ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ພາຍຫຼັງໄດ້ປິດເມືອງແລະມີຂໍ້ຈຳກັດຕ່າງໆເປັນເວລາ 1 ປີແລ້ວ, ປະຊາຊົນຢູ່ປະເທດຕ່າງໆໃນໂລກລ້ວນແຕ່ມີຄວາມປາຖະໜາຢ່າງແຮງກ້າທີ່ຢາກຈະອອກໄປທ່ຽວຢູ່ຕ່າງປະເທດ. ຄຽງຄູ່ກັບການສັກວັກຊີນໂຄວິດ-19 ຢູ່ໃນຂອບເຂດທົ່ວໂລກຢ່າງຕັ້ງໜ້າ, ປະເທດແລະເຂດແຄວ້ນຈຳນວນບໍ່ໜ້ອຍໄດ້ເລີ່ມປັບມາດຕະການທີ່ລະອຽດພາຍໃນໃນການປ້ອງກັນພະຍາດໂຄວິດ-19, ຫວ່າງມໍ່ໆມານີ້, ປະເທດອິສຣາແອນ,ສິງກະໂປແລະປະເທດອື່ນໆໄດ້ສົ່ງສັນຍານທີ່ຈະນຳໃຊ້ “ໃບຢັ້ງຢືນວັກຊີນ”, ຄະນະກຳມາທິການສະຫະພາບເອີຣົບກໍຈະເປີດເຜີຍຍັດຕິ“ໃບຢັ້ງຢືນວັກຊີນ” ໃນວັນທີ 17 ມີນານີ້, “ໃບຢັ້ງຢືນສຸຂະພາບການທ່ອງທ່ຽວສາກົນ” ຂອງຈີນໄດ້ເລີ່ມນຳໃຊ້ຢ່າງເປັນທາງການແລ້ວແລະອື່ນໆ. ການສົ່ງສັນຍານຕ່າງໆສະແດງໃຫ້ເຫັນວ່າ: ໂລກໄດ້ເລີ່ມກະກຽມລ່ວງໜ້າໃຫ້ແກ່ການຟື້ນຟູເສດຖະກິດແລະການທ່ອງທ່ຽວຂ້າມຊາດແລ້ວ, ປະເທດໃຫຍ່ດ້ານການທ່ອງທ່ຽວດັ້ງເດີມຈຳນວນໜຶ່ງກໍຢາກດຳເນີນການຟື້ນຟູອຸດສາຫະກຳທ່ອງທ່ຽວຂອງປະເທດຕົນຄືນໃໝ່ຢ່າງຮີບດ່ວນ.
ຢູ່ເອີຣົບ, ລັດຖະບານເກຼັກກ່າວວ່າ: ຖ້າຫາກສະພາບການແຜ່ລະບາດຂອງພະຍາດໂຄວິດ-19 ມີສະພາບໝັ້ນທ່ຽງ, ຈະເລີ່ມເປີດປະເທດເພື່ອຕ້ອນຮັບນັກທ່ອງທ່ຽວຕ່າງປະເທດໃນວັນທີ 14 ພຶດສະພາປີນີ້. ປະເທດໄຊປຣັສກໍກ່າວວ່າ: ຈະອະນຸຍາດໃຫ້ຄົນອັງກິດທີ່ໄດ້ສັກວັກຊີນໂຄວິດ-19 ເຂັມທີສອງແລ້ວເຂົ້າແດນຕົນແຕ່ວັນທີ 1 ພຶດສະພາປີນີ້ເປັນຕົ້ນໄປ, ສ່ວນຝຣັ່ງກໍຈະໂຍະຍານຂໍ້ຈຳກັດຕໍ່ນັກທ່ອງທ່ຽວຈາກ 7 ປະເທດທີ່ບໍ່ແມ່ນປະເທດສະມາຊິກສະຫະພາບເອີຣົບເຊິ່ງລວມທັງອັງກິດ.
ຢູ່ອາຊີ, ເກາະສະໝຸຍທີ່ເປັນແຫຼ່ງທ່ອງທ່ຽວຍອດນິຍົມຢູ່ທາງພາກໃຕ້ຂອງໄທກໍໄດ້ມີແຜນຈະຕ້ອນຮັບນັກທ່ອງທ່ຽວຕ່າງປະເທດທີ່ໄດ້ສັກວັກຊີນໂຄວິດ-19 ຢ່າງຮອບດ້ານ ໂດຍຈະອະນຸຍາດໃຫ້ເຂົາເຈົ້າບໍ່ຈຳເປັນຕ້ອງກັກບໍລິເວນຫຼັງຈາກເຂົ້າແດນໄທແຕ່ວັນທີ 1 ຕຸລາປີນີ້ເປັນຕົ້ນໄປ. ສຳລັບສິງກະໂປກໍໄດ້ກ່າວໃນວັນທີ 12 ມີນານີ້ວ່າ: ຈະສາມາດເປີດດ່ານຊາຍແດນທີ່ຕິດກັບປະເທດແລະເຂດແຄວ້ນທີ່ມີຄວາມສ່ຽງລະດັບກາງແລະຕ່ຳຂອງການແຜ່ລະບາດຂອງພະຍາດໂຄວິດ-19 ທີ່ໄດ້ເລີ່ມສັກວັກຊີນໂຄວິດ-19 ແລ້ວ.
ຢູ່ຈີນ, ຄຽງຄູ່ກັບໄລຍະວັນພັກວັນກຳມະກອນສາກົນທີ 1 ພຶດສະພາທີ່ໃກ້ຈະມາເຖິງນີ້, ຄຽງຄູ່ກັບວຽກງານປ້ອງກັນແລະຄວບຄຸມສະພາບການແຜ່ລະບາດຂອງພະຍາດໂຄວິດ-19 ເຮັດໄດ້ດີກໍຄືການສັກວັກຊີນໂຄວິດ-19 ຢ່າງເປັນລະບຽບຮຽບຮ້ອຍແລ້ວ, ຄວາມປາຖະໜາຂອງປະຊາຊົນຈີນໃນການໄປທ່ຽວພາຍໃນແລະຕ່າງປະເທດກໍໄດ້ເພີ່ມຂຶ້ນຢ່າງຫຼວງຫຼາຍ, ຕົວເລກຂໍ້ມູນຈາກບໍລິສັດທ່ອງທ່ຽວຂອງຈີນສະແດງໃຫ້ເຫັນວ່າ: ປັດຈຸບັນ, ປະລິມານການຈັ່ງຈອງປີ້ເຮືອບິນລ່ວງໜ້າໃນໄລຍະວັນພັກທີ 1 ພຶດສະພາປີ້ນີ້ໄດ້ມີຫຼາຍກວ່າປີ 2019.
ແຕ່ວ່າ, ໂລກໄດ້ກະກຽມດີແທ້ແລ້ວບໍ່ຈຶ່ງຈະຍົກເລີກມາດຕະການປິດເມືອງແລະຂໍ້ຈຳກັດຕ່າງໆ?
ອົງການອະນາໄມໂລກຫຼື WHO ໄດ້ເປີດເຜີຍຕົວເລກຂໍ້ມູນຫຼ້າສຸດໃນວັນທີ 16 ມີນານີ້ໂດຍສະແດງໃຫ້ເຫັນວ່າ: ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ຢູ່ໃນໂລກໄດ້ມີເຖິງ 119.960.700 ກໍລະນີ, ຈຳນວນຜູ້ເສຍຊີວິດຍ້ອນເປັນພະຍາດມີເຖິງ 2.656.822 ຄົນ. ຂະນະດຽວກັນ, ເນື່ອງຈາກມາດຕະການດ້ານການປ້ອງກັນພະຍາດໂຄວິດ-19 ທີ່ບໍ່ຮອບຄອບ, ຊັບພະຍາກອນດ້ານຕ່າງໆຍັງຂາດແຄນກໍຄືເຊື້ອພະຍາດໂຄວິດ-19 ກາຍພັນຢ່າງບໍ່ຢຸດຢັ້ງແລະປັດໄຈອື່ນໆເຮັດໃຫ້ພະຍາດໂຄວິດ-19 ຍັງສືບຕໍ່ແຜ່ຂະຫຍາຍຢູ່ແຫ່ງຕ່າງໆໃນໂລກທີ່ຍັງບໍ່ທັນມີສະພາບດີຂຶ້ນ. ເຖິງວ່າການສັກວັກຊີນໂຄວິດ-19 ໃນໂລກໄດ້ຮັບການຊຸກຍູ້ຢ່າງຕັ້ງໜ້າກໍຕາມ, ແຕ່ຈຳນວນຜູ້ສັກວັກຊີນໂຄວິດ-19 ໃນໂລກຕ້ອງມີຫຼາຍກວ່າ 50% ແລະການບັນລຸເປົ້າໝາຍການສ້າງພູມຕ້ານທານແບບລວມໝູ່ໃນລະດັບໃດໜຶ່ງນັ້ນຍັງບໍ່ທັນໄດ້ບັນລຸຜົນເປັນຈິງເທື່ອ. ນອກນີ້, ເນື່ອງຈາກມີບາງປະເທດຮັ່ງມີໄດ້ກັກຕຸນວັກຊີນໂຄວິດ-19 ແລະຄວາມບໍ່ຍຸດຕິທຳໃນການແບ່ງປັນວັກຊີນກໍໄດ້ເຮັດໃຫ້ການສັກວັກຊີນໂຄວິດ-19 ຂອງໂລກບໍ່ໄດ້ຮັບຄວາມຄືບໜ້າຕາມຄວາມມຸ້ງຫວັງຂອງຊາວໂລກ. ເມື່ອເປັນແບບນັ້ນ, ຖ້າບັນດາປະເທດໃນໂລກຢາກເປີດປະຕູປະເທດ,ຍັງຕ້ອງເອົາໃຈໃສ່ເບິ່ງການປ່ຽນແປງຂອງສະພາບການແຜ່ລະບາດຂອງພະຍາດໂຄວິດ-19 ໃຫ້ຮອບຄອບ, ບໍ່ຄວນເຫັນໄປໃນແງ່ດີເກີນໄປ. ເພາະວ່າ, ພວກເຮົາໄດ້ອົດທົນຕໍ່ໄລຍະການປິດເມືອງແລະຂໍ້ຈຳກັດຕ່າງໆມາເປັນເວລາ 1 ປີແລ້ວ, ເພື່ອຕ້ານກັບສະພາບການແຜ່ລະບາດຂອງພະຍາດໂຄວິດ-19 ຈຶ່ງສົມຄວນສືບຕໍ່ອົດທົນໄປອີກໄລຍະໜຶ່ງກໍຈະເປັນເລື່ອງດີຫຼາຍກວ່າ.
ຄຳເຫັນ
0