ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ມີນານີ້, ອາເມຣິກາແລະຍີ່ປຸ່ນໄດ້ຈັດການພົບປະສອງຝ່າຍ “2+2”. ນີ້ເປັນການພົບປະກັບຕ່າງປະເທດເປັນຄັ້ງທຳອິດຫຼັງຈາກລັດຖະບານ ໂຈ ໄບເດັນຂຶ້ນກຳອຳນາດ.
ທຳມະດາແລ້ວ, ອາເມຣິກາແລະຍີ່ປຸ່ນຈັດການພົບປະສອງຝ່າຍຄວນເນັ້ນໃສ່ເນື້ອໃນກ່ຽວກັບການພົວພັນລະຫວ່າງສອງປະເທດ, ການແລກປ່ຽນ, ການຮ່ວມມືແລະການພັດທະນາຂອງສອງຝ່າຍ, ຫຼືວ່າກ່ຽວກັບຫົວຂໍ້ສັນຕິພາບແລະສະຖຽນລະພາບ. ຫຼືວ່າສອງຝ່າຍຄວນປຶກສາຫາລືກ່ຽວກັບວ່າຈະປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ແນວໃດແລະຄວນແບ່ງປັນວັກຊີນໂຄວິດ-19ແນວໃດ? ແຕ່ວ່າ, ສິ່ງທີ່ເຮັດໃຫ້ຄົນເຫຼືອເຊື່ອແລະຮູ້ສຶກແປກປະຫຼາດນັ້ນຄືເນື້ອໃນຕົ້ນຕໍຂອງການພົບປະຄັ້ງນີ້ພັດໂຈະຈົງກ່ຽວກັບຈີນ.
ໃນການອອກຖະແຫຼງການຮ່ວມຫຼັງສິ້ນສຸດການພົບປະຄັ້ງນີ້ໄດ້ມີເນື້ອໃນກ່ຽວກັບຈີນເກືອບເຄິ່ງໜຶ່ງ, ນອກຈາກໃສ່ຮ້າຍປ້າຍສີຈີນຢ່າງຮຸນແຮງແລ້ວ, ຍັງໄດ້ກ່າວວ່າການກະທຳຂອງຈີນບໍ່ສອດຄ່ອງກັບລະບຽບສາກົນໃນປັດຈຸບັນ, ເປັນສິ່ງທ້າທາຍຕໍ່ປະຊາຄົມໂລກ, ຍັງໄດ້ແຊກແຊງວຽກງານພາຍໃນຂອງຈີນຢ່າງປ່າເຖື່ອນອີກ, ຊີ້ນັ້ນສັ່ງນີ້ກ່ຽວກັບບັນຫາໄຕ້ຫວັນ,ບັນຫາຮົງກົງ,ບັນຫາທະເລຈີນໃຕ້,ຊິ່ນຈ່ຽງແລະບັນຫາອື່ນໆຂອງຈີນໂດຍທຳທ່າວ່າ: “ເປັນຫ່ວງເປັນໃຍຕໍ່ບັນຫາດັ່ງກ່າວ”.
ເປັນຫຍັງເນື້ອໃນຕົ້ນຕໍຂອງການພົບປະລະຫວ່າງອາເມຣິກາ-ຍີ່ປຸ່ນຈຶ່ງໂຈະຈົງກ່ຽວກັບຈີນ?
ເນື່ອງຈາກຍຸດທະສາດ “ອາເມຣິກາຕ້ອງມາກ່ອນ” ໃນໄລຍະລັດຖະບານໂດໂນ ທຣຳ ກຳອຳນາດໄດ້ທຳລາຍຜົນປະໂຫຍດຂອງປະເທດພັນທະມິດ,ເຮັດໃຫ້ອິດທິພົນຂອງອາເມຣິກາໃນສາກົນຫຼຸດລົງຢ່າງບໍ່ຢຸດຢັ້ງ. ຍ້ອນວ່າ, ພາຍຫຼັງລັດຖະບານໂຈ ໄບເດັນ ເລີ່ມກຳອຳນາດແລ້ວ, ສິ່ງຮີບດ່ວນກໍ່ແມ່ນຕ້ອງການເວທີສາກົນເພື່ອສະແດງໂຕ. ການພົບປະຄັ້ງນີ້ເປັນການປະກົດຕົວຕໍ່ສາກົນຢ່າງເປັນທາງການຄັ້ງທຳອິດຂອງບຸກຄົນສຳຄັນໃນຄະນະລັດຖະບານໂຈ ໄບເດັນ,ພໍດີເປັນໂອກາດກ່າວໂຈມຕີຈີນ,ເປັນການສະແດງທ່າທີຂອງອາເມຣິກາໃນການຕໍ່ຕ້ານຈີນເພີ່ມຂຶ້ນ, ເພື່ອສ້າງປັດໄຈໃນການເພີ່ມທະວີການພົວພັນກັບປະເທດພັນທະມິດ,ທັງບັນລຸຈຸດປະສົງທີ່ສະກັດກັ້ນຈີນ. ຂະນະດຽວກັນ, ໂດຍຜ່ານການປຸກກະແສ “ໄພຂົ່ມຂູ່ຈາກຈີນ”ຍຸແຍ່ອາລົມຂອງປະເທດພັນທະມິດອາຊີປາຊີຟິກໃນການຕໍ່ຕ້ານຈີນ,ພ້ອມທັງສະແດງໃຫ້ເຫັນເຖິງອິດທິພົນຂອງອາເມຣິກາຄື: ພຽງແຕ່ຮ້ອງໂຣ່ຂຶ້ນຄົນດຽວ ລູກນ້ອງຕາມຫຼັງກໍຮ້ອງຕາມຍ້ອນເປັນປະເທດມະຫາອຳນາດພຽງໜຶ່ງດຽວໃນໂລກ. ສ່ວນຍີ່ປຸ່ນກໍຫວັງຢາກເພີ່ມທະວີອິດທິພົນຂອງຕົນຢູ່ເຂດອາຊີປາຊີຟິກແລະເວທີການເມືອງສາກົນໂດຍຜ່ານການຕິດສອຍຫ້ອຍຕາມອາເມຣິກາທີ່ເປັນອ້າຍໃຫຍ່ຂອງຕົນ. ດັ່ງນັ້ນ, ສອງຝ່າຍຈຶ່ງໄດ້ເຫັນດີນຳກັນໂດຍຖືເອົາຈີນເປັນເນື້ອໃນຕົ້ນຕໍໃນການພົບປະຄັ້ງນີ້.
ແຕ່ວ່າຜູ້ສັນທັດກໍລະນີລ້ວນແຕ່ຮູ້ແຈ້ງເຫັນຈິງວ່າ: ການກະທຳແບບຍຸແຍ່ແລະປຸກກະແສຂອງອາເມຣິກາພຽງແຕ່ເພື່ອປົກປັກຮັກສາຄວາມເປັນມະຫາອຳນາດຂອງຕົນເທົ່ານັ້ນ,ແມ່ນເພື່ອຜົນປະໂຫຍດສ່ວນຕົວຢ່າງດຽວ. ການພົບປະຄັ້ງນີ້ພຽງແຕ່ແມ່ນກົນອຸບາຍທາງການເມືອງອັນໃໝ່ລະຫວ່າງຄົນຖ່ອຍທີ່ໜ້າໄຫວ້ຫຼັງຫຼອກສອງຄົນເທົ່ານັ້ນ, ເມື່ອແກ້ເສື້ອທີ່ຈອມປອມຂອງພວກເຂົາອອກ,ກໍຈະເຫັນແຈ້ງວ່າ:ອາເມຣິກາກໍຍັງແມ່ນອາເມຣິກາທີ່ຖືໂຕເອງສຳຄັນຄືເກົ່າ,ຍີ່ປຸ່ນກໍຍັງແມ່ນຍີ່ປຸ່ນຄືເກົ່າທີ່ເຮັດຕາມຄຳສັ່ງຂອງອາເມຣິກາຢ່າງກົ້ມຫົວຫຼອບຕົວແລະຍິນດີເປັນລູກນ້ອງຊັ້ນຈຳຂອງອາເມຣິກາຄືເກົ່າ. ຖະແຫຼງການຮ່ວມອາເມຣິກາ-ຍີ່ປຸ່ນແມ່ນຫຼັກອ້າງອີງອີກອັນໜຶ່ງທີ່ສອງປະເທດໄດ້ສົມຮູ້ຮ່ວມຄິດກັນ,ບໍ່ໄດ້ຕອບສະໜອງຜົນປະໂຫຍດຫຍັງເລີຍຕໍ່ກະແສຂອງຍຸກສະໄໝທີ່ສະແຫວງຫາສັນຕິພາບ,ການພັດທະນາ,ຊຸກຍູ້ການຮ່ວມມືແລະຄວາມກ້າວໜ້າຂອງປະເທດຈຳນວນຫຼາຍຢູ່ພາກພື້ນກໍຄືຢູ່ໃນໂລກ. ແຕ່ວ່າ, ບໍ່ວ່ານັກການເມືອງອາເມຣິກາຈະປຸກກະແສແລະຍຸແຍ່ກໍ່ເລື່ອງແນວໃດກໍຕາມກໍຈະບໍ່ສາມາດເຮັດໃຫ້ຈີນຖອຍຫຼັງແລະກໍບໍ່ສາມາດສະກັດກັ້ນການພັດທະນາແລະສັນຕິພາບຂອງຈີນໄດ້.
ຄຳເຫັນ
0