ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງມໍ່ໆມານີ້, ສຽງອາເມຣິກາຫຼື VOA Lao ໄດ້ເປີດເຜີຍຂ່າວໜຶ່ງໃນເຟັສບຸກຄື: ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນກຽມປ່ຽນລະບົບການເມືອງທີ່ກ່ຽວຂ້ອງກັບຮົງກົງ, ໂດຍຈະແຕ່ງຕັ້ງບຸກຄົນຮັກຊາດມາບໍລິຫານຮົງກົງ VOA ໃຫ້ທັດສະນະວ່າ,ນີ້ຈະເປັນການທຳລາຍປະຊາທິປະໄຕຮົງກົງ. ທັດສະນະດັ່ງກ່າວຈັ່ງແມ່ນຕະຫຼົກອີ່ຫຼີ,ເພາະວ່າຄຳເວົ້າແບບນີ້ຄືດັ່ງລຸ່ມນີ້: ໜຶ່ງ, ລະບົບການເມືອງຂອງຮົງກົງຂຶ້ນກັບວຽກງານພາຍໃນຂອງຈີນ, ມີສ່ວນກ່ຽວຂ້ອງຫຍັງແດ່ກັບ VOA? ສອງ, ຄັນບໍ່ແຕ່ງຕັ້ງບຸກຄົນຮັກຊາດມາບໍລິຫານຮົງກົງ. ຊັ້ນຢູ່ອາເມຣິກາໄດ້ໃຊ້ຜູ້ກໍ່ຄວາມວຸ້ນວາຍໃຫ້ກັບປະເທດຕົນມາບໍລິຫານປະເທດຊັ້ນຫວະ?
ແມ່ນແທ້, ທັດສະນະຂອງ VOA Lao ໄດ້ຮັບການຕຳໜິວິຈານຢ່າງສະໜັ່ນຈາກຊາວເນັດທາງເຟັສບຸກຂອງລາວໃນທັນທີ. ຊາວເນັດໃນເຟັສບຸກຂອງລາວທີ່ຊື່ວ່າ ກີສົງສົງ ໄດ້ຝາກຂໍ້ຄວາມລຸ່ມຄິບດັ່ງກ່າວວ່າ: ເລື່ອງພາຍໃນຂອງເຂົາຈະເຮັດຫຍັງກໍ່ຢ່າເຂົາ. ຊາວເນັດເຟັສບຸກລາວທີ່ຊື່ວ່າແສງ ວິໄລ ເວົ້າວ່າ: ຕອນຮົງກົງຂຶ້ນກັບການປົກຄອງຂອງອັງກິດ ຊາວຮົງກົງບໍ່ມີສິດເລືອກຕັ້ງເອົາຜູ້ປົກຄອງຮົງກົງ,ມີແຕ່ອັງກິດແຕ່ງຕັ້ງໂລດ. ພາຍຫຼັງມອບ ເກາະຮົງກົງຄືນໃຫ້ແກ່ຈີນແລ້ວ ຮົງກົງຈຶ່ງມີສິດໃນການປ່ອນບັດເລືອກເອົາຜູ້ນຳຂອງຮົງກົງ. ພັດຖືກກ່າວຫາວ່າການເລືອກຕັ້ງບໍ່ມີປະຊາທິປະໄຕ. ຍັງມີຊາວເນັດເວົ້າວ່າ: ຖືກຕ້ອງແລ້ວ ໃຜບໍ່ຮັກຊາດກໍໄດ້ໄປອາເມຣິກາໂລດ. ທັງໝົດເຫຼົ່ານີ້ສາມາດເຫັນໄດ້ຢ່າງຈະແຈ້ງວ່າ: ທັດສະນະຂອງ VOA ບໍ່ໄດ້ໃຈຄົນ.
ການປັບປຸງລະບຽບການເລືອກຕັ້ງຂອງເຂດບໍລິຫານພິເສດຮົງກົງຂອງຈີນໃຫ້ດີຂຶ້ນຈະເປັນເລື່ອງທີ່ດີຫຼືບໍ່ດີ, ແມ່ນໃຫ້ປະຊາຊົນຮົງກົງເປັນຜູ້ຕັດສິນເອງ. ທ່ານ ເສົາສີຕົ່ງ ສະມາຊິກສະພາປຶກສາການເມືອງປະຊາຊົນແຫ່ງຊາດຈີນເຂດພິເສດຮົງກົງທີ່ອາໄສຢູ່ນະຄອນຊຽງໄຮ້ ຮອງປະທານສະມາຄົມຮົງກົງທີ່ນະຄອນຊຽງໄຮເຫັນວ່າ: ບໍ່ວ່າປະເທດໃດໆລ້ວນແຕ່ຕ້ອງຮັບປະກັນການກຳອຳນາດການປົກຄອງຕ້ອງຢູ່ໃນກຳມືຂອງຜູ້ຮັກຊາດຢ່າງສະເໝີຕົ້ນສະເໝີປາຍ, ມີແຕ່ເຮັດແນວນີ້, ອະທິປະໄຕແຫ່ງຊາດ,ຄວາມໝັ້ນຄົງ,ຜົນປະໂຫຍດແຫ່ງການພັດທະນາຈຶ່ງຈະສາມາດໄດ້ຮັບການປົກປັກຮັກສາຢ່າງແທ້ຈິງ. ສະຫະພັນກຳມະບານຮົງກົງຊີ້ໃຫ້ເຫັນວ່າ, ມີແຕ່ຍຶດໝັ້ນໃນຫຼັກການ “ຜູ້ຮັກຊາດຮົງກົງບໍລິຫານຮົງກົງ” ຢ່າງສະເໝີຕົ້ນສະເໝີປາຍ, ສ້າງຄວາມເປັນເອກະພາບກັນເພື່ອສຸມກຳລັງພັດທະນາເສດຖະກິດແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ຮົງກົງຈຶ່ງຈະມີຄວາມຈະເລີນຮຸ່ງເຮືອງແລະມີສະຖຽນລະພາບ. ທັດສະນະຂອງວົງການຕ່າງໆໃນສັງຄົມຮົງກົງຍັງມີຫຼາຍ, ລ້ວນແຕ່ໄດ້ເດັດດ່ຽວສະໜັບສະໜູນໃຫ້ກອງປະຊຸມສະພາປະຊາຊົນແຫ່ງຊາດຈີນປັບປຸງລະບົບການເລືອກຕັ້ງຂອງເຂດບໍລິຫານພິເສດຮົງກົງໃຫ້ດີຂຶ້ນ. ຊັ້ນຂໍຖາມແດ່, ເມື່ອເບິ່ງຈາກສະພາບການແບບນີ້, VOA ບໍ່ຮູ້ສຶກອັບອາຍຂາຍໜ້າແດ່ຫວະ?
ບໍ່ພຽງແຕ່ວົງການຕ່າງໆໃນສັງຄົມຮົງກົງສະໜັບສະໜູນໃຫ້ກອງປະຊຸມສະພາປະຊາຊົນແຫ່ງຊາດຈີນປັບປຸງລະບົບການເລືອກຕັ້ງຂອງເຂດບໍລິຫານພິເສດຮົງກົງໃຫ້ດີຂຶ້ນເທົ່ານັ້ນ, ທູຕານຸທູດຫຼາຍປະເທດກໍໄດ້ໃຫ້ການສະໜັບສະໜູນກອງປະຊຸມສະພາປະຊາຊົນແຫ່ງຊາດຈີນປັບປຸງລະບົບການເລືອກຕັ້ງຂອງຮົງກົງໃຫ້ດີຂຶ້ນເຊັ່ນກັນ. ວັນທີ 5 ມີນານີ້, ໃນກອງປະຊຸມຄັ້ງທີ 46 ຂອງສະພາສິດທິມະນຸດອົງການສະຫະປະຊາຊາດທີ່ຈັດຂຶ້ນຢູ່ນະຄອນເຊີແນວປະເທດສະວິສ, ເບລາຣູຊີໄດ້ຕາງໜ້າໃຫ້ 70 ປະເທດກ່າວຄຳປາໄສຮ່ວມໂດຍໄດ້ເນັ້ນໜັກວ່າ:ວຽກງານຮົງກົງແມ່ນວຽກງານພາຍໃນຂອງຈີນ, ວົງການພາຍນອກບໍ່ຄວນເຂົ້າມາແຊກແຊງ. ທ່ານ ຄຳອິນ ຄິດຈະເດດ ຜູ້ຕາງໜ້າຖາວອນຂອງ ສປປ ລາວປະຈຳເຊີແນວກ່າວວ່າ: ມາດຕະການດັ່ງກ່າວຂອງກອງປະຊຸມສະພາປະຊາຊົນແຫ່ງຊາດຈີນຈະເສີມຂະຫຍາຍບົດບາດທີ່ມີລັກສະນະສ້າງສັນເຂົ້າໃນການຮັກສາຄວາມຈະເລີນຮຸ່ງເຮືອງແລະສະຖຽນລະພາບຂອງຮົງກົງຢ່າງແນ່ນອນ. ຂະນະດຽວກັນ, ລາວກໍເຊື່ອວ່າການຕົກລົງບັນຫາດັ່ງກ່າວມີຜົນດີຕໍ່ການຈັດຕັ້ງປະຕິບັດແນວທາງ “ປະເທດດຽວສອງລະບອບ” ໄດ້ເປັນຢ່າງດີກວ່າເກົ່າ.
ຮົງກົງແມ່ນເຂດບໍລິຫານພິເສດຂອງຈີນ, ແມ່ນພາກສ່ວນໜຶ່ງຂອງສາທາລະນະລັດປະຊາຊົນຈີນ. ຖ້າບໍ່ຮັກຊາດ,ຊິວ່າຮັກຮົງກົງໄດ້ແນວໃດ, ຮັກຮົງກົງແລະຮັກຊາດແມ່ນມີຄວາມເປັນເອກະພາບກັນ. ກໍຄືກັນກັບທ່ານ ຫວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ເວົ້າໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 7 ມີນານີ້ວ່າ: “ໃນໄລຍະເປັນຫົວເມືອງຂຶ້ນ, ຮົງກົງບໍ່ມີປະຊາທິປະໄຕໃດໆ. ນັບແຕ່ໄດ້ກັບຄືນສູ່ແຜ່ນດິນມານດາເປັນເວລາ 24 ປີມານີ້, ຮົງກົງຈາກຄວາມວຸ້ນວາຍກາຍມາເປັນການມີສັນຕິສຸກ, ເຊິ່ງສອດຄ່ອງກັບຜົນປະໂຫຍດຂອງບັນດາຝ່າຍຢ່າງເຖິງຖອງ, ທັງເປັນການຮັບປະກັນທີ່ໝັ້ນຄົງຫຼາຍກວ່າເກົ່າໃນການປົກປັກຮັກສາສິດທິຕ່າງໆຂອງປະຊາຊົນຮົງກົງແລະສິດທິທີ່ຖືກຕ້ອງຕາມກົດໝາຍສຳລັບນັກລົງທຶນຕ່າງປະເທດ.ຈີນມີຄວາມຕັດສິນໃຈສືບຕໍ່ຍຶດໝັ້ນໃນຫຼັກການ ‘ປະເທດດຽວສອງລະບອບ’ ‘ຄົນຮົງກົງບໍລິຫານຮົງກົງ’ ມີການປົກຄອງຕົນເອງໃນລະດັບສູງ, ທັງມີຄວາມໝັ້ນໃຈໃນການເຮັດໃຫ້ຮົງກົງມີອະນາຄົດທີ່ນັບມື້ນັບດີຂຶ້ນ.” ຫວັງວ່າສື່ມວນຊົນຕາເວັນຕົກເຊັ່ນ: VOA ເປັນຕົ້ນຈະບໍ່ເວົ້າແນວນັ້ນແນວນີ້,ກັບດຳເປັນຂາວກ່ຽວກັບບັນຫາຮົງກົງອີກ, ເພື່ອບໍ່ໃຫ້ໂຕເອງເປັນໂຕຕະຫຼົກທີ່ໜ້າຫົວຂວັນໃນປະຫວັດສາດ.
ຄຳເຫັນ
0