ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນທີ່ທ່ານສີຈິ້ນຜິງຫາກໍ່ໄປດຳລົງຕຳແໜ່ງເປັນເລຂາຄະນະພັກເຂດນິງເຕີ, ທ່ານກໍໄດ້ສ້າງພາບປະທັບໃຈອັນເລິກເຊິ່ງທີ່ສຸດໃຫ້ກັບຄົນທັງຫຼາຍຄື: ທ່ານເປັນຄົນທີ່ເປັນກັນເອງແລະເຂົ້າຫາໄດ້ງ່າຍ, ອາຍຸຍັງໜຸ່ມແຕ່ມີຄວາມອຸ່ນອຽນທຸ່ນທ່ຽງ, ແລະ ກໍສາມາດສ້າງຄວາມໃກ້ຊິດສະໜິດສະໜົມກັບຄົນທັນທີພຽງແຕ່ທ່ານເວົ້າບໍ່ເທົ່າໃດຄວາມເທົ່ານັ້ນ. ແຕ່ທ່ານບໍ່ໄດ້ເຮັດແບບຄື “ຄົນບໍ່ຄິດຫງຳ” ທີ່ຂາດຫຼັກການ ເພື່ອສ້າງບັນຍາກາດປອງດອງກັນຢ່າງດຽວແບບຫຼັບຫູຫຼັບຕາ, ເມື່ອພົບພໍ້ບັນຫາທີ່ເປັນຫຼັກການ, ພົບບັນຫາທີ່ລະເມີດຜົນປະໂຫຍດຂອງປະຊາຊົນ, ທ່ານກໍມີຂໍ້ຮຽກຮ້ອງທີ່ເຂັ້ມງວດຕໍ່ພະນັກງານ. ໃນນີ້ ຕົວຢ່າງທີ່ໂດດເດັ່ນຢ່າງໜຶ່ງກໍຄື: ທ່ານສີຈິ້ນຜິງໄດ້ກວດກາຢ່າງເຖິງຖອງກ່ຽວກັບບັນຫາທີ່ພະນັກງານຍຶດທີ່ດິນຫຼວງປຸກສ້າງເຮືອນສ່ວນຕົວຢ່າງຜິດລະບຽບການຢູ່ເຂດນິງເຕີ.
ໃນເວລານັ້ນ,ນິງເຕີເປັນເຂດທຸກຍາກຂອງແຂວງຟູຈ້ຽນ, ແຕ່ປາກົດການກ່ຽວກັບພະນັກງານຍຶດທີ່ດິນຫລວງປຸກສ້າງເຮືອນສ່ວນຕົວຢ່າງຜິດລະບຽບການນັ້ນພັດກາຍເປັນບັນຍາກາດລວມໃນທົ່ວສັງຄົມ. ຜູ້ທີ່ກອບໂກຍທີ່ດິນຫຼາຍ ແມ່ນແຕ່ເຮືອນຄົວໜຶ່ງເທົ່ານັ້ນກໍມີເນື້ອທີ່ກວ້າງຂວາງເຖິງ 300 ຕາແມັດ, ຄວາມເປັນຈິງໃນການປຸກສ້າງເຮືອນແມ່ນບໍ່ສອດຄ່ອງກັບສະພາບລາຍຮັບຂອງຜູ້ກ່ຽວແທ້ໆ.
ເດືອນມັງກອນປີ1989, ທ່ານສີຈິ້ນຜິງທີ່ຫາກໍ່ໄປດຳລົງຕຳແໜ່ງເປັນເລຂາຄະນະພັກເຂດນິງເຕີບໍ່ພໍເທົ່າໃດເດືອນກໍໄດ້ເປັນປະທານຈັດກອງປະຊຸມວຽກງານຄະນະພັກເຂດນິງເຕີ ໂດຍໄດ້ຕົກລົງໃຫ້ກຳນົດເອົາວຽກງານກວດກາ ແລະ ລົງວິໄນພະນັກງານທີ່ຍຶດທີ່ດິນປຸກສ້າງຢ່າງຜິດລະບຽບການເປັນຈຸດສຳຄັນຕົ້ນຕໍໃນການດຳເນີນວຽກງານຕ້ານການສໍ້ລາດບັງຫຼວງ.
ພາຍຫຼັງໄດ້ດຳເນີນການສຳຫຼວດ ແລະ ຮັບຮູ້ສະພາບການຢ່າງລະອຽດແລ້ວ, ທ່ານສີຈິ້ນຜິງພົບເຫັນວ່າ ວຽກງານນີ້ໄດ້ປະສົບກັບອຸປະສັກກີດຂວາງຫຼາຍສົມຄວນ. ເພາະວ່າໄດ້ແຕະຕ້ອງເຖິງຜົນປະໂຫຍດຂອງພະນັກງານຫຼາຍພັນຄົນເຊັ່ນ:ການນຳຂັ້ນເມືອງຂຶ້ນໄປເປັນຕົ້ນ. ພະນັກງານບາງຄົນແມ່ນມີຄວາມຫຍຸ້ງຍາກດ້ານເຮືອນຢູ່ແທ້ໆ, ໃນຄອບຄົວໜຶ່ງທີ່ມີຫຼານລຸ້ນຄົນໄດ້ຮ່ວມກັນຢູ່ເຮືອນລວມຫ້ອງດຽວ, ຫາກມີຄຳສັ່ງໃຫ້ສົ່ງເຮືອນສ່ວນຕົວຄືນບາດດຽວ, ເຂົາເຈົ້າກໍຈະຜະເຊີນກັບບັນຫາທີ່ບໍ່ມີບ່ອນຢູ່ອາໄສເຊິ່ງເປັນສິ່ງທີ່ເຂົາເຈົ້າຮັບເອົາບໍ່ໄດ້. ຍັງມີບາງຄົນເວົ້າວ່າ: ທ່ານເລຂາສີບໍ່ທັນກຳແໜ້ນວຽກງານການພັດທະນາເສດຖະກິດ, ຫາກໍ່ຂຶ້ນດຳລົງຕຳ ແໜ່ງກໍປາບປາມປະກົດການຫຍໍ້ທໍ້ເລີຍອັນໄດ້ທຳລາຍຄວາມຫ້າວຫັນໃນການປະຕິບັດວຽກງານຂອງພະນັກງານທັງຫຼາຍ, ຍັງແຕະຕ້ອງເຖິງຜົນປະໂຫຍດຂອງພະນັກງານຈຳນວນຫລາຍ. ແຕ່ທ່ານສີຈິ້ນຜິງຍັງມີທ່າທີຢ່າງເດັດຂາດສະເໝີຕົ້ນສະເໝີປາຍ.
ໃນເດືອນພະຈິກປີ2003,ທ່ານສີຈິ້ນຜິງໃຫ້ສຳພາດຕໍ່ນັກຂ່າວກ່ຽວກັບບັນຫາການກວດກາພະນັກງານຍຶດທີ່ດິນປຸກສ້າງຢ່າງຜິດລະບຽບການຢູ່ເຂດນິງເຕີ
ໃນເວລາທີ່ທ່ານສີຈິ້ນຜິງໃຫ້ສຳພາດຕໍ່ນັກຂ່າວໃນເດືອນພະຈິກປີ2003, ນັກຂ່າວຖາມວ່າ: “ໃນເວລານັ້ນ, ການເຄື່ອນໄຫວວຽກງານໄດ້ແຕະຕ້ອງເຖິງຜົນປະໂຫຍດຂອງພະນັກງານຫຼາຍພັນຄົນ, ຕອນນັ້ນຈະລົງມືເຮັດ ຫລື ບໍ່ເຮັດ, ທ່ານເອງໄດ້ມີການຊັ່ງຊາຫຼືບໍ?” ທ່ານສີຈິ້ນຜິງໄດ້ເລົ່າຄືນວ່າ:
“ຂ້າພະເຈົ້າໄດ້ຖາມຮອງເລຂາພັກຄະນະກວດກາວິໄນທ່ານໜຶ່ງໃນເວລານັ້ນວ່າ: ສະຫາຍຄິດວ່າ ຕອນນີ້ປະຊາຊົນເກີດມີຄວາມບໍ່ພໍໃຈຫຼາຍຫຼືບໍ? ລາວຕອບວ່າຫຼາຍ, ຂ້າພະເຈົ້າຖາມອີກວ່າ ມັນເປັນບັນຫາໃຫຍ່ທີ່ສຸດທີ່ກະທົບເຖິງຄວາມຈູບຈ້າວຫ້າວຫັນຂອງປະຊາຊົນໃນປັດຈຸບັນແມ່ນຫຼືບໍ? ລາວຕອບວ່າແມ່ນ, ຂ້າພະເຈົ້າຖາມຕໍ່ວ່າ: ຄົນພວກເຮົາເກືອບ3ລ້ານຄົນນີ້ສົມຄວນຖືກແຕະຕ້ອງຈິດໃຈ ຫຼື ຄົນສອງສາມພັນຄົນທີ່ເຮັດຜິດເຫຼົ່ານີ້ສົມຄວນຖືກແຕະຕ້ອງຈິດໃຈ? ລາວຕອບວ່າ ແນ່ນອນແລ້ວ ແໜງແຕະຕ້ອງຈິດໃຈຂອງສອງສາມພັນຄົນນັ້ນຈະດີກວ່າ. ຂ້າພະເຈົ້າກໍເວົ້າວ່າ ຊັ້ນເຮົາກໍລົງມືເຮັດທັນທີ, ຄັນເຮັດກໍຕ້ອງເຮັດໃຫ້ສຳເລັດ, ບຸກບືນໄປໜ້າຢ່າງກ້າຫານໂດຍບໍ່ລັ່ງເລໃຈປຽບດັ່ງຍິງລູກສອນອອກໄປແລ້ວຈະບໍ່ຫັກຕ່າວຄືນມາ.
ທ່ານສີຈິນຜິງໄດ້ເວົ້າແບບນີ້ ແລະກໍໄດ້ປະພຶດແບບນີ້ເຊັ່ນດຽວກັນ.
ໃນກອງປະຊຸມວຽກງານຄະນະພັກເຂດນິງເຕີ, ທ່ານໄດ້ມີທ່າທີຢ່າງຈະແຈ້ງວ່າ: “ການຕ້ານການສໍ້ລາດບັງຫຼວງໃຫ້ເນັ້ນທີ່ການປົກຄອງຢ່າງປອດໃສຂາວສະອາດ, ພວກເຮົາບໍ່ມີທາງເລືອກອື່ນ. ການສວຍໃຊ້ສິດຕຳແໜ່ງຍຶດເອົາເນື້ອທີ່ດິນສ່ວນລວມເພື່ອມາປຸກສ້າງເຮືອນສ່ວນຕົວ, ຖ້າເຮັດແນວນີ້ຈະສ້າງສັດທາໃຫ້ກັບປະຊາຊົນນິງເຕີຈຳນວນ2.700.000 ຄົນໄດ້ແນວໃດ? ການຕ້ານການສໍ້ລາດບັງຫຼວງແນ່ນອນຕ້ອງພົວພັນເຖິງຜູ້ໃດຜູ້ໜຶ່ງ, ຖ້າພວກເຮົາສູນເສຍຫຼັກການຍ້ອນຜູ້ໃດຜູ້ໜຶ່ງ,ພວກເຮົາກໍຈະສູນເສຍສັດທາທີ່ມີຕໍ່ຄົນຫຼາຍລ້ານຄົນ.”
ໂດຍແນໃສ່ກໍລະນີທີ່ພະນັກງານຈຳນວນໜຶ່ງມີຄວາມຮັບຮູ້ທີ່ຜິດພາດຕ່າງໆເຊັ່ນ: ມີຄວາມໜັກໃຈ, ຢ້ານແຕະຕ້ອງຈິດໃຈຄົນອື່ນແລະອື່ນໆ, ທ່ານສີຈິ້ນຜິງຍັງໄດ້ຊີ້ໃຫ້ເຫັນຢ່າງມີຈຸດສຸມວ່າ: “ທີ່ນີ້ມີບັນຫາໜຶ່ງຄື ແມ່ນໃຜແຕະຕ້ອງໃຜ, ຫາກເຮົາຍຶດທີ່ດິນປຸກສ້າງຢ່າງຜິດລະບຽບວິໄນແລະກົດໝາຍ, ທຳລາຍອິດທິພົນແລະພາບພົດຂອງພັກຍ້ອນຜົນປະໂຫຍດສ່ວນຕົວ, ກໍແມ່ນເຮົາເອງໄດ້ແຕະຕ້ອງຈິດໃຈຂອງພັກ, ແຕະຕ້ອງຈິດໃຈປະຊາຊົນ, ແຕະຕ້ອງລະບຽບວິໄນພັກແລະກົດໝາຍຂອງລັດ, ແຕ່ບໍ່ແມ່ນພະນັກງານທີ່ເປັນຕົວແທນໃຫ້ແກ່ຜົນປະໂຫຍດຂອງພັກແລະ ປະຊາຊົນທີ່ໄປເຮັດວຽກກວດກາ ແລະ ລົງວິໄນນັ້ນໄດ້ແຕະຕ້ອງຈິດໃຈເຮົາ.”
ຄຳເວົ້າທີ່ມີຈຸດຢືນ ແລະ ທ່າທີ ຢ່າງຈະແຈ້ງເຫຼົ່ານີ້ຂອງທ່ານສີຈິ້ນຜິງໄດ້ໃຫ້ກຳລັງໃຈຢ່າງໃຫຍ່ຫຼວງແກ່ພະນັກງານແລະປະຊາຊົນທົ່ວເຂດນິງເຕີ ທັງໄດ້ຊຸກຍູ້ໃຫ້ຂະບວນການຕໍ່ສູ້ຕ້ານກັບການສໍ້ລາດບັງຫຼວງຄັ້ງນັ້ນໄດ້ກ້າວເຂົ້າສູ່ລວງເລິກ.
ຜ່ານຈາກຄວາມພະຍາຍາມມາເປັນເວລາປີປາຍ, ເຂດນິງເຕີໄດ້ກວດກາແລະລົງວິໄນພະນັກງານ 7.392 ຄົນທີ່ໄດ້ຍຶດເອົາທີ່ດິນຫຼວງປຸກສ້າງເຮືອນສ່ວນຕົວຢ່າງຜິດລະບຽບວິໄນແລະກົດໝາຍ. ນອກຈາກນີ້, ໜ່ວຍກວດສອບການປຸກສ້າງເຮືອນຂອງບັນດາເມືອງໃນເຂດນິງເຕີຍັງໄດ້ດຳເນີນການສຳຫຼວດຢ່າງຮອບດ້ານຕໍ່ການຍຶດເອົາທີ່ດິນຫຼວງປຸກສ້າງເຮືອນສ່ວນຕົວໃນທົ່ວເຂດນິງເຕີນັບແຕ່ປີ1982ເປັນຕົ້ນມາ, ຈົດທະບຽນໃຫ້ຄົບຖ້ວນ, ທັງເປີດເຜີຍຄວາມຈິງຕໍ່ສົງຄົມກ່ຽວກັບບັນຫາຕ່າງໆເຊັ່ນ:ເນື້ອທີ່ກໍ່ສ້າງເຮືອນ, ຂັ້ນຕອນການພິຈາລະນາການຂໍອະນຸຍາດການປຸກສ້າງ,ຖານະເສດຖະກິດຂອງຄອບຄົວຜູ້ປຸກສ້າງເຮືອນແລະອື່ນໆ ເພື່ອໃຫ້ປະຊາຊົນຕິດຕາມກວດກາ ແລະ ລາຍງານບັນຫາທີ່ກ່ຽວຂ້ອງ.
ໃນເວລາຊຸກຍູ້ການປະຕິບັດວຽກງານທີ່ໄດ້ພົບພໍ້ອຸປະສັກກີດຂວາງຫຼາຍຢ່າງ, ພະນັກງານທ້ອງຖິ່ນມີຄວາມບໍ່ພໍໃຈທ່ານສີຈິ້ນຜິງຫຼືບໍ? ໃນເວລາໃຫ້ສຳພາດຕໍ່ນັກຂ່າວໃນເດືອນພະຈິກປີ2003, ທ່ານສີຈິ້ນຜິງໄດ້ຕອບວ່າ: “ເຂົາເຈົ້າບໍ່ໄດ້ມີຄວາມບໍ່ພໍໃຈຕໍ່ຂ້າພະເຈົ້າ, ຕອນຂ້າພະເຈົ້າລາຈາກໄປ,ເຂົາເຈົ້າຍັງເສຍດາຍຫຼາຍ, ເພາະເຂົາເຈົ້າເຫັນວ່າ ສິ່ງທີ່ຂ້າພະເຈົ້າເຮັດນັ້ນບໍ່ແມ່ນເພື່ອຜົນປະໂຫຍດຕົນເອງ, ຂ້າພະເຈົ້າເວລາໃດກໍບໍ່ເຄີຍມີຄວາມຄຽດແຄ້ນກັບເຂົາເຈົ້າ, ພຽງແຕ່ຢາກເນັ້ນໃຫ້ເຫັນຄວາມຍຸຕິທຳເທົ່ານັ້ນ, ພະນັກງານພວກເຮົາຢ່າສູ່ໄປທຳລາຍຜົນປະໂຫຍດຂອງປະຊາຊົນ.”
ວຽກງານການແກ້ໄຂບັນຫາກ່ຽວກັບພະນັກງານຍຶດທີ່ດິນຫຼວງປຸກສ້າງເຮືອນສ່ວນຕົວຢ່າງຜິດລະບຽບການຢູ່ເຂດນິງເຕີໃນທີ່ສຸດກໍສາມາດແກ້ໄຂໄດ້ຢ່າງມີປະສິດທິຜົນອັນພົ້ນເດັ່ນ, ແບບແຜນຂອງພັກ ແລະ ແບບແຜນບໍລິຫານງານຂອງທ້ອງຖິ່ນແຫ່ງນີ້ກໍໄດ້ເກີດມີການປ່ຽນແປງໃໝ່. ໃຜໆກໍຍອມຮັບວ່າ: ທ່ານເລຂາສີມີສາຍຕາແຫຼມຄົມໃນການເບິ່ງບັນຫາ, ມີຈິດໃຈອັນເດັດດ່ຽວໜຽວແໜ້ນ, ບໍ່ພຽງແຕ່ເທົ່ານັ້ນ, ບໍ່ວ່າຈະແມ່ນດ້ານລະບຽບວິໄນແລະກົດໝາຍ, ທ່ານກໍໃຊ້ຄວາມຈິງໃຈອະທິບາຍເພື່ອໃຫ້ພະນັກງານທັງຫຼາຍຍອມຮັບໂດຍດີ, ການກະທຳຂອງທ່ານໄດ້ສ້າງພາບພົດແລະອິດທິພົນໃຫ້ກັບສະມາຊິກພັກ-ພະນັກງານເຂດນິງເຕີຢ່າງໜັກແໜ້ນກວ່າເກົ່າ.
ທ່ານເສີນເຈິ່ງກວ່າງ ຮອງເລຂາຄະນະພັກເຂດນິງເຕີໃນເວລານັ້ນຍັງຈື່ໄດ້ວ່າ:ຕອນນັ້ນທ່ານສີຈິ້ນຜິງໄດ້ມີສຳນວນທີ່ມີຊື່ສຽງວ່າ “ເມື່ອເປັນພະນັກງານການນຳກໍຢ່າສູ່ຫວັງຢາກລ້ຳລວຍ, ຄັນຢາກລ້ຳລວຍກໍຄວນເລືອກໄປເຮັດວຽກອື່ນ, ຫາກເຮົາເປັນການນຳແລ້ວກໍຕ້ອງເຮັດຕາມມາດຕະຖານ ແລະ ຂໍ້ຮຽກຮ້ອງສຳລັບການນຳ.” ຈົນມາເຖິງປັດຈຸບັນ, ສຳນວນດັ່ງກ່າວນີ້ຍັງຖືກເຜີຍແຜ່ໃນວົງການການເມືອງຂອງຈີນຢູ່.
ຄຳເຫັນ
0