ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນໄຕມາດທຳອິດຂອງປີນີ້, ລວມຍອດຜະລິດຕະພັນພາຍໃນຫຼື GDP ຂອງຈີນໄດ້ເພີ່ມຂຶ້ນ 18,3% ເມື່ອທຽບໃສ່ໄລຍະດຽວກັນຂອງປີກາຍ, ໄດ້ເພີ່ມຂຶ້ນ 5,0% ເມື່ອທຽບໃສ່ການເຕີບໂຕສະເລ່ຍສອງປີ. ພາຍໃຕ້ສະພາບທີ່ການແຜ່ລະບາດຂອງພະຍາດໂຄວິດ-19 ໃນໂລກຍັງບໍ່ມີທ່າອ່ຽງວ່າຈະຜ່ອນຄາຍລົງໂດຍພື້ນຖານເທື່ອ, ນີ້ເປັນຜົນທີ່ດີທີ່ສຸດໃນກຸ່ມເສດຖະກິດຕົ້ນຕໍຂອງໂລກຢ່າງແນ່ນອນ. ອົງການກອງທຶນເງິນຕາສາກົນຫຼື IMF ໄດ້ຄາດຄະເນການເຕີບໂຕ GDP ຂອງຈີນໃນປີນີ້ແມ່ນ 8,4%, ມັນອາດຈະບັນລຸຜົນເປັນຈິງ.
ໃນວັນທີ 6 ເມສານີ້, ອົງການກອງທຶນເງິນຕາສາກົນຫຼື IMF ໄດ້ເປີດເຜີຍ “ບົດລາຍງານການຈ້ອງເບິ່ງເສດຖະກິດໂລກ” ໂດຍຊີ້ໃຫ້ເຫັນວ່າ: “ມາດຕະການດ້ານການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ທີ່ມີປະສິດທິຜົນ, ການເພີ່ມການລົງທຶນດ້ານສາທາລະນະປະໂຫຍດຢ່າງທັນການ ແລະ ທະນາຄານກາງຂອງຈີນກໍໄດ້ໃຫ້ການສະໜັບສະໜູນດ້ານເງິນຄ່ອງໄດ້ເຮັດໃຫ້ເສດຖະກິດຈີນສາມາດຟື້ນຟູຄືນໃໝ່ໄດ້ຢ່າງເຂັ້ມແຂງ.”
ຫວ່າງມໍ່ໆມານີ້, ຕົວເລກເສດຖະກິດດ້ານອື່ນໆຂອງຈີນກໍໄດ້ມີທ່ວງທ່າທີ່ດີປະກົດອອກມາໃຫ້ເຫັນເຊັ່ນກັນ. ໃນວັນທີ 13 ເມສານີ້, ອົງການພາສີແຫ່ງຊາດຈີນໄດ້ເປີດເຜີຍຕົວເລກຂາເຂົ້າຂາອອກໃນໄຕມາດທຳອິດຂອງຈີນໂດຍໄດ້ໃຫ້ຮູ້ວ່າ: ຍອດມູນຄ່າການສົ່ງອອກແລະນຳເຂົ້າການຄ້າສິນຄ້າປະເພດຈັບຕ້ອງໄດ້ຂອງຈີນໄດ້ບັນລຸເຖິງ 8.470 ຕື້ຢວນ, ເພີ່ມຂຶ້ນ 29,2% ເມື່ອທຽບໃສ່ໄລຍະດຽວກັນຂອງປີກາຍ; ໃນນັ້ນ, ການສົ່ງອອກບັນລຸເຖິງ 4.610 ຕື້ຢວນ, ເພີ່ມຂຶ້ນ 38,7%; ການນຳເຂົ້າມີເຖິງ 3.860 ຕື້ຢວນ, ເພີ່ມຂຶ້ນ 19,3%; ໄດ້ປຽບດຸນການຄ້າເຖິງ 759,29 ຕື້ຢວນ, ໄດ້ເພີ່ມຂຶ້ນ 690%. ໃນໄຕມາດທຳອິດຂອງປີນີ້, ການສົ່ງອອກຂອງຈີນໄດ້ມີທ່ວງທ່າທີ່ດີ, ການນຳເຂົ້າລື່ນກາຍຄາດໝາຍ ເຊິ່ງໄດ້ສະແດງໃຫ້ເຫັນວ່າເສດຖະກິດຈີນສາມາດຟື້ນຄືນໃໝ່ໄດ້ນັບແຕ່ 6 ເດືອນທ້າຍປີກາຍນີ້ເປັນຕົ້ນມາແລະໄດ້ສືບຕໍ່ມີທ່າອ່ຽງທີ່ຈະພັດທະນາໄປໃນທິດທາງທີ່ດີຢ່າງຕໍ່ເນື່ອງ.
ຫວ່າງມໍ່ໆມານີ້,ສຳນັກຂ່າວສານຣອຍເຕີໄດ້ສັງເກດເຫັນວ່າ: ຫຼັງບຸນກຸດຈີນ, ວິສາຫະກິດຈີນໄດ້ເລັ່ງການຜະລິດໃຫ້ໄວຂຶ້ນຢ່າງສຳເລັດຜົນ ແລະໄດ້ຊຸກຍູ້ໃຫ້ອຸດສາຫະກຳການຜະລິດຂອງຈີນເຕີບໂຕຢ່າງຈະແຈ້ງ. ໃນຖານະເປັນດັດຊະນີຊີ້ວັດດ້ານເສດຖະກິດມະຫາພາກ, ໃນເດືອນມີນາປີນີ້, ດັດຊະນີຜູ້ຈັດການຝ່າຍຈັດຊື້ດ້ານອຸດສາຫະກຳການຜະລິດຫຼື PMI ຂອງຈີນໄດ້ເພີ່ມຂຶ້ນເປັນ 51,9 ໂດຍລື່ນກາຍຄາດໝາຍ, ແລະເປັນສະຖິຕິທີ່ສູງສຸດໃນ 3 ເດືອນຜ່ານມາ ເຊິ່ງໄດ້ສະແດງໃຫ້ເຫັນເຖິງພະລັງແຮງໃນການຟື້ນຟູເສດຖະກິດຈີນຄືນໃໝ່ເພີ່ມຂຶ້ນ. ໃນໄຕມາດທຳອິດຂອງປີນີ້, ການລົງທຶນຂອງຈີນໃນຂົງເຂດເຕັກນິກຂັ້ນສູງໄດ້ເພີ່ມຂຶ້ນອ່າວໄວ,ການລົງທຶນໃນອຸດສາຫະກຳການຜະລິດເຕັກນິກຂັ້ນສູງໄດ້ເພີ່ມຂຶ້ນ 41,6% ແລະ ການລົງທຶນໃນຂະແໜງການການບໍລິການເຕັກນິກຂັ້ນສູງໄດ້ເພີ່ມຂຶ້ນ 28,6%. ເສດຖະກິດຈີນບໍ່ພຽງແຕ່ເຕີບໂຕທາງດ້ານຂະໜາດແລະຄວາມໄວເທົ່ານັ້ນ, ຍັງມີຄຸນນະພາບແລະປະສິດທິພາບອີກດ້ວຍ, ມູນຄ່າດ້ານເສດຖະກິດໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ.
IMF ໄດ້ຄາດຄະເນວ່າ: ເສດຖະກິດຂອງປະເທດທີ່ພັດທະນາແລ້ວທີ່ຈະເຕີບໂຕໄວທີ່ສຸດແມ່ນອາເມຣິກາ, ຈະບັນລຸ 6,4%. ແຕ່ການເຕີບໂຕຂອງເສດຖະກິດອາເມຣິກາສ່ວນໃຫຍ່ແມ່ນມາຈາກການເພີ່ມປະລິມານເງິນຕາຫຼາຍຂຶ້ນ, ອັດຕາສ່ວນທີ່ສາມາດຈັດຕັ້ງປະຕິບັດແຜນການປັບປຸງລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນຢ່າງແທ້ຈິງນັ້ນພັດມີໜ້ອຍ. ອາດເວົ້າໄດ້ວ່າ, ການແຜ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບໃຫ້ສັງຄົມອາເມຣິກາທີ່ມີຄວາມແຕກໂຕນກັນຢູ່ແລ້ວເພີ່ມຂຶ້ນອີກ. ສ່ວນຈີນກໍໄດ້ເພີ່ມຄວາມເອົາໃຈໃສ່ຕໍ່ການເຕີບໂຕດ້ານເສດຖະກິດທີ່ມີລັກສະນະສ້າງຜົນປະໂຫຍດທົ່ວໄປ ເຊິ່ງເປັນການສະທ້ອນໃຫ້ເຫັນນະໂຍບາຍທີ່ຖືປະຊາຊົນເປັນໃຈກາງຢ່າງແທ້ຈິງ.
ຈີນໄດ້ຕັ້ງໜ້າຊຸກຍູ້ໃຫ້ການຄ້າແລະການລົງທຶນເປັນເສລີແລະສະດວກ, ຈີນໄດ້ເຮັດສຳເລັດທຸກຂັ້ນຕອນຂອງລະບຽບການໃຫ້ສັດຕະຍາບັນຕາມສັນຍາ RCEP ຢ່າງເປັນທາງການ,ຊຸກຍູ້ການພັດທະນາດ້ານຂາເຂົ້າຂາອອກຢ່າງມີການປະສານສົມທົບກັນ, ຫຼຸດບັນຊີລາຍຊື່ທາງລົບກ່ຽວກັບການອະນຸມັດທຶນຕ່າງປະເທດເຂົ້າເຖິງຕະຫຼາດໃຫ້ໜ້ອຍລົງຕື່ມອີກ, ປັບປຸງແຜນການສັບຊ້ອນເຂດທົດລອງການຄ້າເສລີໃຫ້ດີຂຶ້ນ, ຊຸກຍູ້ການສ້າງທ່າການຄ້າເສລີໄຫຫຼຳຢ່າງໝັ້ນທ່ຽງແລະອື່ນໆ. ປະຕູບານໃຫຍ່ແຫ່ງການເປີດປະຕູຂອງຈີນນັບມື້ນັບເປີດກວ້າງອອກຕື່ມອີກ,ເຮັດໃຫ້ທົ່ວໂລກໄດ້ເຫັນກາລະໂອກາດການຄ້າການລົງທຶນ.
ຕາມຕົວເລກຄາດຄະເນຂອງ IMF ກ່ຽວກັບການເຕີບໂຕດ້ານເສດຖະກິດຈີນໃນປີ 2021, ແລະຫວ່າງມໍ່ໆມານີ້, ສຳນັກຂ່າວສານບລຸມເບີກຂອງອາເມຣິກາໄດ້ດຳເນີນການວິເຄາະແລ້ວເຫັນວ່າ: ເມື່ອຮອດປີ 2026, ການປະກອບສ່ວນຂອງຈີນທີ່ມີຕໍ່ການເຕີບໂຕຂອງ GDP ຂອງໂລກຈະຫຼາຍກວ່າ 1 ສ່ວນ 5. ຂ່າວສານບລຸມເບີກຍັງໄດ້ຊີ້ໃຫ້ເຫັນວ່າ: ໃນຍຸກສະໄໝຫຼັງການແຜ່ລະບາດຂອງພະຍາດໂຄວິດ-19, ການເຕີບໂຕຂອງເສດຖະກິດຈີນມີທ່າອ່ຽງທີ່ເຂັ້ມແຂງແລະຈະນຳໜ້າການເຕີບໂຕຂອງເສດຖະກິດໂລກ.
ຄຳເຫັນ
0