ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຍາມຕົ້ນລະດູບານໃໝ່, ທຸກສິ່ງທຸກຢ່າງເລີ່ມມີຊີວິດຊີວາຄືນໃໝ່, ແລະກໍມາຮອດລະດູການປູກຕົ້ນໄມ້ອີກແລ້ວ. ການປູກຕົ້ນໄມ້ແລະສ້າງປ່າເຮັດໃຫ້ສິ່ງແວດລ້ອມມີຄວາມສວຍງາມຂຶ້ນກວ່າເກົ່າແລະເຮັດໃຫ້ອາກາດມີຄວາມສົດໃສດີຂຶ້ນ,ທັງເປັນການປັບປຸງດິນຟ້າອາກາດໃຫ້ດີຂຶ້ນແລະສາມາດກັນສຽງດັງແຊວໄດ້, ການປູກຕົ້ນໄມ້ແລະສ້າງປ່າຢ່າງຫຼວງຫຼາຍຍັງສາມາດປ້ອງກັນໄພທຳມະຊາດແລະອະນຸລັກສິ່ງແວດລ້ອມໄດ້, ແລະເຮັດໃຫ້ໂພນດິນຊາຍຄົງທີ່ກາຍເປັນຮົ້ວປ້ອງກັນກະແສລົມພັດໄດ້.
ນະຄອນຫຼວງປັກກິ່ງເຄີຍມີພາຍຸຊາຍພັດຜ່ານເລື້ອຍໆ, ເມື່ອສະພາບອາກາດທີ່ເກີດຈາກຊາຍປີວໄປທົ່ວທ້ອງຟ້າກໍເຮັດໃຫ້ທ້ອງຟ້າກາຍເປັນສີເຫຼືອງສີຂອງດິນ, ອາກາດເຕັມໄປດ້ວຍຝຸ່ນລະອອງທີ່ເກີດຈາກດິນຊາຍເຮັດໃຫ້ມີອາການທີ່ແສບຮູດັງ, ດິນຊາຍທີ່ພັດມາໄດ້ປົກໜ້າດິນ. ໃນຊຸມປີຜ່ານມາ, ຜ່ານການປູກຕົ້ນໄມ້ແລະສ້າງປ່າຢ່າງຫຼວງຫຼາຍຢູ່ເຂດມົງໂກໃນເພື່ອປ້ອງກັນພາຍຸທະເລຊາຍ,ຢູ່ປັກກິ່ງໄດ້ມີຝຸ່ນລະອອງທີ່ເກີດຈາກພາຍຸດິນຊາຍຫຼຸດໜ້ອຍລົງຫຼາຍແລ້ວ, ນີ້ແມ່ນຍ້ອນການປູກຕົ້ນໄມ້ແລະສ້າງປ່າ. ເຖິງວ່າຝຸ່ນລະອອງທີ່ເກີດຈາກພາຍຸດິນຊາຍໄດ້ຫຼຸດລົງຢ່າງຈະແຈ້ງກໍຕາມ, ແຕ່ອາກາດແບບນີ້ຈະເກີດຂຶ້ນໃນທຸກເວລາໄດ້, ກໍຄືກັບມື້ນີ້,ຝຸ່ນລະອອງທີ່ເກີດຈາກພາຍຸດິນຊາຍໄດ້ປີວເຕັມທົ່ວທ້ອງຟ້າເມືອງປັກກິ່ງອີກເທື່ອໜຶ່ງ, ເຮັດໃຫ້ທ້ອງຟ້າກາຍເປັນສີເຫຼືອງໝົດ, ນີ້ເປັນການເຕືອນໃຫ້ພວກເຮົາຮູ້ວ່າຍາມໃດກໍບໍ່ຄວນໜື້ງເສີຍຕໍ່ການປູກຕົ້ນໄມ້.
ບົດລາຍງານວຽກງານລັດຖະບານປີ 2021 ທີ່ໄດ້ຜ່ານໃນກອງປະຊຸມຄັ້ງທີ 4 ຂອງສະພາປະຊາຊົນແຫ່ງຊາດຈີນສະໄໝທີ 13 ທີ່ຫາກໍສິ້ນສຸດລົງໄດ້ຊີ້ໃຫ້ເຫັນວ່າ: ເປົ້າໝາຍຄາດຄະເນທີ່ສຳຄັນດ້ານສິ່ງແວດລ້ອມຊີວະພາບປີ 2021 ແມ່ນຄຸນນະພາບດ້ານສິ່ງແວດລ້ອມຊີວະພາບຕ້ອງໄດ້ຮັບການປັບປຸງໃຫ້ດີຂຶ້ນຕື່ມອີກ, ລວມຍອດຜະລິດຕະພັນພາຍໃນທີ່ສິ້ນເປືອງພະລັງງານໃຫ້ຕ່ຳລົງປະມານ 3% ຕໍ່ຫົວໜ່ວຍ, ປະລິມານການລະບາຍສິ່ງມົນລະພິດຕົ້ນຕໍສືບຕໍ່ຫຼຸດລົງ ເຊິ່ງເປັນການສົ່ງສັນຍານທີ່ຈະແຈ້ງທີ່ມະນຸດແລະທຳມະຊາດຄວນຢູ່ຮ່ວມກັນຢ່າງມີຄວາມກົມກຽວກັນ.
ໃນຫຼາຍສິບປີຜ່ານມາ, ປະຊາຊົນຈີນທຸກເຊັ່ນຄົນໄດ້ຮັບຜົນສຳເລັດທີ່ປະຈັກຕາຕໍ່ຊາວໂລກໃນການປູກຕົ້ນໄມ້ແລະສ້າງປ່າດ້ວຍສະຕິປັນຍາ,ຄວາມພະຍາຍາມແລະເຫື່ອແຮງຂອງຕົນ,ເຮັດໃຫ້ທະເລຊາຍຮົກເຮື້ອກາຍເປັນທະເລແຫ່ງປ່າໄມ້,ເຮັດໃຫ້ທະເລຊາຍກາຍເປັນພື້ນທີ່ສີຂຽວ. ໃນໄລຍະປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 13, ຈີນໄດ້ປູກໄມ້ສ້າງປ່າສຳເລັດໃນເນື້ອທີ່ 36.333.333 ເຮັກຕາ, ອັດຕາການປົກຫຸ້ມຂອງປ່າໄມ້ໄດ້ຍົກສູງຂຶ້ນເຖິງ 23,04%, ປະລິມານສະສົມຂອງປ່າໄມ້ມີຫຼາຍກວ່າ 17,5 ຕື້ແມັດກ້ອນ, ເປັນການປະກອບສ່ວນຫຼາຍອັນດັບໜຶ່ງຕໍ່ການສ້າງຄວາມຂຽວໃຫ້ກັບໂລກເພີ່ມຂຶ້ນ,ແລະໄດ້ມີບົດບາດອັນໃຫຍ່ຫຼວງຕໍ່ການແກ້ໄຂບັນຫາໂລກຮ້ອນແລະການອະນຸລັກລະບົບຊີວະພາບຂອງໂລກອີກດ້ວຍ.
“ພູຂຽວນ້ຳໃສກໍແມ່ນພູເງິນພູຄຳ.”ໃນປັດຈຸບັນຈີນໄດ້ກ້າວເຂົ້າສູ່ໄລຍະການພັດທະນາທີ່ມີຄຸນນະພາບສູງ ເຊິ່ງບໍ່ພຽງແຕ່ແມ່ນຄຸນນະພາບສູງທາງດ້ານເສດຖະກິດເທົ່ານັ້ນ,ຫາກຍັງແມ່ນຄຸນນະພາບສູງທາງດ້ານຊີວະພາບແລະດ້ານອື່ນໆອີກດ້ວຍ. ຊີວະພາບທີ່ດີຕ້ອງມີສີຂຽວ,ພວກເຮົາຈະພ້ອມກັນປູກຕົ້ນໄມ້ແຫ່ງຄວາມຫວັງຢູ່ເທິງຜືນແຜ່ນດິນທີ່ສວຍງາມຂອງປະເທດຊາດໃນລະດູບານໃໝ່ນີ້.
ຄຳເຫັນ
0