫຼາຍສຳລັບປະເທດພວມພັດທະນາທັງຫຼາຍ. ໃນເດືອນກັນຍາປີ 2015, ທ່ານປະທານສີຈິ້ນຜິງໄດ້ປະກາດໃນກອງປະຊຸມໂຕະມົນການຮ່ວມມືໃຕ້-ໃຕ້ວ່າ ເພື່ອຊ່ວຍເຫຼືອປະເທດພວມພັດທະນາໃນການພັດທະນາເສດຖະກິດແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ໃນ 5 ປີຕໍ່ໜ້າ, ຈີນຈະໃຫ້ການສະໜັບສະໜູນຊ່ວຍເຫຼືອໃນ 6 ຂົງເຂດເຊິ່ງແຕ່ລະຂົງເຂດມີປະເທດພວມພັດທະນາ 100 ໂຄງການເຊິ່ງປະກອບດ້ວຍໂຄງການລຶບລ້າງຄວາມທຸກຍາກ 100 ໂຄງການ, ໂຄງການການຮ່ວມມືດ້ານກະສິກຳ 100 ໂຄງການ, ໂຄງການຊ່ວຍເຫຼືອກ່ຽວກັບການສົ່ງເສີມການຄ້າ 100 ໂຄງການ,ໂຄງການການອະນຸລັກສິ່ງແວດລ້ອມຊີວະພາບແລະຮັບມືກັບການປ່ຽນແປງຂອງດິນຟ້າອາກາດ 100 ໂຄງການ, ໂຮງໝໍແລະຄລິນິກ 100 ແຫ່ງ, ໂຮງຮຽນແລະສູນອົບຮົມວິຊາຊີບ 100 ແຫ່ງ.
ໃນສູ່ມື້ນີ້, ນັກວິທະຍາສາດ, ວິສະວະກອນ, ນັກທຸລະກິດ, ພະນັກງານເຕັກນິກ, ພະນັກງານການແພດ, ຄູແລະອາຈານ, ພະນັກງານສາມັນ, ອາສາສະໝັກແລະອື່ນໆຂອງຈີນຫຼາຍໝື່ນຄົນພວມສູ້ຊົນເຮັດວຽກຢູ່ດິນແດນທີ່ກວ້າງໃຫຍ່ຂອງປະເທດພວມພັດທະນາທັງຫຼາຍ, ຮ່ວມມືກັບປະຊາຊົນທ້ອງຖິ່ນແບບຄຽງບ່າຄຽງໄຫຼ່, ຊ່ວຍປ່ຽນຊາຕາກຳຂອງເຂົາເຈົ້າ.
ຈີນເຊື່ອໝັ້ນຢ່າງສະເໝີຕົ້ນສະເໝີປາຍວ່າ, ເມື່ອໂລກມີສະພາບທີ່ດີ, ຈີນຈຶ່ງຈະສາມາດມີສະພາບທີ່ດີ. ເມື່ອຈີນມີສະພາບທີ່ດີ, ໂລກກໍຍັງຈະແຮ່ງດີ. ພວກເຮົາຈົ່ງຮ່ວມມືກັນແລະສູ້ຊົນຢ່າງບໍ່ລົດລະເພື່ອສ້າງປະຊາຄົມຮ່ວມຊາຕາກຳຂອງມວນມະນຸດທີ່ພັດທະນຮ່ວມກັນແລະປາສະຈາກຄວາມທຸກຍາກ.
ຄຳເຫັນ
0