ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 22 ມີນານີ້, ໂດຍໄດ້ຮັບການມອບໝາຍຈາກທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ກໍຄືສູນກາງພັກກອມມູນິດຈີນ, ທ່ານຊົ້ງທ່າວ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນໄດ້ພົບປະກັບທ່ານຣີຢົງນາມ ເອກອັກຄະລັດຖະທູດສປປ.ເກົາຫຼີປະຈຳຈີນ.
ທ່ານຣີຢົງນາມໄດ້ນຳເອົາຄວາມຢື້ຢາມຖາມຂ່າວຂອງທ່ານກິມເຈິງອຸນ ເລຂາທິການໃຫຍ່ພັກແຮງງານເກົາຫຼີມາເຖິງທ່ານສີຈິ້ນຜິງ, ນອກນີ້ ທ່ານຍັງໄດ້ແຈ້ງສະພາບການຈັດກອງປະຊຸມໃຫຍ່ຄັ້ງທີ 8 ຂອງພັກແຮງງານເກົາຫຼີໃຫ້ຝ່າຍຈີນໄດ້ຮັບຊາບ, ທ່ານໄດ້ຕີລາຄາສູງຕໍ່ພັກ ແລະປະຊາຊົນຈີນພາຍໃຕ້ການນຳພາຂອງທ່ານສີຈິ້ນຜິງທີ່ສາມາດຕ້ານກັບວິກິດການດ້ານສາທາລະນະສຸກທີ່ມີລັກສະນະທົ່ວໂລກໄດ້ຢ່າງສຳເລັດຜົນ, ແລະໄດ້ຮັບຜົນສຳເລັດທີ່ປະຈັກຕາຕໍ່ຊາວໂລກໃນການສ້າງສັງຄົມອີ່ມໜຳສຳລານໃຫ້ສຳເລັດຮອບດ້ານ ແລະໃນບັ້ນສູ້ຮົບເພື່ອລຶບລ້າງຄວາມທຸກຍາກໄດ້ຢ່າງສິ້ນເຊີງ.
ທ່ານຊົ້ງທ່າວໄດ້ນຳເອົາຄວາມຢື້ຢາມຖາມຂ່າວຂອງທ່ານສີຈິ້ນຜິງຝາກເຖິງທ່ານກິມເຈິງອຸນ ເຊິ່ງໄດ້ສະແດງຄວາມຊົມເຊີຍອີກຄັ້ງຕໍ່ການຈັດກອງປະຊຸມໃຫຍ່ຄັ້ງທີ 8 ຂອງພັກແຮງງານເກົາຫຼີ ແລະກ່າວວ່າ: ໃນສະພາບການໃໝ່ ພວກຂ້າພະເຈົ້າຍິນດີຮ່ວມກັບບັນດາສະຫາຍສປປ.ເກົາຫຼີ, ພະຍາຍາມຮັກສາ ປັບປຸງ ແລະເສີມຂະຫຍາຍສາຍພົວພັນຈີນ-ສປປ.ເກົາຫຼີໃຫ້ດີ, ຊຸກຍູ້ພາລະກິດສັງຄົມນິຍົມຂອງສອງປະເທດໃຫ້ໄດ້ຮັບໝາກຜົນໃໝ່ຢ່າງບໍ່ຢຸດຢັ້ງ ແລະສ້າງຜົນປະໂຫຍດໃຫ້ປະຊາຊົນສອງຊາດຫຼາຍກວ່າເກົ່າ.
ທ່ານສີຈິ້ນຜິງກ່າວເນັ້ນວ່າ: ປັດຈຸບັນນີ້, ໂລກມີການປ່ຽນແປງທີ່ບໍ່ເຄີຍມີມາກ່ອນໃນຮອບ 100 ປີ ແລະການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ສະຖານະການສາກົນ ແລະພາກພື້ນມີການຜັນແປຢ່າງເລິກເຊິ່ງ. ຈີນຍິນດີຮ່ວມກັບສປປ.ເກົາຫຼີ ແລະຝ່າຍທີ່ກ່ຽວຂ້ອງ, ຍຶດຫັ້ນໃນການແກ້ໄຂບັນຫາແຫຼມເກົາຫຼີດ້ວຍວິທີທາງການເມືອງ, ປົກປັກຮັກສາສັນຕິພາບ ແລະຄວາມໝັ້ນຄົງຂອງແຫຼມເກົາຫຼີ, ປະກອບສ່ວນອັນໃໝ່ຢ່າງຕັ້ງໜ້າເຂົ້າໃນການຮັກສາສັນຕິພາບ, ສະຖຽນລະພາບ ແລະການພັດທະນາໃຫ້ມີຄວາມຈະເລີນຮຸ່ງເຮືອງຂອງພາກພື້ນ.
ຄຳເຫັນ
0