ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 31 ມີນາຜ່ານມາ, ຢູ່ປັກກິ່ງ, ທ່ານ ຢາງເຈສື້ ຫົວໜ້າຫ້ອງການຄະນະກຳມະການວຽກງານການຕ່າງປະເທດສູນກາງຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ເຄັກ ຊີໂຊດາ ເອກອັກຄະລັດຖະທູດກຳປູເຈຍປະຈຳຈີນ, ທ່ານນາງ ຄຳເຜົ່າ ເອີນທະວັນ ເອກອັກຄະລັດຖະທູດລາວປະຈຳຈີນ; ໃນວັນທີ 31 ມີນາຫາວັນທີ 2 ເມສານີ້, ລັດຖະມົນຕີກະຊວງການຕ່າງປະເທດຂອງ 4 ປະເທດຄື: ສິງກະໂປ, ມາເລເຊຍ, ອິນໂດເນເຊຍແລະຟີລິບປິນໄດ້ເດີນທາງຢ້ຽມຢາມຈີນຕາມຄຳເຊື້ອເຊີນ.
ນັບແຕ່ໄດ້ເກີດການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ໄດ້ສົ່ງຜົນກະທົບຕໍ່ເສດຖະກິດແລະສັງຄົມຂອງໂລກຢ່າງໃຫຍ່ຫຼວງ, ແຕ່ການຮ່ວມມືລະຫວ່າງຈີນ-ອາຊຽນໄດ້ນັບມື້ນັບມີຄວາມແໜ້ນແຟ້ນຫຼາຍຂຶ້ນກວ່າເກົ່າ. ໂດຍຜະເຊີນໜ້າກັບການແຜ່ລະບາດຂອງພະຍາດໂຄວິດ-19 ທີ່ເກີດຂຶ້ນຢ່າງກະທັນຫັນ,ຈີນແລະອາຊຽນໄດ້ຊ່ວຍເຫຼືອເຊິ່ງກັນແລະກັນແລະສະໜັບສະໜູນເຊິ່ງກັນແລະກັນ, ຈາກວັດຖຸແລະອຸປະກອນການແພດຮອດວັກຊີນຕ້ານໂຄວິດ-19, ຈາກຊ່ອງທາງການສ້າງຄວາມສະດວກໃຫ້ກັນແລະກັນດ້ານການຢືນຢັນຮອດການເຊັນສັນຍາການພົວພັນຄູ່ຮ່ວມມືເສດຖະກິດຮອບດ້ານຫຼື RCEP ຢ່າງສຳເລັດ, ຈາກກົດແຫ່ງການປະພຶດໃນທະເລຈີນໃຕ້ຫຼື COC ຮອດການທີ່ຈີນສະໜັບສະໜູນການພັດທະນາເຕີບໂຕຂອງອາຊຽນ,ພ້ອມທັງສະໜັບສະໜູນຖານະແກນນຳຂອງອາຊຽນໃນການຮ່ວມມືຂອງພາກພື້ນ,ການຮ່ວມມືລະຫວ່າງຈີນ-ອາຊຽນໄດ້ຢືນຢູ່ແຖວໜ້າຂອງການຮ່ວມມືລະຫວ່າງບັນດາປະເທດໃນພາກພື້ນແຕ່ຕົ້ນຕະຫຼອດປາຍ.
ຈີນແລະປະເທດອາຊຽນໄດ້ມີການພົວພັນທີ່ແໜ້ນແຟ້ນໃນດ້ານປະຫວັດສາດແລະດ້ານວັດທະນະທຳ. ແຕ່ 2 ພັນກວ່າປີກ່ອນ, ຈີນແລະອາຊຽນກໍໄດ້ມີການແລກປ່ຽນດ້ານວັດທະນະທຳແລະມີການພົວພັນດ້ານເສດຖະກິດ, ພາສາແລະວັດທະນະທຳຂອງຈີນໄດ້ເຜີຍແຜ່ເຂົ້າໄປໃນປະເທດອາຊຽນໂດຍຜ່ານເສັ້ນທາງສາຍໄໝ,ແລະມີຜົນສະທ້ອນອັນເລິກເຊິ່ງຕໍ່ປະເທດອາຊຽນ; ຂະນະດຽວກັນ, ສາສະໜາແລະຜະລິດຕະຜົນຂອງປະເທດອາຊຽນກໍໄດ້ຊຸກຍູ້ການພັດທະນາຂອງວັດທະນະທຳຈີນ. ມິດຕະພາບອັນເປັນມູນເຊື້ອທີ່ນັບມື້ນັບເລິກເຊິ່ງຈາກການໄປມາຫາສູ່ກັນເລື້ອຍໆແລະນັບມື້ນັບມີຄວາມໃກ້ຊິດແລະສະໜິດແໜ້ນນີ້ໄດ້ເປັນພື້ນຖານຂອງການຮ່ວມມືບົນຈິດໃຈມິດຕະພາບລະຫວ່າງສອງຝ່າຍ,ເຊິ່ງບໍ່ວ່າອິດທິກຳລັງພາຍນອກໃດໆກໍຈະສັ່ນຄອນບໍ່ໄດ້.
ແຕ່ວ່າ,ເລື່ອງການຮ່ວມມືລະຫວ່າງຈີນ-ອາຊຽນໃນສາຍຕາຂອງນັກການເມືອງອາເມຣິກາຈຳນວນໜຶ່ງນັ້ນພັດເຫັນວ່າຈີນແລະປະເທດອາຊຽນກຳລັງດຶງພັກດຶງພວກເພື່ອສ້າງໃຫ້ເປັນການພົວພັນດ້ານການເມືອງພູມິພາກ, ແຕ່ວ່ານັກການເມືອງເຫຼົ່ານີ້ພັດໄດ້ຕັ້ງໃຈລືມວ່າ “ພັນທະມິດ 5 ຕາ” ນັ້ນຈຶ່ງແມ່ນຜົນທີ່ກຳເນີດເກີດຈາກການເມືອງພູມິພາກທີ່ກີດກັນພາຍນອກຮຸນແຮງທີ່ສຸດແທ້ຈິງ; ອາເມຣິກາໃນຂະນະທີ່ມີເຈດຕະນາຢາກປັບປຸງການພົວພັນກັບປະເທດອາຊຽນໃຫ້ດີຂຶ້ນນັ້ນ, ພັດຕັ້ງໃຈປຸກປັ່ນອາລົມຄຽດຊັງຂອງປະຊາຊົນທີ່ມີຕໍ່ຊາວອາເມຣິກາເຊື້ອສາຍອາຊີ,ເຮັດໃຫ້ກຸ່ມຄົນຊາວອາເມຣິກາເຊື້ອສາຍອາຊີຖືກໂຈມຕີນັບມື້ນັບເພີ່ມຫຼາຍຂຶ້ນ, ອາເມຣິກາໃຊ້ການກະທຳຕົວຈິງຊຸກດັນໃຫ້ປະຊາຊົນຂອງປະເທດໃນອາຊີເປັນປໍລະປັກກັນຕົນ; ອາເມຣິກາເຊື້ອເຊີນຜູ້ນຳປະເທດອາຊຽນເຂົ້າຮ່ວມກອງປະຊຸມສຸດຍອດສະໄໝວິສາມັນອາເມຣິກາ-ອາຊຽນ, ແລະກ່າວວ່າ “ປະເທດໃຫຍ່ບໍ່ຄວນຂົ່ມເຫັງປະເທດອື່ນ”, ແຕ່ຜູ້ນຳຂອງອາເມຣິກາເອງພັດບໍ່ເຂົ້າຮ່ວມກອງປະຊຸມ, ທ່າທີທີ່ວາງໂຕເອງຢູ່ເໜືອກວ່າປະເທດອື່ນແບບນີ້ແຮ່ງໄດ້ເຮັດໃຫ້ປະເທດອາຊຽນມີຄວາມບໍ່ພໍໃຈເລີຍ.
ປີ 2021 ແມ່ນປີທີ່ຈີນແລະອາຊຽນສ້າງສາຍພົວພັນຄູ່ເຈລະຈາຄົບຮອບ 30 ປີ. ຕະຫຼອດໄລຍະ 30 ປີຜ່ານມາ, ສາຍພົວພັນລະຫວ່າງຈີນ-ອາຊຽນໄດ້ຮັບການຍົກລະດັບສູງຂຶ້ນເທື່ອລະກ້າວ,ການຮ່ວມມືລະຫວ່າງສອງຝ່າຍໄດ້ຮັບການຍົກລະດັບໃຫ້ສູງຂຶ້ນຢ່າງບໍ່ຢຸດຢັ້ງ,ການພົວພັນລະຫວ່າງສອງຝ່າຍນັບມື້ນັບແໜ້ນແຟ້ນຍິ່ງຂຶ້ນ. ເປັນເວລາດົນນານມານີ້, ຈີນແລະປະເທດອາຊຽນໄດ້ຊ່ວຍເຫຼືອເຊິ່ງກັນແລະກັນ,ເປັນແບບຢ່າງທີ່ດີໃນການພົວພັນຮ່ວມມືໃນສາກົນ,ແລະກໍເປັນສາທິດຕໍ່ອາເມຣິກາທີ່ຈະແກ້ໄຂການພົວພັນສາກົນແນວໃດ,ນັ້ນກໍຄື: ມີແຕ່ໄວ້ເນື້ອເຊື່ອໃຈເຊິ່ງກັນແລະກັນ,ເຄົາລົບເຊິ່ງກັນແລະກັນ,ສະເໝີພາບແລະຕ່າງຝ່າຍຕ່າງມີຜົນປະໂຫຍດ,ຈຶ່ງຈະສາມາດສ້າງການພົວພັນສາກົນທີ່ປອດໃສໄດ້ແລະການພົວພັນແບບນີ້ຈຶ່ງສາມາດພົ້ນອອກຈາກການຜູກມັດດ້ານການເມືອງພູມິພາກໄດ້.
ພາຍໃຕ້ສະພາບທີ່ການໄປມາຫາສູ່ກັນລະຫວ່າງຊາດໃນສະໄໝປັດຈຸບັນນັບມື້ນັບຫຼາຍຂຶ້ນແລະການພົວພັນສາກົນນັບມື້ນັບສັບສົນຂຶ້ນ, ອາເມຣິກາຍັງມີການປະພຶດຕໍ່ກັບການພົວພັນສາກົນດ້ວຍທ່າທີແບບເກົ່າທີ່ຖືວ່າໂຕເອງຢູ່ເໜືອທຸກປະເທດແລະດູຖູກດູໝິ່ນປະເທດອື່ນ. ໃນທີ່ສຸດ, ກໍຈະຖືກປັດເຂ່ຍອອກຈາກປະຫວັດສາດບໍ່ໄດ້ກໍ່ຊ້າ.
ຄຳເຫັນ
0