ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 13 ເມສານີ້, ລັດຖະບານຍີ່ປຸ່ນໄດ້ຕົກລົງຈະປ່ອຍນ້ຳປົນເປື້ອນລັງສີຂອງໂຮງໄຟຟ້ານິວເຄລຍຟູກູຊີມະເລກໜຶ່ງລົງທະເລຢ່າງເປັນທາງການ. ຍີ່ປຸ່ນໄດ້ຕົກລົງຈະແກ້ໄຂບັນຫານ້ຳປົນເປືອນລັງສີນິວເຄລຍດ້ວຍວິທີການປ່ອຍລົງທະເລໃນຂະນະທີ່ຍັງມີວິທີແກ້ໄຂຢ່າງອື່ນ,ນີ້ເປັນ “ການກໍ່ອາຊະຍາກຳຕໍ່ມວນມະນຸດ”! ເພາະວ່າມະຫາສະໝຸດແມ່ນຊັບສິນຮ່ວມກັນຂອງມວນມະນຸດ,ບໍ່ແມ່ນທໍ່ລະບາຍນ້ຳເປື້ອນຂອງຍີ່ປຸ່ນ.
ຕາມການປະເມີນແລະຄາດຄະເນຂອງສະຖາບັນຄົ້ນຄວ້າວິທະຍາສາດມະຫາສະໝຸດຂອງເຢຍລະມັນ, ຖ້ານ້ຳປົນເປື້ອນລັງສີຖືກປ່ອຍລົງທະເລ,ຈະແຜ່ລາມໄປຮອດເຂດສ່ວນໃຫຍ່ຂອງມະຫາສະໝຸດປາຊີຟິກພາຍໃນ 57 ວັນ,ອາເມຣິກາແລະການາດາກໍຈະໄດ້ຮັບມົນລະພິດນິວເຄລຍຫຼັງຈາກນັ້ນ 3 ປີ. ການກະທຳແບບນີ້ຂອງຍີ່ປຸ່ນຈະມີຜົນກະທົບຕໍ່ທຳມະຊາດເປັນຄືແນວໃດ,ໃຜກໍ່ບໍ່ສາມາດຄາດຄະເນລ່ວງໜ້າໄດ້.
ປີ 1986, ໄພພິບັດໂຮງໄຟຟ້ານິວເຄລຍເຊີໂນບິນຂອງອະດີດສະຫະພາບໂຊວຽດໄດ້ເກີດການລະເບີດ,ເພື່ອປ້ອງກັນບໍ່ໃຫ້ເກີດການແຜ່ລັງສີນິວເຄລຍ, ໂຊວຽດໄດ້ສົ່ງຍົນເຮລີກົບແຕບິນເຂົ້າໄປຢູ່ເທິງເຕົາປະຕິກອນນິວເຄລຍແລະປ່ອນວັດຖຸພິເສດປິດຮູລະເບີດອີກແລ້ວອີກຕື່ມທ່າມກາງມີກຳມັນຕະພາບລັງສີທີ່ຮ້າຍແຮງທີ່ສຸດ, ລັດຖະບານໂຊວຽດໄດ້ສ້າງສິ່ງກໍ່ສ້າງເບຕົງເສີມເຫຼັກເປັນເວລາຫຼາຍເດືອນເພື່ອປິດເຄື່ອງຈັກຜະລິດໄຟຟ້ານິວເຄລຍຢ່າງຖາວອນ. ໃນຂະບວນການນີ້,ມີນັກດັບເພີງແລະນັກກູ້ໄພຈຳນວນຫຼາຍໄດ້ສ່ຽງຄວາມເປັນຄວາມຕາຍໄປປະຕິບັດໜ້າທີ່ແລະເສຍສະຫຼະຊີວິດຢ່າງອົງອາດກ້າຫານ.
ເຖິງວ່າໂຊວຽດໄດ້ເຮັດແນວນີ້ແລ້ວກໍຕາມ, ແຕ່ໄພພິບັດໃນເຫດການເຊີໂນບີນຍັງບໍ່ສາມາດປາສະຈາກໄດ້ການຕຳໜິຕິຕຽນຢ່າງຮຸນແຮງຈາກສື່ມວນຊົນຕາເວັນຕົກຄືເກົ່າ,ຈົນຖືກເອີ້ນວ່າເປັນ “ໄພພິບັດທີ່ສ້າງຂຶ້ນໂດຍມະນຸດທີ່ໃຫຍ່ທີ່ສຸດໃນປະຫວັດສາດຂອງມວນມະນຸດ”. ອຸບັດເຫດ ໂຮງໄຟຟ້ານິວເຄລຍຟູກູຊີມະເລກໜຶ່ງຂອງຍີ່ປຸ່ນໃນຖານະເປັນໄພພິບັດຂະໜາດໃຫຍ່ພິເສດໃນລະດັບດຽວກັນກັບເຫດການເຊີໂນບີນ,ຈະມີຜົນຮ້າຍຕໍ່ສິ່ງແວດລ້ອມຢ່າງແນ່ນອນ,ແຕ່ວ່າເມື່ອລັດຖະບານຍີ່ປຸ່ນໄດ້ຕົກລົງຈະປ່ອຍນ້ຳປົນເປື້ອນລັງສີຟູກູຊີມະລົງທະເລຢ່າງເປັນທາງການແລ້ວ, ສື່ມວນຊົນຂອງປະເທດຕາເວັນຕົກທີ່ມັກປະພຶດໂຕເປັນ “ຜູ້ອາລັກຂາສິ່ງແວດລ້ອມ”ເລື້ອຍໆນັ້ນພັດປິດປາກງຽບບໍ່ເວົ້າຫຍັງເລີຍໃນຄັ້ງນີ້.
ຍິ່ງກວ່ານັ້ນ,ທ່ານ ອານໂຕນີ ບຣິນເຄັນ ລັດຖະມົນຕີກະຊວງການຕ່າງປະເທດອາເມຣິກາຍັງກ່າວວ່າ: ການບຳບັດນ້ຳປົນເປື້ອນລັງສີຂອງຍີ່ປຸ່ນແມ່ນໄດ້ກະທຳຢ່າງມີຄວາມໂປ່ງໃສ,ພ້ອມທັງໄດ້ສະແດງຄວາມຂອບໃຈຍີ່ປຸ່ນທີ່ໄດ້ສຸມຄວາມພະຍາຍາມຜ່ານທາງສື່ສັງຄົມອອນລາຍ. ຄຳເວົ້າທີ່ບໍ່ມີຄວາມຮັບຜິດຊອບແບບນີ້ເຮັດໃຫ້ຊາວເນັດອາເມຣິກາຈຳນວນຫຼາຍລ້ວນແຕ່ຮູ້ສຶກໂມໂຫແລະຕ່າງກໍໄດ້ສະແດງຄວາມບໍ່ພໍໃຈຕໍ່ກໍລະນີດັ່ງກ່າວ.
ຊາວເນັດທີ່ມີຊື່ວ່າ Aegean ກ່າວວ່າ: ໃນເວລາທີ່ຈີນພຽງແຕ່ສ້າງເຂື່ອນໄຟຟ້ານ້ຳຕົກແລະໂຮງໄຟຟ້ານິວເຄລຍບໍ່ພໍເທົ່າໃດແຫ່ງ, ອາເມຣິກາກໍ່ໄດ້ຕຳໜິວ່າ: ສິ່ງທີ່ຈີນເຮັດນີ້ໄດ້ທຳລາຍສິ່ງແວດລ້ອມ! ແຕ່ໃນເວລາທີ່ຍີ່ປຸ່ນຕົກລົງຈະປ່ອຍນ້ຳປົນເປື້ອນລັງສີທີ່ມີຜົນຮ້າຍແຮງທີ່ສຸດລົງມະຫາສະໝຸດປາຊີຟິກ,ອາເມຣິກາພັດກ່າວວ່າ: ເຮັດແນວນີ້ບໍ່ເປັນຫຍັງ,ຈັ່ງແມ່ນເປັນທັດສະນະໃນສອງມາດຕະຖານແທ້ແທ້! ຊາວເນັດທີ່ຊື່ວ່າ Michael Bonic ກ່າວວ່າ: ກໍລະນີທີ່ຍີ່ປຸ່ນເຮັດນັ້ນ“ເປັນຄວາມພະຍາຍາມທີ່ໂປ່ງໃສຊັ້ນຫວາ? ຈັ່ງແມ່ນເປັນຕາຫົວຂວັນແທ້ໆ… ເມື່ອເວົ້າເຖິງສິ່ງແວດລ້ອມ,ປະເທດຕາເວັນຕົກພາກັນທຳທ່າມິດງຽບເລີຍ.”
ໃນເດືອນພະຈິກປີ 2020, ທ່ານ ໂຢະຊິຮິເດະ ຊຸກະ ນາຍົກລັດຖະມົນຕີຍີ່ປຸ່ນເຄີຍໄດ້ຖາມວ່າ: “ນ້ຳປົນເປື້ອນລັງສີເປັນນ້ຳທີ່ສາມາດດື່ມໄດ້ຫຼືບໍ່” ໃນເວລາທ່ານໄປສຳຫຼວດກວດເບິ່ງໂຮງໄຟຟ້ານິວເຄລຍຟູກູຊີມະ, ຜູ້ຮັບຜິດຊອບຂອງບໍລິສັດພະລັງໄຟຟ້າໂຕກຽວກ່າວວ່າ: ຖ້າລັງສີຈືດຈາງແລ້ວກໍ່ດື່ມໄດ້. ທ່ານໂຢະຊິຮິເດະ ຊຸກະ ໄດ້ເບິ່ງຢູ່ດົນໆແຕ່ກໍ່ບໍ່ໄດ້ດື່ມໃນທີ່ສຸດ. ຄຳເວົ້າທີ່ວ່ານ້ຳປົນເປື້ອນລັງສີແມ່ນໄດ້ຕາມມາດຕະຖານວ່າດ້ວຍຄວາມປອດໄພ, ແຕ່ໃນຕົວຈິງລັດຖະບານຍີ່ປຸ່ນເອງກໍ່ບໍ່ເຊື່ອໝັ້ນຕົນເອງ.
ໃນເວລາທີ່ຍີ່ປຸ່ນມີການກະທຳທີ່ທຳຮ້າຍໂລກ, ສື່ມວນຊົນຕາເວັນຕົກພັດປິດປາກງຽບບໍ່ເວົ້າຫຍັງເລີຍ,ແຕ່ມັກເວົ້ານັ້ນເວົ້ານີ້ໃຫ້ຈີນໃນເວລາດຽວກັນ, ປຸກປັ່ນກະແສທີ່ວ່າ: ຈີນມີ “ການບີບບັງຄັບໃຫ້ອອກແຮງງານ” ຢ່າງຮ້າຍແຮງ, ການເບິ່ງບັນຫາດ້ວຍການໃຊ້ສອງມາດຕະຖານແບບນີ້ເຮັດໃຫ້ຄົນຮູ້ສຶກເບື່ອໜ່າຍແທ້ແທ້. ຖ້າມື້ໃດມື້ໜຶ່ງໃນອະນາຄົດ ຊີວິດການເປັນຢູ່ຂອງປະເທດຕາເວັນຕົກໄດ້ຮັບຜົນກະທົບຈາກການປ່ອຍນ້ຳປົນເປື້ອນລັງສີ,ບໍ່ຮູ້ວ່າສື່ມວນຊົນເຫຼົ່ານີ້ຍັງຈະປິດປາກງຽບບໍ່ເວົ້າຫຍັງຄືເກົ່າຫຼືບໍ່.
ຄຳເຫັນ
0